1. Mmushindo kinyi watudi balombene kumona kineemo kia kuteka Yehowa?

 TUI na kineemo kikata kiabadi betupe, kui Mupangi a eyilu na nsenga, kiabuntu ki buwa, keneemo kia kumuteka. Tubande kunangushena: Tui balombene kufunguila Yehowa mashimba eetu nsaa yoso, na mu ludimi looso lu’atukumiina. Sunga biekala’shi ta tui baate naye nsaa ya kuisamba, tui balombene kumuteka patudi na maladi mu lupitalo, patudi mu lukano, bashinkamishe’shi Nshetu sha kifulo etuteemesha. Tui na lutumbo lukata bua kino kiabuntu.

2. Mmushindo kinyi ubaadi Mfumu Davide muleshe’shi mmuate kineemo kia kuteka na muulo?

² Mfumu Davide baadi muate kineemo kia kuteka na muulo. Baadi muyimbile Yehowa’shi: “Luteko luande, luikale bu kabanda kalumbuulue kumpala koobe.” (Mis. 141:1, 2, NWT) Mu mafuku a Davide, kabanda kabaadi kintu kia kishila, muanda babaadi abekafubisha mu lulanguilo lua binyibinyi kui ba tshite-muankuidi, na babaadi abekalumbuula na kuikalama kalolo. (Efi. 30:34, 35) Davide baadi akumiina kunangushena kalolo kiakiebe nkakula nsaa y’akatekie Yehowa, nka bu bibaabadi abalumbuula kabanda kalolo, kumpala kua kuikafubisha. N’atue namu ngi biatudi balombene kukita kumpala kua kuteka. Atukumiina’shi teko yetu isankishe Yehowa.

3. Tui balombene kuikala na kinangu ki naminyi nsaa y’atuifubuila Yehowa mu luteko, na mbuakinyi?

³ Nsaa y’atutekie Yehowa, abitungu tulekie kutenkanga nka luteko luatudi bawubiile. Pamutue pa kuteka biabia, abitungu tutekie Yehowa na kaneemo kakata. Nangushena pabitale bimonua bia kukanya bibabamuene kui Yeeshaya, Esekyele, Ndanyele,  na Yowano. Bino bimonua bioso bibaadi bilekeene ku muntu na muntu, anka bibaadi na ingi mianda i mumune. Bioso bimonua mbileshe Yehowa bu Mfumu mukata. Yeeshaya ‘bamuene Yehowa mmushaale pa lupuna-nsulu lukile bula.’ (Yesh. 6:1-3) Esekyele bamuene Yehowa mmushaale ku etempu diaye dia muyilu, muifunyishwe ‘n’etâta . . . adipenyapenya bu nkongolo.’ (Es. 1:26-28, EEM) Ndanyele bamuene “Mukulu a Mafuku” bilamba biaye bibaadi bitooka soo bu mulemba, na ndimi ya kaalo ibaadi ayituukila ku lupuna-nsulu Luaye. (Nda. 7:9, 10, EEM) Na Yowano namu, bamuene Yehowa mmushaale ku lupuna-nsulu muifunyishue na kingi kintu ki buwa bukile nka bu ebue dia émeraude. (Kibaf. 4:2-4) Nsaa y’atunangushena bua ntumbo wa Yehowa ishi ya kunangushena, atutentekiesha bukata bua kineemo kia kuifubuila kuadi mu luteko, na muulo wa kukita luteko na kaneemo. Biabia tui kuteka pabitale kinyi?

4. Nkinyi kibatulongo mu bishima bia mbangilo bi mu luteko lua kileshesho lu’atupete mu Mateo 6:9, 10?

⁴ Badika Mateo 6:9, 10. Mu muisambo waye wa pa muengie Yesu balongieshe balongi baaye biabadia kuteka, mu mushindo ausankisha Efile Mukulu. Kunyima kua kuamba’shi: “Bino nyi byanudya kwikala anutekye,” Yesu baadi mutemune kia kumpala mianda i na muulo ipushene na mpango ya Yehowa, ya kutumbisha eshina Diaye, kufika kua Bufumu buaye, na kubutula kua beshikuanyi booso be’Efile Mukulu, na mianda i buwa y’akiebe nkakitshina bantu pa nsenga mu mafuku aafiki. P’atutuesha uno mianda yoso mu nteko yetu, atulesha’shi kikiebe kieshimba ki’Efile Mukulu ki na muulo kuatudi.

5. Bi buwa kuteka Yehowa pabitale mianda yetu’tue banabene su?

⁵ Mu kipindi akilondo kia luteko, Yesu balesheshe’shi bi buwa tutekie pabitale mianda yetu atue ba nabene. Tui balombene kuteka Yehowa bua’shi etupe bidibua bia kuifuku, etufuile lusa ku miluisho yetu, etukaluile ku bitompuanga na kuitufungusha kui mubi. (Mat. 6:11-13) Nsaa y’atutekie Yehowa bino bintu bioso, atulesha’shi tuibamukulupile, na’shi atukiebe kukuminyibua naye.

6. Tui balombene kuteka nka penda mianda yabadi bateemune mu luteko lua kileshesho su? Patuula.

⁶ Yesu tabaadi mutekie balongi baye bua’shi, bambuule nka bishima bioso bi mu luteko  lua kileshesho nya. Mu ingi nteko ibaadi Yesu muele baadi mutemune mianda ilekeenelekeene ibaadi na muulo kuadi mu yaya nsaa. (Mat. 26:39, 42; Yo. 17:1-26) Mu mushindo umune, tui balombene kuteka pabitale kintu kioso kiakia kitutale. Nsaa y’atuata kitshibilo, tui balombene kuteka binangu na kiukilo. (Mis. 119:33, 34) Nsaa y’abetupa mudimo kampanda wi bukopo, tui balombene kuteka binangu bua kumona mushindo wa kuiwukita. (Nki. 2:6) Banambutuile mbalombene kutekiela bana baabo, bana namu mbalombene kutekiela baledi baabo, na atue booso tui balombene kutekiela balongi betu ba Bible, na bano booso b’atulungulaa mukandu wibuwa. Biabia nsaa y’atutekie, t’abitungu tutekie Yehowa nka penda bukuashi nya.

7. Buakinyi abitungu tutumbishe Yehowa mu luteko?

⁷ Abitungu tutentekieshe’shi atutumbisha Yehowa mu nteko yetu. Ta kui muntu su ngumune mulombene ntumbo kukila Efile Mukulu eetu nya. Yehowa “e buwa na e kuanka bua kufuilana lusa.” E na’nyi “lusa lukata na t’akuataa nsungu bukidi, mmuule ndaa na kifulo ki na lulamato na lulamato.” (Mis. 86:5, 15, NWT) Kushi mpaka, tui na kabingilo ke buwa ka kutumbisha Yehowa bua biadi muikale na bia kuete kukita.

8. Tui kutumbula Yehowa bua bingi bintu kinyi? (Misambo 104:12-15, 24)

⁸ Kukatusha kutumbisha Yehowa mu nteko yetu, abitutakula bua kumutumbula, bua bintu bi buwa biakuete etupa. Bu kileshesho, tui balombene kumutumbula, bua malangi e buwa atumonaa ku bilongo, na bua bidibua bilekeenelekeene bietupeyaa, na bua muloo w’atudi nao bua ba kuuku batudi bafule. Nshetu sha kifulo muitupe bino bintu, na bingi bi bungi bua nka penda’shi tuikale na muloo. (Badika Misambo 104:12-15, 24.) Nkintu ki na muulo ukata, atutumbulaa Yehowa bua bidibua bi bungi bia mu kikudi bia kuete etupa, na bua lukulupilo lui buwa bukile luatudi nalo bua mafuku aafiki.

9. Nkinyi kiatudi balombene kutentekiesha bua kutumbula Yehowa? (1 Bena-Tesalonika 5:17, 18)

⁹ Mbilombene kuikadika bibofule buatudia kuiluankana kutumbula Yehowa, bua bioso bia kuete kuitukishina. Nkinyi kilombene kukuasha bua kutentekiesha? We mulombene kufunda mulongo wa bintu biodi mutekie Yehowa, na kuiyitaluula ungi nsaa bua kumona mushindo  ukualuule Yehowa ku yanka. Dingi ela luteko bua kumutumbula bua bukuashi buaye. (Badika 1 Bena-Tesalonika 5:17, 18.) Tubande kunangushena pabitale uno muanda: Atuikalaa na muloo ukata na lutumbu nsaa i bangi abetutumbula namu. Mushindo umune, nsaa y’atutentekiesha bua kutumbula Yehowa, buabiadi mualuule ku nteko yetu abimuikashaa na muloo. (Kol. 3:15) Biabia, kui tungi tubingilo tui na muulo bua kutumbula Efile Mukulu eetu?

10. Muyile mukanda wa 1 Mpyeele 2:21, buakinyi tui na kabingilo ka kutumbula Yehowa bua biadi mutume Yesu pa nsenga?

¹⁰ Badika 1 Mpyeele 2:21. Abitungu tutumbule Yehowa buabiadi mutume Muana aaye a kifulo bua kuitulongiesha. Atulongo mianda i bungi pabitale Yehowa, na pabitale mushindo wa kumusankisha, p’atulongo nshalelo a Yesu. Su tuekala na lukumiino mu mulambu wa Kidishitu, tui balombene kuikadika mu kipuano kia pa bupenka na Yehowa Efile Mukulu na kusankila butaale pamune n’Aye.​—Lom. 5:1.

11. Buakinyi abitungu tutekie muishina dia Yesu?

¹¹ Atutumbulaa Yehowa, muanda tui balombene kumuteka muishina dia Muana aaye. Yehowa afubishaa Muana aaye bua kuitupa kiakia kiatumutekie. Yehowa ateemeshaa na alulaa nteko y’abamutekie muishina dia Yesu. Yesu baadi mupatuule’shi: “Kintu kioso kianudia kuteka mwishina diande, nankekikitshi, bwa’shi Yaya atumbishiibwe mu Mwana.”​—Yo. 14:13, 14, Kilombeeno Kipya 2014.

12. Nkangi kabingilo kinyi kakutumbula Yehowa bua Muana aaye?

¹² Yehowa etufuilaa lusa ku miluisho yetu, kukiila ku mulambu wa nkuulo ya Yesu. Bifundue abilesha Yesu bu “tshite-mwakwidi e pa nundu e byabya mushâle mwiilu ku mboko ibalume ku lupuna-nsulu lw’Efile Mukulu sha ntumbo yoso.” (Eb. 8:1, EEM) Yesu nyi ‘muakuidi eetu kumpala kua Nshetu a muiyilu.’ (1 Yo. 2:1, EEM) Tui na lutumbu lukata kui Yehowa bua biadi muitupe Tshite-muankuidi Mukata, etuula pa mbalo yetu, apushaa bi kubofula kuetu, na “etwakwilaa”! (Lom. 8:34; Eb. 4:15) Tui bantu bakutue kupuidika, biabia su ta mulombu wa Yesu ta tui balombene kupeta mushindo wa kuifubuila kui Yehowa mu luteko nya. Kushi mpaka, we mulombene kukumiina’shi lutumbu luetu taluana lombane na kiabuntu ki buwa kiabadi betupe kui Yehowa nya, kiabuntu kia Muana aaye a kifulo!

13. Bufuku kumpala kua lufu luaye, mushindo kinyi ubaadi Yesu muleshe’shi mmufule balondi baaye?

¹³ Bufuku kumpala kua lufu luaye Yesu batekiele kipindi ki bula bua balongi baaye, batekanga Nshaye “bwa kwibakalwila kwi mubi.” (Yo. 17:15) Bino, bibalesheshe bi kifulo kia Yesu kuabadi! Sunga mbibaadi muukie’shi mu kapindi kapeela akiengie ngofu, baadi mutungunukie nka na kuikalakasha bua batumibua baaye.

14. Mmushindo kinyi watudi balombene kulesha’shi tui bafule bakuetu balume na bakashi?

¹⁴ P’atuambula Yesu, t’atutuulu binangu bietu nka penda mu kuteka bintu bietu bia ku mbidi, biatudi nabio lukalo nya. Mu kuilekeena na biabia, abitungu kuikale atutekie nsaa yoso bua bakuetu balume na bakashi. Nsaa y’atukitshi bino atukokiela ku muiya wa Yesu, wa kuifulena ku muntu na muntu, na atulesha Yehowa mushindo wi bukata bua kifulo kiatudi nakio bua bakuetu bena Kidishitu. (Yo. 13:34) P’atutekiela bakuetu balume na bakashi abibakuasha. Eyi di’Efile Mukulu aditulungula’shi “luteko lwa mululame alufubaa na bukome bwibungi.”​—Shak. 5:16.

15. Mbuakinyi balanguidi neetu be na lukalo na nteko yetu?

¹⁵ Balonguidi neetu bena lukalo na nteko  yetu, ku muanda bakuete kunyingiila nkalakashi i bungi. Tui balombene kuteka Yehowa bua’shi ebakuashe bamone bia kunyingiila mikumbo, masaku aatukila ku bintu bipangibue, ngoshi, kubinguabingua, na ingi nkalakashi. Tui balombene kuteka dingi, bua bakuetu balume na bakashi bakuete kufuba ngofu bua kukuasha bantu be mu lukalo. Pangi we mulombene kuiuka bangi bakuetu bakuete kufumankananga na ingi nkalakashi. Nsaa y’otekie obe nabene, we mulombene kutemuna mashina aabo mu luteko loobe. Atulesha kifulo kikata bua bakuetu p’atutekie Yehowa bua’shi ebakuashe bua kunyingiila.

16. Mbuakinyi abitungu’shi tutekie bua baaba booso bakuete kukunkusha munkatshi muetu?

¹⁶ Baaba booso bakuete kukunkusha mu tukongie, be na lutumbo lukata bua nteko ya bangi, na ikuete kuibakuasha. Mpoolo mutumibua baadi muukie’shi e mu lukalo lua’shi bangi namu bamutekiele. Bafundile’shi: “Ikalai anuntekyela ami namu bilombêne Efile Mukulu ampa bya kwakula, nsâ yankyebe kwakula byandja kwiûkisha bantu kushi mô mukandu wi buwa ubádi mwanda ufibwe.” (Ef. 6:19, EEM) Na lelo uno namu, tui na bakuetu balume be bungi bakuete kufuba ngofu abakunkusha munkatshi muetu. Atuibalesha kifulo p’atutekie Yehowa bua’shi ebeelele miabi ku mifubo yabo.

17-18. Nsaa kinyi yatudi balombene kuela luteko muishina dia bangi, na nkinyi akitungu’shi tulame mu binangu bietu?

¹⁷ Ingi nsaa, abetuitanyinaa bua kuela luteko kumpala kua bantu be bungi. Bu kileshesho, mukuetu mukashi kuete akunkusha kulonga kua Bible, mmulombene kuteka mukuetu mukashi bamushindikila buadia kuela luteko. Yawa mukuetu mukashi bamushindikila t’auuku mulongi a Bible kalolo nya. Biabia, e kuela luteko ku mfudiilo kua kulonga, p’akitshi bino mbilombene kumubofuila ngofu buadia kuela luteko aluipushena na nkalo ya mulongi.

¹⁸ Be kuteka mukuetu mulume, buadia kuela luteko mu bisangilo bia bulungudi, sunga mu bisangilo bia kakongie. Bakuetu balume babapa buno bushito, abitungu batuule mu binangu biabo, kepatshila ka kisangilo. Luteko t’alufubishuaa bua kulanga bangi mu kakongie, sunga bu kutuusha ngukisho nya. Kipindi kia kubanga bisangilo bia kakongie, ki na penda minute itano ya kuyimba loono na kuela luteko, biabia  mukuetu mulume eele luteko, t’abitungu’shi ‘akule mianda i bungi,’ bikishekishe ku bangilo kua bisangilo nya.​—Mat. 6:7, EEM.

19. Nkinyi akitukuasha bua kuikala belumbuule bua efuku dia kiimu kia Yehowa?

¹⁹ Abitungu tutuule luteko bu kintu ki na muulo ukata mu nshalelo eetu, bu biatukuete kuifubuila kuifuku dia kiimu kia Yehowa. Pabitale uno muanda, Yesu bakuile’shi: “Anka shaalaayi bapasukye, nwikale anutekye nguba ooso, bwanudy’a kwikala bapaashiibwe ku yaaya myanda yooso aikafiki.” (Luk. 21:36) Su tubekala atutekie nsaa yoso lukumiino luetu aluikala lunyingie, na atuikala belumbuule nsaa ayikafiki efuku dia kiimu ki’Efile Mukulu.

20. Mmushindo kinyi ulombene nteko yetu kuikadika bu miishi ya kabanda ina mapebue e buwa?

²⁰ Nkinyi kibatuisambila? Tubashimika kasele pabitale muulo wa kineemo kiatudi nio kia kuteka. Mianda i na muulo ayitungu’shi tuikadikie atutekie mu nteko yetu, mmianda i mu kuipushena na mpango ya Yehowa. Tuleshe dingi lutumbu lukata bua Muana a Efile Mukulu na bua Bufumu buaye bukuete kumunana, na kutekiela balanguidi neetu. Na dingi, tui balombene kuteka bua nkalo ya bintu bietu bia ku mbidi na bia mu kikudi. Nsaa y’atunangushena kalolo pabitale kiatukiebe kuakula mu nteko yetu, atulesha’shi tubaata kino kineemo ki buwa na muulo. Bishima bietu abikadika nka bu miishi ya kabanda i na mapebue e buwa kui Yehowa, “a Amusankisha.”​—Nki. 15:8.