1. Buakinyi bantu be bungi tabakuete kutundula lulanguilo lua binyibinyi?

KUI bipuilo bi bungi lelo uno abiyitamina bu bena Kidishitu na bakuete kuakula’shi abalanguila Efile Mukulu mu mushindo aumusankisha. Muanda wa kukutua kua kutalula bantu be bungi tabakuete kutundula lulanguilo lua binyibinyi nya! Pa muanda wa biabia, abeyipusha’shi kui lulanguilo lua binyibinyi su? Ndanguilo yoso aisankisha Efile Mukulu? Tui na bishinkamisho mu binangu bietu’shi tukuete kulambukisha bia binyibinyi? Na’shi kileshesho kia lulanguilo akilondo ba Temue ba Yehowa lelo uno nyi kiinyi kiabadi bakumine kui Yehowa su? Mu binyibinyi mbibofule buatudia kuikala na kiakia kishinkamisho su? Tubandenyi kutala bishinkamisho.

2. Muyile 1 Bena-Tesalonika 1:5, buakinyi Mpoolo badi na kishinkamisho kikata kia bia binyibinyi?

² Mpoolo mutumibua badi na kishinkamisho kikata kia bia binyibinyi. (Badika 1 Bena-Tesalonika 1:5.) Kino kishinkamisho takibadi kimeene penda ku bibadi apusha nya. Mpoolo badi mulongi ebuwa a Eyi di’Efile Mukulu. Badi mukumine’shi “kifundwe kyoso nkiyokielwe kwi Efile Mukulu.” (2 Tim. 3:16, Kilombeeno Kipya 2014) Badi mulongie kinyi? Mu bifundue Mpoolo badi musangane mianda ailesha’shi Yesu nyi Mesiya mulayibue, anka bakata ba bena Yunda abadi bate kitshibilo kia kupela ku mutundula bu Mesiya. Bino bipuilo bioso bia bulamalama abiamba’shi bikuete kufubila Efile Mukulu, anka abakitshi mianda yabadi bashikue kui Efile Mukulu. (Tt. 1:16) Mu kuilekena na bano bantu, Mpoolo ntamusangule kipindi kia mianda kampanda mu Eyi di’Efile Mukulu kia kutumikila na kingi ki’shi kia kutumikila nya. Badi alongiesha na kutumikila “elango dioso di’Efile Mukulu.”​—Bik. 20:27, Esambi Dipya 2015.

3. Bua kuikala na kishinkamisho kikata abitungu tupete ngalulo ku nkonko yetu yoso su? (Tala dingi kashibo akamba’shi “ Mifubo na binangu bia Yehowa​—‘mbikile bungi biansha kui bi badika.’”)

 ³ Bangi abamono’shi lulanguilo lua bia binyibinyi ndulombene kuikala na ngobesha ya kutuusha ngalulo ku lukonko loso sunga lukonko luekala’shi talui mu Bible. Biabia bi kukitshika su? Tubadeyi kutala kileshesho kia Mpoolo. Badi munyingishe bena Kidishitu naaye “buabadia kutalula bintu bioso,” badi muakule dingi’shi kui ingi mianda i bungi ya’nshi mupushe kalolo. (1 Tes. 5:21, Kilombeeno Kipya 2014) Mpoolo bafundile’shi atuuku nka kipindi. Bambile dingi’shi, “atumuena mu lumueno mui milembalemba.” (1 Kod. 13:9, 12, Kilombeeno Kipya 2014) Mpoolo tamupushe mianda yoso nya, na atue namu ta tui balombene kupusha mianda yoso. Mpoolo badi mupushe bia binyibinyi bia kitako pabitale Yehowa. Badi na kishinkamisho kikata’shi mianda yadi mukumine ngia binyibinyi!

4. Mushindo kinyi watudi balombene kuyingisha bishinkamisho bietu’shi tui bapete bia binyibinyi, na nkinyi kia tukatalula pabitale bena Kidishitu ba binyibinyi?

⁴ Mushindo umune watudi balombene kunyingisha kinshikamisho kietu’shi tui bapete bia binyibinyi mpa kupuandikisha kileshesho kia lulanguilo lua binyibinyi kibetulekiele Yesu na bikuete abikitshi ba Temue ba Yehowa lelo uno. Mu uno muisambo atukamono’shi bena Kidishitu ba binyibinyi (1) tabalanguila ma nkishi, (2) abanemeka eshina dia Yehowa, (3) mbafule bia binyibinyi, na (4) bena kifulo kibukopo kia bu bana na bana.

5. Nkinyi kiatudi balombene kulongiela kui Yesu pabitale mushindo wi buwa wa kulanguila Efile Mukulu, tui kutumikila ino mianda ibadi mulongieshe naminyi?

⁵ Bu bibadi mufule Efile Mukulu bikata, Yesu badi mulanguile Yehowa na lulamato, kubanga muiyilu mpa na pano pa nsenga. (Luk. 4:8)  Balongieshe balongi baye buabadia kukita naabo namu nka biabia. Na balongi ba Yesu basha lulamato tambafubishe kifuanyi efuku su dimune bua kumulanguila. Efile Mukulu nkikudi, na takui kintu su nkimune kiabadi balombene kukita kui muntu bua kumupuadikisha naye! (Yesh. 46:5) Tui kuamba naminyi bua binfuanyi bia betanyina bu bansantu na kuela nteko kuabidi? Mu muiya wa kabadi wa ku miya ekumi, Yehowa bakuile’shi: ‘Tokitanga nkishi sunga kintu kilombene kwikala na nkiebukilo kya bii muiyilu mwaa mula na pa nsenga pano pashi . . . Twebakunaminanga.’ (Efi. 20:4, 5) Ano mayi ngatokane kui boso abakiebe kusankisha Efile Mukulu.

6. Lelo uno ba Temue ba Yehowa bakuete kulonda kileshesho kia lulanguilo kinyi?

⁶ Bantu balongie mianda ya kala abadi baukie’shi bena Kidishitu ba kumpala, abadi abalanguila anka penda Efile Mukulu na lulamato. Bu kileshesho, mukanda wa histoire wa bena bipuilo aulesha’shi bena Kidishitu ba kumpala babadi abatala na moo nsaa ibabadi abapuandikisha na kutula binfuanyi mbalo wa lulanguilo. Lelo uno, ba Temue ba Yehowa bakuete kulonda kileshesho kia bena Kidishitu ba mu siekele a kumpala. Ta tui balombene kuela nteko kui binfuanyi bia “bansantu” sunga mikeyilu, mbiatushi mbalombene kuteka sunga Yesu. Na tatulanguila mabendela a mbulamatadi sunga a eumbo nya. Sunga batompa kuitukitshisha mianda pa bukopo, atue tui nka na kitshibilo kia kukokiela mayi a Yesu aamba’shi: “Yehowa Efile Mukulu oobe ngi a-kulangwila.”​—Mat. 4:10.

7. Nkuilekena kinyi kui pankatshi pa ba Temue ba Yehowa na bingi bipuilo?

⁷ Lelo uno, bantu be bungi abakumina kutemesha ano malongiesha a bakata ba bipuilo. Muanda wa kuibafula kukile, ingi nsaa abafiki mpa na mu kuibalanguila. Bangi bantu abauku bilubilo bia bano bakata ba bipuilo, bakuete kukumina mianda yabo na abatusha makuta e bungi bua kukuatshishena ndumbuluilo yabo. Abakumina muanda oso awakula bano bakata ba bipuilo. Bi bukopo buatudia kunangushena’shi bano bantu abadia kuikala na kino kisumi su Yesu badia kuikala panka! Mu kuilekena na biabia, balanguidi ba Yehowa ba binyibinyi ta bekala na mukata a kipuilo. Sunga mbiabia atunemeka baba boso bakuete kuituludika, atuuku malongiesha a Yesu a amba’shi: “Anwe booso nwi baana-na-baana.” (Mat. 23:8-10) Tatulanguila bantu nya, bia bikala bakata ba politike sunga ba bipuilo. Na dingi ta tuibakuatshishenaa ku mianda yabo nya. Tui belamune mu mianda ya uno ndumbuluilo, na ta tutuelakanaa mu mianda ya politike nya. Pa muanda wa bino tui belekene na bipuilo bioso abiyitamina bu bena Kidishitu.​—Yo. 18:36.

8. Mushindo kinyi watuuku’shi Yehowa akumina tutumbishe eshina diaye na kuidiukisha bangi?

⁸ Ungi musango Yesu batekiele’shi: “Yaaya tumbisha eshina dyobe.” Yehowa baluluile luno luteko na eyi dibukopo adifiki muiyilu, alaa’shi atumbisha eshina diaye. (Yo. 12:28, Kilombeeno Kipya 2014) Kukiila ku mudimo wa bulungudi, Yesu badi mutumbishe eshina dia Nshaye. (Yo. 17:26) Bena Kidishitu ba binyibinyi abamona’shi nyi nkinemo kikata kia kufubisha eshina di’Efile Mukulu na kuidiukisha bangi.

9. Mushindo kinyi ubalesheshe bena Kidishitu ba mu siekele a kumpala’shi babadi abanemeka eshina di’Efile Mukulu?

⁹ Mu siekele a kumpala B.B., kunyima kuabo kutula kakongie ka bena Kidishitu, Yehowa Efile Mukulu badi “mutadishe binangu biaye kwi bena maumbo bwa kusangula mwanka mwilo bua kinemo kia eshina dyaye.” (Bik. 15:14, NWT) Bano bena Kidishitu boso ba mu siekele a kumpala babaadi na kinemo kia kufubisha  eshina di’Efile Mukulu na kuidiukisha bangi. Batumibua na balongi babadi bafubishe eshina di’Efile Mukulu pa kulungula mukandu wi buwa na pa kufunda mikanda ya mu Bible. * Abalesheshe abo banabene’shi mbekale muilo bua eshina di’Efile Mukulu.​—Bik. 2:14, 21.

10. Nkinyi akishinkamisha’shi ba Temue ba Yehowa mbekale muilo bua eshina dia Yehowa?

¹⁰ Ba Temue ba Yehowa muilo bu’eshina dia Yehowa su? Tutaleyi kino kishinkamisho. Lelo uno, bakata ba bipuilo bebungi mbakite muabo moso bua kukimba bia kushimisha eshina di’Efile Mukulu dinabene. Mbedikatushe mu ma Bible abo, na dingi mbapeleshe kuidifubisha mu midimo yoso itale bipuilo biabo. * Ta kui muntu su ngumune akupela’shi nka penda ba Temue ba Yehowa nyi abafubisha eshina dia Yehowa, kui dinemeka na kuidipa ntumbo nya. Tukuete kufubisha eshina di’Efile Mukulu dinabene ngofu na kuidiukisha bangi kukila bingi bipuilo bioso! Pa muanda wa bino tukuete kuikitshisha muetu moso, bua kuikala na nshalelo muipushene na eshina dietu dia bu ba Temue ba Yehowa! (Yesh. 43:10-12) Tukuete kutusha ma Bible akile pa midiyo 240 a Traduction du monde nouveau, afunde eshina di’Efile Mukulu mu ma mbalo abadi bedikatushe kui bangi baludi ba Bible. Na dingi tukuete kutusha mikanda ayakuila Bible ina eshina dia Yehowa mu ndimi ikile pa 1 000!

11. Mushindo kinyi ubadi bena Kidishitu ba kumpala baleshe kifulo kiabo bua bia binyibinyi?

¹¹ Yesu badi mufule bia binyibinyi, kuamba’shi bia binyibinyi pabitale Efile Mukulu na mpango yaye. Yesu badi na nshalelo muipushene na bia binyibinyi, na dingi badi muate bino bia binyibinyi ebiukisha mbangi. (Yo. 18:37) Balongi ba Yesu ba binyibinyi mbafule n’aabo bia binyibinyi. (Yo. 4:23, 24) Nyi buakinyi, Mpyele mutumibua badi muitamine bena Kidishitu basha lukumino “bu eshinda dia binyibinyi.” (2 Mp. 2:2) Bu bibabadi na kifulo ki bukopo bua bia binyibinyi, bena Kidishitu ba kumpala babadi basumbule binangu bi bubi, bipikua, na muineno a bena bipuilo shi muipushene na bia binyibinyi. (Kol. 2:8) Mu mushindo umune, lelo uno bena Kidishitu ba binyibinyi abekitshisha bua “kutambuka mu bia binyibinyi” lukumino luabo na nshalelo abo mbipushene na Eyi dia Yehowa.​—3 Yo. 3, 4.

12. Bano abetukunkusha abakita kinyi su abasangana’shi mpushisho etu atungu kutokiesha, na buakinyi abakita bino kushi kunyengakana?

¹² Muilo w’Efile Mukulu lelo uno, taukuete kuamba’shi wi na kiukilo kipuidikie na kikumbane kia bia binyibinyi nya. Ingi nsaa, abakita bilubilo pabitale bipikua bia lulanguilo na buludiki bua ndumbuluilo. Bino nta bilombene kuitukanyisha nya. Bible atokiesha kalolo’shi bantu abakapusha bia binybinyi kalolo mu kukila kua mafuku. (Kol. 1:9, 10) Yehowa afumbula bia binyibinyi kapelakapela, na abitungu kutengiela na luishinko bua kumona etaata dia bia binyibinyi bia diende na kutama. (Nki. 4:18) Nsaa i Kasaka Ka bakunkushi Bakulu kabasangana’shi kui lukalo lua kushintula mpushisho sunga mianda kampanda, abeyishintuula kushi kunyengakana. Bakata ba bipuilo be bungi lelo uno, abashintula malongiesha abo buabadia kukuminyibua na bena bipuilo baabo, sunga buabadia kuukibua na bantu be bungi, anka ba Temue ba Yehowa abashintuula mianda muanda abakumina kuifubuila kui Efile Mukulu abo, na kumulanguila mu mushindo ubadi umulanguile Yesu. (Shak. 4:4) Su atushintula mianda nta mpa muanda wa’shi atulondo mueneno a bantu ba mu nsenga abashintula nya, kadi mpa muanda wa’shi atupusha Bible kalolo, na tui bafule bia binyibinyi!​—1 Tes. 2:3, 4.

13. Eyikashi kinyi dina muulo ukata dia bakuete kulesha kui bena Kidishitu ba binyibinyi, na ba Temue ba Yehowa bakuete kuidilesha naminyi lelo uno?

¹³ Ku ngikashi yoso ibaadi ayitundusha bena Kidishitu ba mu siekele a kumpala mu kakongie, eyikashi dibadi na muulo ngofu nyi nkifulo. Yesu bakuile’shi: “Su anwifulena kifulo, bantu boso abakeûku’shi nwi balongi bande.” (Yo. 13:34, 35, EEM) Lelo uno, ba Temue boso mu nsenga ishima bakuete kumona bi kifulo kia binyibinyi na buumune. Tui belekene na bingi bipuilo bioso, muanda tui nka bu kifuko kimune, sunga tuekala beumbo kinyi sunga ba kipikua kinyi. Tukuete kumona kishinkamisho kia kifulo kia binyibinyi pa tutuele mu bisangilo bia kakongie, ku bikongeno bia efuku dimune, na bikongeno bia mafuku asatu. Kino kishinkamisho akinyingisha lukumino luetu’shi lulanguilo luetu ndukuminyibue na Yehowa.

14. Muyile Bena-Kolose 3:12-14, mushindo kinyi wi na muulo watudi balombene kulesha’shi tui befulene bikata?

¹⁴ Bifundue abitulungula biatudia “kwikala atuifulêna kifulo kikata.” (1 Mp. 4:8, EEM) Mu mushindo umune watuileshena kino kifulo mpa kuifuidishena lusa, na kuleka kutala kukutua kua kupuidika kua bakuetu. Atukimbaa mishindo ya kuikala na kalolo pa kukukila bakuetu boso mu kakongie, mpa na baba abetukitshina bilubilo. (Badika Bena-Kolose 3:12-14.) Su tubalesha kifulo kibino atushinkamisha’shi tui bena Kidishitu ba binyibinyi.

15. Mu ingi mishindo kinyi muatulondo kileshesho kia lulanguilo kiabadi betulekiele kui bena Kidishitu ba mu siekele a kumpala?

¹⁵ Tukuete kulonda kileshesho kia lulanguilo lua kakongie ka bena Kidishitu ba mu siekele a kumpala mu ungi mushindo wi buwa. Bu kileshesho, ndumbuluilo etu mutuule mianda mu mulongo​—atuula bakunkushi ba bifunda, bakulu, bafubi ba midimo​—anka bu bibakitshine batumibua ba mu siekele a kumpala. (Fid. 1:1; Tt. 1:5) Mueneno etu pabitale lusandi na eyibakishi, biatunemeka mase bu kintu kia kishila, na lukalo luetu lua kukaluila kakongie kui bankitshishi a bubi bashabelanga, bino bioso abilesha’shi atuambula kileshesho kia bena Kidishitu ba mu siekele a kumpala.​—Bik. 15:28, 29; 1 Kod. 5:11-13; 6:9, 10; Eb. 13:4.

16. Nkinyi kibatulongiela mu mianda ayakula Bena-Efeso 4:4-6?

¹⁶ Yesu bakuile’shi be bungi abakeyitanyina bu balongi bande, anka ntambebikale nya. (Mat. 7:21-23) Bifundue abitulungula’shi, mu mafuku a kunfudilo be bungi abakekala nka penda “abelesha bu bena Efile.” (2 Tim. 3:1, 5) Bible etupatuluila kalolo’shi, kui “lukumîno lumune” luabadi bakumine kui Efile Mukulu.​—Badika Bena-Efeso 4:4-6, EEM.

17. Lelo uno mbananyi bakuete kulonda Kidishitu na bakuete kulesha lukumino lua binyibinyi?

¹⁷ Mbantu kinyi bakuete kulesha lukumino lumune lua binyibinyi lelo uno? Tubakatuka mu kutaluula akibishinkamisha. Tubamuno dingi kileshesho kia lulanguilo lubalongieshe Yesu na bibakitshine bena Kidishitu ba mu seikele a kumpala. Lualulo lui nka penda lumune​—mba Temue ba Yehowa. Tui na kinemo kia kuikala muilo umune wa Yehowa auku bia binyibinyi pabitale Yehowa na bi mpango yaye! Biabia abitungu tutungunukie na kukita kioso akitungu bua kukuatshidila ku kishinkamisho kikata.