1. Nshalelo oobe baadi naminyi kumpala kobe kubanga kulonga Bible?

 NSHALELO oobe baadi naminyi kumpala kobe kubanga kulonga Bible na ba Temue ba Yehowa? Be bungi ba kuatudi, t’abakumiinaa kunangushena pabitale uno muanda nya. Binangu bietu na bumuntu buetu, bibaadi na bukitshishi bua uno ndumbuluilo​—ku kiakia ki’atuakula sunga ku kiakia kiatudi na matalua akukita sunga kiekala kibi. Sunga mbiabia, tubaadi “bashii na lukulupilo, na bashii na Efile Mukulu pa nsenga.” (Ef. 2:12, Kilombeeno Kipya 2014) Bible mmushintule mianda yoso!

2. We mutundule kinyi kunyima kobe kubanga kulonga Bible?

² Anka kunyima kobe kubanga kulonga Bible, we mutundule’shi we na Nshobe a muiyilu mukufule ngofu. We mumone’shi su okumiina kusankisha Yehowa, na kufika umune a mu kifuko kia balanguidi baye, we mulombene kushintuluka ngofu mu nshalelo oobe, mu mueneno oobe na mu kunangushena kobe. Na we mulombene kulonga bia kukita kiakia akiamba Yehowa’shi ki buwa, na kuleka kukita kiakia akiamba Yehowa’shi ki bubi.​—Ef. 5:3-5.

3. Muyile Bena-Kolose 3:9, 10, Yehowa akumiina’shi tukite kinyi, na nkinyi ki’atukesambila mu uno muisambo?

³ Bu bi Yehowa mmupangi eetu na Nshetu a muiyilu, e na matalua a kuata kitshibilo kia kulesha, bena kifuko kiaye abamulanguilaa kiabadia kukita. Etutekie’shi kumpala kuatudia kubatshishibua, abitungu tuikitshishe buatudia “kufuula muntu a kala na bikitshiino biaye.” * (Badika Bena-Kolose 3:9, 10.) Uno muisambo aukakuasha booso abakumiina kubatshishibua, buabadia kualuula ino nkonko isatu: (1) “Bumuntu bua kala nkinyi”? (2) Buakinyi Yehowa etutekie buatudia kuibufuula?  (3) Tui kuibikita naminyi? Buatue booso bapue kubatshishibua, uno muisambo auketukuasha buatudia kuleka, ngikashi ya muntu a kala iki’ayimueneka muatudi.

4. Muntu paadi mumunyibue na “bumuntu bua kala” ekalaa na bikitshiino bi naminyi?

⁴ Muntu abadi bamune kui “bumuntu bua kala” akambaa kunangushena na kukita mianda nka ya miluisho. Mmulombene kuikadika muntu a ku mbidi akuataa nsungu bukidi, shi na lutumbu na e na kuitatula. Mmulombene kukumiina kubandila bintu abilesha pornografi, na kubandila mianda ya bukitekite, na ma filme aalesha mianda ya buntomboshi. Kushi mpaka e na ingi ngikashi ibuwa, mmulombene kupusha bi bubi pabitale mianda ibi yadi muakule sunga yadi mukite. Anka te na namu kiinyi kia kumutakula bua’shi ashintule kunangushena kuaye na muikeelo waye nya.​—Nga. 5:19-21; 2 Tim. 3:2-5.

5. Tui balombene kukatusha bumuntu booso bua kala su? Patuula (Bikitshino 3:19)

⁵ Tui bantu bakutue kupuidika, biabia ta tui balombene kukatusha kalolo binangu bioso bi bubi na ngabiabi i muishimba na mu binangu bietu nya. Ingi nsaa, atukakitshi sunga kuakula muanda w’atukenyongola kunyima. (Yel. 17:9; Shak. 3:2) Biabia, nsaa y’atufuulu bumuntu bua kala, binangu bia ku mbidi na bikitshiino bia bumuntu a kala t’abiikala bitumune dingi nya. Na t’abituikeela bukopo bua kutundula’shi tui bantu ba mushindo kinyi nya.​—Yesh. 55:7; badika Bikitshino 3:19.

6. Buakinyi Yehowa etutekie bua kukatusha binangu bioso bi bubi na biubishi bi bubi bia muntu a kala?

⁶ Yehowa etutekie’shi tukatushe binangu bioso bi bubi, na biubishi bi bubi kumuanda mmuitufule ngofu, na akumiina’shi tuikadikie na muloo mu nshalelo eetu. (Yesh. 48:17, 18) Yehowa auku’shi baaba booso be na ngabiabi ibi, abeluishisha abo banabene na kuluishisha bangi. Abimuinyongoshaa pa kumona atuiluishisha na kuluishisha bangi.

7. Muyile mukanda wa Bena-Looma 12:1, 2, tui kumpala kua kitshibilo kinyi?

⁷ Bangi ba kuuku betu, na bena kifuko be bungi be kubanga kuitusepa, p’atuikitshisha bua’shi tushintule bumuntu buetu. (1 Mp. 4:3, 4) Be kuamba’shi tui na matalua a kukita kioso kiatukumiina, na ta tui bia kutengiela’shi bangi betulungule kiatudia kukita nya. Anka baaba booso abasumbushena mayi a kulonda a Yehowa,  ta be mu bulungantu nya. Mu binyibinyi, be nka mu bukitshishi bua ndumbuluilo a Satana. (Badika Bena-Looma 12:1, 2.) Atue booso tui kumpala kua kino kitshibilo: Tui kuata kitshibilo kia’shi tushaale na muntu eetu a kala, mumunyibue na miluisho na ndumbuluilo a Satana, sunga kuata kitshibilo kia kutadiila’shi Yehowa, eetualuule buatudia kuikadika bantu be buwa kubanga binobino.​—Yesh. 64:8.

8. Nkinyi kilombene kuitukuasha bua kuleka binangu bi bubi na biubishi bi bubi?

⁸ Yehowa auku’shi abitungu nsaa na kuikitshisha, buatudia kuleka biubishi bi bubi na binangu bi bubi. (Mis. 103:13, 14) Biabia, kukiila Kuiyi diaye, na kikudi kiaye kiselele, na ndumbuluilo aaye, Yehowa kuete etupa binangu na bukome, na kuitukuatshishena bua’shi tumone bia kushintuluka ku biabia biatudi bekale. Kushi mpaka, mmupue nkukuasha. Binobino, tutaleyi ingi mianda yodi mulombene kukita bodia kuenda kumpala, na kufuula muntu a kala bua’shi wekale mulombane bua kubatshishibua.

9. Eyi di’Efile Mukulu di nkukuasha bua kukita kinyi?

⁹ Fubisha Bible bodia kuitaluula obe nabene kalolo. Eyi di’Efile Mukulu dinka bu lumueno, ndilombene nkukuasha bodia kuitaluula mu kunangushena kobe, mu ngakuilo oobe, na mu bikitshiino biobe. (Shak. 1:22-25) Mulongieshi oobe a Bible na bangi bena Kidishitu banyingie mu kikudi, mbalombene nkukuasha mu ingi mianda. Bu kileshesho, be kufubisha Bifundue bua nkukuasha bua’shi, otundule pe bukome bobe na poodi mubofuile. Be nkulongiesha mushindo, oodi mulombene kupeta mianda ya mu Bible yodia kutumikila bu elango, bua’shi okambile biubishi biobe bi bubi. Na Yehowa e kuanka nsaa yoso buadia nkukuasha. Auku mushindo wibuwa wadia nkukuasha; na auku lukalo lui muishimba diobe. (Nki. 14:10; 15:11) Biabia, ikala na kiubishi kia kumutekanga na kubadikanga Eyi diaye efuku dioso.

10. Bolongiela kinyi ku kileshesho kia Elie?

¹⁰ Ikala mushinkamishe’shi mayi a kulonda a Yehowa e buwa. Kioso ki’abetutekie kui Yehowa bua’shi tukite, mbua buwa buetu. Booso be na nshalelo muipushene na miya yaye, abapete kineemo, nshalelo e buwa, na muloo wa binyibinyi. (Mis. 19:7-11) Baaba booso bash’abaneemeka mayi a kulonda a Yehowa, bakuete kukienga na bipeta abitukila ku bikitshiino biabo bia ku mbidi. Tala bibambile ungi muana mulume abetanyina bu Elie pabitale kusumbushena mayi a kulonda a Efile Mukulu. Baadi mukudile kui banambutuile bafule Yehowa. Anka pa baadi Elie ende na kukula, baadi musangule kuikadika na bakuuku be bubi. Babangile kuikadika na nshalelo mubi a kutoma bintu abikoluana, kukita bukitekite, na kuiba. Elie amba’shi ne mumone ami nabene’shi, nabanga kuikala na nsungu ibungi na buntomboshi. Amba dingi’shi: “Naadi mukite kintu kioso kiakia kinandi mulongie’shi muina Kidishitu ta mmulombene kuikikita.” Sunga mbiabia, Elie nta muiluankane mianda ibaadi mulongie ku bukinga nya. Mfudiilo a bioso, babangile dingi kulonga Bible. Baadi muikitshishe ngofu buadia kukatusha biubishi biaye bi bubi, na abatshishibua mu kipua kia 2000. Kuikala na nshalelo muipushene na mayi a kulonda a Yehowa kubamukuashishe naminyi? Elie amba’shi: “Binobino, ntandi na butaale bua mu binangu na kondo k’eshimba katooka.” * Uno muanda awitulesha’shi, baaba booso abasumbushena mayi a kulonda a Yehowa, abeluishisha abo banabene. Sunga mbiabia, Yehowa akumiina kuibakuasha bua’shi bashintulukie.

11. Mmianda kinyi yabadi bashikue kui Yehowa?

¹¹ Longa bia kushikua mianda yabadi bashikue kui Yehowa. (Mis. 97:10) Bible etulesha’shi Yehowa mmushikue “meeso a kwitatula, ludimi  lwa madimi; maasa aasukumuna mase a muntu shii musoole mwanda.” (Nki. 6:16, 17) Dingi, ‘mmushikwe baasha kwinêmeka na bankitshishi ba bubi boso.’ (Mis. 5:6, EEM) Yehowa mmushikue bino binangu bioso na bikitshiino ngofu, ngi buakinyi baadi mubutule bantomboshi booso ba mu kipungo kia Nowa, kumuanda babaadi baushe nsenga na buntumboshi. (Kib. 6:13) Tutaleyi kingi kileshesho. Kukiila kui mutemuki Malaki, Yehowa bambile’shi mmushikue baaba booso abakitshi mianda na bulamalama, bua’shi b’epeleene na muina dibaka naye shi musoole muanda. Efile Mukulu mmupele lulanguilo luabo, na akebatshibila kiimu muyile bikitshiino biabo.​—Mal. 2:13-16; Eb. 13:4.

12. ‘Kushikua bubi’ akulesha kinyi?

¹² Yehowa akumiina “tushikwe bubi.” (Lom. 12:9) Kishima “kushikwa” akilesha bi’atupusha mu binangu, na akilesha kushikua kintu kampanda ngofu, na kuleka kunangushena ku kianka. Banda kunangushena biodi mulombene kupusha su otekiele bia kudia, kadi babakupa elonga dia bia kudia binyangie. Pangi p’onangushena uno muanda we kupusha na maladi. Mu mushindo umune, su tuina kinangu kia kukita kintu kampanda ki’abakula kui Yehowa’shi ki bubi, abitungu tuikishikue.

13. Buakinyi abitungu tulame ngielelo eetu a binangu?

¹³ Lama ngielelo oobe a binangu. Binangu bietu, bi na bukitshishi ku bikitshiino bietu. Ngi buakinyi Yesu mmuitulongieshe buatudia kusumbula binangu, bilombene kuitukunkusha mu kukita muluisho ukata. (Mat. 5:21, 22, 28, 29) Tui bashinkamishe’shi atukumiina kusankisha Nshetu e muiyilu. Bi na muulo ukata, nsaa y’atusumbula musuusa nka umune bintu bioso bi bubi bilombene kuitufikila mu binangu bietu!

14. Ngakuilo eetu alesha kinyi, na nkonko kinyi yatudi balombene kualuula?

¹⁴ Lama ngakuilo oobe. Yesu bambile’shi: “Anka bintu abituukila kukanwa abifiki mwishimba.” (Mat. 15:18, Kilombeeno Kipya 2014) Eyendo, ngakuilo eetu alesha mianda ibungi pabitale biatudi munda muetu. Biabia, eyipushe ino nkonko: ‘Ne mushikue madimi, sunga kuakula bia binyibinyi abikamfuishiisha lukalakashi su? Bu biandi ne muibakile, nadimukilaa kupela kukisha nsaa ibungi na mukashi sunga na mulume shi ande su? Ne mulekie ngakuilo e butete abadi baubiile kui bantu booso su? Nsaa ayingolomona muntu, naumiinaa bisumanga kushi kumualuula su?’ Okapete bukuashi bukata p’onangushena pabitale ino nkonko yoso. Abitungu ngakuilo oobe ekadikie e  buwa (ngakuilo a muntu mupia). Su wekitshisha mobe mooso biodia kukatusha ngakuilo mubi, madimi, na ngukuilo e butete mu ntentekieshi yobe, okamono’shi mbibofule bodia kufuula muntu a kala.

15. Kukookola bumuntu buetu bua kala ku “mutshi wa makienga” akupushisha kinyi?

¹⁵ Atukumiina kuata bitshibilo bia kukita mianda i buwa. Mpoolo baadi mufubishe bileshesho bua kuitulongiesha mianda i na muulo, bua’shi tushintule nshalelo eetu. Mpoolo bafundile’shi abitungu’shi “muntu eetu a kala” akookolue ku “mutshi wa makienga.” (Lom. 6:6, NWT) Mu ungi ngakuilo, atukumiinaa kulonda kileshesho kia Kidishitu. Abitungu tukatushe binangu na bikitshiino biabadi bashikue kui Yehowa. Abitungu tuele ano ooso matabula, buatudia kupeta kondo k’eshimba katooka bua’shi tupete muwa wa ikalayika. (Yo. 17:3; 1 Mp. 3:21) Tentekiesha’shi Yehowa ta mmulombene kushintula mayi aaye a kulonda bua kuitusankisha nya. Mu kuilekeena na biabia, abitungu atue tushintule bumuntu buetu na tukookiele mayi aaye a kulonda.​—Yesh. 1:16-18; 55:9.

16. Buakinyi abikutungu wate kitshibilo kia kutungunuka na kukambila nkalo ibi ya ku mbidi?

¹⁶ Tungunuka na kukambila nkalo i bubi ya ku mbidi. Sunga kunyima k’obe kubatshishibua, abitungu otungunukie na kukambila nkalo i bubi ya ku mbidi. Tala mianda yabadi bamone kui muntu abetanyina bu Maurício. Pa baadi ki nsongua, babangile kuikadika na nshalelo a kutambuka lusandi na balume naye. Kunyima, baadi mufumankane na muilo wa Yehowa na babangile kulonga Bible. Kunyima kuaye kushintuluka mu nshalelo aaye, baadi mubatshishibue mu kipua kia 2002. Sunga mbitaadi mupue kufubila Yehowa bipua bi bungi, Maurício amba’shi: “Ne mulombene kuamba’shi nkiantungunuka nka na kulua bua kukambila nkalo ya ku mbidi i bubi.” Ta mulekie’shi bino bimutshoboloshe nya. Amba dingi’shi: “Naadi muikale n’eshimba dinyingie na kuuka’shi su nasangula kupela kukita mianda muyile nkalo ibi ya ku mbidi, ne mulombene kusankisha Yehowa.” *

17. Nkunyingishibua kinyi kubopete pabitale muanda wabadi bamone kui Nabiha?

¹⁷ Teka bukuashi bua Yehowa na okulupile kikudi kiaye, kushi kukulupila mu bukome bobe’be nabene. (Nga. 5:22; Fid. 4:6) Abitungu tuate kitshibilo kia kufuula muntu a kala na kuleka kumulama. Tubande kutala muanda ubabamuene kui muana mukashi abetanyina bu Nabiha. Nshaye baadi mumusumbushene pa baadi na bipua bisamombo. Amba’shi: “Bibaadi abinkalakasha  mu binangu ngofu.” Pa baadi ende na kukula, Nabiha baafikile muntu e na nsungu ibungi na e na bukielo bukile. Babangile kusunga na bintu abikoluana, abo nkumukuata na nkukisha bipua bi bungi mu lukano. Ba Temue ba Yehowa babaadi bamutembele mu lukano, abo nkubanga kulonga naye Bible. Nabiha babangile kushintuluka ngofu. Amba’shi: “Ingi nsaa mu nshalelo ande, bibaadi bimbofuile buandia kushintuluka naleka biubishi biande bi bubi.” Anka “bua kuimika kutoma mfuanka bibaadi muanda wi bukopo.” Nabiha baadi muikitshishe munda mua bipua bibungi, na ku mfudiilo kua bioso bapetele mushindo wadia kuleka kutoma mfuanka. Baadi muibikite naminyi? Amba dingi’shi: “Ki na muulo ukata, naadi natekie Yehowa nsaa yoso bua’shi ankuashe mmone bia kuibiobesha.” Binobino, alungula bangi’shi: “Ne mushinkamishe’shi su ne mufikie mu kushintuluka, mbua kusankisha Yehowa, na muntu ooso mmulombene kuibikita!” *

18. Muyile 1 Bena-Kodinda 6:9-11, bafubi be bungi b’Efile Mukulu mbapete ngobesha ya kukita kinyi?

¹⁸ Bangi bana bakashi na bana balume babaabadi basangule kui Yehowa mu siekele a kumpala, bua’shi bakamunane pamune na Kidishitu muiyilu, babaadi abakitshi n’abo mianda i bubi kumpala. Bu kileshesho, babaadi bantambushi ba lusandi, abalaala na bakashi nabo sunga na balume nabo, na bangifi. Ku bukuashi bua kikudi kiselele ki’Efile Mukulu, mbamone biabadia kushintuluka ku bumuntu buabo. (Badika 1 Bena-Kodinda 6:9-11.) Mu mushindo umune na lelo uno, Bible mmukuashe midiyo ya bantu buabadia kushintuula nshalelo aabo. * Mbalekie bikitshiino biabo bia kala bi bubi. Bileshesho biabo abilesha’shi nnobe namu we mulombene kushintuluka mu bumuntu bobe na olombana a kubatshishibua.

19. Nkinyi ki’atukesambila mu muisambo aulondo?

¹⁹ Kukatusha kuikitshisha bua kufuula muntu a kala, booso abakumiina kubatshishibua abitungu bekitshishe bua kufuala muntu mupia. Mu muisambo aulondo, atukesambila mushindo watudi balombene kuibikita, na mushindo ulombene bangi kuitukuasha.