1-2. Buakinyi tui kupusha’shi Yehowa t’alulaa ku nteko yetu?

 “KIMBA mulô ôbe mwi Yehowa, ê namu akakupa byabya byodi n’abyo lukalo mwishimba dyobe.” (Mis. 37:​4, EEM.) Uno mmulayilo wi buwa bukile! Biabia, tui kutengiela’shi Yehowa etupe kioso ki’atumutekie nka musuusa umune su? Buakinyi abitungu tuiyele luno lukonko? Tutaleyi kino kileshesho akilondo. Mukuetu mukashi e bukupi eele nteko bua’shi su akatuele ku kalaasa ka balungudi ba Bufumu. Anka bipua bi bungi bibakidi, kadi ta mbamuitanyine nya. Mukuetu ki nsongua atekie Yehowa bua’shi amupaashe ku mukumbo wi bukopo, buadia kumona mushindo wadia kukita bi bungi mu kakongie anka mukumbo waye t’aupu. Baledi bena Nkidishi abeele luteko bua’shi muana aabo ashaale mu bia binyibinyi. Anka muana baata kitshibilo kia kuleka kufubila Yehowa.

² Pangi noobe namu we mutekie Yehowa kintu kampanda, anka tuekipetele nya. Ku nfudiilo we kuamba’shi Yehowa aluulaa nteko ya bangi bantu yande nya. Pangi we kunangushena’shi we mukite muanda wi bubi. Mukuetu mukashi Janice b baadi mupushe nka bino. Aye na mulume aaye babaadi beele nteko bua lukalo lubaabadi nalo lua kufuba ku Betele, amba’shi: “Naadi mushinkamishe’shi abetuitanyina ku Betele nka binobino.” Anka mieshi ibafuimine yafika bipua,kadi ta mbetanyine uno mulume na mukashi ku Betele. Janice amba’shi: “Naadi mupushe bi bubi, na ntshinaadi nauku kia kukita nya. Naadi muiyipushe kiandi mukite buandia kufiitshisha Yehowa munda. Nemuele nteko i bungi bukile bua’shi nyende ku Betele. Buakinyi ta mualuule ku nteko yande?”

3. Nkinyi ki’atukesambila mu uno muisambo?

³ Ingi nsaa tui kuiyipusha su Yehowa kuete ateemesha nteko  yetu. Bangi bantu baasha lulanmato ba kala, babaadi beyipushe nabo nka uno muanda umune. (Yob. 30:20; Mis. 22:2; Aba. 1:2) Nkinyi kilombene nkushinkamiisha’shi Yehowa aluulaa ku nteko yobe? (Mis. 65:2) Bua nkukuasha bua kualuula luno lukonko, kia kumpala abitungu tualuule ino nkonko ayilondo: (1) Nkinyi kiatudi balombene kutengiela kui Yehowa? (2) Yehowa namu atengiela kinyi kuatudi? (3) Nkinyi akitungu’shi tulumbuule mu nteko yetu?

4. Muyile mukanda wa Yelemiya 29:​12, Yehowa mmuitulee’shi akakitshi kinyi?

⁴ Yehowa etulaa’shi ateemesha nteko yetu. (Badika Yeelemiya 29:12.) Efile Mukulu eetu mmufule balanguidi baye baasha lulamato, ta mulombene kupela kuteemesha nteko yabo nya. (Mis. 10:17; 37:28) Anka bino t’abipushisha’shi aketupa bintu bioso bi’atumutekie nya. Tui balombene kutengiela mpaa na p’atukatuele mu nsenga ipia kumpala kua’shi tupete bingi bintu bia tukuete kuteka lelo uno.

5. Yehowa atalulaa kinyi nsaa y’ateemesha nteko yetu? Patuula.

⁵ Yehowa e na mpango yadi nayo mu binangu muaye nsaa y’ateemesha nteko yetu. (Yesh. 55:​8, 9) Imune ya ku ino mpango yaaye ngia’shi akumiina kuusha nsenga i na bantu be na muloo na abakookiela bukunkushi buaye. Anka satana amba’shi bantu mbalombene kuikala na muloo nka nsaa y’abekunkusha abo banabene. (Kib. 3:​1-5) Bua kulesha’shi biabia abiakula Satana mbia madimi, Yehowa mmulekiele bantu bua’shi b’ekunkushe abo banabene. Ngi buakinyi bukunkushi bua bantu mbufuishe nkalakashi i bungi ya tukuete kufumankana nayo lelo uno. (Mul. 8:9) Atuuku’shi Yehowa t’akatusha ino nkalakashi yooso lelo uno nya. Muanda su akatusha ino mianda yooso binobino, bantu bash’abalanguilaa Efile Mukulu be kunangushena’shi, bantu ngi bakuete kupua ino nkalakashi yooso. Na dingi be kunangushena’shi bantu be kuikunkusha abo banabene kalolo.

6. Buakinyi abitungu tushinkamishe’shi Yehowa misuusa yooso akitaa mianda nka na kifulo na kululama?

⁶ Yehowa e kualuula nka lualua luteko lumune mu mishindo ilekeene. Bu kileshesho, pa baadi nfumu Ezekiase na maladi e bukopo, baadi muisendeele Yehowa bua’shi amupaashe. Na Yehowa namu bamupashiishe. (2 Bf. 20:​1-6) Ku lungi lupese namu, pa bakumbile Mpoolo mutumibua, ateka Yehowa bua’shi amukatushe “mulobo mu mbidi” pangi abaadi maladi a ku mbidi, Yehowa ta baadi mumupaashe ku luno lukalakashi nya. (2 Ko. 12:​7-9) Tutaleyi dingi kileshesho kia batumibua babidi, Yakobo na Mpiele. Booso babidi babaadi abakiebe kuibayipa kui Mfumu Erode. Kakongie kabaadi keele nteko bua Mpyele pangi namu nyi na bua Yakobo. Anka Yakobo babamuipayile. Mpyele namu bamupaasha kui muikeyilu. (Bik. 12:​1-11) Tui kuiyipusha’shi: ‘Buakinyi Yehowa bapaashiishe Mpyele, kadi ta mupaashe Yakobo?’ Bible ta muibiakule nya. c Kiatudi balombene kushinkamisha nkia’shi Yehowa “ta mukutue bululame.” (Miy. 32:4) Na dingi atuuku’shi booso babidi mpyele na Yakobo, babaadi bakuminyibue na Yehowa. (Kbf. 21:14) Ingi nsaa, Yehowa mmulombene kukutua kualuula nteko yetu mu mushindo w’atukulupilanga. Pa muanda wa’shi tui bashinkamishe’shi misuusa yooso Yehowa aluulaa ku nteko yetu na kifulo na kululama, ta tui balombene kuikalakasha bua mushindo w’akumiina kualuula ku nteko yetu nya.—Yob. 33:13. 

7. Nkinyi akitungu’shi tukatushe mu nteko yetu na buakinyi?

⁷ Ta tukumanga kupuandikisha muanda wetu na wa bangi bantu. Bu kileshesho, tui kuteka  Yehowa muanda kampanda wi pabuawo, anka akutua kualuula luteko luetu. Anka kunyima bokauku’shi, muntu kampanda mmutekie Yehowa nka wawa muanda umune, na Yehowa namu amualuula ku wanka. Ungi mukuetu mukashi Anna taadi mumone muanda wi bino. Baadi muele nteko bua’shi su mulume aaye Matthew apanda ku mukumbo wa cancer. Nka yaaya nsaa imune bakuetu bakashi batabadi banunu, balume baabo namu babaadi na cancer. Anna baadi mutekie ngofu bua Matthew na bua bano bakuetu bakashi babidi. Balume ba bano bakuetu bakashi babidi batabadi banunu, babapandile anka Matthew bafuile. Bua musuusa wa kumpala, baadi eyipusha aye nabene su bakuetu bakashi babidi batabadi banunu be biya, muanda Yehowa mmuibakuashe. Biabia su Yehowa mmukuashe bano bakuetu bakashi banunu, buakinyi ta mualuule namu ku nteko ya Anna bua’shi mulume aaye namu apande? Biabia, t’atuuku buakinyi nteko yaaye bua kupaasha mulume aaye ta mbeyaluule. Anka ki’atuuku nkia’shi, Yehowa afudiisha ano makienga ooso binobino, na akumiina kusangula ba kuuku baye bafue.—Yob. 14:15.

8. (a) Muyile mukanda wa Yeeshaya 43:​2, mmushindo kinyi awitukuashaa Yehowa? (b) Mmushindo kinyi ulombene kuitukuasha nteko yetu nsaa y’atupete nkalakashi? (Tala video amba’shi: Luteko aluitukuashaa bua kunyingiila.)

⁸ Yehowa ekala etukuasha nk’efuku dioso. Bu biadi Nshetu sha kifulo, Yehowa t’akumiina’shi tukiengie nya. (Yesh. 63:9) Na dingi ta mulombene kushikiila bitompuanga bioso bi’atupete, bilombene kumueneka bu muela sunga bu ndimi ya kaalo nya. (Badika Yeeshaya 43:2.) Anka, etulaa kuitukuasha amba’shi: “Okidi munkatshi” mwabyo. T’akatadiila’shi nkalakashi yatudi nayo itukambile nya. Yehowa etupa bukome bua kikudi kiaye kiselele bua’shi buitukuashe bua kunyingiila. (Luk. 11:13; Fid. 4:13) Ngi buakinyi, tui balombene kushinkamisha’shi, ekala etupa efuku dioso nka biabia biatudi nabio lukalo buatudia kunyingiila na buatudia kushaala na lulamato kuadi. d

9. Muyile mukanda wa Yakobo 1:​6, 7, buakinyi abitungu tukulupile’shi Yehowa etukuasha?

⁹ Yehowa namu atengiela kuatudi’shi tu mukulupile. (Eb. 11:6) Ingi misuusa, tui kumona bitompuanga bietu bu bi bukopo buatudia kuibikambila. Ingi nsaa tui kubanga kuela na mpaka ya’shi ta mmulombene kuitukuasha. Anka Bible etushinkamiisha’shi, ku bukome bu’Efile Mukulu, tui balombene “kuitumba kimano.” (Mis. 18:​29, NWT) Pa mutue pa kutadiila mpaka yetu itungunukie na kutama, tui kuteka na lukumiino looso bakulupile’shi Yehowa akaluula ku nteko yetu.—Badika Yakobo 1:​6, 7.

10. Tusha kileshesho kia mushindo watudia kukita mianda ipushene na nteko yetu.

¹⁰ Yehowa atengiela kuatudi’shi tukite mianda ipusheene na nteko yetu. Bu kileshesho, mukuetu mulume e kuteka Yehowa bua’shi amukuashe apete nsaa ya kuikisha ku mudimo waye wa ku mbidi, bua’shi amone mushindo wa kutuela mu kikongeno kia mafuku asatu. Yehowa e kualuula ku luteko luaye naminyi? Yehowa e kupa mukuetu mulume eshimba dinyingie diadi nadio lukalo buadia kuteka mukata aaye a mudimo nsaa ya kuikisha. Anka abitungu yawa mukuetu mulume atungunukie nka na kuenda kui mukata aaye bua kumuteka nsaa ya kuikisha. Abitungu atungunukie na kumuteka nsaa yooso. E kuteka mukata aaye a mudimo bua’shi beshintushene nsaa ya mudimo na mungi muina mudimo naye. Na su ta mbikuatshikie, e kulungula mukata aaye a mudimo bua’shi aye aate mafuku a kuikisha kadi bamutshibe makuta.

11. Buakinyi abitungu tutungunukie na kuteka pabitale mianda yetu?

 ¹¹ Yehowa atengiela kuatudi’shi tutungunukie na kuteka pabitale mianda yetu i na muulo. (1 Te. 5:17) Yesu bambile’shi ingi nteko yetu ngilombene kukutua lualuulo musuusa umune. (Luk. 11:9) Biabia, ta tukookanga! Abitungu tutekie n’eshimba dietu dioso na kutungunuka na kuteka. (Luk. 18:​1-7) P’atutungunuka na kuteka pabitale mianda yetu, atulesha Yehowa’shi mianda y’atumutekie i na muulo ukata kuatudi. Atulesha dingi lukumiino luetu mu ngobesha yaaye ya kuitukuasha.

12. (a) Ndukonko kinyi alutungu’shi tuiyipushe pabitale nteko yetu, na buakinyi? (b) Tui kuleshesha’shi nteko yetu ayilesha kaneemo bua Yehowa mushindo kinyi? (Tala kashibo akamba’shi: “ Nteko yande ayilesha kaneemo bua Yehowa su?”)

¹² Su ta tui bapete kiakia kia tuikeele batekie mu luteko, abitungu tuiyipushe atue banabene ino nkonko isatu. Lua kumpala aluamba’shi: ‘Natekaa bua mianda i buwa su?’ Kubapu tunangushene ku kiakia kiatuuku’shi ki buwa kuatudi. Muanda tui kuteka ingi mianda ish’ayitukuasha munda mua mafuku e bungi. Su tuateka bua mianda yetu, tui kupeta ngaluulo i buwa kukila biinyi bia tutekiele. Anka ingi mianda y’atutekie i kukutua kuikala ipusheene na kikiebe ki’eshimba dia Yehowa. (1 Yo. 5:14) Bu kileshesho, tutaluuleyi kileshesho kia baledi batudi bateemune kunudu. Babaadi batekie Yehowa bua’shi muana aabo atungunukie nka na kushaala mu bia binyibinyi. Luno luteko lui kumueneka bu lui buwa bukile, anka Yehowa t’akitshishaa ooso akuatudi pa bukopo bua’shi amufubile nya. Akumiina’shi atue booso mpaa na bana betu, tusangule buatudia kumulanguila. (Miy. 10:​12, 13; 30:​19, 20) Abitungu banambutuile batekie Yehowa bukuashi bua kukuma mashimba a bana baabo, bua’shi bamone bia  kuibatakula mu kufubila Yehowa na bafikie bakuuku baye.—Nki. 22:6; Ef. 6:4.

13. Muyile mukanda wa Bena Ebelu 4:​16, Yehowa etukuashaa nsaa kinyi? Patuula.

¹³ Lukonko lua kabidi lui bino: ‘Ino ngi nsaa i buwa ilombene Yehowa kualuula ku luteko luande su?’ Tui kunangushena’shi abitungu aluule ku nteko yetu nka paapa. Mu binyibinyi, Yehowa ngi auku nsaa i buwa yaadi mulombene kuitukuasha. (Badika Bena Ebelu 4:16.) Su ta tui bapete lualuulo ku mianda ya tuikeele batekie musuusa umune, ingi nsaa tui kunangushena’shi Yehowa bapele kuitualuula.’ Anka bi kuikala’shi nsaa tayalombene yadia kualuula. Bu kileshesho, we kubanda kunangushena bua nsongualume baadi mutekie Yehowa bua’shi amupaashe ku mukumbo waye. Su Yehowa badia kumupaasha mu kilengieleshi, satana badia kuamba’shi yawa mukuetu kuete kutumikila Yehowa nka pa muanda wa’shi Yehowa mumupaashe. (Yob. 1:​9-11; 2:4) Kukatusha biabia, Yehowa mmupue kulumbuula kipungo ki’akapaasha mikumbo yooso. (Yesh. 33:24; Kbf. 21:​3, 4) Bua binobino, ta tui balombene kutengiela’shi Yehowa etupaasha mu kilengieshi nya. Ngi buakinyi, abitungu mukuetu mulume atekie Yehowa amupe bukome na butaale bua mu binangu buadia kunyingiila mukumbo waye, na kutungunuka na kufubila Efile Mukulu na lulamato.—Mis. 29:11.

14. Muanda wabadi bamone kui Janice ubakulongiesha kinyi?

¹⁴ Tutaluleyi dingi kileshesho kia Janice baadi atekie Yehowa bua’shi ende akafube ku Betele. Kunyima kua bipua bitano, baadi mufikie mu nkapusha’shi Yehowa mmualuule ku nteko yaaye kadi mu mushindo wilekeene na bi’atengielanga. Amba’shi: “Yehowa mmufubishe kiakia kipungo buadia kundongiesha na buadia kundumbuula. Bibaadi abitungu’shi lukulupilo luande muadi lutame ngofu. Bibaadi abitungu dingi’shi ndumbuule mushindo wa kuibadikila  Bible. Na dingi ne mufikie mu kuuka’shi ne mulombene kuikala na muloo wa binyibinyi, nka nsaa yanfubila Yehowa.” Kunyima babaadi batume Janice na mulume aaye mu mudimo wa bu mukunkushi a kifunda. P’alusha binagu kumongo, Janice amba’shi: “Yehowa mmualuule ku nteko yande, kadi mu mushindo wansh’anangushenga. Ne mufikie mu kuuka’shi ngaluulo ya Yehowa, nyi nkia buntu ki buwa bukile ki’etupeya. Ne na lutumbu lukata bua mushindo wadi mumpe wa kupusha bi kifulo kiaye na kalolo kaye.”

15. Buakinyi abitungu tushimikie kasele pa muanda kampanda mu nteko yetu? (Tala dingi bifuatulo.)

¹⁵ Lukonko lua kasatu lui’shi: ‘Ne mulombene kuteka bua ingi mianda kampanda su?’ Bi buwa p’atuele nteko yetu tushimikie kasele pa muanda kampanda. Tui kupeta mushindo wa kunangushena bi kikiebe ki’eshimba dia Yehowa kuatudi pa kuela nteko i bungi. Tutaluuleyi kileshesho kia mukuetu mukashi e bukupi baadi eele nteko bua’shi atuele mu kalaasa ka balungudi ba Bufumu. Baadi akumiina kutuela mu kalaasa ka balungudi ba Bufumu, bua’shi akafube ku mbalo i lukalo lukata lua balungudi. Pa baadi mutungunukie na kuteka Yehowa bua’shi bamuitanyine ku kalaasa, baadi mutekie dingi Yehowa bua’shi amukuashe atundule ingi mishindo yaadi mulombene kutamisha mudimo waye wa bulungudi. (Bik. 16:​9, 10) Akupu, baadi mukite mianda ipushene na luteko luaye pa kuipusha mukunkushi a kifunda su kui kakongie ke peepi na mbalo yaadi mushaale ke na lukalo na ba mbala-mashinda be bungi. Sunga’shi baadi mulombene kufundila biro bia filiale bua’shi ayipushe su kui mbalo kampanda i lukalo lukata lua balungudi ba Bufumu. e

16. Abitungu tushinkamishe kinyi?

¹⁶ Nka bu bibatukatuka mu kulonga, tui balombene kushinkamisha’shi Yehowa aluula ku nteko yetu na kifulo na mu mushindo wi buwa. (Mis. 4:3; Yesh. 30:18) Ingi nsaa tui kukutua kupeta lualuulo lu’atutengielanga. Anka Yehowa t’abepulaa nteko yetu. Mmuitufule ngofu na dingi t’anetusumbushene nya. (Mis. 9:10) Biabia tungunuka na ‘kukulupila mwadi nguba ooso,’ na kumufunguila eshimba diobe mu luteko.—Mis. 62:8.