BWA BALEDI
7: Ngikashi ya muulo
AYILESHA KINYI
Ngikashi ya muulo ngisangishe miiya yosangula obe nabeene kwiyelela mu nshalelo oobe. Bu kileshesho, wetatshishaa bwa kwikala mululame mu myanda yooso? Byabya pangi akumiina shi bana boobe bekale n’abo namu na uno mwikeelo.
Ngikashi ya muulo ngisangishe na miiya itale kululama mu nshalelo na bantu. Bu kileshesho, muntu sha kuno kululama ekala akitshi bintu bilongame, bilulame, na ata bangi na muulo—ngikashi ayitungu kwikala nayo kubanga bukinga
EYI DYA KULONDA DYA MU BIBLE: “Su olambukisha mwana mwikêlo wi buwa pa ki mukinga, byabya, akekala n’ao mpâ na ku bununu bwê.”—Nkindji 22:6, EEM.
BWAKINYI I NA MUULO
Mu kino kipungo kya teknoloji, abitungu kwikala na ngikashi ya muulo itale mwikeelo. Nyina bana umune atwitanyina bu Karyn amba shi: “Myanda ibubi ngikumbeene kufumankanwa nayo ku twamo tooso na mbalo yooso. Bana betu mbalombeene kwikala bashale mbwipi mwetu, aku bakwete kutala myanda i butete!”
EYI DYA KULONDA DYA MU BIBLE: “Bakulu, . . . be na kiûkilo kya bi buwa na bi bubi, mwanda mbaubîle kwibitundula.”—Bena-Ebelu 5:14, EEM.
Ngikashi ya muulo itale bya kwikala na bantu i na muulo ukata. Ino ngisangishe ngakwilo a kanemo (bu kileshesho “mpe namu” na “ bofwambuka”) na kulesha kwitatshisha bwa bangi—eyikashi dya muulo dikwete kushimina, mwanda bantu abatuulu binangu byabo penda ku twamo pamutwe pa kwikalakasha bwa bantu.
EYI DYA KULONDA DYA MU BIBLE: “Na biabia bianukyebe’shi bantu benukite, anwe namu ebakiteyi bianka pamune.”—Luka 6:31, Kilombeno kipya 2014.
KYODY’A KUKITA
Lesha myanda itale mwikeelo yoodi mukumiine. Bu kileshesho, bafundji mbaleshe shi bansongwa bebungi mbalombeene kupela kusangisha mbidi kumpala kwa dibaka su abaadi bebalungule patooka shi uno mmwikeelo wi bubi.
KINANGU: Su kubakitshika mwanda kampanda, kukidila ku uno mwanda esambeyi pabitale ngikashi ya muulo. Bu kileshesho, su ku bisaashi abesamba pabitale buntomboshi, we kwamba shi: “Mwanda wi moo kumona mushindo wi bantu abashikwa bangi. Opwandjikisha shi bantu mbafikye mu kwikala bino mushindo kinyi?”
“Bi bukopo bwashi bana basangule pankatshi pa biya na bibi su tabauku kiya na kibi.”—Brandon.
Longyesha ngikashi ya muulo itale bya kwikala na bantu. Mpa na mwana kyalala mmulombeene kulonga bya kwamba shi “mpe namu” na “bofwambuka” na kulesha shi ata bangi na muulo. Mukanda umune (Parenting Without Borders) awamba shi: “Nsaa i bana abamono shi tabe bupenka, be munkatshi mwa bibumbu—kifuko, kalasa, kartye—abekala abakitshi myanda ilombeene kulesha kalolo kwi bantu booso, kushi penda abo banabeene.
KINANGU: Ope bana boobe midimo ya mu nshibo bwa kwibakwasha balongye bya kufubila bangi.
“Su bana boobe abapete kiubishi kya kukitanga midimo ya mu nshibo binobino, tabibekela bukopo pabekala kwabo abo banabeene. Kwata mashito aabo akwikala kupwe kupeta mbalo mu nshalelo aabo.”—Tara.
