Yesu, balongieshe bantu buabadia kuikala mu butaale ku muntu na mukuabo. Dingi efuku, balunguile balongi baye’shi: “Tanwelanga kinangu’shi nee mufikye mu kutwala butaale pa nsenga, ntshi mufikye mu kutwala butaale; eyendo, anka kimpulu. Oolo, nee mufikye mu kwabuula mwana-mulume na nshaaye, mwana-mukashi na nyinaaye, mukashy’a-mwana na nyina-mweno.” (Mat. 10:34, 35) Yesu baadi akiebe kuamba kinyi?

Yesu ta baadi akumiina kuabuula bena bifuko na bangi bakuabo nya, anka baadi muukie’shi malongiesha aaye, ngalombene kuabuula bingi bifuko. Biabia, baaba booso be na lukalo lua kuikadika bu balongi ba Kidishitu na kubatshishibua, abitungu bauukie’shi bangi ba mu bifuko biabo, ta mbalombene kuikadika na muloo pabitale kiakia kitshibilo ki’abaata nya. Su bapeta buluishi abutukila kui bantu bashi bena kukumiina, bu mulume aaye, mukashi aaye, sunga kui bangi ba mu bifuko, mbilombene kuikala lukalakashi bua kushaala na lulamato ku malongiesha a Kidishitu.

Bible anyingisha bena Kidishitu buabadia ‘kwikala mu butaale na bantu booso.’ (Lom. 12:18) Anka malongiesha a Yesu, ngalombene kuikala na bukitshishi nka bu “kimpulu” mu bingi bifuko. Bino mbilombene kukitshika nsaa i muina kifuko, akumiina malongiesha a Yesu sunga bangi abamupele, sunga kumuluisha. Mu uno muanda, bena kifuko na baaba booso ba mu nshibo, mbalombene kufika “beshikwanyi” ba yawa muntu alongo bia binyibinyi.​—Mat. 10:36.

Kui bangi balongi ba Kidishitu, bashaale na bantu be mu bingi bipuilo, ingi nsaa bakuete kufumankananga na mianda i bukopo, ayitompo kifulo kiabo bua Yehowa na bua Yesu. Bu kileshesho, bena kifuko bashi bena kukumiina, mbalombene kuibakitshisha buabadia kukita nabo misangeelo yabo ya bena bipuilo. Nsaa y’abafuisha kino kitompuanga, we kukumiina kuibasankisha su? Yesu bambile’shi: “Yawa mufule nshe su nyina kunkila, tamundombeene’mi.” (Mat. 10:37) Sunga mbiabia, Yesu ta mmuambe’shi baaba booso abakiebe kuikadika bu balongi baye bakuete kulonga bia binyibinyi, abitungu balekie kufula baledi babo ngofu nya. Biabia, Yesu baadi muibalongieshe mushindo wabadia kuata kitshibilo ku mianda i na muulo ukata mu nshalelo aabo. Su bakuetu ba mu bifuko bashi ba Temue ba Yehowa, betuluisha mu kuikitshisha kuetu kua kulanguila Yehowa, tutungunukie nka na kuibafula, anka tuukie’shi kifulo kietu bu’Efile Mukulu, ngi kia kuikadika pa mbalo ya kumpala.

Kushi mpaka, bena kifuko abetuluisha mbalombene kuitukutshishua muloo ngofu. Mpaa na lelo uno, balongi ba Yesu baki balame mayi aaye mu binangu aamba’shi: ‘Shyeetenteka mutshi waye wa makyenga bwa kundonda, ta mundombeene’mi.’ (Mat. 10:38) Mu ungi ngakuilo, bena Kidishitu abamonaa bifuko abibabingabinga, bu kimune kia ku makienga a balongi ba Kidishitu abakumiina kukuminyibua naye. Mbakulupile’shi, pa muanda wa muikeelo wabo wi buwa, bakuabo ba mu bifuko banaakumiine kualuula binangu biabo, na kukumiina bua kulonga mukandu wa mu Bible.​—1 Mp. 3:1, 2.