Mu uno muanda wi bino kakongie nkalombene kumona eyibakishi dia kala bu dibaafu, nsaa i mulume bayibakila dimonyi na bafundisha eyibakishi diaye dipia. Bua kupusha tubingilo tua bino bibatuakula kalolo tutaluuleyi kibakuile Yesu pabitale kuipaa dibaka na kuibakila dimo.

Anka bu biabebilesha mu Mateo 19:9, Yesu balesheshe kabingilo kamune ka kuipaa dibaka. Bambile’shi: “Muntu ooso akupela mukashi aaye, kushii pa mwanda wa lukyebanokyebano, n’ayibakila mungi, batambuka lusandji.” Ku ano mayi a Yesu atuikulongiela’shi (1) kutambuka kua lusandi nyi nkabingilo kamune ka mu Bible bua kuipaa dibaka na (2) mulume apele mukashi aye kushi kabingilo ka mu Bible na ayibakila mungi batambuka lusandi. *

Ano mayi a Yesu aakiebe kulesha’shi mulume ekutambuka lusandi bua kuipa dibaka na mukashi aye bua kano kabingilo ka mu Bible na ekala bulungatu bua kuibakila dingi? Nya ta bina muulo. Su mulume batambuka lusandi mukashi shi musoole muanda nyi e na kitshibilo kia kumufuila lusa sunga kumupela. Na su babakitshisha mikanda ya kuipaa dibaka, boso babidi be bulungantu bua kuibakilua dingi na babakumbasha akitungu kukita bua kuipa dibaka.

Ku lungi lupese, kui mushindo wa’shi mukashi shi musoole muanda akumiine kulama bulunda buaye na kushaala na mulume aye, na mulombene kulungula mulume aye’shi nakumiina nkufuila lusa. Kadi, nkinyi kilombene kukitshika su mulume batambuka lusandi bapele lusa lubabamufuila kui mukashi aye, na bapete mukanda wa kuipaa dibaka wadi muele kiala aye nabene? Pa muanda mukashi akumiina kumufuila lusa na kutungunuka mu eyibakishi diaye mulume te na kabingilo ka mu Bible akamupa bulungantu bua kuibakila dingi. Su mulume baata nka kitshibilo kia kuibakila ungi mukashi aku te na bulungantu bua mu Bible bua kuibikita, batambuka dingi lusandi, paapa abitungu bakulu ba mu kakongie bamutueshe dingi mu komite bua kumusambisha bua bubi buaye bua kuete kukita.​—1 Kod. 5:1, 2; 6:9, 10.

Su muntu te na kabingilo ka mu Bible akamupa bulungatu bua kuibakila dingi, kakongie nkalomebene kumona naminyi eyibakishi diaye dia kala na eyibakishi diaye dipia? Muyile Bifundue eyibakishi diaye dia kala di kinka kuanka su? Mukashi shi musoole muanda ki’atungunuka na kuata kitshibilo kia kufuila sunga kupela mulume aye a kala su? Eyibakishi dipia di kumueka bu dia lusandi su?

Mu mafuku a kala, kakongie kabaadi akamono eyibakishi dipia bu dia lusandi su mukashi shi musoole muanda kiatala, bashala shi muibakilue na tamusanganyibue mu mianda ya lusandi. Biabia, Yesu ta baadi mutemune mukashi shi musoole muanda nsaa ibaadi esambila kuipa dibaka na kuibakila dingi nya. Baadi mupatuule’shi mulume afiki na mukanda wa kutshiba nao dibaka  kushi kabingilo ka mu Bible na kuiyibakishena na ungi mukashi, batambuka lusandi. Mu uno muanda, kuipaa dibaka na kuibakila dingi kubadi Yesu muakule bu kutambuka kua lusandi, akuipa dibaka dia kumpala.

Nsaa ayifu dibaka pa muanda wa kuiditshiba na kuibakila dingi, lusa sunga kupela kua mukashi shi musoole muanda kua mulume aye ta kui na muulo. Biabia mukashi te na bushito bua kuata kitshibilo ki bukopo kia kufuila mulume aye a kala lusa sunga kumupela nya. Dingi mukashi shi musoole muanda sunga afua, sunga ebakilua dingi, sunga atambuka lusandi biabia ta mbilombene kushintula mueneno a kakongie pabitale eyibakishi dipia nya. *

Mu kino kileshesho kiatubaata, mulume batambuka lusandi bua kuipa dibaka na mukashi aye. Kadi bikuikadika naminyi su mulume ta mutambukie lusandi kadi bayipa dibaka na bebakila dingi? Sunga’shi su mulume ta mutambukie lusandi kumpala kua kuipa dibaka na mukashi aye, kadi be lutambuka kunyima kua kuipa dibaka na bebakila dingi aku namu mukashi aye akumiina kumufuila lusa? Mu bino bileshesho bioso bibidi kuipa dibaka na kuibakila dingi bioso nkutambuka kua lusandi, na abiyipa dibaka dia kumpala. Eyibakishi dipia abitungu bedifundishe ku mbulamatadi na bedikumiine. Anka bu bibaadi bileshe Kitenta kia Mulami kia mu 15/2/1980, esak. dia 31-32 shi, “binobino bitaadi mupue kuibakila dingi, ta mulombene kualukiila kuiyibakishi diaye dia kala nya muanda ndipue kufua, na editshiba, na atambuka lusandi na ayibakila dingi.”

Uno mpushisho mupia t’abepuula’shi eyibakishi nkintu kia kishila nya na t’abepuula dingi bubi bua kutambuka lusandi nya. Mulume ayipaa dibaka na mukashi aye kushi kabingilo ka mu Bible akupu eyibakishena na ungi mukashi, kua shi na kabingilo ka mu Bible akamupa bulungatu bua kuibikita atuele mu kumote a kusambisha pa muanda wa lusandi. (Su mukashi aye mupia Temue a Yehowa, n’aye namu atuele mu komite akusambisha bua muanda wa lusandi.) Sunga eyibakishi diabo dipia tandiatshibue bu eyibakishi dia lusandi, yawa mulume ta mulombashe mianda itekibue bua kupeta midimo mu kakongie munda mua bipua bi bungi. Bu biabidi’shi bantu be bungi mbakalakashue na kiakia kiadi mukite, abimueka’shi ki muluishe nkumo yaye. Kumpala a kumupa midimo mu kakongie abitungu bakulu baukie ingi mianda pabitale mukashi aye a kala aadi muluishishe na bana badi mulekie baki bakinga.​—Mal. 2:14-16.

Bu bi bena Kidishitu abauku bubi bua kuipa dibaka na kuibakila dingi, mu kuikutuena na abianmba Bible abitungu bekale badimukie bua kumona mianda bu abiyimono Yehowa, na baate eyibakishi bu kintu kia kishila.​—Mul. 5:4, 5; Eb. 13:4.