1. Yehowa bakitshine kinyi kapindi kapeela kunyima kua Adame na Eva kukita muluisho? (Kibangilo 3:15)

 KAPINDI kapeela kunyima kua Adame na Eva kukita muluisho, Yehowa bapeele bekulu baabo lukulupilo ku bukuashi bua buno butemuki bui na muulo. Kibaadi muakule, nkifundibue mu mukanda wa Kibangilo 3:15.​—Badika.

2. Buakinyi buno butemuki bui na muulo?

² Buabua butemuki, bui mu mukanda wa kumpala wa mu Bible. Anka ingi mikanda yoso ya mu Bible, ayakuila nka buno butemuki kadi mu ingi mishindo. Nka bu abikadikaa ku kitako kia mukanda, ki’abalamika mapupua e bungi bua’shi atushe mukanda umune, ngi bi ano mayi abadi bafunde mu Kibangilo 3:15, ngabungie mukanda ooso wa mu Bible na mukandu umune aulesha’shi ban’akatume mupaashi anakabutule Diabulu na bantu baye booso be bubi abamulondo. * Nyi muabi ukata bua bano booso bafule Yehowa!

3. Nkinyi ki’atukesambila mu uno muisambo?

³ Mu uno muisambo, atukaluula ku ino nkonko ayilondo pabitale butemuki bui mu Kibangilo 3:15: Mbanyi babadi bakuile mu buno butemuki? Buno butemuki mbulombane mushindo kinyi? Na mbulombene kuitukuasha mushindo kinyi?

4. “Nyoka” nnanyi na atumuuku mushindo kinyi?

⁴ Mu bantu babadi bateemune mu buno butemuki bufundibue  mu Kibangilo 3:14, 15, mui “nyoka,” “bekulu ba nyoka,” “mukashi,” na “bekulu” ba mukashi. Bible etukuasha buatudia kutundula ooso a kuabadi. * Tubandeyi kubanga na “nyoka.” Nyoka a binyibinyi, ta mmulombene kupusha kiakia kibaabadi bakule kui Yehowa mu efuba dia edene nya. Biabia kepatshila ka kiimu kia Yehowa, abitungu kekadikie nka kui bipangua bi na binangu. Yehowa baadi akuila bantu kinyi? Mukanda wa Kibafumbwilwe 12:9, aupatuula kalolo akilesha nyoka. Kubaadi “Kinyoka kia kala” kileeshe patooka bu Satana diabulu. Kadi mbanyi bekale bu bekulu ba nyoka?

5. Bekulu ba nyoka mbanyi?

⁵ Nsaa ayakula Bible bua bekulu mu ngukuilo a mu kinfuanyi, alesha baaba booso be na binangu na bikitshiino bu nshabo a mu kinfuanyi. Biabia bekulu ba nyoka, nyi mbamikeyilu bashi na lulamato na bantu be bu Satana, abapele kukookiela Yehowa Efile Mukulu na abashikua muilo waye. Mu bano bekulu, mui mpaa na ba mikeyilua babaadi basumbusheene midimo yabo muiyilu mu mafuku a Nowa na bantu babi abakitshi bibi bu nshabo Diabulu.​—Kib. 6:1, 2; Yo. 8:44; 1 Yo. 5:19; Yu. 6.

6. Buakinyi “mukashi” ta baadi mulombene kuikadika Eva?

⁶ Tubandengieyi kutundula “mukashi.” Mukashi ta mulombene kuikadika Eva nya. Buakinyi? Tutaleyi kabingilo kamune. Butemuki abulesha’shi muikulu a “mukashi,” a “kasooso” mutue wa nyoka. Nka bu bibatukatuka mu kuisamba, nyoka nyi nkipangua kia mu kikudi, Satana, na ta mbantu bashi bapuidikie, bekulu ba Eva balombene kuikadika na ngobesha ya kumusoosa ku mutue nya. Kuki ingi mianda i bungi ayitungu.

7. Bu biabadi baleshe mu mukanda wa Kibafumbwilwe 12:1, 2, 5, 10, mukashi abadi bateemune mu mukanda wa Kibangilo 3:15, nnanyi?

⁷ Kitunduilo kia mukashi abadi bateemune mu  mukanda wa Kibangilo 3:15, mbekileshe mu mukanda wa mfudiilo wa mu Bible. (Badika Kibafumbwilwe 12:1, 2, 5, 10.) Uno ta mukashi a pano pa nsenga nya! Mukashi baadi na mueshi muushi mua ngua yaye na kituto kia nyenyenyi ekumi na ibidi ku mutue waye. Mmutande muana shi bi bana booso: Bufumu bu’Efile Mukulu. Bufumu bui muiyilu, biabia abitungu mukashi ekadikie’nyi naye muiyilu. Mukashi alesha kipindi kia Ndumbuluilo a Yehowa ki muiyilu na bipangua biaye bia mu kikudi bi na lulamato.​—Nga. 4:26.

8. Muikulu a kumpala a mukashi nnanyi, na nsaa kinyi ibaadi mufikie buinyi bu muikulu? (Kibangilo 22:15-18)

⁸ Eyi di’Efile Mukulu aditukuasha dingi buatudia kutundula muikulu a kumpala a mukashi. Uno muikulu baadi binyibinyi a Abrahame. (Badika Kibangilo 22:15-18.) Nka bu bibaadi bileshe butemuki, Yesu baadi mulombene kuikadika muikulu a Mfumu a kifuko sha lulamato. (Luk. 3:23, 34) Anka bibaadi abitungu’shi muikulu ekadikie na bukome bui bungi kukila bantu, kumuanda nnaye a kasooso Satana diabulu ku mutue bua’shi tekadikanga’nyi kuanka dimo. Biabia, pabalombeshe Yesu bipua peepi makumi asatu, baadi muedibue muimu, aye nkufika bu Muana a Efile Mukulu batandikua mu kikudi. Nsaa ibaadi Yesu muedibue muimu, bafikile bu Muikulu a kumpala a ku bekulu ba mukashi. (Nga. 3:16) Kunyima kua Yesu kufua na kusanguka, Efile Mukulu “bamufwadikile ntumbo na kineemo” na kumupa “matalwa ooso . . . muiyilu na pa nsenga,” mui mpaa na matalua a “kubutula mifubo ya Diabulu.”​—Eb. 2:7; Mat. 28:18; 1 Yo. 3:8, Kilombeeno Kipya 2014.

9-10. (a) Mbanyi be bu bekulu ba mukashi, na nsaa kinyi ibaabadi bafikie bu bekulu? (b) Nkinyi ki’atukataluula mu kipindi akilondo?

⁹ Anka ku lupese lua Yesu, nkulombene kuikadika dingi bangi bekulu. Mpoolo mutumibua baadi muleshe kino kipindi kia muikulu nsaa ibakuile bua bisaka bioso bibidi bia bena kidishitu bedibue muimu, bena Yuda na bashi bena Yuda. Amba’shi: “Byabya su nwi ba Kidishitu, nwi twikulu twa Abrahame na muyiile milayilo.” (Nga. 3:28, 29) Nsaa ibaadi Yehowa muele bena Kidishitu muimu wa Kikudi kiselele, ngi nsaa ibafikile bano bena Kidishitu bu bekulu ba mukashi. Biabia muikulu abadi bekashe nyi Yesu Kidishitu na bantu 144 000 bedibue muimu bakamunana nabo. (Kibaf. 14:1) Bano booso abatompaa kunangushena mu kukidi na kukita mianda nka bu nshabo Yehowa Efile Mukulu.

¹⁰ Binobino, tubapu kutundula bantu babadi bateemune mu butemuki bui mu Kibangilo 3:15, tubandengieyi kutaluula mu kikoso, mushindo ukuete Yehowa kulombasha kapeelakapeela buno butemuki, na mushindo w’abuitukuasha.

11. Nkinyi akilesha butemuki nsaa y’abuakula’shi muikulu a mukashi abakamusuma ku “kisuulu”?

¹¹ Muyile butemuki bui mu Kibangilo 3:15, nyoka baadi mulombene kusuma muikulu a mukashi “ku kisuulu.” Bino bibalombene nsaa ibaadi Satana mutakule bena Yuda na bena Looma buabadia kuipaa Muan’Efile Mukulu. (Luk. 23:13, 20-24) Nka bu bilombene muntu kampanda kuikadika n’elonda dia binyibinyi ku kisuulu, na diamukutshishua kutambuka munda mua mafuku apeela, ngi bibaabidi namu’nyi bua Yesu. Baadi mufue akita mu mashama mafuku apeela kushi kukita kinti su nkimune.​—Mat. 16:21.

12. Nsaa kinyi na mmushindo kinyi w’abakasooso mutue wa nyoka?

¹² Bua’shi butemuki bui mu mukanda wa Kibangilo 3:15 bulombane, ta bibaadi abitungu’shi Yesu ayishe mu mashama nya. Buakinyi? Muanda muyile butemuki, muikulu ngi mulombene nkasoosa mutue wa nyoka. Bino abipushisha’shi, bibaadi abitungu’shi Yesu asangukie. Ngi biabidi bikitshikie! Muifuku dia kasatu kunyima kua lufu luaye, Yesu baadi musangukie bu kipangua kia mu kukidi kishanafue dimo. Mu kipungo kiabadi batshibe kui Efile Mukulu  Yesu akasooso Satana, takekala kuanka dimo. (Eb. 2:14) Baaba booso abakakunkusha pamune na Kidishitu, abakakuatshishena mudimo wa kusoosa beshikuanyi b’Efile Mukulu booso be pa nsenga abo bekadikie bekulu ba nyoka.​—Kibaf. 17:14; 20:4, 10. *

13. Kulombana kua buno butemuki, kukuete kuitukuasha naminyi?

¹³ Su we muilambule bua kufubila Efile Mukulu, kulombana kua buno butemuki, kukuete nkukuasha. Yesu bafikile pa nsenga bu muntu. Baadi muleshe bi bu muntu bua Nshaye mu mushindo upuidikie. (Yo. 14:9) Kukiila kuadi, ngi kuatudi bafikie mu kuiwuka na mu kufula Yehowa Efile Mukulu. Tukuete kupeta dingi bukuashi ku malongiesha a Yesu na ku bukunkushi buaye, bu biakuete kukunkusha tukongie tua bena Kidishitu lelo uno. Kuete kuitulongiesha mushindo watudia kuikadika na nshalelo etukuasha buatudia kukuminyibua na Yehowa. Na atue booso tui balombene kukuashibua na lufu lua Yesu, kumuanda babaadi bamusume ku kisuulu kiaye. Mushindo kinyi? Pa basangukile Yesu, batushiishe mase aaye e na muulo ukata bu mulambu upuidikie bua “kuitutoosha ku bubi booso.”​—1 Yo. 1:7, Kilombeeno Kipya 2014.

14. Atuiwuku naminyi’shi butemuki bubaabadi bakule kui Yehowa muifuba dia Edene ta mbulombane nka paapa? Patuula.

¹⁴ Ano mayi abaabadi bakule kui Yehowa muifuba dia Edene, ta abaadi alombane nka paapa nya. Bibaadi abitungu’shi bingi bipungo bibande kukila kumpala kua’shi buno butemuki bulombane booso kalolo. Bibaadi abitungu kukile mafuku ebungi bua’shi mukashi atande muikulu baadi mulayibue, na bua’shi Satana abungie bantu baye abamulondo atueshe mushikua ukata pankatshi pa bino bisaka bibidi. Abitukuasha p’atue kuiwuka pabitale buno butemuki, kumuanda abuitudimusha’shi tui mu nsenga y’abakunkusha kui Satana, e na mushukua na balanguidi ba Yehowa. Kunyima Yesu badimuishe balongi baaye mu uno mushindo umune. (Mak. 13:13; Yo. 17:14) Tuibamone kulombana kua kipindi kia mu buno butemuki bikishekishe mu bipua lukama bipue kukila. Mushindo kinyi?

15. Buakinyi mushikua wa ndumbuluilo a Satana ukuete kunyiisha kutama, kadi buakinyi ta tui na kabingilo ka kutshina Satana?

¹⁵ Kapindi kapeela kunyima kua Yesu kutudibua bu Mesiya Mfumu mu kipua kia 1914, Satana baadi mubingibue muiyilu. Binobino mmuedibue mu lukano pano pa nsenga, kuete atengiela kabutu kaye. (Kibaf. 12:9, 12) Kasha nka afika pano pa nsenga kuete afubu ngofu, Satana mmuinyongole ngofu, na e na nsungu i bungi, na kuete kulua na muilo w’Efile Mukulu. (Kibaf. 12:13, 17) Kano ngi kabingilo ka buakinyi ndumbuluilo a Satana banyiisha kushikua muilo w’Efile Mukulu ngofu. Sunga mbiabia, ta tui na kabingilo ka kutshina satana na bantu baye nya. Na dingi pamutue pa kumutshina, tui balombene kuikadika na kishinkamisho ki mumune na kibaadi nakio Mpoolo mutumibua pa bafundile’shi: “Su Efile Mukulu e lwetu lupese, a nnanyi aketukambila?” (Lom. 8:31, EEM) Tui balombene kutuula lukulupilo luetu looso mui Yehowa, muanda nka bu bibatupu kuibimona, matemuki e bungi atale buno butemuki bui mu mukanda wa Kibangilo 3:15, ngapue kulombana.

16-18. Kupusha kua butemuki bui mu mukanda wa Kibangilo 3:15, nkukuashe Curtis, Ursula, na Jessica naminyi?

¹⁶ Mulayilo wa Yehowa watupete mu mukanda wa Kibangilo 3:15, ngulombene kuitukuasha bua kunyingiila sunga tuapeta lukalakashi lua mushindo kinyi mu nshalelo eetu. Curtis mufube bu misionere mu Guam, amba’shi: “Ingi nsaa mianda ibaadi ayinkitshikila mu nshalelo ande, bibaadi abingikeela bukopo buandia kushaala na lulamato kui Yehowa. Anka kunangushena ku  butemuki bui mu mukanda wa Kibangilo 3:15, nkukuashe buandia kulama lukulupilo luande mui Nshami e muiyilu.” Curtis kuete kutengiela na kinsukunsuku kioso, efuku diabakakatusha ino nkalakashi yoso kui Yehowa.

¹⁷ Ungi mukuetu mukashi a mu Bavaria abetanyinaa bu Ursula amba’shi kupusha kua butemuki bui mu Kibangilo 3:15, nkumukuashe buadia kushinkamisha’shi Bible mmuyokielue n’Efile Mukulu. Mmumone mushindo wi angi matemuki ooso e mu kuipushena na buno butemuki, na mbinyishe kumukaanyisha ngofu. Amba dingi’shi: “Bibaadi binkume ngofu kuishimba nsaa inaadi mulongie’shi Yehowa baadi mukite kintu kampanda musuusa nka umune bua kuitupa lukulupilo, na bibaadi bitamishe kifulo kiande kuadi.”

¹⁸ Jessica a mu Micronesie amba’shi: “Nkiantentekieshaa binaadi napusha nsaa inaadi muukie bua musuusa wa kumpala’shi napete bia binyibinyi! Butemuki buabadi bafunde mu mukanda wa Kibangilo 3:15, bukuete kulombana. Buno butemuki, mbukuashe buandia kutentekiesha’shi ino mianda yatukuete kumona lelo uno na kukienga kua tukiengie, ta ngi bibaadi Yehowa mukumiine buetu nya. Buno butemuki, mbunyingishe lukumiino luande lua’shi kufubila Yehowa akutushaa bipeta bibuwa, ne mulombene kuikala na nshelelo e buwa kubanga binobino, na nkekadika’nyi na nshalelo e buwa mu mafuku aafiki.”

19. Buakinyi tui balombene kushinkamisha’shi kipindi kia mfudiilo kia buno butemuki akikalombana?

¹⁹ Nka bu bibatupu kuibimona, butemuki bui mu mukanda wa Kibangilo 3:15, bukuete kuenda na kulombana booso binobino. Bekulu ba mukashi na bekulu ba nyoka, tubapu kuibatundula kalolo. Yesu muikadikie kekulu ka kumpala ka mukashi kabaabadi basume ku kisuulu, binobino taadi mu ntumbo bu Mfumu shanafue dimo. Binobino Yehowa kuete kusangula mu bantu booso bantu abakamunana na Muanaye muiyilu. Muanda kipindi kia kumpala kia buno butemuki nkipue kulombana, bibetupa kabingilo kebuwa katudi na kishinkamisho kia’shi kipindi kia mfudiilo kia kusoosa mutue wa nyoka, akikalombana nakio namu. Bafubi b’Efile Mukulu abakekadika na muloo ukata nsaa y’abakabula Satana! Ngi buakinyi ta tukookanga. Efile Mukulu eetu nga kukupila. Kukiila kui muikulu a mukashi akekadika nsulo a “mîlo yoso i pa nsenga.”​—Kib. 22:18, EEM.