Rosie akula’shi: “Nadi mukambilwe na twinyongoshi pa mwanda wa kunangushena’shi myanda ayikalwila ngofu sunga kunangushena ku myanda ibubi.” Ma verse kinyi a mu Bible abadi amukwashe? Umune a ku anka Mateo 6:34: “Tanwikalanga na katshim’a-munda bwa malooba: malooba e na aayo nkalakashi. Efuku dyooso di na yaadyo mpombo.” Rosie akula binobino’shi, ano mayi a Yesu abadi amukwashe bwadya kuleka kwikalakasha bwa myanda ilombene kukitshika malooba. Alombasha’shi, “Nadi nekalakasha nka bwa myanda inadi nayo mu dyadya efuku, kushi kutenteka twinyongoshi twa myanda ishabandile kukitshika pangi ishi’ayikitshika.”

Yasmine namu bapushishe’shi twinyongoshi tukwete kwenda na kumukambila. Akula’shi: “Nadi nadidi munda mwa mafuku abidi ku lubingo, na mu angi mafuku ntshinadi napusha tulo nya. Nadi napusha binangu bibubi bikwete kundya ami atala.” Verse kinyi bamukwashishe? Atemuna 1 Mpyeele 5:7: ‘Lubwilayi [Efile Mukulu] mpombo yenu yooso, mwanda aye kwete kwinulama.’ Yasmine akula’shi: “Mu kukila kwa mafuku, nadi neele nteko kwi Yehowa, aye namu badi angalula ku nteko yande. Nadi mupushe nka bu abankatusha kiita ki bushito akikalanga ku mapampa kwande. Binangu bibubi abinfikilaa nsaa na nsaa, anka binobino nauku bya kwibikambila.”

Ungi nsongwakashi abetanyinaa bu Isabella akula’shi: “Namono’shi kulongyelalongyela kwa myanda kwi lwambu mwanda na nshami badi nako. Nakutwaa kukita myanda i na muulo, nashalanga bisumanga​—penda bwa kwikisha na kubandila televizion. Nkyubishi kibubi mwanda akikaamisha twinyongoshi na akikutshishwa muntu bwadya kufuba kalolo.” Eyi dya kulonda dibamukwashishe di mu mukanda wa 2 Timote 2:15, awamba’shi: “Kita bukopo bwa kwileesha kumpala kw’Efile Mukulu bu muntu mupwidikye, mwina mufubo shi na kya kupusha buufu.” Isabella akula’shi, “Ntshinadi nakumina’shi Yehowa apushe mufubo wande buufu nka pa mwanda wa kulongyelalongyela kwande kwa myanda nya.” Mmushintulukye ngofu.

Mu mushindo umune, Kelsey akula’shi: “Nadi mulombene kwikala na mudimo wa kukita mu nsaa itshibibwe, kadi nalongyela bwa kwiukita kunyima ako kubashala sekonde ipeela. Nadi nadidi bwa uno mwanda, kukutwa kupeta tulo, na kwikala na twinyongoshi. Bino tabibadi abingikasha bibuwa nya.” Kelsey bapetele bukwashi mu mukanda wa Nkindji 13:16, awamba’shi: “Muntu ooso mupasukye akitaa mwanda na binangu, mupatakane aleshaa kupatakana kwaye patooka.” Alesha bukwashi bubapetele pa kunangushena ku uno verse’shi: “Kwata mpàngo ya kukita mwanda kumpala na kwiukita mu nsaa itshibibwe nkulesha kwa binangu. Binobino ne na esaki dyanfundaa mifubo yoso ayitungu’shi nkite kumpala, na bino abinkwashaa bwa kwilumbuula kumpala, kushi kulekyela midimo bwa kwiyikita ako kubashala minite ipeela.”

Kirsten abwela’shi: “Mulume ande badi mutshibe eyibakishe dyetu, andeka na bana bananka.” Eyi kinyi dya kulonda dya mu Bifundwe dibadi dimukwashe? Nkindji 17:17, (EEM) amba’shi: “Kuuku a binyibinyi aleshaa kifulo mafuku ooso, [nyi] mukwabo na muntu e kwanka bwa kumukwasha mu bishotshi.” Kirsten bakimbile bukwashi kwi bangi bantu abafubila Yehowa mu kakongye. Bapetele kinyi? Akula’shi: “Balole bande abadi bankwashe mu mishindo ibungi! Bamo babadi abandekyela bya kudya na bilongo pa kibelo. Kisaka kya bantu kibafikile mu kunkwasha ami na bana bande misusa isatu bwatudya kukatuka mu nshibo ibatudi bashale bwa kwenda mu ingi. Ungi muntu badi munkwashe bwa kupeta mudimo. Balole bande babadi nka panka bwa kunkwasha.”

Delphine, atudi bateemune ku mbangilo, badi mulwe bwa kukambila binangu bya kwipusha bu e bupenka. Anangushena kunyima kwa’ye kushimisha bintu bibungi’shi: “Nadi namono bangi bantu mbashale boso pamune anka ami ne nka bupenka shi na muloo. Nadi nepusha bupenka.” Verse badi mumukwashe nyi Misambo 68:6, amba’shi: “[Efile Mukulu] apeyâ baba be bupenka mashibo a kushâla.” Apatuula’shi: “Nadi nauku’shi uno verse takwila nka penda nshibo ayimweneka na meeso nya. Anka nafikile mu kushinguula’shi Efile Mukulu etupa nshibo ya mu kikudi, mbalo yatwipusha mu kwiyikeela kwa binyibinyi kwatupete ku bukwashi bwa kwipushena kwa binyibinyi na kipwano ki pankatshi pa bantu bafule Yehowa. Anka nadi nauku’shi kumpala kwandya kwifubwila peepi na bangi bantu, abitungu mbande kwifubwila pepi na Yehowa. Ngi bwakinyi mayi e mu Misambo 37:4, abankwashishe, aamba’shi: ‘Kimba muloo oobe mwi Yehowa, aye namu akakupa byabya byodi nabyo lukalo mwishimba dyobe.’”

Afudisha’shi: “Namwene’shi abitungu ngikale mulamate kwi Yehowa ngofu. Aye ngi muntu e buwa kukila bantu boso. Kunyima nafundile mulongo wa myanda ibadi ayitungu’shi nkite bwa kusanka pamune na bangi, bwa’shi mmone bya kwikala mu kipwano na bantu bafule Yehowa. Nalongyele bya kumona myanda ibuwa i mwi bangi na kwibakitshina myanda na kwilwankana bilubilo byabo.”

Byabya, bakuuku na balole betu bakwete kufubila Efile Mukulu baki bantu bakutwe kupwidika. Ba Temwe ba Yehowa bakwete kwikitshisha bwa kukambila myanda nka bu bangi bantu boso. Anka malongyesha a mu Bible akwete kutakula bantu bwabadya kukumina kukwasha bangi nsaa yoso yakudi mushindo. Bibuwa kwikala na ba kuuku be bino. Byabya, mayi a kulonda a mu Bible ngalombene kukwasha bantu be na myanda ishi ilombene kupwa mu ano mafuku atudi, bu mikumbo ishi’ayipu na kinyongwa su?