1. Yesu baadi mulungule balongi kinyi pabitale kipungo kia mfudiilo, na baadi muibadimushe naminyi?

 MAFUKU apeela kumpala kua lufu lua Yesu, balongi baye bananka babamuipuishe’shi: ‘Nkitundwilo kinyi naamu . . . kia nfudîlo a uno ndumbuluilo?’ (Mat. 24:3, EEM) Pangi babaadi abayipusha mushindo wabadi balombene kuuka nsaa ayikabutudibua Yelusaleme na ntempelo a muanka. Mu lualuulo luaye, Yesu ta baadi mualuule penda pabitale mfudiilo a mianda a bena Yuda nya, anka bakuile dingi pabitale mfudiilo a uno ndumbuluilo a mianda atudi bashaale lelo uno. Pabitale kipungo kia mfudiilo Yesu bakuile’shi: “Pa bitale diadia efuku, sunga nsaa, takwi muntu su ngumune e na kiwukilo kiabio, sunga bamwikeyilu be mwiulu, sunga ngwiini Mwana, anka Yaya.” Na dingi baadi mudimushe balongi booso’shi: “Dimukayi” na ‘nwikale bapasukye.’—Mak. 13:32-37, Kilombeeno Kipya 2014.

2. Buakinyi bibaadi na muulo bua bena Kidishitu ba mu siekele a kumpala kushaala bapasukie?

² Bena Kidishitu ba mu Yuda ba mu siekele a kumpala babaadi bashaale bapasukie mu nshalelo aabo buabadia kupanda. Yesu balunguile balongi baye biabakamono buabadia kuuka nsaa ayikafiki mfudiilo a ndumbuluilo a bena Yuda. Yesu bambile’shi: “Na p’anukamono Yelusaleme mbamuifunyishe kui bisaka bia basalayi, ukayi paapa’shi kubutuka kuaye kubesesela peepi.” Mu yaya nsaa babaadi bakookiele kudimusha kua Yesu, na ‘abo nkusuukila ku miengye.’ (Luk. 21:20, 21, Kilombeeno Kipya 2014) Booso babaadi bapasukie na kuno kudimusha, babaadi bapande nsaa ibaadi bena Loma babutule Yelusaleme.

3. Nkinyi ki’atukesambila mu uno muisambo?

 ³ Lelo uno tui bashaale mu kipungo kia mfudiilo, kia uno ndumbuluilo e bubi. N’atue namu abitungu tuikale belame na bapasukie. Mu uno muisambo, atukesambila mushindo watudi balombene kuikala na nkatshinkatshi, bu bia tukuete kuilama mu mianda ya ino nsenga, na mushindo watudia kushaala belame na bia kufubisha nsaa yetu kalolo.

4. Buakinyi tui balombene kutuula binangu bietu bioso ku mushindo w’atumono mianda ikata ayikitshika mu nsenga ayilombasha matemuki a mu Bible?

⁴ Mbua kabingilo ke buwa, abitungu’shi tuipaane ku mushindo w’atumono mianda ikata ayikitshika mu nsenga, ayilombasha matemuki a mu Bible. Bu kileshesho, Yesu baadi muitulungule mianda ayikakitshika ayiketukuasha bua kuuka’shi mfudiilo a ndumbuluilo a Satana taadi peepi. (Mat. 24:3-14) Mpoolo mutumibua baadi muitunyingishe bua’shi tuikale bapasukie apalombana matemuki bua’shi lukumiino luetu lushaale lunyingie. (2 Mp. 1:19-21) Mukanda wa mfudiilo wa mu Bible aubanga na ano mayi’shi: “Kibafumbwilwe kia Yesu Kidishitu, kibamupeele Efile Mukulu bwa kuleesha bapika baaye bintu abituungu kufika binobino.” (Kibaf. 1:1, Kilombeeno Kipya 2014) Biabia, abitungu tutume binangu bietu ngofu ku mianda ikuete kukitshika mu nsenga binobino na kuuka mushindo aulombana matemuki a mu Bible. Na abitungu tuisambile ino mianda ku muntu na muinaye.

5. Nkinyi akitungu’shi tulekie, anka nkinyi akitungu’shi tukite? (Tala dingi bifuatulo.)

⁵ P’atuisambila mianda ya butemuki ya mu Bible, abitungu tulekie kutenteka ingi mianda ya madimi muanka. Buakinyi? Muanda t’atukumiina kuakula muanda kampanda ulombene kuabuula kakongie. Bu kileshesho, tui balombene kupusha bakata ba ino nsenga abakula pabitale mushindo wabadi balombene kukatusha mushikua na kufuisha kufukama na kuiyikeela. Pa mutue pa kupalakasha mianda ya madimi pabitale butemuki bui mu 1 Bena-Tesalonika 5:3, abitungu tuukie mianda ipia yabadi batuushe binobino. Su miisambo yetu yekala imeene’nka mu mikanda ayitusha ndumbuluilo a Yehowa, atukuasha kakongie buakadia kushaala mu buumune na “mu kinangu kimune.”—1 Kod. 1:10; 4:6, Kilombeeno Kipya 2014.

6. Mmalongiesha kinyi atudi balombene kupeta mu mukanda wa 2 Mpyeele 3:11-13?

⁶ Badika 2 Mpyeele 3:11-13. Mpiele mutumibua, etukuasha buatudia kunangushena pabitale kabingilo ka buakinyi abitungu tutaluule matemuki a mu Bible. Mpiele etulungula buatudia “kuikala batengiele kufika kw’efuku dia Yehowa.” Buakinyi? Ta mpa muanda atukumiina kuuka “efuku na nsaa” yabakafuisha Armagedone kui Yehowa nya. Kadi mpa muanda atukumiina kufubisha nsaa yetu mu mushindo wi buwa pa kuikala bantu baasha ‘mwikeelo wa kalolo na kineemo ki’Efile Mukulu.’ (Mat. 24:36; Luk. 12:40) Mu ungi ngakuilo, atukumiina kulama muikelo wetu wa kalolo na kushinkamisha’shi kuikitshisha kuetu bua kufubila Yehowa, akulesha’shi tui bamufule ngofu. Bua’shi tukite bino abitungu tuikale badimukie atue banabene.

7. Tui kulesha’shi tui badimukie atue banabene mushindo kinyi? (Luka 21:34)

⁷ Yesu balongieshe balongi baaye biabashii balombene kudimuka penda bua mianda ikata ya mu ino nsenga, kadi bekale badimukie bua abo banabene. Uno muanda mbeuleshe kalolo mu kudimusha kui mu mukanda wa Luka  21:34. (Badika.) Pusha abiamba mayi a Yesu: ‘Dimukayi anwe banabene.’ Muntu mudimukie aye nabene, ekalaa mupasukie ku masaku ooso alombene kutshiba kipuano kiaye na Yehowa, na elaa matabula buadia kuibileka. Mu uno mushindo, ashaala aye nabene mu kifulo ki’Efile Mukulu.—Nki. 22:3; Yu. 20, 21.

8. Mpoolo mutumibua baadi mudimushe bena Kidishitu naminyi?

⁸ Mpoolo mutumibua badimuishe bena Kidishitu buabadia kudimuka abo banabene. Bu kileshesho, balunguile bena Kidishitu ba mu Efeso’shi: “Abitungu nudimukye mu mwikêlo wenu: ikalai anutambuka bu bantu basha binangu, kushi bu bashi na binangu.” (Ef. 5:15, 16, EEM) Satana kuete ekitshisha bua kuluisha kipuano kietu na Yehowa. Anka Bible etulanga’shi: ‘Shingulayi kalolo’shi nkinyi akikiebe Yehowa kuanudi,’ bino ngi biatudi balombene kuikaluila ku buluishi booso bua Satana.—Ef. 5:17.

9. Mmushindo kinyi watudia kushinguula kalolo’shi nkinyi akikiebe Yehowa kuatudi?

⁹ Bible ta mulombene kulesha masaku ooso alombene kutshiba kipuano kietu na Yehowa nya. Anka, abitungu tuate bitshibilo bia mianda yabashii bakambe kuisambila ngofu mu Bifundue. Buatudia kuata bitshibilo bibuwa, abitungu tushinguule sunga kuuka “akikumiina Yehowa’shi tukite.” Tui kukita bino patuikala atuilongiela Eyi di’Efile Mukulu nsaa yoso na kunangushena ku dianka. P’atunyisha kupusha kikiebe ki’eshimba dia Yehowa na kuikala na “binangu bia Kidishitu,” atunyisha kutambuka bu “bantu basha binangu” sunga tuakutua kuikala na buludiki kampanda abuitulesha kiatudia kukita na kiatushi balombene kukita. (1 Kod. 2:14-16) Ingi nsaa bi kuitubofuila buatudia kutundula akitungu’shi tulekie kukita. Anka ingi nsaa bi kuituelela bukopo bua kuibitundula.

10. Ngangi masaku kinyi aatungu’shi tusuukie?

¹⁰ Mu angi masaku aatungu’shi tusuukie, mui kukisha nsaa ibungi pamune na muntu shi mulume sunga shi mukashi nobe, kutoma kukishekishe, budiafi, kuakula mianda ayitapa bangi ku mashimba, kutala mianda ya buntomboshi, kubandila Pornografi, na ingi mianda i biabia. (Mis. 101:3) Diabulu muishikuanyi netu, mmuipaane ngofu bua kupeta mushindo wa kuluisha kipuano kietu na Yehowa. (1 Mp. 5:8) Su ta tui badimukie, Satana mmulombene kukuna mu binangu bietu na muishimba dietu ntete ya luabi, bulandue, mushikua, kuitatula, na ngo. (Nga. 5:19-21) Ku mbangilo, ta tui balombene kumona’shi bino binangu bi masaku. Anka su tuakutua kuibikatusha nka musuusa umune, mbilombene kutungunuka na kutama nka bu mutshi wi na nsumu ulombene kufuisha masaku.—Shak. 1:14, 15.

11. Mmasaku kinyi aamuenekaa bu ashi kintu aatungu’shi tuiasukie, na buakinyi?

¹¹ Mmasaku amune akata mba kuuku be bubi. Tubandeyi kutala uno muanda. Su ofubaa na muntu kampanda shii Kamonyi ka Yehowa, okumiina’shi yawa muina mudimo nobe ekale na mueneno ebuwa pabitale Tumonyi tua Yehowa, wekala na kalolo na okumiina kumukuasha. Ingi nsaa okumiina kudia pamune na yawa muntu. Mu kapindi kapeela nubeubidishena na yawa muntu, na bobanga kudia naye nsaa yoso pamune. Ungi musuusa yawa muntu babanga kuakula mianda ya butete yosh’okumiinanga kupusha ku mbangilo. Muenda mafuku bobanga kuakula nka yaya mianda ibaadi ayikutondo ku mbangilo. Dingi efuku, yawa muina mudimo nobe bakuitanyina bua’shi nukatome kunyima kua mudimo, bokumiina. Ku mfudiilo a bioso, bobanga kunangushena nka bu yawa muina mudimo nobe. Mu uno muanda wi bino, nobe  namu obanga kukita mianda nka bu muina mudimo nobe. Eyendo’shi atuikalaa na kalolo na kaneemo kui booso, anka abitungu tutentekieshe’shi, atukekala nka bu bano batusangula bua kukisha nabo nsaa. (1 Kod. 15:33) Su tubadimuka atue banabene anka bu bibetulunguile Yesu bua kukita, atukalekie ba kuuku be bubi bashi na nshalelo muipushene na mayi a kulonda a Yehowa. (2 Kod. 6:15) Atukamono masaku na kukimba bia kuiasuka.

12. Balongi ba Yesu babaadi balombene kukita kinyi sunga mbibaabadi abatengiela mfudiilo a ndumbuluilo a mianda?

¹² Yesu baadi akumiina’shi balongi baye bekale na bi bungi bia kukita, sunga mbibaabadi abatengiela’shi mfudiilo a mianda afikie. Yesu bebapeele mudimo wa kukita. Bebapeele mudimo wa kulungula mukandu wibuwa mu “Yeelusaleme, mu Yuudeya mushima, na mu Samariya, mpaa na kufudiile nsenga.” (Bik. 1:6-8) Uno ngi mudimo ubaadi balongi ba Yesu bapete. Pa kuikitshisha na muabo mooso bua kulungula bangi mukandu wibuwa, babaadi bafubishe nsaa yabo kalolo.

13. Buakinyi abitungu tufubishe nsaa yetu kalolo? (Bena-Kolose 4:5)

¹³ Badika Bena-Kolose 4:5. Bua’shi tuikale badimukie atue banabene, abitungu tutale mushindo watufubisha nsaa yetu. “Mianda ya mu kimpulunkamba” ngilombene kukitshikila  muntu ooso a kuatudi. (Mul. 9:11) Tui balombene kufua mu kabasamushi.

14-15. Tui kufubisha nsaa yetu kalolo mushindo kinyi? (Bena-Ebelu 6:11, 12) (Tala dingi kifuatulo.)

¹⁴ Tui kufubisha nsaa yetu kalolo pa kukita kikiabe ki’eshimba dia Yehowa na kunyingisha kipuano kietu naye. (Yo. 14:21) Abitungu ‘twikale banyingye, bashii kusaanyishwa, twikale na katshintshi ku mufubo wa Mwanana.’ (1 Kod. 15:58) Na dingi nsaa ayikafiki mfudiilo, bi’ekala a muwa wetu sunga a uno ndumbuluilo e bubi, t’abiketukemesha nya.—Mat. 24:13; Lom. 14:8.

¹⁵ Lelo uno, Yesu ki’atungunuka na kupa balongi baye buludiki bu biabaki’abalungula mukandu wibuwa pabitale Bufumu bu’Efile Mukulu mu nsenga ishima. Kuete alombasha mulayilo waye. Kukiila kui ndumbuluilo a Yehowa, Yesu kuete etulongiesha mushindo wa kulungula mukandu wibuwa, na kuitupa bina mudimo biatudi nabio lukalo bua kupalakasha mukandu wibuwa. (Mat. 28:18-20) Tukuete kukita akitutekie Yesu, pa kuikitshisha na muetu mooso bua kulungula bangi mukandu wibuwa na kuibalongiesha, na kushaala bapasukie patuki’atutengiela’shi Yehowa afuishe mfudiilo a uno ndumbuluilo e bubi. P’atutumikila elango di mu Bena-Ebelu 6:11, 12, atukalama lukulupilo luetu lunyingie “mpaa na ku mfudiilo.”—Badika.

16. Tui na kitshibilo kia kukita kinyi?

¹⁶ Yehowa mmupue kutshiba efuku na nsaa y’akafuisha mfudiilo a ndumbuluilo a Satana. Apakafiki diadia efuku, Yehowa t’akakutua kulombasha matemuki afundibue Muiyi diaye. Anka ingi nsaa tui kubanga kunangushena’shi mfudiilo a uno ndumbuluilo e bubi tayifiki bukidi. Anka efuku dia Yehowa ‘t’adiisha nya.’ (Aba. 2:3, EEM) Biabia, tuateyi kitshibilo kia kutungunuka na “kutengiela Yehowa,” bua kulesha’shi “tui na kinangu kia kutengiela Efile Mukulu eetu, Mupaashi eetu.”—Mik. 7:7, NWT.