1-2. (a) Nsaa kinyi bikishekishe yatukamba kutentekiesha muntu atudi bafule mufue? (b) Yesu badi mukite kinyi kumpala kua lufu luaye?

 SUNGA biekala’shi takudi mafuku e bungi atudi bafuishe bakuetu batudi bafule, atutungunukaa nka na kuibatentekiesha. Atukamba kunangushena pabibatale bikishekishe patufiki efuku dibabafuile.

² Ku kipua kioso atupetekielua munkatshi mua midiyo ya bakuetu mu nsenga ishima, ku kitentekiesho kia lufu lua muntu umune atudi bafule ngofu​—Yesu Kidishitu. (1 Mp. 1:8) Atufikaa atue boso bua kutentekiesha lufu lua muntu umune badi mutushe muwa waye bu nkuulo buadia kuitupaasha ku muluisho na ku lufu. (Mat. 20:28) Anka, Yesu badi mukumiine’shi balongi baye batentekieshe lufu luaye. Bufuku kumpala kua lufu luaye bakitshine kidibua kipabuakio na akula’shi: “Kitaayi bino bwa kuntentekyesha.”​—Luk. 22:19.

3. Nkinyi kia tukataluula mu uno muisambo?

³ Bantu bapela bakubano abatuela mu kintentekiesho kia lufu lua Yesu bena lukulupilo lua kuenda muiyilu. Anka midiyo ya bantu bena lukulupilo lua kushala pa nsenga namu abapetekielua. Mu uno muisambo atukatalula tubingilo tua buakinyi bino bisaka bioso bibidi abitengiela kutuela mu kitentekiesho kia ku kipua kioso na eshimba kuiyilu. Atukataluula dingi mushindo watudi balombene kupetela miabi patuimutuele. Bua binobino tubangieyi na tutaleyi tungi tubingilo atutakula bedibue muimu bua kutuela mu kitentekiesho.

4. Buakinyi bena Kidishitu bedibue muimu abadiya mukate na kutoma nfinyo ku kitentekiesho?

⁴ Ku kipua kioso bedibue muimu abatuela mu kitentekiesho kia lufu lua Yesu, bua kudia mukate na kutoma nfinyo. Buakinyi mbalombene kutuela mu kitentekiosho kia lufu lua Yesu bua kudia mukate na kutoma nfinyo? Bua kutuusha lualulo tutaleyi kibakitshikile bufuku bua nfudilo bua muwa wa Yesu pa nsenga. Kunyima kua kudia kidibua kia Pasaka, Yesu bakitshine kingi kidibua kiabetanyina bu kidibua kia Muanana. Bakishishe mukate na nfinyo munkatshi mua batumibua baye 11 basha lulamato, na aye kuibalungula’shi diayi na nutome. Yesu bebalunguile pabitale bilombeno bibidi​—kilombeno kipia na kilombeno kia Bufumu. * (Luk. 22:19, 20, 28-30) Bino bilombeno bibidi bibadi bifunguile bano batumibua boso na bungi butshibibue bua bangi bantu bua badia nkekala ba mfumu na ba tshite-muakuidi muiyilu. (Kibaf. 5:10; 14:1) Nka penda bedibue muimu ba mu bino bilombeno * bibidi nyi balombene kudia mukate na kutoma nfinyo ku kitentekiesho.

5. Bena Kidishitu bedibue muimu abauku kinyi pabitale lukulupilo luabo luabadi bebape?

⁵ Kangi kabingilo ka buakinyi bedibue muimu abatengiela bua kutuela mu kitentekiesho n’eshimba kuiyilu nkano: Kutuela mu kitentekiesho akuibapa mushindo wa kunangushena pabitale lukulupilo luabo. Yehowa muibape lukulupilo lua kukanya​—lua nkekala na muwa muiyilu na kusankila mbidi ishaifu na ishainyanga dingi bua nkamunana pamune na Yesu Kidishitu mutumbishibue na kisaka kia 144 000 kia bedibue muimu, na muanda wi na muulo ukata bua nkekala kumpala kua Yehowa Efile Mukulu etu! (1 Kod. 15:51-53; 1 Yo. 3:2) Bedibue muimu abauuku’shi mbebetanyine buabadia nkasankila uno muabi ukata muiyilu. Anka, bua’shi bende muiyilu abitungu balame lulamato luabo nyaa mpa na ku lufu luabo. (2 Tim. 4:7, 8) Abipa bedibue muimu muloo ukata bua kunangushena bi lukulupilo luabo lua kuenda muiyilu. (Tt. 2:13) Tui kuamba naminyi bua “yingi mikooko”? (Yo. 10:16, Kilombeeno Kipya 2014) Tungi tubingilo kinyi atuibatakula bua kutuela mu kitentekiesho?

6. Buakinyi ingi mikooko ayituela ku kitentekiesho ku kipua kioso?

⁶ Ingi mikooko ayituela mu kitentekiesho ta mpa muanda wa’shi badie mukate na kutoma nfinyo nya, kadi mbua kubandila bisumanga. Kubanga nka mu kipua kia 1938 mubabadi betanyine bena Kidishitu babadi na lukulupilo lua kushala pa nsenga bua badia kutuela mu kitentekiesho bua mususa wa kumpala. Kitenta kia Mulami kia mu 1/4/1938 akiamba’shi: “Bibadi buwa ngofu bua’shi [bena Kidishitu bena lukulupilo lua kushaala pa nsenga] bapetekielue ku kino kisangilo, na babadi balombene kubandila mushindo wakikitshika na abo namu.  . . Muanda ino nsaa nyi nsaa ya muloo.” Nka bu bantu babadi betanyine ku eyibakishi bena muloo wa kumona abikitshika mianda ya dibaka, ingi mikooko, ina muloo wa kupetekielua ku kitentekiesho kia lufu lua Yesu bua kubandila abikitshika.

7. Buakinyi ingi mikooko ayitengiela n’eshimba kuiyilu bua kupusha muisambo wa ku kitentekiesho?

⁷ Ingi mikooko namu ayinangushena n’ayo pabitale lukulupilo luayo. Na ayitengiela n’eshimba kuiyilu bua kutemesha muisambo wa kitentekiesho awakuila pabitale Kidishitu na  bantu 144 000 basha lulamato abakamunana pamunenka na Yesu munda a bipua kinunu. Mu kumunana kua Mfumuabo Yesu Kidishitu, boso abakamunana naye, abakakuasha bua kualuula nsenga bu mpaladiso na kuikasha bantu abakokiela bapuidikie. Nsaa ya kitentekiesho midiyo ya ingi mikooko ayibandilaa abapusha muloo ukata wa kunangushena pabitale kulombana kua matemuki a mu Bible pabitale mafuku aafiki bu a tusangana mu Yeeshaya 35:5, 6; 65:21-23; na Kibafumbwilwe 21:3, 4. Abanangushena be mu nsenga ipia na bakuabo ba kifulo na abayingisha lukulupilo luabo, na kuata kitshibilo kia kutungunuka na kufubila Yehowa.​—Mat. 24:13; Nga. 6:9.

8. Nkangi kabingilo kinyi akatakula ingi mikooko bua kutuela mu kitentekiesho?

⁸ Tubandeyi kutala kangi kabingilo akatakula ingi mikooko bua kutuela mu kitentekiesho. Abakumina kulesha’shi mbafule na abakuatshishena bedibue muimu. Eyi di’Efile Mukulu dibadi dipue kutemuka kipuano kibadi kilombene kuikala pankatshi pa bedibue muimu na bano boso bena lukulupilo lua kushala pa nsenga. Mushindo kinyi? Binobino tuisambileyi bileshesho bipela.

9. Muyile Sekadya 8:23, ingi mikooko ayipusha naminyi pabitale bena Kidishitu bedibue muimu?

⁹ Badika Sekadya 8:23. Buno butemuki buibuwa ngofu abulesha abipusha ingi mikooko pabitale bakuabo balume na bakashi bedibue muimu. Kishima “mwina Yunda” na kishima “nenu” akilesha kisaka kimune​—kia bedibue muimu baki pa nsenga. (Lom. 2:28, 29) Bantu “ekumi abakula ndimi yooso ba mu bisamba byoso” abalesha ingi mikooko. ‘Mbakwate ku lwembe lwa kilamba’ na lulamato loso abelamika kui bedibue muimu na kutuela nabo mu lulanguilo luiselele. Nyi buakinyi ku kiolua kioso kia kitentekiesho ingi mikooko ayilesha lulamato luabo pakutuela nabo mu kitentekiesho.

10. Yehowa mukite kinyi bua kulombasha butemuki buatupete mu Esekyele 37:15-19, 24, 25?

¹⁰ Badika Esekyele 37:15-19, 24, 25. Bua kulombasha buno butemuki, Yehowa mutule bedibue muimu na ingi mikooko buaidia kufuba pamune mu buumune. Buno butemukie abulesha bipindi bibidi bia mitshi. Bano boso bena lukulupilo lua kuenda muiyilu be bu kipindi kia mutshi “kya Yuuda” (kisamba kibabadi basangule bafumu boso ba mu Isaleele), na bano boso bena lukulupilo lua kushala pa nsenga be bu kipindi kia mutshi kia “kya Efraime.” * Yehowa mubungie bino bisaka bioso bibidi bua bidia kufika kipindi kia “mutshi umune.” Bino abilesha’shi bakuete kufuba mu buumune muushi mua batalua a Mfumu abo umune, Yesu Kidishitu. Ku kipua kioso bedibue muimu na ingi mikooko bakuete kutuela mu kitentekiesho kia lufu lua Yesu kushi bu bisaka bibidi nya, kadi “lombe lumune” lui na “mulami umune.”​—Yo. 10:16.

11. “Mikooko” yabalesha mu Mateo 25:31-36, 40, ayilesha naminyi’shi ikuete kukuatshishena bakuabo na Kidishitu?

¹¹ Badika Mateo 25:31-36, 40. “Mikooko” mu luno lukindi ayilesha bantu balulame ba mu kipungo kia nfudilo bena lukulupilo lua kushala pa nsenga​—bano nyi ingi mikooko. Abakuatshishena bakuabo na Kidishito bedibue muimu na lulamato loso baki pa nsenga buabadia kulombasha mashito akata abadi nao​—a kulungula mukandu wibuwa na kuikasha bantu bu balongi mu nsenga ishima.​—Mat. 24:14; 28:19, 20.

12-13. Mu ingi mishindo kinyi dingi ayilesha ingi mikooko’shi ikuete kukuatshishena bakuabo na Kidishitu?

¹² Ku kipua kioso mbingo kumpala kua kitentekiesho, ingi mikooko ayilesha’shi ayikuatshishena  bakuabo na Kidishitu pakukita kampanye na pa kuabila mapuupua a luitamiino kui bantu abakumina kufika mu kutuela mu kitentekiesho. (Tala kashibo akamba’shi: “ Nkepatshila kinyi kodi mulombene kuiatshila mu kipungo kia Kitentekiesho?”) Abakuasha dingi bua kulumbula mianda ina muulo pabitale kitentekiesho bua kukuasha tukongie toso tui mu nsenga ishima sunga tungi tukongie tuibungi tatuina bantu abadiya mukate na kutoma nfinyo nsaa yabatuele mu kitentekiesho. Ingi mikooko ina muloo wa kukuatshishena bakuabo na Yesu mu uno mushindo. Yesu kuete amono bia bakuete kukitshina bakuabo bedibue muimu nka bu bakuete kumukitshina aye nabene.​—Mat. 25:37-40.

¹³ Tutaleyi tungi tubingilo atuitutakula bua kutuela mu kitentekiesho, sunga tuekala na lukulupilo lua mushindo kinyi.

14. Yehowa na Yesu mbetuleshe kifulo kikata mushindo kinyi?

¹⁴ Tui na lutumbu bua kifulo kiabadi betuleshe kui Yehowa na Yesu. Yehowa muituleshe kifulo kiaye mu mishindo ibungi, anka kui umune wa ku ino mishindo ukile yoso. Wawa mushindo umune ukile yoso ku bukata wituleshe Efile Mukulu kifulo kiaye kikata, mpa kutuma Muan’aye a kifulo buadia kukienga na kufua pa muanda wetu. (Yo. 3:16) Atuuku dingi’shi na Yesu namu betulesheshe kifulo kikata, p’aye kukumina kutusha muwa waye pa muanda wetu. (Yo. 15:13) Tatuanekale na ngobesha ya kufuta muulo wa kifulo kituleshe Yehowa na Yesu. Anka tui balombene kulesha lutumbu luetu mu mushindo watukitshi mianda mu nshalelo etu a ku efuku n’efuku. (Kol. 3:15) Atutuela mu kitentekiesho bua kunangushena pabitale kifulo kiabadi betuleshe na bua’shi tuibaleshe namu’shi tui bebafule.

15. Buakinyi bisaka bioso bibidi kia bedibue muimu na kia ingi mikooko akiata kia buuntu kia nkuulo na muulo ukata?

¹⁵ Tui na lutumbu lukata bua kino kia buuntu kia nkuulo. (Mat. 20:28) Bedibue muimu abata nkuulo na muulo ukata, muanda ayibakuasha bua’shi lukulupilo luabo luibuwa lukumbane. Pa muanda wa lukulupilo luabo mu mulambu wa nkuulo ya Kidishitu, Yehowa muibetanyine bu balulame na ebakumiina bu bana baye. (Lom. 5:1; 8:15-17, 23) Na ingi mikooko namu ina lutumbu lukata bua nkuulo. Pa muanda wa lukumiino luabo mu mulambu wa nkuulo ya Kidishitu, beselele kumpala kua Efile Mukulu na abakitshi mudimo wa kishila na mbakulupile’shi “abakapanda ku mpombo ikata.” (Kibaf. 7:13-15) Mushindo umune aulesha bedibue muimu na ingi mikooko’shi bena lutumbu mu nkuulo ya Kidishitu mpa kutuela mu kitentekiesho ku kipua kioso.

16. Nkangi kabingilo kinyi aketutakulaa bua kutuela mu kitentekiesho?

¹⁶ Kangi kabingilo aketutakula bua kutuela mu kitentekiesho nka’shi muanda atukumiina kukokiela Yesu. Sunga tuekala na lukulupilo lua mushindo kinyi bua mafuku aafiki, abitungu oso akuatudi anemekie uno muiya wa Yesu ubetupele bufuku nsaa ibakitshine kitentekiesho amba’shi: “Kitayi bino bwa kuntentekyesha.”​—1 Kod. 11:23, 24.

17. Kitentekiesho akitukuasha buatudia kuifubuila kui Yehowa mushindo kinyi?

¹⁷ Atuifubuila pepi na Yehowa. (Shak. 4:8) Anka bu bibatukatuka mu kulonga, kutuela mu kitentekiesho akuitupa mushindo wa kunangushena pabitale lukulupilo luetu luabadi betupe kui Yehowa na kunangushena dingi ku kifulo kikata kiadi muituleshe. (Yel. 29:11; 1 Yo. 4:8-10) Nsaa yatunangushena bua lukulupilo luetu bua mafuku aafiki na kifulo kishi bia kupuandikisha  kituleshe Yehowa, atunyingisha kifulo kietu bua Yehowa na atunyingisha dingi kipuano kietu naye.​—Lom. 8:38, 39.

18. Patunangushena ku kileshesho kia Yesu abitutakula mu kukita kinyi?

¹⁸ Abitutakula buatudia kuambula kileshesho kia Yesu. (1 Mp. 2:21) Mafuku a kumpala kua kitentekiesho atutulaa binangu bietu ku mianda i mu Bible pabitale lubingo lua nfudilo lua muwa wa Yesu pa nsenga, lufu, na lusangukilo luaye. Na dingi ku kiolua nsaa ya kitentekiesho abela muisambo awitutentekiesha bi kifulo kia Yesu kuatudi. (Ef. 5:2; 1 Yo. 3:16) Nsaa yatubadika pabitale kileshesho kia Yesu kia kuilambula na kunangushena ku kianka abitutakula bua ‘kutambuka anka bu bibaadi’ye nabene mutambukye.’​—1 Yo. 2:6.

19. Tui kushala mu kifulo kia Yehowa mushindo kinyi?

¹⁹ Atunyisha kuata kitshibilo kia kushala mu kifulo kia Efile Mukulu. (Yu. 20, 21) Atushala mu kifulo kia Efile Mukulu nsaa yatuikitshisha na muetu moso buatudia kumukokiela, bua kutumbisha eshina diaye, na kusankisha eshimba diaye. (Nki. 27:11; Mat. 6:9; 1 Yo. 5:3) Kutuela mu kitentekiesho bua kubandila akuitutakula buatudia kunyisha kuata kitshibilo kia kuikala na nshalelo a kuifuku n’efuku, mulombene kuitutakula mu kulungula Yehowa’shi: ‘Nakumiina kushala mu kifulo kiobe bua loso!’

20. Ntumbingilo kinyi dingi tui na muulo tuatudi n’ato bua kutuela mu kitentekiesho?

²⁰ Sunga lukulupilo luetu luekala lua kuenda muiyilu sunga lua kushala pa nsenga ikalaika, tui na tubingilo tukata tuatudi balombene kutuelela mu kitentekiesho. Ku kipua kioso nsaa yatuibungu pamune bua diadia efuku atutentekiesha lufu lua muntu atudi bafule ngofu Yesu Kidishitu. Kunundu kua bioso atutentekiesha kikitshino kia Kifulo kikata kiabadi betuleshe kui Yehowa pa kuitupa Muan’aye bu nkuulo. Kino kipua, kitentekiesho akikatuele mu dia Katano 15/4/2022 ku kiolua. Tui bafule Yehowa na Muan’aye biabia efuku dia kutentekiesha lufu lua Yesu, takui kintu ki na muulo ukata kilombene kui tukutshihua kupetekielua ku kitentekiesho nya.