Muyile mukanda wa 1 Bena-Kodinda 15:8, Mpoolo bambile’shi: “Kunyima kwa baba boso, e nkummwekyela namu’mi, sunga nyi bu mwana batandjikilwe kabishi, EEM.” Kala, tubaadi abapatuula’shi Mpoolo pangi baadi akiebe kuakuila bua bibaadi mumone nsaa ibamuene kimonua kia Yesu mushaale muiyilu mu ntumbo. Bibaadi nka bu’shi Mpoolo baadi mupete kineemo kia kutandikua, sunga kusanguka, bua kupeta muwa wa mu kikudi mu kiakia kipungo siekele i bungi kumpala kua’shi lusangukilo lua uno mushindo lubangie. Anka, kunyima kua’tue kulonga uno verse ngofu, bibamueneka’shi bi na muulo kushintuula mushindo w’atuikalanga atupatuula uno verse.

Mu binyibinyi, Mpoolo baadi akuila pano bua kintu kibaadi kikitshikie pa kushintuluka kuaye. Biabia Mpoolo baadi akiebe kuamba kinyi nsaa ibaadi muileshe aye nabene bu “mwana batandjikilwe kabishi”? Kui mishindo i bungi.

Kushintuluka kuaye, kubaadi kua mu kabasamushi na akuinyongosha ngofu. Kutanda kua muana kabishi akufikaa ke bungi nka mu kabasamushi. Pabaadi ki bu Soolo, (abaabadi baukie kunyima bu Mpoolo) baadi ende ku Damase buadia nkakiengiesha bena Kidishitu kuanka, ta baadi auuku’shi e kumona kimonua kia Yesu musangukie nya. Kuno kushintuluka kua Mpoolo, ta kubaadi kumukaanyishe nka penda aye nya, kubaadi kukaanyishe mpaa na benyi bena Kidishitu babaadi muatshile mpango ya kuibabingabinga mu kiakia kibundi. Kukatusha biabia, bino bibaadi mumone bibaadi bimuinyongoshe ngofu, muanda baadi mufikie mpaa na mu kuikala bu mpofu mund’a mafuku apeela.​—Bik. 9:1-9, 17-19.

Baadi mushintulukie mu “kipungo ki bubi.” Kishima kia mu kina Greke kiabadi baluule bu “mwana batandjikilwe kabishi,” mbalombene dingi kuikialuula dingi bu “mwana mutandjikwe mu kipungo ki bubi.” Bible a Jerusaleme apatuula kino kishima mu uno mushindo’shi: “Bibaadi nka bu’shi naadi mutandjikwe nsaa ishi baadi ayitengiela bantu.” Nsaa ibaadi ishintulukie Mpoolo, Yesu baadi mupue kuikala muiyilu. Kuilekeena na abikalanga biakule Mpoolo mu ma verse e kunundu, aye ta baadi mumone Yesu musangukie akaamina muiyilu nya. (1 Kod. 15:4-8) Babaadi bape Mpoolo mushindo wa kumona Yesu kunyima kuaye kusanguka, nsunga mbibaabidi abimueneka bu bibakitshika mu “kipungo ki bubi.”

Baadi esamba buaye’ye nabane na kuiyisha kooso. Muyile bantu balongie ngofu, kino kishima kiabadi bafubishe kui Mpoolo pano, nkilombene kutusha mpushisho a muntu emono bu shii mulombene. Su Mpoolo baadi na uno muanda mu binangu, baadi euuku’shi ta mulombene kupeta uno muabi wadi mupebue. Na dingi, atungunuka na kuakula’shi: “Mwanda ne mukile bupeela a ku batumiibwa, ami ntshi mupwandjikile kwitanyinwa bu mutumiibwa, mwanda naadi mubingyebingye kakongye k’Efile Mukulu. Pamwanda wa buntu bw’Efile Mukulu, ne bino byandji.”​—1 Kod. 15:9, 10, Kilombeeno Kipya 2014.

Biabia, abimueka pangi’shi Mpoolo baadi akuila pabitale mushindo ubaabadi bamumuekiele kui Yesu mu kabasamushi, washibaadi atengiela sunga’shi ta baadi mulombene kumona kino kimonua akikaanyisha kia mu kikudi nya. Uno muanda ubaabadi bamone kui Mpoolo ubaadi na muulo ukata kuadi. Bino bibaadi bimushinkamiishe kushi mpaka’shi, Yesu baadi musangukie ku lufu binyibinyi. Ta tui balombene kukaanya p’atumono Mpoolo akuila pabitale uno muanda, ubaadi mumone mu kabasamushi nsaa ibaadi alongiesha bangi pabitale lusangukilo lua Yesu.​—Bik. 22:6-11; 26:13-18.