BWA BEYIBAKISHENE
2: Kukita myanda pamune
AKULESHA KINYI
Pabakitshi myanda pamune, mulume na mukashi be bu muntu atambushaa ndekye na mukwashi aaye abatambusha na plan umune. Sunga kwatuuka nkalakashi, ooso a kwabadi anangushena penda shi “atwe” kushi’ shi “ami.”
EYI DYA KULONDA DYA MU BIBLE: “Ta bakí bu babidinyi, ooo, tábadi bu muntu umune.”—Mateo 19:6, EEM.
“Dibaka ta mwanda wa muntu umune nyaa. Mulume na mukashi abitungu bakite myanda pamune bwa kobesha.”—Christopher.
BWAKINYI KWI NA MUULO
Apatuuku kwikutwena, mukashi na mulume bashi abakitshi myanda pamune abekala abelwishena ngoshi, pamutwe pa kulwa na mwanda ubatuuku. Myanda ipeela ayitama ifikye nkalakashi ikata.
“Kukita myanda pamune nyi kukite dibaka. Su ami na mulume ande tatufubu pamune atwikala bu beena nshibo imune, kushi bu beena dibaka—bu bantu babidi bashale nshibo imune kadi bashi abafubu pamune bwa kwata bitshibilo bikata.”—Alexandra.
KYODY’A KUKITA
ETALUULE OBE NABEENE
Namonaa shi makuta andi nao “ooso ngande”?
Bwa kukisha nsaa kalolo, nekalaa na lukalo lwa kwikala kula na mulunda ande?
Nekalaa kula na bakwabo na mulunda ande, sunga aye akala pepi nabo ngofu?
ESAMBE NA MWINA DIBAKA NOOBE
Myanda kinyi itale dibaka dyetu yatukitaa pamune?
Myanda kinyi ayitungu kulongamisha?
Myanda kinyi yatudya kukita bwashi twikale atukitshi myanda pamune?
BINANGU
Banda kupwandjikisha shi anwasha tennis na umune a kwanudi e mu kisaka ki luno lupese anka mungi e mu kisaka ki ku lungi lupese. Pamutwe pa byabya, nkinyi kyodi mulombeene kukita bwashi wende ku lupese lwi mulunda oobe bwashi nwikale mu kisaka kimune?
Pamutwe pa kwela binangu shi, ‘Mushindo kinyi wandia kutshokola?’ elayi binangu shi ‘Mushindo kinyi watudia kutshokola atwe booso?’
“Lekaayi kukimba nnanyi bakitshi biya na nnanyi bakitshi bibi. Byabya tabi na muulo kukila kwikala na butaale na buumune mu dibaka dyenu nya.”—Ethan.
EYI DYA KULONDA DYA MU BIBLE: “Muntu takimbanga’nka penda buwa bwê nabêne, ooo akimbe namu bwa bangi.”—Bena-Fidipe 2:3, 4, EEM.
