MU DIA Kasatu, efuku dia 18/1/2023, babaadi baukishe muanda wi pabuao mu jw.org, wa’shi mukuetu Gage Fleegle na mukuetu Jeffrey Winder babatudibua bua kufuba bu bena Kasaka ka Bakunkushi-Bakulu ka Tumonyi tua Yehowa. Bano bakuetu boso babidi, mbapue kufubila Yehowa na lulamato munda mua mafuku e bungi.

Mukuetu Fleegle mmukudile dia kupona nguba kua eumbo dia États-Unis mu Pennsylvanie mui baledi baye babadi bamulongieshe bia binyibinyi. Pabadi nsongualume, kifuko kiaye kibayile mu kushala mu ka musoko kapela mubadi lukalo lukata na balungudi. Kunyima kua mafuku apeela, badi mubatshishibue mu 20/11/1988.

Baledi ba mukuetu Fleegle babadi abamunyingisha nsaa yoso buadia kutuela mu mudimo wa nsaa yoso. Babaadi abakamba kukukila ku nshibo kuabo bakunkushi ba bifunda na bena Betele, na bino bibakuashile mukuetu Fleegle bua kumona muloo ubadi nao bano bakuetu balume na bakashi. Kunyima kua mafuku apeela n’aye kubatshishibua, babangile mudimo wa bu mbala-mashinda a mieshi yoso, mu 1/9/1989. Kunyima kua bipua bibidi, balombeshe kepatshila kaye ka kufuba Betele kabatshile pabadi na bipua 12. Babangile kufuba ku Betele a mu Brooklyn mu mueshi w’Ekumi 1991.

Ku Betele, mukuetu Fleegle badi mutumikie mu mbalo yabalamikaa mikanda munda mua bipua 8, akupu badi mufube mu Departema a mudimo. Mu aa mafuku, bakuashile mu kakongie ka ludimi lua Ruse munda mua bipua bipeela. Mu 2006, badi muibakile mukashi aaye Nadia, babangile namu kufuba ku Betele. Boso buabo, babadi bakuatshishene kakongie ka ludimi lua Portugais na kukuatshishena kakongie ka ludimi lua Espagnol munda mua bipua bikile ku 10. Kunyima kua kufuba bipua bibungi mu Departema a mudimo, Mukuetu Fleegle babamutudile bua kufuba ku biro bia Komite a malongiesha, na kunyima ku  biro bia Komite a mudimo. Mu mueshi wa Kasatu 2022 bekele bamutule bu mukuashi mu Komite a Mudimo a Kasaka ka Bakunkushi-Bakulu.

Mukuetu Winder badi mukudile mu Murrieta mu Californie, mu eumbo dia Étas-Unis. Babadi bamulongieshe bia binyibinyi kui baledi baye, aye nkubatshishibua mu 29/3/1986. Mu mueshi ubalondele, batshile kitshibilo kia kufuba bu mbala-mashinda mukuashi. Bapushile muloo wibungi, aye nkutungunuka. Kunyima kua kufuba bu mbala-mashinda mukuashi munda mua mieshi ibungi, babangile kufuba bu mbala-mashinda a mieshi yoso mu 1/10/1986.

Pabadi ki nsongualume, mukuetu Winder bayile mu kutembela ba tutu baye babidi babadi abafubu ku Betele. Kuakua kutemba kubamupele namu lukalo lua kufika mu kufuba ku Betele p’akulu. Mu mueshi wa Katano 1990, babadi bamuitamine bua kufuba ku Betele a Wallkill.

Ku Betele, Mukuetu Winder mmufube mu midimo ibungi, bu mudimo wa kutumpa mashibo, kufuba ku ferme na kufuba ku biro bia Betele. Badi muibakile mukashi aaye Angela, mu 1997, na abo nkutungunuka na kufuba ku betele boso bubidi. Mu 2014 babadi bebatume ku Warwick, kubadi Mukuetu Winder mukuashe mu luibako lua mashibo a biro bietu bikata. Mu 2016 babayile ku mbalo ikata ya malongyesha a Watchtower mu Patterson, kubadi Mukuetu Winder mufube mu mudimo wa Audio/Video. Kunyima kua bipua binanka, babadi balukile ku Warwick, na Mukuetu Winder babamutudile buadia kufuba mu biro bia Komite a bena Betele. Mu mueshi wa Kasatu 2022 bekele bamutule bu mukuashi mu Komite a Bena Betele a Kasaka ka Bakunkushi-Bakulu.

Atutekie Yehowa bua’shi elele bano bakuetu be bu “bia buntu bikale bantu” miabi i bungi buabadia kutungunuka na kufuba ngofu mu mudimo wa Bufumu.—Ef. 4:8.