1-2. Nkinyi kilombene kuitukuasha bua kuuka mushindo ubaadi upushe Yehowa pabitale madimi ababadi badimbile eshina diaye?

 BANDA kupuandikisha bino: Muntu kampanda odi mufule bakula muanda wi bubi ngofu pa bikutale. Ouku’shi wawa muanda ubakula ngua madimi, anka bantu bebungi babeukumiina. Na muanda wi bubi bukilekile babanga kupalakasha aa madimi aaye, na bantu bebungi’nyi babakumiina. Wekupusha namu naminyi? Su wemufule bantu be bungi na nkumo yobe i buwa, kadi nsaa yabakudimbiila muanda we kupusha bi bubi ngofu, nta mbiabia su?—Nki. 22:1.

² Uno muanda wi kuitukuasha bua kuuka mushindo ubaadi upushe Yehowa pababaluishishe nkumo yaaye. Umune a ku bana baye ba mu kikudi baadi mumudimbile kui muana mukashi a kumpala Eva. Na Eva namu nkukumina aa madimi. Ano madimi abaadi atakule baledi betu ba kumpala mu kutombokiela Yehowa. Bu kipeta, miluisho na lufu mbikuate bantu. (Kib. 3:​1-6; Lom. 5:12) Ino nkalakashi yoso yatudi nayo lelo uno mu nsenga ishima—bu lufu, ngoshi, makienga—mbifikie pa muanda wa madimi a Satana ababangile kupalakasha mu efuba dia Edene. Yehowa bapushishe bubi pa muanda wa ano madimi na bino bipeta bi bubi su? Oolo. Anka, Yehowa nta Efile Mukulu a nsungu sunga alamaa ngo nya. Kadi mmutungunukie na kuikala bu “Efile Mukulu a muloo.”—1 Ti. 1:11.

3. Nkinemo kinyi kiatudi nakio?

³ Tui na kinemo kia kukuatshishena bua kukaluila eshina dia Yehowa pakukokiela uno muiya upelepele awamba’shi: “Tumbishayi eshina dia Yehowa.” (Mis. 113:​1, NWT) Atutumbisha eshina dia Yehowa nsaa yatulungula bangi bia binyibinyi pabimutale. Obe namu okumina kutumbisha eshina dia Yehowa su? Biabia tutaluleyi mianda isatu i na muulo ngofu ayiketukuasha buatudia kutumbisha eshina di’Efile Mukulu eetu n’eshimba dietu dioso.

 ATUSANKISHA YEHOWA NSAA YATUTUMBISHA ESHINA DIAYE

4. Buakinyi patutumbisha Yehowa abimusankishaa? Tuusha kileshesho. (Tala dingi kifuatulo.)

⁴ Atusankisha Nshetu emuiyilu nsaa yatutumbisha eshina diaye. (Mis. 119:108) Bino abipushisha’shi, Efile Mukulu sha bukome boso ebu bana ba bantu bashi bapuidikie abakuminaa kuibatumbisha bua kuibanyingisha sunga bua kuibakuasha? Nya. Tutaluleyi kino kileshesho. Banda kupuandikisha ka songuakashi kabadi bafule kui shako ngofu akasuku lubilo, aketumbila nshaye pa mbidi na akamuanya kipa, akamulungula’shi: “We buwa kukila baledi boso ba mu nsenga ishima!” Nshaye asanka ngofu, na abimukumu kuishimba pa kumona kiakia kikitshino kia muan’aye. Buakinyi? Tui kupuandikisha’shi nshe muana emonaa bu shi kapu, na e na lukalo na muan’aye bua’shi amutumbishe ndio apushe kalolo su? Nya. Muanda mmufule ka nsonguakashi kaye na e na muloo wa’shi kabamulesha’shi nkamufule na ke na lutumbu. Mmuukie’shi ino ngikashi ayikakuasha muan’aye bua’shi ekale na muloo bia kuete kuenda na kukula. Mu mushindo umune, Yehowa Nshetu mukata asankaa nsaa yatumutumbisha.

5. Su tubatumbisha eshina di’Efile Mukulu, abitukuasha buatudia kutuusha madimi a Satana pabutooka naminyi?

⁵ Patutumbisha Nshetu e muiyilu, abitukuasha buatudia kulesha’shi, mianda yoso yabakulaa kui Satana bua oso a kuatudi ngia madimi. Satana amba’shi, takui muntu sunga ngumune, mulombene kukaluila eshina di’Efile Mukulu na lulamato. Na’shi, takui muntu sunga ngumune ekushaala na lulamato kui Efile Mukulu nsaa yadi mu kitompuanga. Amba dingi’shi atue boso tui kukumina kuleka kufubila Efile Mukulu su tuamona’shi abitusankisha. (Yob. 1:​9-11; 2:4) Anka Yobo muntu sha lulamato baadi muleshe’shi Satana nsha madimi. N’obe namu okumiina kushala na lulamato kui Efile Mukulu? Oso a kuatudi e na kiadia kusangula bua kukaluila eshina dia Nshetu na kumusankisha pa kumufubila na lulamato. (Nki. 27:11) Nyi nkinemo kikata kia kutumbisha eshina dia Yehowa.

6. Tuikuambula Nfumu Davide na bena Levi naminyi? (Neemiya 9:5)

⁶ Kifulo bu’Efile Mukulu akitakulaa bantu basha lulamato buabadia kutumbisha eshina diaye n’eshimba diabo dioso. Nfumu Davide bafundile’shi: “Nakumiina kutumbisha eshina dia Yehowa, na bioso biandi nabio bitumbishe eshina diaye dia kishila.” (Mis. 103:​1, NWT) Davide baadi muukie kalolo’shi, kutumbisha eshina dia Yehowa nyi nkutumbisha Yehowa aye nabene. Nsaa yatupusha pabitale eshina dia Yehowa, atunangushena bi bumuntu buaye na bi ngikashi yaye i buwa na bikitshino biaye bia kukaanya. Davide baadi mukumiine kuikasha eshina dia Yehowa bu dia kishila na kuiditumbisha.  Baadi mukumiine kukita biabia na “bintu biaye bioso,” kuamba’shi n’eshimba diaye dioso. Mu mushindo umune, bena Levi namu babatshile mpango yakubanga kutumbisha Yehowa. Na kuiyisha koso babaadi bakumiine’shi, mayi abo t’aanalombane kutumbisha Yehowa, n’eshina diaye dikale dia kishila. (Badika Neemiya 9:5.) Kushi mpaka, kuno kuiyisha na kumutumbisha n’eshimba diabo dioso, kubaadi kusankishe eshimba dia Yehowa.

7. Tui kutumbisha Yehowa mu bulungudi na mu nshalelo etu a kuifuku n’efuku naminyi?

⁷ Lelo uno, tuikutumbisha Yehowa pakuakula pa bimutale na muloo oso na lutumbu mpa na kifulo. Nsaa yatudi mu mudimo wa bulungudi, abitungu tulamiine’shi, kepatshila ketu nka kukakila bantu kui Yehowa, na kuibakuasha bua’shi bamone Nshetu sha kifulo bu biatumumonaa. (Yak. 4:8) Mushindo wabalesha Yehowa mu Bible, biadi na kifulo, kululama, binangu na bukome na ingi ngikashi yaaye i buwa abisankishaa bikile. Atutumbisha dingi Yehowa na kumusankisha patuikitshisha bua kumuambula. (Ef. 5:1) Su tubambula Yehowa, atuikala belamune na uno ndumbuluilo e bubi. Patuambula Yehowa bantu mbalombene kumona’shi tuibelekene na bantu ba mu uno ndumbuluilo e bubi. (Mat. 5:​14-16) Patuikala belekene nabo mu nshalelo etu a kuifuku n’efuku, tuikupeta mushindo wa kuibapatuluila buakinyi atukitaa biabia. Bu kipeta, bantu be na mashimba alulame abefubuila kui Efile Mukulu etu. Patutumbisha Yehowa mu ino mishindo, abinyisha kusankisha eshimba diaye.—1 Ti. 2:​3, 4.

ATUSANKISHA YESU PATUTUMBISHA ESHINA DIA YEHOWA

8. Yesu mmuikale kileshesho ki buwa mu kutumbisha eshina dia Yehowa naminyi?

⁸ Ku bipangua bioso bi na binangu bi muiyilu na pa nsenga, takui sunga nkimune akiuku Nshetu kalolo kukila Yesu nya. (Mat. 11:27) Yesu mmufulue Nshaye, na naaye muikale kileshesho kia kumpala kia kutumbisha eshina dia Yehowa. (Yo. 14:31) Pabaadi atekie Nshaye bufuku kumpala kua lufu luaye, baadi muleshe bibaadi mukite mudimo wa bulungudi pa nsenga mu kikoso mu uno mushindo, amba’shi: “Ne muibaukishe eshina diobe.” (Yo. 17:26) Nkinyi kibaadi akiebe kuamba pano?

9. Nkileshesho kinyi kibaadi Yesu mufubishe bua kupatuluila bantu kalolo bi Nshaye mu mushindo wi buwa?

⁹ Yesu baadi mukite ingi mianda i bungi kukatusha penda kulungula bantu’shi eshina di’Efile Mukulu nyi Yehowa. Bena Yuda babaadi Yesu mulongieshe babaadi bapue kuuka eshina di’Efile Mukulu. Anka Yesu nyi batshile mpango ya kuikala “yawa . . . mupatuule Kiadi.” (Yo. 1:​17, 18) Bu kileshesho, Bifundue bia ki na Ebelu abilesha’shi Yehowa, nyi Efile Mukulu sha kalolo na lusa. (Efi. 34:​5-7) Yesu baadi mupatuule bino bia binyibinyi kalolo nsaa ibaadi akula muanda wa lukindi pabitale muana ntomboshi na nshaye. Nsaa yatubadika mu Bible pabitale yawa nshe muana amono muana aye belanga kuishimba, “pabaadi ki ku bula’biaa,” aye nkusuuka lubilo nkumuanya kiipa nkumufifia kuitama na kalolo koso na aaye nkumufuila lusa n’eshimba diaye dioso, atumono kileshesho kia mushindo awikalaa Yehowa na lusa na kalolo. (Luk. 15:​11-32) Yesu baadi mukuashe bangi bantu buabadia kuuka bi bumuntu bua Yehowa binyibinyi.

10. (a) Atuuku naminyi’shi Yesu baadi mufubishe eshina dia Nshaye dinabene na akumiina’shi bangi bedifubishe? (Maako 5:19) (Tala dingi kifuatulo.) (b) Yesu akumiina’shi tukite kinyi lelo uno?

¹⁰ Yesu akumiina dingi’shi bangi bafubishe eshina dia Nshaye dinabene su? Oolo. Bangi bakata ba bipuilo ba mu mafuku a kala, babaadi abamba’shi, tabibuwa kutemuna eshina di’Efile Mukulu muanda nyi eshina dikile kishila, anka Yesu tabaadi mutadiile efuku sunga ndimune bua’shi bipikua bia mianda ishi ya mu Bible bimukutshishue kutumbisha eshina dia Nshaye nya. Tutaluuleyi nsaa ibadi mupashe muana mulume  baadi na ma demo ebungi ku Ngalasene. Bantu bebungi babapushishe moo na abo nkubanga kuisendeela Yesu bua’shi akatukie mu eumbo diabo, na aye namu ntamushaale muanka nya, bakatukile. (Mak. 5:​16, 17) Aku namu, Yesu baadi akumiina’shi, bantu ba mu yaaya nsenga baukie eshina dia Nshaye. Kunyima kua paapa, Yesu balunguile yawa muana mulume baadi mupande ku ma demo buadia kuenda akalungule bantu bibamukitshiina Yehowa kushi bibamukitshiina aye. (Badika Maako 5:19.) a Mu mushindo umune lelo uno, akumiina’shi tuukishe bangi bantu eshina dia Nshaye mu nsenga ishima! (Mat. 24:14; 28:​19, 20) Su tubakitshi biabia atusankisha Nfumuetu Yesu.

11. Yesu balongieshe balongi baaye buabadia kuteka bua muanda kinyi, na buakinyi bino bibaadi na muulo ukata? (Esekiele 36:23)

¹¹ Yesu baadi muukie’shi, mpango ya Yehowa ngia’shi, ekashe eshina diaye dia kishila na kuidikaluila ku madimi oso abadi bedidimbile. Ngi buakinyi Nfumuetu balongieshe balongi baaye buabadia kuteka’shi: “Yaya etu e muiyilu, eshina diobe dikashue dia kishila.” (Mat. 6:9) Yesu baadi muukie’shi, uno nyi muanda ukata ukuete kufumankana na bipangua bioso. (Badika Esekiele 36:23.) Takui kipangua sunga nkimune ki na binangu muiyilu na pa nsenga, kitakidi kikite mudimo wi bungi bua kuikasha eshina dia Yehowa bu dia kishila kukila Yesu. Pababakuatshile Yesu, beshikuanyi baaye babaadi bamufunde’shi bakitshi muluisho kinyi? Babambile’shi baadi asabuula Nshaye! Yesu baadi mupushe bubi ngofu muanda’shi, kudimbila eshina dia Nshaye dia kishila kubaadi bu muluisho ukata kukila yoso. Bibaadi bimukalakashe ngofu pabo kumudimbiila’shi mmukite kibeshi kia wawa mushindo. Kano nyi kabingilo kakata kabaadi kenyongoshe Yesu ngofu nsaa ibungi kumpala kuashi bamukuate.—Luk. 22:​41-44.

12. Yesu baadi muikashe eshina dia Nshaye dia kishila mu mushindo wi buwa naminyi?

¹² Bua kuikasha eshina dia Nshaye dia kishila, Yesu baadi munyingile mianda i bukopo bu kukayibua, na kudimbilua mianda. Baadi muukie’shi baadi akokiela Nshaye mu mianda yoso na takubaadi kintu su nkimune kibaadi kilombene kumukutshishua kuibikita. (Eb. 12:2) Baadi muukie dingi’shi Satana nyi baadi alu naye mu yaaya nsaa ya makienga. (Luk. 22:​2-4; 23:​33, 34) Satana baadi ashinkamisha mu binyibinyi’shi, akutshishua Yesu lulamato luaye; anka  Satana baadi muidimbe ngofu! Yesu baadi muleshe’shi Satana nsha madimi na’shi Yehowa e na bafubi baye basha lulamato, abalama lulamato luabo mpa na mu bitompuanga bi bukopo!

13. We kusankisha Nfumobe kuete kumunana naminyi?

¹³ Okumiina kusankisha Nfumobe kuete kumunana su? Tungunuka na kutumbisha eshina dia Yehowa, na kukuasha bangi bua’shi baukie Efile etu a binyibinyi. Su bokitshi biabia, wambula Yesu. (1 Mp. 2:21) Nka bu Yesu, osankisha Yehowa na olesha pa butooka’shi, Satana diabulu muishikuanyi a Yehowa ngi nsulo ya madimi!

PATUTUMBISHA ESHINA DIA YEHOWA ATUKUASHA BUA KUPAASHA MIUWA YA BANTU

14-15. Mmianda kinyi i buwa ilombene kukitshika p’atulongiesha bantu pabitale Yehowa?

¹⁴ Patutumbisha eshina dia Yehowa atukuasha bua kupaasha miuwa ya bantu. Mu mushindo kinyi? Muanda Satana “mmubuikile binangu bia bantu bashi bena kukumiina.” (2 Ko. 4:4) Pa muanda wa biabia mbafikie mu kukumina ano madimi a Satana aamba’shi: Efile Mukulu te kuanka, ekula n’etu, tekalashaa bua bantu, ntomboshi na akiengiesha bantu babi mu kaalo ka loso. Satana alungula bantu ano madimi muanda akumiina kuluisha nkumo y’eshina dia Yehowa, akiebe’shi bantu balekie kuifubuila kui Efile Mukulu. Biabia patulungula mukandu wibuwa atukutshishua Satana kulombasha kepatshila kaye. Atulongiesha bantu bia binyibinyi pabitale Nshetu, na atutumbisha eshina dia kishila di’Efile Mukulu etu. Bino abitusha bipeta kinyi?

¹⁵ Bia binyibinyi bia muiyi di’Efile Mukulu bi na bukome bui bungi. P’atulongiesha bantu pabitale Yehowa na biakumiina, abitusha bipeta bi buwa bukile. Mu kukila kua mafuku, bantu tabekala dingi babuikidibue ku meso na madimi a Satana nya, ababanga mpa na kumona ngikashi i buwa ya Nshetu. Na abekala abasankila bukome bua Yehowa bushi na mpuilo. (Yesh. 40:26) Na abalongo bia kumukulupila muanda wa kululama kuaye kupuidikie. (Miy. 32:4) Abalongo mianda i bungi kukiila ku binangu biaye. (Yesh. 55:9; Lom. 11:33) Na abanyingishibua pa kuuka’shi, Efile Mukulu nyi nkifulo. (1 Yo. 4:8) Pabefubuila kui Yehowa, lukulupilo luabo lua kuikala na muwa wa loso bu bana b’Efile Mukulu, alufiki lua binyibinyi. Tui na kinemo kikata kia kukuasha bantu buabadia kuifubuila kui Nshetu!  Su tubakitshi biabia, Yehowa etumono’shi ‘tukuete kufuba naye pamune.’—1 Ko. 3:​5, 9.

16. Abikalaa na bukitshishi kinyi kui bangi nsaa yabauku eshina di’Efile Mukulu? Tuusha kileshesho.

¹⁶ Kia kumpala, tui balombene kulongiesha bantu penda’shi, eshina di’Efile Mukulu mbu Yehowa. Nkapenda bino bia binyibinyi, ngi bilombene kushintuula nshalelo a bantu basha mashimba alulame. Bu kileshesho, ungi nsonguakashi abetanyina bu Aaliyah b badi mukidile mu kipuilo muabashaa balongieshaa mianda ayitukila mu Bible. Anka tabaadi akamba kumona kuipushena kui pankatshi pa kipuilo kiaye n’Efile Mukulu nya. Biabia bibaadi bishintuule nshalelo aye kunyima kuaye kulonga bia binyibinyi na Tumonyi tua Yehowa. Babangile kumona Efile Mukulu bu kuuku aye. Na baadi mukaanye ngofu pa kuuka’shi babaadi bakatushe eshina di’Efile Mukulu mu ma Bible ebungi, na bedipianyikisha na miasu, bu kileshesho, Muanana. Kuuka eshina di’Efile Mukulu kubaadi na muulo ukata mu nshalelo aye. Baadi mukaanye’shi: “Kuuku ande a p’eshimba e na eshina!” Pa muanda wa biabia bambile’shi: “Binobino napete butaale buibungi muishimba. Napusha’shi nena kinemo.” Ungi muana mulume abetanyinaa bu Steve baadi ayimbi misambo, baadi mukule mu kifuko kia bena Yuda. Tabaadi akumiina kuikala mu ndumbuluilo kampanda a kipuilo, muanda baadi emumono bunsesa. Biabia kunyima kua nyinaye kufua, baadi mukumiine kulonga Bible na umune a ku ba Tumonyi ba Yehowa. Bibaadi bimukume kuishimba ngofu paye kuuka eshina di’Efile Mukulu. Amba’shi: “Kashaa ntshinadi mubande kulonga eshina di’Efile Mukulu.” Akumbasha’shi: “Ngi mususa wa kumpala unampushishe’shi Efile Mukulu ekuanka binyibinyi! Namumuene bu muntu a binyibinyi. Na naukile dingi’shi napete kuuku.”

17. Buakinyi we na kitshibilo kia kutungunuka na kutumbisha eshina dia kishila dia Yehowa? (Tala dingi kifuatulo.)

¹⁷ Mu mudimo obe wa bulungudi na wa kulongiesha, olungulaa namu bantu pabitale eshina dia Yehowa dia kishila su? Webakuashaa namu biabadia kumona abikalaa Efile Mukulu su? Nsaa yokitshi biabia otumbisha eshina di’Efile Mukulu. Biabia tutungunukieyi na kutumbisha eshina dia Yehowa dia kishila, pakukuasha bantu buabadia kuuka bi bumuntu buaye binyibinyi. Su bokitshi biabia opasha miuwa ya bantu. Na okalondo kileshesho kia Nfumobe Yesu Nkidishitu. Kikile bioso okasankisha Nshobe sha kifulo Yehowa. Biabia tuikaleyi ‘atutumbisha eshina diaye bua loso!’—Mis. 145:2.