1. Buakinyi tui na lukalo na bukunkushi bua Yehowa? Tusha kileshesho.

 BANDA kupuandikisha’shi boshimina mu mutamba. We mu masaku akata muanda wa nyema i bukielo, tuishi atusumanaa, mitshi i na lulengo na milobo. We kuikala na lutumbu lukata su we na muntu auku yaya mbalo i masaku kalolo na mulombene nkukunkusha muishinda di buwa! Uno ndumbuluilo e nka bu mu wawa mutamba. Mmuule na masaku e bungi alombene kuluisha kipuano kietu na Yehowa. Anka tui na Mukunkushi mupuidikie, Yehowa. Etukunkusha bua kukatuka mu mbalo i masaku buatudia kuikala muishinda aditutuala ku muwa wa ikalaika mu nsenga ipia.

2. Yehowa kuete kuitukunkusha naminyi?

² Yehowa etukunkushaa mu mushindo kinyi? Kia kumpala, etukunkushaa ku bukuashi bua Eyi diaye Bible. Dingi afubishaa bantu abalesha mpala yaye. Bu kileshesho, kuete kufubisha “mpika a lulamato na mudimukie” bua kuitupa bidibua bia mu kikudi abitukuasha bua kuata bitshibilo bi buwa. (Mat. 24:45) Yehowa afubishaa dingi bana balume be na ngobesha bua kuitukunkusha. Bu kileshesho, bakunkushi ba bifunda na bakulu ba mu tukongie, abetunyingishaa na kuitupa malango e bia kuitukuasha bua kunyingiila mu bipungo bia nkalakashi. Tui na lutumbu lukata kui Yehowa biakuete kuitukunkusha kalolo mu ano mafuku e bukopo a ku nfudiilo! Muanda buno bukunkushi abuitukuasha buatudia kushala mu kipuano na Yehowa na kuikala na muloo mu nshalelo kubanga binobino na bua loso.

3. Nkinyi kiakutalula mu uno muisambo?

³ Sunga mbiabia, ingi nsaa abituikeela bukopo buatudia kulonda bukunkushi bua Yehowa, bikishekishe nsaa yabebutusha kui bantu bakutue kupuidika. Buakinyi? Pangi bi kuikala’shi elango diabatusha nta nyi diatukumina kupusha. Pangi namu atupusha’shi buludiki buatupete ta bui buwa, na kumona’shi t’abufiki kui  Yehowa. Mu yaya nsaa, tui na lukalo lua kushinkamisha binyibinyi’shi Yehowa nyi kuete kukunkusha muilo waye, na’shi kulonda bukunkushi buaye akuitupetesha miabi. Biabia, bua kunyingisha lukulupilo luetu, uno muisambo aukiebe kuitukuasha bua kumona (1) mushindo ubadi Yehowa akunkusha muilo waye mu mafuku a kala, (2) mushindo wakuete kuitukunkusha lelo uno, na (3) biatupete bukuashi nsaa yatutungunuka na kulonda bukunkushi buaye.

MUSHINDO UBADI YEHOWA AKUNKUSHA MUILO WA ISALELE

4-5. Yehowa badi muleshe’shi badi afubisha Moyise bua kukunkusha muilo wa Isalele naminyi? (Tala kifuatulo ki ku kipusu.)

⁴ Yehowa badi musangule Moyise bua kunkukusha muilo wa Isalele bua kutuka mu Ejipitu. Na Badi mupe bena Isalele bishinkamisho abimueneka patooka’shi Badi ebakunkusha ku bukuashi bua Moyise. Bu kileshesho, Badi ebakunkusha na musungo w’ekumbi mu kaanya na wa kaalo bufuku. (Efi. 13:21) Moyise badi alondo wawa musongo ubadi awibakunkusha na bena Isalele ku Kalunga Kamonga. Bena Isalele babapushe moo ukile nsaa ibabamuene’shi kumpala kuabo kui kalunga na kumongo kuabo kui basalayi ba bena Ejipitu abebalondo. Nyi abo nkumona’shi Moyise bakitshine kilubilo kikata p’aye kuibatuala muishinda dia ku Kalunga Kamonga. Aku namu takibadi kilubilo nya. Yehowa nyi badi mufubishe Moyise buadia kuibakunkusha kuakua. (Efi. 14:2) Kunyima, Efile Mukulu badi muibapaashe mu kipaso kia kukaanya.—Efi. 14:​26-28.

⁵ Akupu, munda mua bipua 40, Moyise badi mutungunukie na kulonda musungo w’ekumbi bua kukunkusha muilo w’Efile Mukulu mu kabaaka. a Ungi musango, Yehowa batuudile musungo kunundu kua kashibo k’epema ka Moyise bua’shi bena Isalele boso beumone. (Efi. 33:​7, 9, 10) Yehowa badi esamba na Moyise kukiila ku musungo, Moyise namu badi atuala buabua buludiki kui muilo. (Mis. 99:7) Bena Isalele babaadi na kishinkamisho akilesha’shi Yehowa badi afubisha Moyise bua kuibakunkusha.

6. Bena Isalele babakitshine naminyi na bukunkushi bua Yehowa? (Mbadiko 14:​2, 10, 11)

⁶ Bi malua, muanda bena Isalele bebungi babadi bapele kishinkamisho akilesha potoka’shi, Yehowa badi afubisha Moyise bu muntu alesha mpala Yaye. (Badika Mbadiko 14:​2, 10, 11.) Misango i bungi, babadi abapele’shi Yehowa badi afubisha Moyise bua kuibakunkusha. Pa muanda wa biabia, kiakia kipungo kia bena Isalele takibatuelele mu Nsenga ya Mulailo nya.—Mba. 14:30.

7. Teemuna bileshesho bia bantu babaadi balonde bukunkushi bua Yehowa. (Mbadiko 14:24) (Tala dingi kifuatulo.)

⁷ Anka, bangi bena Isalele babalondele bukunkushi bua Yehowa. Bu kileshesho, Yehowa bambile’shi: ‘Kalebe . . . mmundonde n’eshimba diaye dioso.’ (Badika Mbadiko 14:24.) Efile Mukulu baadi mufute Kalebe, amupa mpaa na matalua a kuisanguila mbalo yooso y’akumiina nkashaala mu Nsenga ya Mulayilo. (Yosh. 14:​12-14) Bena Isalele babatuelele mu Nsenga ya Mulayilo babalekiele kileshesho ki buwa bukile kia kulonda bukunkushi bua Yehowa. Nsaa ibaadi Yoshua abaabadi batuule bua kukunkusha bena Isalele mupiane Moyise, babaadi “abamunêmeka mafuku oso a mûwa wê.” (Yosh. 4:14) P’abo kukita bino, Yehowa baadi muibelele muabi pa kuibatuala ku Nsenga ya Mulayilo ibaadi muibalee.—Yosh. 21:​43, 44.

8. Patuula bibaadi Yehowa akunkusha muilo waye mu mafuku a ba nfumu. (Tala dingi kifuatulo.)

⁸ Kunyima kua bipua, Yehowa badi mutuule ba nsushi buabadia kukunkusha muilo waye. Akupu mu mafuku a ba nfumu, Yehowa batudile batemuki buabadia kukunkusha muilo waye. Ba nfumu ba sha lulamato babadi abakokiela malango a batemuki. Bu kileshesho Nfumu Davide, badi mukumine na kuiyisha koso pababadi bamutopekie kui mutemuki Natane. (2 Sam. 12:​7, 13;  1 Mya. 17:​3, 4) Nfumu Yeoshafate namu badi mukulupile buludiki bua mutemuki Yaaziele n’aye nkunyingisha bena Yuda buabadia ‘kutuula lukumiino mui batemuki [b’Efile Mukulu.’] (2 Mya. 20:​14, 15, 20, EEM) Nfumu Ezekiya p’abadi mubungame, batekiele mutemuki Yeshaya bukuashi. (Yesh. 37:​1-6) Misango yoso ibadi ba nfumu abalondo bukunkushi bua Yehowa, baadi ebelela miabi na kukaluila muilo waye. (2 Mya. 20:​29, 30; 32:22) Bantu boso babaadi abamono kalolo’shi, Yehowa badi afubisha batemuki baye buabadia kukunkusha muilo waye. Anka, ba nfumu na bantu bebungi, babaadi abapele kukokiela buludiki bua batemuki.—Yel. 35:​12-15.

MUSHINDO UBADI YEHOWA AKUNKUSHA BENA NKIDISHITU BA KUMPALA

9. Yehowa badi afubisha nnanyi bua kukunkusha bena Nkidishitu ba mu siekele a kumpala? (Tala dingi kifuatulo.)

⁹ Mu Pantekote a mu kipua kia 33 B.B., Yehowa batudile kakongie ka bena Nkidishitu. Badi akunkusha baba bena Nkidishitu ba kumpala naminyi? Badi musangule Yesu bu nfumu a kakongie. (Ef. 5:23) Anka Yesu tabadi alungula mulongi ooso pa bupenka kiadia kukita nya. Badi afubisha batumibua na bakulu babadi mu Yelusalema buabadia kukunkusha. (Bik. 15:​1, 2) Dingi, bakulu babadi abatudibua bua kukunkusha tukongie.—1 Te. 5:12; Tt. 1:5.

10. (a) Bena Nkidishitu ba mu siekele a kumpala babaadi bakokiele buludiki bubaabadi abapete su? (Bikitshino 15:​30, 31) (b) Buakinyi bangi mu mafuku a kala babadi abapele kukokiela bantu abalesha mpala ya Yehowa? (Tala kashibo akamba’shi: “ Buakinyi bangi babaadi abapele bishinkamisho abimueneka?”)

¹⁰ Bena Nkidishitu ba mu siekele a kumpala babaadi bakokiele buabua buludiki su? Oolo, bebungi ba kuabadi babadi na muloo wa kulonda buludiki bubabadi abapete. Biabia, “abaadi basankie bua kuakua kunyingishibua” kubabadi bapete. (Badika Bikitshino 15:​30, 31.) Biabia, Yehowa kuete kukunkusha muilo waye ano eetu mufuku su?

MUSHINDO AWITUKUNKUSHA YEHOWA LELO

11. Tusha kileshesho kia mushindo ukunkushe Yehowa baba abakunkusha mu ano eetu mafuku.

¹¹ Yehowa kuete kutungunuka na kukunkusha muilo waye lelo uno. Kuete kuibikita ku bukuashi bua Eyi diaye na Muana’ye muikale mutue wa kakongie. Tukuete kumona bishinkamisho abilesha’shi Yehowa kuete kutungunuka na kufubisha bantu abalesha mpala yaye su? Oolo. Bu kileshesho, tubande kunangushena bibadi bikitshikie kunyima kua kipua kia 1870. Mukuetu Charles Taze Russell na benaye bababangile  kushinguula’shi kipua kia 1914 akikala kipua ki na muulo ukata pabitale kutudibua kua Bufumu bu’Efile Mukulu. (Nda. 4:​25, 26) Babafikile mu kuibishinguula muanda babaadi abakimbuula mu Bible na kukulupila’shi babadi na kia kumona akulombana matemuki a mu Bible. Yehowa badi akunkusha kukimbuula kuabo kua mu mu Bible su? Oolo, badi ebakunkusha kalolo. Mu kipua kia 1914 mianda ibadi ikitshikie pa nsenga ibadi ishinkamishe’shi Bufmu bu’Efile Mukulu bubabanga kumunana. Ngoshi ya kumpala ya nsenga ishima ibabangile, ilondene na bipupa, kutshinkatshinka kua nsenga na bipupa bia nsala. (Luk. 21:​10, 11) Yehowa badi mufubishe bano balongi ba Bible buabadia kukuasha muilo waye.

12-13. Mpango kinyi ibaabadi baate bua kutamisha mudimo wa kulungula na kulongiesha mu kipungo kia Ngoshi ya Kabidi ya Nsenga ishima?

¹² Tutale dingi mianda ibaadi ikitshikie mu Ngoshi ya Kabidi ya Nsenga ishima. Kunyima kua kulonga mukanda wa Kibafumbuilue 17:​8, bakuetu balume babaadi na mashito ku biro bietu bikata bia mu nsenga ishima, babaadi batundule’shi ngoshi ngilombene kuitutuala kushi ku ngoshi ya Armangedone, kadi ku kipungo kia butaale akiketupa mishindo i bungi ya kutamisha mudimo wa bulungudi. Sunga ingi nsaa bibaadi abimueneka bu bi bukopo, bakuetu balume babaadi na mashito, babatuudile kalaasa ka Galaade bua kulongiesha ba misionere bua kukita bulungudi na kulongiesha mu maumbo a mu nsenga ishima. Babaadi batume ba misionere sunga mbibaakudi ngoshi. Kukatusha biabia, mpika a lulamato na mudimukie, baadi mulumbuule tungi tulaasa tua teokrasi b bua kulongiesha tukongie tooso bua’shi bafikie balungudi na balongieshi be buwa b’Eyi di‘Efile Mukulu. Ino mpango yoso ibaadi bua’shi balumbuule muilo w’Efile Mukulu bua mudimo wa mu mafuku aafiki.

¹³ Lelo uno, tui kumona kalolo’shi Yehowa baadi akunkusha muilo waye mu kiakia kipungo ki bukopo. Kubanga nka mu Ngoshi ya Kabidi ya Nsenga ishima, muilo wa Yehowa wi mu bulungantu bua kukita mudimo wa kulungula mukandu wibuwa mu maumbo e bungi. Kadi, mudimo ukuete kuenda nka na kutama.

14. Buakinyi tui kukulupila buludiki buabatusha kui ndumbuluilo a Yehowa na abufiki kui bakulu babadi batuule? (Kibafumbuilue 2:1) (Tala dingi kifuatulo.)

¹⁴ Lelo uno, bena Kasaka ka Bakunkushi-Bakulu bakuete kutungunuka na kukimba bukunkushi bua Nkidishitu. Abakumiinaa kutusha  buludiki kui bakuetu balume bua’shi bekale na mmueneno a mianda a Yehowa na a Yesu. Na abafubishaa bakunkushi ba bifunda na bakulu bua kutusha buludiki mu tukongie. c Bakulu bedibue muimu be ‘muiyasa dibalume’ dia Nkidishitu.’ (Badika Kibafumbuilue 2:1.) Biabia, bano mbekale bantu bakutue kupuidika na abakitaa bilubilo. Mpaa na Moyise na Yoshua babadi abakitshi bilubilo ingi nsaa, nka bu bibadi bikite batumibua. (Mba. 20:12; Yosh. 9:​14, 15; Lom. 3:23) Anka, tukuete kumona kalolo’shi Nkidishitu kuete kukunkusha kalolo mpika a lulamato na bakulu, atungunuka na kuibikita “mafuku oso mpa na ku nfudiilo kua uno ndumbuluilo a mianda.” (Mat. 28:20) Biabia, tui na kabingilo ke buwa bukile ka kukulupila bukunkushi buabakuete kuitupa kui baba babadi basangule bua kuitukunkusha.

ATUPETE BUKUASHI NSAA Y’ATULONDO BUKUNKUSHI BUA YEHOWA

15-16. Bolongiela kinyi ku bileshesho bia baba balonde bukunkushi bua Yehowa?

¹⁵ Nsaa yatutungunuka na kulonda bukunkushi bua Yehowa, atupete miabi kubanga binobino. Bu kileshesho, Andy na mukashi aaye Robyn babadi batumikile elango dia mpika a lulamato dia kupelepesha nshalelo aabo. (Mat. 6:22) Pa muanda wa biabia, babadi bepaane mu kufuba mu mudimo wa luibako lua mashibo a teokrasi. Robyn amba’shi: “Ingi nsaa tubadi atushala mu tu mashibo tupeela, mubadi mukutshikue mpa na mbalo ya kutekiela. Naadi muudishe bintu biande bibungi bia kukuata nabio ma foto, sunga binadi muibifule ngofu. Bino bibaadi mpa na bindidishe. Kadi, nka bu Abalahama na mukashi aaye Sara, natshile kitshibilo kia kuenda’nka kumpala kushi kualukila ku mongo.” (Eb. 11:15) Mmiabi kinyi ipete uno mulume na mukashi aaye ku mianda yabadi bafumankane nayo? Robyn akula dingi’shi: “Tui na muloo wibungi pa kuuka’shi tukuete kupa Yehowa bintu bioso biatudi nabio. Nsaa yatukitshi mudimo wabetupa kui Yehowa, atumono abikekala nshalelo mu nsenga ipia.” Andy akumina biabia pa kuamba’shi: “Tui na muloo muanda tukuete kutusha nsaa yetu yoso na bukome buetu boso bua kukuatshishena mudimo wa Yehowa.”

¹⁶ Mbukuashi kinyi dingi buatupete nsaa yatutungunuka na kulonda bukunkushi bua Yehowa? Kunyima kua’ye kupudisha kalaasa ka sekondere, ungi mukuetu mukashi abetanyina bu Marcia balondele elango dia kuipaana mu kukita mudimo wa Yehowa. (Mat. 6:33; Lom. 12:11) Amba’shi: “Babadi bampe mushindo wa kulonga iniversite munda mua bipua binanka buntu. Kadi nadi nakumiina kulombasha bipatshila bia mu kikudi.  Biabia, pa mutue pa kukumiina kuenda ku iniversite, nasanguile bua kulonga mudimo wa maasa ulombene kunkuasha bua kupeta makuta andi nao lukalo bua kufuba bu mbala-mashinda. Kibadi kitshiblo ki buwa bukile kinadi muate. Lelo uno ne na muloo wa kufuba bu mbala-mashinda a mieshi yoso, dingi biandi na mushindo wa kuiatshila bitshibilo, mbikuashe bua kufuba ingi nsaa ku Betele na kukuasha mu ingi midimo ibungi ya Yehowa.”

17. Mmiabi kinyi dingi yatupete nsaa yatutungunuka na kulonda bukunkushi bua Yehowa? (Yeeshaya 48:​17, 18)

¹⁷ Ingi nsaa, atupetaa malango aatukila kui ndumbuluilo bua kuitukaluila. Bu kileshesho, abetudimushaa pabitale kuikala na kifulo kia nfualanga, na kuleka kukita mianda ayitutakula bua kuipaa miiya y’Efile Mukulu. Su tubalondo dingi bukunkushi bua Yehowa mu ino mianda, etuelela miabi. Atuikala na kondo k’eshimba katokie, na kuikaluila ku mianda ayitupa kinyongua. (1 Ti. 6:​9, 10) Bu kipeta, tui balombene kulanguila Yehowa n’eshimba dietu dioso, na bino abitutuadila muloo wibungi na butaale.—Badika Yeeshaya 48:​17, 18.

18. Buakinyi we na kitshibilo kia kutungunuka na kulonda bukunkushi bua Yehowa?

¹⁸ Kushi mpaka, Yehowa atungunuka’nka na kufubisha bantu abalesha mpala yaye bua kuitupa bukunkushi mu nsaa ya mpombo ikata mpaa na patukatuele mu Kumunana kua Bipua Kinunu. (Mis. 45:16) Atukatungunuka’nka na kulonda buabua buludiki, sunga biekala’shi atukimbi kukita biatukumina atue banabene su? Abiketuikeela bibofule, su tukuete kulonda bukunkushi bua Yehowa kubanga binobino. Biabia, tuikaleyi atulondo bukunkushi bua Yehowa, mpa na kulonda buabua abutukila kui bantu badi mutuule bua kuitupasukila. (Yesh. 32:​1, 2; Eb. 13:17) Na p’atukitshi biabia, atuikala na kabingilo ka kukulupila mui Mukunkushi eetu Yehowa, aye kuete kuitukunkusha bua kuitukatusha mu mbalo i masaku na buatudia kuikala muishinda aditutuala ku muwa wa ikalaika mu nsenga ipia.