Kwisamba akwikala buwa nsaa yanwisamba na bana na kwilungushena myanda mpa na kwileshena byanupusha ku mashimba.

Kwisamba kwi kwikala bukopo na bana abesesela ku bunsongwa. Mukanda umune (Breaking the Code) awamba shi mu mafuku ashale, “bibaadi nka bu’shi boodi na matalwa a kutwela mu tudimbo amwilumbuula bana boobe bwa kukita teatre. Binobino kyoodi mulombeene kukulupila nyi nkushaala mbalo ishale bantu ababandjila, na pangi tayikala sunga mbalo ibuwa nya.” Kukasha byabimweneka, bino abikitshika mu mafuku aatungu shi bana bekale abesamba ngofu na baledi!

Kimba nsaa ilombane bwa mwana. Kita byabya sunga abitungu kwisamba nsaa ikile-bufuku.

“We kupusha bu’be amba shi, ‘Binobino okumiina twisambe? Nekalanga noobe efuku dishima!’ Kadi mushindo kinyi watudi balombeene kwidila su bana abakumiina kwisamba neetu? Kino ta nyi akikimbi muledi ooso?”​—Lisa.

“Ne mukumiine kulaala tulo, kadi misusa yandi mwisambe na bansongwa bande kalolo bibaadi kunyima kwa munkatshi mwa bufuku.”​—Herbert.

EYI DYA KULONDA DYA MU BIBLE: “Muntu takimbanga buwa bwaye’ye nabene, anka akimbe bwa mungi.”​—1 Bena-Kodinda 10:24, Kilombeno kipya 2014.

Kambila kutuma kwa binangu kungi. Nshe bana umune amba shi: “Ingi nsaa abinfwilaa shi natumu binangu ku myanda ibungi nsaa ikwete bana kwakula. Mbalombeene kwamba shi nta nebapushisha nya!”

Su okita bino, funga TV na tungi twamo tooso. Tuula binangu ku akisamba mwana oobe, na tala mwanda waaye bu wi na muulo, sunga wekala aumweneka bu ushi ukambe na kya nsongo.

“Abitungu tuleshe bana betu shi byabapusha ku mashimba bi na muulo ukata kwatudi. Su tabapusha byabya, abakyebe kulama byabapusha mu mashimba sunga kukimba bukwashi ingi mbalo.”​—Maranda.

“Totombokanga, su mwana obe balesha binangu bishi mwishinda.”​—Anthony.

EYI DYA KULONDA DYA MU BIBLE: “Dimukayi muyiile kipaso kianuteemesha.”​—Luka 8:18, Kilombeno kipya 2014.

Tumika mpa na nsaa ya kukisha kapapi na ingi mbalo. Ingi nsaa abekala na muloo wa kwakula byabadi nabyo mwishimba su ta mbashale abetalena na muledi.

“Atukumiina kwisamba patudi mu motoka. Patudi bashale ku mbwipi pamutwe pa kwitalena, atwisambaa kalolo.”​—Nicole.

Nsaa ya kudia nsaa ikile buwa ya kwisamba myanda ilekenelekene.

“Nsaa ya kudia ku kyolwa, ooso a kwatudi alondaa myanda ibubi na ibuwa ibamufwila mu dyadya efuku. Kukita byabya akwitubungu na kwitulesha shi muntu ooso te na kya kukambila nkalakashi aye nabeene nya.”​—Robin.

EYI DYA KULONDA DYA MU BIBLE: “Ikala na bukidi bwa kupusha, kushiii bukidi bwa nsungu.”​—Shake 1:19, Kilombeno kipya 2014.