1. Kikiebe ki’eshimba dia Yehowa nkia naminyi lelo uno?

 LELO uno, kikiebe ki’eshimba di’Efile Mukulu nkia’shi mukandu wi buwa wa Bufumu, ulungulue pa nsenga yoso ishima. (Mak. 13:10; 1 Tim. 2:3, 4) Uno mudimo wa Yehowa wi na muulo ukata, na mmuiwupe Muana aaye aadi mufule bua’shi eukunkushe. Tui balombene kushinkamisha’shi, ku muanda’shi tukuete kukunkushibua na Yesu, mudimo wa kulungula mukandu wi buwa aukakitshibua kalolo kakile, nka bu bi’abakumiina kui Yehowa kumpala kua’shi mfudiilo ifikie.​—Mat. 24:14.

2. Nkinyi ki’atukamono mu uno muisambo?

² Mu uno muisambo, atukamono mushindo ukuete Yesu kufubisha “mpika a lulamato na mudimukie” bua kutusha biakudia bia mu kikudi, na kulumbuula balongi baye bua’shi bakite kampanye ka mudimo wa kulungula mukandu wi buwa kashakitshikile dingi kashaa. (Mat. 24:45, NWT) Atukamono dingi kilombene ooso a kuatudi kukita, buadia kukuatshishena Yesu na mpika a lulamato na mudimukie.

3. Mmatalua kinyi abadi bape Yesu?

³ Yesu ngi kuete kukunkusha mudimo wa kulungula mukandu wi buwa. Tui kuibishinkamisha naminyi? Mu kapindi kapeela kumpala kua’shi Yesu ende muiyilu, baadi mufumankane na balongi baye be bungi baasha lulamato ku muengie wa mu Ngalileya. Bebalunguile’shi: “Matalwa ooso, mbeeampe mwiyilu na pa nsenga.” Tala’nyi angi mayi aaye abaadi mukumbashe: “Byabya ndaayi: mu miilo yooso, nwibeekashe buu balondji bande.” (Mat.  28:18, 19) Biabia, kukatusha ingi mianda, babapeele Yesu matalua a kukunkusha mudimo wa kulungula mukandu wi buwa.

4. Buakinyi tui balombene kushinkamisha’shi Yesu ngi ki’atungunuka na kukunkusha mudimo wa kulungula mukandu wi buwa?

⁴ Yesu bakuile’shi kulungula kua mukandu wi buwa, na mudimo wa kuikasha bantu bu balongi, abikakitshibua mu “miilo yooso” na’shi balongi baye ngi balombene kuiwukita “nyaa na ku mfudiilo aa byaa-pano.” (Mat. 28:20) Ano mayi aalesha kalolo’shi mudimo wa kulungula mukandu wi buwa, ngulombene kutungunuka na kukitshibua kalolo nka ku bukunkushi bua Yesu mpaa na ku ano mafuku eetu.

5. Tukuete kukita kinyi bua kulombasha ano mayi a butemuki e mu Misambo 110:3?

⁵ Yesu ta baadi ekalakasha bua’shi, nkulombene kukutshikua bafubi ba uno mudimo wa mukandu wi buwa, mu mafuku a ku mfudiilo kua uno ndumbuluilo a bia pano nya. Baadi muukie’shi mayi a butemuki a kayimba ka misambo abaadi alombene kulombana bino: ‘Mwilo ôbe aukepâna kodi, p’efuku dy’okebebwela ngoshi.’ (Mis. 110:3, EEM) Su okuete kukitanga mudimo wa kulungula mukandu wi buwa, okuete kukuatshishena Yesu na mpika a lulamato na mudimukie, na okuete kukuasha bua’shi buno butemuki bulombane. Mudimo, ukuete kuenda kumpala, anka kui nkalakashi.

6. Balungudi ba Bufumu bakuete kufumankana na lukalakashi kinyi lelo uno?

⁶ Lukalakashi lumune luabakuete kufumankana nalo kui balungudi ba Bufumu, nyi mbuluishi. Bantu basumbule lukumiino, bakata ba bipuilo, na bakata ba mianda ya politike, mbalungule bantu be bungi mianda ya madimi pabitale mudimo wetu. Bena kifuko netu, bantu abetuuku kalolo, na bena mudimo netu, be kuitupalakesha mianda ya madimi na mbalombene kuitukitshisha bia’shi tulekie kufubila Yehowa na’shi tulekie kulungula mukandu wi buwa. Mu angi maumbo, beshikuanyi betu bakuete kuitukuatshisha moo, kuitukitshiina mianda bi bubi, na kuitukuata sunga kuituela mu nkano. Bino bikitshiino bioso t’abitukaanyisha nya. Yesu baadi mutemukie’shi: “Abakenushikwa kwi miilo yoso pa mwanda w’eshina diande.” (Mat. 24:9, Kilombeeno Kipya 2014) Pa muanda tukuete kumona ino mianda yoso ya mushikua, abilesha’shi tui bakuminyibue na Yehowa. (Mat. 5:11, 12) Diabulu ngi e kunyima kua buno buluishi. Anka Yesu mmumukile bukome! Ku bukuashi bua Yesu, mukandu wi buwa ukuete kulunguluanga kui bantu ba miilo yoso. Tutaleyi kino kishinkamiisho.

7. Nkishinkamiisho kinyi ki’omono akilesha’shi butemuki bui mu Kibafumbwilwe 14:6, 7 mbulombane?

⁷ Bu biatudi balungudi ba Bufumu, tukuete kufumankana na lungi lukalakashi lua bantu abakula ingi ndimi yatush’atuuku, ilekeene na yetu. Mu kimonua kibaadi Yesu muleshe Yowano mutumibua, Yesu baadi mutemukie’shi mukandu wi buwa aukakambila lulo lukalakashi. (Badika Kibafumbwilwe 14:6, 7.) Mu mushindo kinyi? Tukuete kupa bantu be bungi mushindo wabadia kukumiina mukandu wa Bufumu. Lelo uno, bantu bashaale mu nsenga ishima mbalombene kubadika bintu abiakuila mianda imeene mu Bible, bi mu site eetu a jw.org ku muanda bi na mianda i bungi i mu ndimi ikile pa 1 000! Kasaka ka Bakunkushi-Bakulu nkakumiine bua’shi baluule mukanda wa We kuikala na muloo bua loso! Mukanda wetu awitukuasha, mu mudimo wa kuikasha bantu bu balongi mu ndimi ikile pa 700! Bidibua bia mu kikudi, bi kuanka dingi mu ma video abadi bakobole bua tumaama na mikanda yabadi bafunde bua bampofu. Tukuete kumona kulombana kua matemuki a mu Bible. Bantu ba ‘bisamba abiakula ndimi yoso,’ bakuete kulonganga bia kuakula “ludimi lui selele” lua bia binyibinyi bia mu Bible. (Sek. 8:23; Sef. 3:9, NWT) Bino  bioso mbilombane mu ngobesha ya Mukunkushi Yesu Kidishitu.

8. Mudimo wetu wa bulungudi ukuete kutusha bipeta kinyi mpaa na lelo uno?

⁸ Lelo uno, bantu bakile pa 8 000 000, ba mu maumbo 240 bakuete kutuelanga mu ndumbuluilo a Yehowa, na ku kipua kioso bantu binunu makumi, bakuete kubatshishibuanga! Kintu ki na muulo kukila buno bungi, nyi ngikashi ya buina Kidishitu na “bumuntu bupia,” biabakuete kukimbanga kui bano balongi bapia bua kuikala nabio. (Kol. 3:8-10) Be bungi mbalekie bukitekite, baleka etombo, na kuleka ntondo ya tubila. Butemuki bui mu mukanda wa Yeeshaya 2:4, mbupue kulombana; ‘taabayiyi dimo bya kulwa ngoshi.’ Bu bi’atuikitshisha bua kufuala bumuntu bupia, atukuasha bantu buabadia kutuela mu ndumbuluilo a Efile Mukulu, na atulesha’shi tukuete kulonda Mukunkushi eetu Yesu Kidishitu. (Yo. 13:35; 1 Mp. 2:12) Bino bioso t’abikitshikilaa nya. Yesu ngi kuete kuitupa bukuashi buatudi nabo lukalo.

9. Muyile mukanda wa Mateo 24:45-47, nkinyi kibaabadi batemukie pabitale kipungo kia mafuku a ku mfudiilo?

⁹ Badika Mateo 24:45-47. Yesu batemukile’shi mu kipungo kia mafuku a ku mfudiilo, akatuulu “mpika a lulamato na mudimukie” buadia kutushanga bidibua bia mu kikudi. Biabia tui balombene kutengiela’shi mpika afubu ngofu mu ano mafuku eetu. Bino abilesha’shi mbia binyibinyi. Mukunkushi eetu kuete afubisha kasaka kapeela ka balume bedibue muimu, buakadia kupa muilo w’Efile Mukulu “bidibwa pa nsaa ikumbane” na kuiwupasukila mu kikudi. Bano balume, ta be na mueneno a bu bakata be panundu pa lukumiino lua bangi nya. (2 Kod. 1:24) Mu kuilekeena na biabia, abauku’shi Yesu Kidishitu ngi ‘mfumu na nsha matalwa’ kui muilo waye.​—Yesh. 55:4.

10. Mmukanda kinyi wa ku ino mikanda yatubalesha ukukuashe bodia kubanga kufubila Yehowa?

¹⁰ Kubanga nka mu kipua kia 1919, mpika a lulamato  na mudimukie mmulumbuule mikanda ilekeenelekeene ayipa bantu bapia abakumiina bia binyibinyi bua musuusa wa kumpala, mushindo wabadia kulonga bia binyibinyi bia Muiyi di’Efile Mukulu. Mu kipua kia 1921, mpika baadi mutushe mukanda wa La Harpe de Dieu bua kukuasha bantu abakumiina kulonga malongiesha aatukila mu Bible. Bu bikuete kushintuluka bipungo, kui mikanda i bungi ikuetu kutukanga. Mmukanda kinyi ukukuashe bodia kuuka na kufula Nshetu e muiyilu? Kubaadi mukanda wa “Que Dieu soit reconnu pour vrai !” La vérité qui conduit à la vie éternelle, Vous pouvez vivre éternellement sur une terre qui deviendra un paradis, La connaissance qui mène à la vie éternelle, A nkinyi akilongyesha namu Bible? A nkinyi akitulongyesha Bible? Sunga mukanda wetu upia wa We kuikala na muloo bua loso! Ino yoso mikanda, ngikitshibue bua kuitukuasha mu mudimo wetu wa kuikasha bantu bu balongi, na ayitukaa nka pa kipindi kilombane kiatudi nayo lukalo.

11. Buakinyi bi na muulo bua ooso a kuatudi kupeta bidibua bia mu kikudi?

¹¹ Bantu bapia abakiebe kuiwuka bia binyibinyi, t’abekalaa nka na penda lukalo lua biakudia binyingie nya. Sunga atue booso. Mpoolo mutumibua bafundile’shi: “Bidibwa bi bukopo mbya bantu bakulu.” Mpoolo bakuile dingi’shi, kutumikila mianda y’atulongo ya mu Bible nkulombene kuitukuasha bua “kushinguula ki buwa na ki bubi.” (Eb. 5:14, Kilombeeno Kipya 2014) Bi kuikala bukopo bua kukookiela mayi a kulonda a Yehowa lelo uno, ku muanda bantu be bungi tabadi na bukitekite. Anka Yesu mmushinkamishe’shi tukuete kulonga mianda yatudi nayo lukalo, buatudia kulama lukumiino luetu lunyingie. Nsulo ya bino bidibua, nyi Eyi di’Efile Mukulu diyokielue, Bible. Mpika a lulamato na mudimukie, alumbuulaa na kuabila bino bidibua, mu buludiki bua Yesu.

12. Nka bu Yesu, mmushindo kinyi w’atuneemekaa eshina di’Efile Mukulu?

¹² Nka bu Yesu, tukuete kupa eshina di’Efile  Mukulu kineemo kidilombene. (Yo. 17:6, 26) Bu kileshesho, mu kipua kia 1931 tubaadi baate dino eshina dia mu Bifundue bu ba Temue ba Yehowa ku muanda, ndituikashe mu mushindo wi pabuawo kui Nshetu e muiyilu. (Yesh. 43:10-12) Kubanga nka mu mueshi w’ekumi wa kiakia kipua, eshina di’Efile Mukulu dibabangile kumueka ku kipusu kia ino mikanda yoso ya ma Jurnale. Kukatusha biabia, Bible a Les Saintes Écritures Traduction du monde nouveau, e n’eshina di’Efile Mukulu difundibue pa mbalo yadio Muiyi diaye. Mbilekeene ngofu na bipuilo bia buina Kidishitu kuishina, bikatushe eshina dia Yehowa mu ma Bible aabo e bungi abadi baluule!

13. Nkinyi akikushinkamiisha’shi Yesu kuete kufubisha “mpika a lulamato na mudimukie” lelo uno? (Yowano 6:68)

¹³ Ku bukuashi bua “mpika a lulamato na mudimukie,” Yesu Kidishitu mmukite ndumbuluilo amueka na meeso pano pa nsenga bua kukuatshishena lulanguilo lui selele. Opushaa namu naminyi pabitale uno ndumbuluilo? Mu kualuula, pangi we kunangushena ku mayi a Mpiele mutumibua abaadi mulungule Yesu’shi: “Nkwi’nyi kwatudy’a kwenda? We na bishima bya muuwa wa looso.” (Yo. 6:68) Nkunyi kubaadia kuikadika ooso a kuatudi lelo uno su ta tui bafikie mu kutuela mu ndumbuluilo a Yehowa? Kukiila kuadi, Kidishitu mmushinkamishe’shi tukuete kudishibua mu kikudi kalolo. Dingi kuete etulongiesha biatudia kukita mudimo wetu wa mukandu wi buwa kalolo. Biabia, kuete etukuasha buatudia kufuala “muntu mupia,” yawa asankisha Yehowa.​—Ef. 4:24.

14. Mmushindo kinyi oodi mupete bukuashi abufiki mu ndumbuluilo a Yehowa mu kipungo kia Corona-Virus?

¹⁴ Yesu kuete atusha buludiki bui buwa mu bipungo bi na nkalakashi. Bukuashi bua buno buludiki, mbumuekie patooka mu kipungo kia kipupa kia Corona-Virus. Sunga be bungi mu ino  nsenga t’abaukanga kiabadi balombene kukita, Yesu mmushinkamishe’shi tui bapete malango e buwa bukile bua kuikaluila ku mbidi yetu. Bekeele betunyingishe buatudia kuikala atufuala ma maske nsaa y’atuikadika mu mbalo i bantu be bungi, na buatudia kuikadika kula-kula na bantu. Bekeele batentekieshe bakulu buabadia kuikala abetanyina bena kakongie booso ku tuamo, bua’shi bauukie nkalo yabo ya ku mbidi na ya mu kikudi. (Yesh. 32:1, 2) Tui bapete bungi buludiki na kukankamikibua mu mianda ipia ayifiki kui Kasaka Bakunkushi-Bakulu.

15. Mbuludiki kinyi buabadi betupe pabitale kutuela kua mu bisangilo na kulungula kua mukandu wi buwa mu kino kipungo kia Corona-Virus, na mbitusha bipeta kinyi?

¹⁵ Mu kipungo kia Corona-Virus, tuikeele bapete dingi buludiki abupushika kalolo pabitale bia kutuela mu bisangilo bia tukongie, na biakukita mudimo wa kulungula mukandu wi buwa. Kushi kunyengakana, tui babangie kutuela mu bisangilo bia bena Kidishitu, mu bikongeeno bi’efuku dimune, na mu bikongeeno bia mafuku asatu, ku bukuashi bua Internete. Tui babangie dingi kukita bulungudi ku bukuashi bua mikanda kufunda na bua telefone. Yehowa mmuelele kuikitshisha kuetu miabi. Ma filiale e bungi, ngatushe luapoolo alulesha kufuima kua bungi bua balungudi. Na dingi, be bungi mbapete kukankamishibua mu kino kipungo.​—Tala kashibo akamba’shi “ Yehowa mmuelele mudimo wetu wa bulungudi miabi.”

16. Tui balombene kushinkamisha kinyi?

¹⁶ Bangi mbafikie mpaa na mu kumona’shi, ndumbuluilo mmudimukie bikile pabitale kino kipupa. Ku nsaa na nsaa, tui bafikie mu kushinkamisha’shi buludiki buabadi betupe bui buwa bukile. (Mat. 11:19) Na p’atunangushena ku kifulo kiabadi baleshe kui Yesu kuete akunkusha muilo waye, abinyiisha kuitushinkamiisha’shi muanda ooso wa kuitukitshikila mu mafuku aafiki, Yehowa na Muana aaye a kifulo abakekala netu.​—Badika Bena-Ebelu 13:5, 6.

17. Opushaa namu naminyi pabitale kufuba mu bukunkushi bua Yesu?

¹⁷ Tukuete kupeta miabi bu biatukuete kufuba ku bukunkushi bua Yesu! Tui mu ndumbuluilo abashi babuule kui mianda ya bipikua, tubila, na ndimi yatush’atuuku. Tukuete kudishibua mu kikudi kalolo na tukuete kupeta biina mudimo abitukuasha bua kulungula mukandu wi buwa. Ooso a kuatudi, kuete kulonga bia kufuala muntu mupia, na biadia kufula namu bangi. Tui na kabingilo ke buwa bukile ka buakinyi atuitumbisha na Mukunkushi eetu Yesu!