Delphine, atudi batemune mu mwisambo ubashale, badi apusha’shi twinyongoshi atumutakula bwadya kwikala atomo maalwa akile bungi. Bible ta mupele kutoma maalwa mu mushindo upwandikile nya, anka akula’shi: “Tokungilanga ba ntomi.” (Nkindji 23:20) Kutoma kwa maalwa akile bungi akwibweshaa mikumbo ibungi mu mbidi, kulwisha kipwano na bantu. Bantu midiyo na midiyo bakwete kufwa lufu lwa bukidi ku kipwa kyooso pa mwanda wa kutoma kwa maalwa kukilekile. Ino nkalakashi yoso bantu mbalombene kwiyisuuka su balonda elango dya binangu dya mu Bible.

Delphine badi mwiditumikile. Binobino akula’shi: “Nafikile mu kumona’shi maalwa ta ngalombene kupudisha twinyongoshi twande nya. Nadi mutumikile elango dya binangu di mu Beena-Fidipe 4:6, 7, adyamba’shi: ‘Tanwikalanga eshimba kwiyilu pa kintu su nkimune, anka . . . uukishayi Efile Mukulu nkalo yeenu.’ Nsaa yoso inadi napusha twinyongoshi na binangu bibubi abinfikila bufuku, nadi nakitshi luteko kwi Yehowa. Nadi namulungula byampusha, mpa na nsungu yande, myanda ayinkalakasha, myanda ayishimisha lukulupilo lwande, na kumusendeela bwa’shi ankwashe bwandya kupeta mushindo wa kwikala na binangu bibuwa. Kunakashika, nadi namono’shi bino binangu byoso bibubi byangikalanga nabyo bibankatuka. Kyubishi kya kuteka Yehowa bwa’shi ankwashe bwandya kwikala na binangu bibuwa kibankwashishe bwandya kutuula binangu byande ku bintu binadi nabyo, pamutwe pa kwibituula ku bintu byanshi nabyo. Nadi mwate kitshibilo kya kupela kutoma dingi maalwa. Mwanda butaale bunadi mupete bubadi na muulo ngofu, ntshinadi nakumina kwibushimisha nya.”

Myanda i butete ikwete kwibwesha twinyongoshi na makyenga mwi bantu. Anka mayi a kulonda a mu Bible ngalombene kwitukwasha bwatudya kusuuka ino myanda pa kuleka kukita myanda ilombene nketufisha ku lusandji​—bu kileshesho, kukisha nsaa ibungi na muntu shi mulume sunga shi mukashi oobe na kubandjila pornografi. Ungi nsongwalume abetanyinaa bu Samuel akula’shi: “Kukisha nsaa ikile bungi na muntu shi mukashi’ande kubadi kubofule. Ingi nsaa ntshinadi na lukalo lwa kumwibakila, anka nadi mulombene kumulungula’shi, ansangasha​—bino bibadi abitutakula bwa’shi twakishanga nsaa ibungi pamune.” Samuel bamwene’shi bantu bakwete kumuteula misusa ibungi’shi kwete kukisha nsaa ibungi na bana bakashi—​mpa na pabadi te na lukalo lwa kukisha nabo nsaa ibungi pamune—​ngi bwakinyi baukile kwata kitshibilo kya kutungunuka na kukisha nsaa pamune na bana bakashi. Anka kino kyubishi kibadi akimukalakasha ngofu. Binobino akula’shi, “bino bibadi na bukitshishi bwi bubi kwandi, mwanda abitamisha mwandi binangu bya kwifula nka’mi nabene.”

Samuel badi mubadikye ungi mwisambo utale ba nsongwa wabadi batuushe mu site a Internete a jw.org. Kunyima badi munangushene pa mukanda wa Nkindji 20:11, awakula’shi: “Abaukaa bi eyikashi dya mwana ku bikitshino byaye, su bibuwa na bilulame.” Ano mayi abamukwashishe naminyi? Samuel badi mushinguule’shi kyubishi kyaye kya kukisha nsaa ibungi pamune na bantu bashi bakashi baye, taki buwa na tankilulame nya. Binobino akula’shi: “Ne mufikye mu kuuka dingi’shi nsongwa kwete kukisha nsaa ibungi pamune na muntu shi mulume sunga shi mukashi’aye kwete kutamisha ngikashi ayikamwikasha bu mulume sunga mukashi ebubi nsaa yakatwele mu eyibakishi. Nadi mubangye kunangushena bilombene kupusha mukashi ankebakila nsaa yamono nkwete kukisha nsaa ibungi pamune na ungi mwana mukashi. Bino bibankwashishe bwa kuuka’shi kino kyubishi nkilombene nkampetesha nkalakashi ibungi. Sunga byekala’shi kukita bino nkubofule, bino tabilesha’shi kukita bino kwibuwa nya.” Samuel badi mushintulukye. Kupela kukisha nsaa ibungi pamune na muntu shi mukashi’aaye kubamukwashishe bwadya kusuuka myanda ibutete.

Antonio badi akitshi mwanda ubadi aumutuulu mu masaku a kutambuka lusandji: Badi na kyubishi kya kubandjila pornografi. Sunga mbibadi mwibakile mukashi abaadi mufule ngofu, badi mupone mu kubandjilanga pornografi misusa na misusa. Akula’shi kunangushena ku mayi e mu 1 Mpyeele 5:8, kubamukwashishe binyibinyi. Uno verse akula’shi: ‘Ikalayi bapasukye, buulayi meeso! Mwanda mwishikwanyi neenu, winyi Kafilefile akindakana koosokooso bu ntambwe e bukyelo kwete kukimba adya kudya.’ Antonio akula’shi: “Mu uno ndumbulwilo atudi, bifwatulo bya pornografi mbitwifunyishe mu ma mbalo oso, na bino bifwatulo mbilombene kushala bilamate mu binangu byetu. Uno verse badi munkwashe bwandya kunangushena akufiki bino bitompwanga. Nadi mulongye bwandya kutentekyeshanga bukidi bukidi’shi bino bifwatulo bya pornografi abifiki kwi Diabulu. Binobino nauku’shi nka penda Yehowa ngi mulombne kunkwasha bwandya ‘kwikala mupasukye, na mubuule meeso’ bwandya kumona bya kulwa na kukambila ino myanda ilombene kulwisha binangu byande, eshimba na eyibakishi dyande.” Antonio badi mupete bukwashi bubadi nabo lukalo, na mmupwe kuleka kyubishi kyaye kibubi takudi mafuku ebungi. Bino mbimukwashe bwadya kusuuka nkalakashi ibukopo.

Abimweneka kalolo’shi, Bible etupa malango ebuwa alombene kwitukwasha bwatudya kusuuka myanda ibukopo. Kadi twi kwakula naminyi bwa myanda ipwe kumena mishi mwatudi na ikwete kushinama? Tubandeyi kutala mushindo ulombene kwitukwasha Eyi dy’Efile Mukulu bwatudya kupudisha ino myanda.