BWA BEYIBAKISHENE
3: Kanemo
AKALESHA KINYI
Mulume na mukashi abeleshena kanemo abekumbushenaa, sunga bekutwena ku mwanda kampanda. Mukanda umune (Ten Lessons to Transform Your Marriage) awamba shi: “Mulume na mukashi be byabya tabekalaa bashinkamane penda muntu na muntu mu kyakumiina nya. Anka abatungunuka na kwisambanga pabitale myanda ayifwisha kwikutwena. Muntu ooso atemesha mwinaye na kanemo na kukimba bya kushintuula eshimba bwa kwipushena.”
EYI DYA KULONDA DYA MU BIBLE: “Kifulo . . . takikimbaa penda buwa bwakyo nya.”—1 Bena-Kodinda 13:4, 5.
“Kulesha mukashi ande kanemo nyi nkulesha shi nasangala naaye na kumwata na muulo na napele kukita kintu kyooso kilombeene kumulwishisha sunga kulwisha bulunda bwetu.”—Micah.
BWAKINYI KE NA MUULO
Su takwi kanemo, mwisambo munkatshi mwa mulume na mukashi akwikala nsaa yooso kwitopekyeshena, kwiyakushena bibi, na ingi nsaa kulee tuleo—ngikashi yabadi baleshe kwi bafundji shi ayibadiila kutshiba kwa dibaka.
“Kwakula bibi, kubepuula, sunga miseku ibubi pabitale mukashi oobe akumukutshisha kukutudila eshimba na kwi kulwisha dibaka dyenu.”—Brian.
KYODY’A KUKITA
ETALUULE OBE NABEENE
Taluula miisambo na bikitshino byoobe munda mwa lubingo. Akupu weyipushe shi:
‘Misango bungi kinyi yandi mutopekye mulunda ande, na misango bungi kinyi yandi mumutumbule?’
‘Nkinyi kyandi mukite bwa kulesha mulunda ande kanemo?’
ESAMBE NA MWINA DIBAKA NOOBE
Myanda kinyi ya kukita sunga kwakula ikumbeene ooso a kwanudi amone shi apebwa kanemo?
Myanda kinyi yanukitshi sunga kwakula ayilesha ooso a kwanudi shi tapebwa kanemo?
BINANGU
Funda liste a mishindo isatu yokumiina shi mulunda oobe akuleshe kanemo. Lungula mulunda oobe namu akite byabya. Eshintusheneyi ma liste, na tumikayi bwa kwileshena kalolo mu ino mishindo ibanufundu.
Kita liste a ngikashi yoodi mufule ngofu kwi mulunda oobe. Akupu olungule mulunda oobe mushindo oodi mufule ino ngikashi.
“Kulesha mulume ande kanemo nyi nkulesha mu bikitshino byande shi namwata na muulo na nakumiina shi ekale na muloo. Ta mbibofule kulesha nsaa yooso nya, ingi nsaa myanda ipeela ibungi ngilombeene kulesha kanemo k’eyendo.”—Megan.
Ku nfudiilo, ta mbitale penda shi obe omonaa shi onemaka mulunda oobe nya; nyi mbitale su mulunda oobe apusha shi okwete kumupa kanemo.
EYI DYA KULONDA DYA MU BIBLE: “Ikalai bafwale lusa lukata na bumuntu na kwipêlesha na kupopêla mpa na lwishinko.”—Bena-Kolose 3:12.
