Naadi mutandikue mu kipua kia 1955, mbetutande bana basatu balume mu kifuko kietu. Ne mukudile peepi na Finlande a kuushi, mu mbalo y’abayitamina binobino bu la ville de Vantaa.

Nyin’ami baadi mubatshishibue bu Kamonyi ka Yehowa bipua bipeela kumpala kua’shi ntandikue. Anka, nshami baadi mushikue bia binyibinyi, na ta baadi akumiina’shi nyinetu alongie netu Bible atue bana, sunga kuituata bua kuenda netu mu bisangilo. Sunga mbiabia, nyinetu baadi etulongiesha bia binyibinyi bia kitako bia mu Bible nsaa i nshetu te kuanka.

Kubanga ku bukinga buande naadi mubangie kukookiela Yehowa. Bu kileshesho, pa naadi na bipua musambobidi, mulongieshi ande ku kalaasa baadi mmunfitshile munda ngofu muanda naadi mupele kudia verilättyjä (kuamba’shi budin bua mase). Bankuatshile na mboko imune, ambuula mukanua pa bukopo bua’shi aate lusomo lukuate budin bua mase angiele mukanua. Naadi mukite muande mooso ami nkumunyenga lusomo lubaadi ku maboko kuaye.

Pa nalombeeshe bipua 12 nshami bafuile. Kunyima kua lufu lua Papa nabangile kutuela mu bisangilo. Bakuetu ba mu kakongie babaadi bampasukile ngofu, na bino bibaadi binkuashe buandia kunyinsha kuifubuila kui Yehowa ngofu. Nabangile kuibadikila Bible efuku dioso, na dingi ami nkubanga kuibadikila mikanda yetu ayipatuula Bible ngofu. Bino biubishi bi buwa bia kuilongiela, ngi bibaadi bu mushindo ubaadi unkuashe bua kubatshishibua pa nalombeeshe bipua 14 mu mueshi wa 8/8/1969.

Mafuku apeela kunyima ku’ami kupua kalaasa, nabangile mudimo wa bu mbala-mashinda a mieshi  yooso. Kunyima kua mbingo ipeela, naadi muende mbalo ibaadi lukalo lukata lua balungudi mu Pielavesi, peepi n’epata dia Finlande.

Mu Pielavesi naadi mufumankane na muana mukashi bafikile bu mukashi ande, Sirkka. Mu binyibinyi, naadi mumukumiine muanda baadi muiyishe na mufule Yehowa ngofu, ta baadi na kuitatula na ta baadi mufule bintu bia ku mbidi nya. Atue booso babidi, tubaadi bakumiine kuikitshisha bua kufubila Yehowa na kukumiina kukita kioso akitungu bua tudia kukita mudimo ooso w’abetupa. Tubaadi beyibakishene mu 23/3/1974. Pa mutue a kuenda mu kuikisha kunyima ku’atue kuiyibakishena, tubaadi bende ku Karttula kubaadi lukalo lukata lua balungudi ba Bufumu.

Kubanga ku mbangilo ku’eyibakishi dietu, Yehowa baadi muituleeshe’shi etupasukila ku nkalo yetu ya bintu bia ku mbidi su tubatuulu Bufumu buaye pa mbalo ya kumpala. (Mat. 6:33) Bu kileshesho, mu Karttula ta tubaadi na mootoka nya. Atue baki’abafiki tubaadi atutambukila nka ku ma nkinga. Anka mu Hiver (kipungo kia mashika e bukopo) mashika abaadi aeele e bukopo. Bua kulungula mukandu wi buwa mu yawa terituare a kakongie baadi mukata bibaadi abitungu’shi tuikale nka na mootoka. Anka tatubaadi na makuta a kuula mootoka nya.

Tuutu ande bafikile mu kuitutembela mu mushindo watushibaadi abapuandikisha. Betupeele mootoka, na wawa mootoka baadi mupue kuiudila bitadi bioso. Tubaadi atuulu nka penda karburan. Kunyima kua paapa, tubapetele mootoka ubaatudi nao lukalo.

Yehowa baadi muleeshe’shi e na matalua a kuitupasukila ku nkalo yetu ya bintu bia ku mbidi. Mudimo wetu ubaadi wa kutuula Bufumu pa mbalo ya kumpala.

Pabatutuelele mu kalaasa ka ba mbala-mashinda mu kipua kia 1978, Raimo Kuokkanen, a umune a ku balongieshi baadi muitunyingishe buatudia kuusha formilere bua nkatuela ku kalaasa ka Galaade. Tubabangile kulonga anglais na kepatshila ka kuikala na kiukilo kilombene tuakatuela ku kalaasa ka Galaade. Anka, mu kipua kia 1980, kumpala kua’shi tuende ku kalaasa ka Galaade babaadi betuitanyine buatudia nkafuba bu bena komite a filiale mu Finlande. Mu aa mafuku, bena Betele ta babaadi abende ku Galaade. Anka, tubaadi atukumiina kufuba mbalo yooso ayitutumu Yehowa, kushi kuetu kuatumono bu kui buwa. Tubaadi bakumiine luno luitanyino. Sunga mbiabia tubaadi batungunukie na kulonga Anglais bua’shi su kuamueka mushindo tui kuusha formilere bua kuenda ku Galaade.

 Kunyima kua bipua bipeela, Kasaka ka Bakunkushi-Bakulu kabaadi kape bena Betele mushindo wa kutuela ku Galaade. Tubaushiishe formilere nka musuusa umune, ta mpa muanda wa’shi ta tubaadi atusankila Betele nya. Mu kuilekeena na biabia, tubaadi belumbuule bua nkakuasha mbalo yooso ayimueneka lukalo lukata su tui balombashe ngikashi. Tubaadi bende mu kutuela ku Galaade na atue nkupua mu kalaasa ka 79 mu mueshi wa 9/1985. Babetutumine ku Colombie.

Bua musuusa wa kumpala babaadi betutume mu Colombie bu bena komite a filiale. Naadi muikishishe buandia kufuba ngofu mu mudimo wande, anka kunyima kua kipua kimune, naadi mupushe’shi, abitungu kushintuula ingi mianda. Bua musuusa wande wa kumpala na wi pa buawo mu nshalelo ande, babaadi bantekie buandia kukita ingi midimo ilekeenelekeene. Kunyima kua paapa babaadi betutume bu ba misionere mu kibundi kia Neiva, mu kipindi kia nsenga kia Huila.

Naadi nasankila mudimo wa bulungudi efuku dioso. Pa naadi nki mbala-mashinda e bukupi mu Finlande, naadi nantuuku nka ku nakashika kooso bua kuenda mu mudimo wa bulungudi, naadi nalukiila nka ku kiolua. Mu mushindo umune, atue baki’abakatuka mu kuiyibakishena, Sirkka na ami tubaadi atukisha nka efuku dishima mu mudimo wa bulungudi. Pabaatudi atuende mu bulungudi mu terituare e kula na ku nshibo yetu, tubaadi atulaala ingi nsaa mu mootoka wetu. Nsaa ibaatudi atulaala mu terituare, efuku adilondo tubaadia atubanga bulungudi nka ku nakashika kooso, muanda t’abituata nsaa ya kutambuka.

Pabatubangile mudimo wa bu misionere mu terituare, tubaadi bapushe dingi muloo wi mumune na ubaatudi nao ku mbangilo kua bulungudi. Kakongie keetu kabatamine ngofu, na bakuetu balume na bakashi ba mu Colombie babaadi na kaneemo, kifulo, mpaa na lutumbu.

Mbalo ibaabadi betutume mu Neiva ibaadi ifunyinshibue na bibundi bi bungi mushibaadi Tumonyi tua Yehowa. Naadi nekalakasha ngofu bua kuuka mushindo ulombene nkafika mukandu wi buwa mu biabia bibundi bioso. Pa muanda wa ngoshi, ibaadi mu yaya mbalo, bantu ta babaadi abakamba kutambula bantu benyi nya. Biabia naadi mukite luteko bua’shi kutuukie namu muntu su ngumune mu bino bibundi bioso ekale Kamonyi ka Yehowa. Naadi munangushene’shi abitungu yawa muntu akumiina kulonga bia binyibinyi akatukie kuakua kuadi afikie ashaleele mu Neiva. Kunyima kua biabia, naadi mukite dingi luteko bua’shi su yawa muntu abatshishibua afika muina Nkidishitu munyingie mu kikudi, abitungu alukiile kuabo akalungule mukandu wi buwa. Naadi muwukie’shi Yehowa auku mushindo wi buwa wa kupua uno muanda kalolo kunkila ami.

Kunyima kua mafuku apeela, nabangile kulonga Bible na ungi nsongualume abaabadi abetanyina bu Fernando González. Bakatukile mu kibundi kia Algeciras mushibaadi Kamonyi ka Yehowa su nkamune. Fernando baadi akitshi bilometre 50 bua nkafika mu Neiva mubaadi akitshi mudimo. Baadi elumbuula kalolo nsaa yooso ibaadi afiki bua kulonga naaye, musuusa umune babangile kutuela mu bisangilo. Lubingo nka lua kumpala lunabangile kulonga naye Bible, Fernando pa balukiile kuabo ku Algeciras, baadi mubungie bangi bantu ku nshibo kuaye, na aye nkubanga kulonga nabo yaya mianda ya mu Bible ibaadi mukatukie mu kulonga.

Fernando mmubatshishibue mu mueshi wa Kumpala mu 1990, mieshi isamombo kunyima kuaye kubanga kulonga Bible. Kunyima kua mafuku apeela bafikile mbala-mashinda a mieshi yooso. Bu bibaadi Kamonyi kamune ka Yehowa muamua mu kibundi kia  Algeciras, filiale baadi muate kitshibilo kia kutuma ba mbala-mashinda ba nsaa yooso mu kiakia kipindi kia nsenga. Mu mueshi wa Kabidi 1992, babaadi batuule kakongie mu kiakia kibundi.

Fernando baadi mulungule mukandu wi buwa ayimeena nka penda mu kibundi kiabo kia butandua su? Nya! Kunyima kuaye kuibakila aye na mukashi aaye babaadi bafilukie benda mu San Vicente del Caguán, kingi kibundi mushibaadi Tumonyi tua Yehowa. Pa babayiile kuakua babaadi bakuashe abo nkutuula kakongie. Mu 2002, babaadi batuule Fernando bu mukunkushi a kifunda, na aye na mukashi aaye Olga bakuete kutungunuka na kukita mudimo wa bu mukunkushi a kifunda mpaa na lelo uno.

Kukiila ku uno muanda wandi mumone, ne muukie muulo wa kushimika kasele pa muanda wi na muulo nsaa y’otekie pabitale midimo ya teokrasi. Yehowa e kuitukitshina kiakia kiatushina ngobesha ya kukita. Kintu kikile bioso, kia kuuka’shi efuba Ndiaye, ta ndietu nya.—Mat. 9:38.

Mu 1990 babaadi betutume bu bakunki bena nyendo. Mudimo wetu wa kumpala wa bu mukunkushi a kifunda babaadi betutume muipata dia Bogota. Wawa mudimo ubaadi witutshinyishe tuemona bu atue bashi balombene kukita wawa mudimo kalolo. Ami na mukashi ande, tubaadi nka bu bantu booso bisumanga, ta tubaadi na kiukilo ki pa buakio nya. Ta tubaadi na kiubishi kia kushaala mbalo i bantu be bungi nya. Anka, Yehowa baadi mulombashe mulayilo waye w’atupete mu Bena Fidipe 2:13 awamba’shi: “Efile Mukulu nnaye enunyingisha muyile kukumiina kuaye, enupa lukalo na bukome bua kukita mianda.”

Kunyima, babaadi betutume bu bakunkushi ba kifunda mu kibundi kia Medellin, kibundi kiandi muteemune ku mbangilo. Bantu babaadi bakule na kiubishi kia kumonanga buabua buntomboshi bua mu kilayi, na biabia ta bibaadi abibatshinyisha dimo nya. Bu kileshesho, dingi efuku naadi nalongo na muntu Bible, napushiishe mputu ibadidi nka kumpala kua nshibo ya winyi muntu ananfikile mu nkatembela. Moo ubankuatshile ami nkukieba kupona mu nsenga, kadi mulongi a Bible baadi atungunuka nka na kubadika bikoso kushi kutshiina. Nsaa ibapuile kubadika baadi mutekie lusa ebua, atuuka paasha. Kunyima kua kapindi kapeela balukiile na bana baaye babidi bakinga na aye nkuamba’shi: “Nfuile lusa abitunganga’shi, nyende nkakimbe bana bande.”

Dingi efuku, tubaadi atukitshi bulungudi bua ku nshibo na nshibo, namuene nka mukashi ande afiki lubilo kuandi, na moo ukile. Na aye nkundungula’shi kui ungi muntu bakiebe kumuasa. Na biabia bibaadi binkaanyishe ngofu. Anka kunyima tubafikile mu kutundula’shi yawa muntu ta baadi akiebe kuasa Sirkka nya, baadi akiebe kuasa ungi muana mulume bakidile mubuipi muaye.

Kunyima, nsaa ibaadi ayikitshika mianda ya buntomboshi mu kilayi, ta ibaadi ayitutshinyisha dingi nya. Tubaadi banyingishibue na Tumonyi neetu tua mu kiakia kibundi tupue kupeta mianda bu yetu mpaa na ikile yetu bukopo. Na atue nkufika mu kuakula’shi su Yehowa baadi muibakuashe, etukuasha namu n’atue. Nsaa yooso tubaadi atulondo nka malango a bakulu ba mu kakongie ka mu yaya mbalo, na kukimba bia kuikaluila na bibashaala tubaadi atuibituulu mu maasa a Yehowa.

Ingi mianda ta ibaadi bubi bia idi ilombene kuitutshinyisha nya. Dingi efuku, napushiishe mayi bu a bana bakashi babidi bakuete kuikayishena paasha pa yaya nshibo inaadi mufikie mu nkatembela yawa buana. Ntshi naadi na lukalo lua kuteemesha kuakua kubaabadi abekakeena nya. Ngi buakinyi sha nshibo  bandunguile’shi we kuenda mu kisanga obanda nkatala, anka pananfikile kuakua, namuene’shi tuatua tuleo tubaatudi atupusha, mu binyibinyi ta mbantu babaadi abekayishena nya. Nyi ntoonyi tua nkusu tubaadi atuambula baaba ba nkungishanyi babaadi abalee.

Mu kipua kia 1997, babaadi bantume bu mulongieshi ku École de formation ministérielle. b Nakumiinaa kutuela mu tulaasa tua teokrasi bikile, anka ntshi naadi napuandikisha namu’shi ne kupeta kino kineemo kia kulongiesha mu kamune ka ku tuno tulaasa nya.

Anka, kunyima naadi mufube bu mukunkushi a distrike. Nsaa ibaabadi baate mpango ya kuimika mudimo wa bu mukunkushi a distrike, nabangile dingi kukita mu dimo wa bu mukunkushi a kifunda. Ne mufube bu mulongieshi a ku École de formation ministérielle na bu mukunkushi a kifunda munda mua bipua bikile pa 30. Ino midimo, ibaadi bu nsulo ya miabi yande. Anka, nta mianda yooso ibaadi ibofule nya. Ntemesheyi ne nulungule buakinyi namba biabia.

Ne muntu e bukome na shakambaa kuidiladila. Bino mbinkuashe buandia kukambila nkalakashi ya mu nshalelo. Biabia naadi ingi nsaa na kisumi kikilekile kia kuikitshisha bua kuludika ingi mianda mu tukongie. Ingi misuusa, naadi akitshisha bantu pa bukopo buabadia kuikala bantu be buwa na be na nkatshinkatshi kui bakuabo. Asepe akula’shi, n’ami namu mu yaya nsaa ntshi naadi na iinyi ngikashi i biabia.—Lom. 7:​21-23.

Pa muanda wa kuno kubofula kuande, ingi nsaa abitshoboloshaa ngofu. (Lom. 7:24) Ungi musuusa, nalunguile Yehowa mu luteko’shi bi buwa nkatukie mu uno mudimo wa bu misionere, ngukie kualuka mu Finlande. Kuakua ku kiolua, nantuelele mu bisangilo bia kakongie. Naadi munyingishibue ngofu mu biabia bisangilo, na ami nkushinkamisha’shi ne mulombene kushaala mu mudimo wande, anka abitungu nekitshishe bua kukambila kuno kubofula kuande. Mushindo ubaadi Yehowa mualuule ku lualua luteko luande, uki’aunkumaa kuishimba mpaa na lelo uno. Kukatusha biabia, ne na lutumbu lui bungi bua mushindo wankuashaa na kalolo kooso, buandia kukambila kubofula kuande.

Ami na Sirkka tui na lutumbu lukata kui Yehowa, bua kineemo kiadi muitupe kia kukisha kipindi kikata kia nshalelo eetu mu mudimo wa nsaa yooso. Natumbula dingi Yehowa bua biadi mumpe mukashi, munfule nsha lulamato munda a bipua bioso biandi mushaale naaye.

Binobino nankiebe kulombasha bipua 70, nalekie mudimo wa bu mulongieshi a ku École de formation ministérielle, na bu mukunkushi a kifunda. Sunga mbiabia, t’abibofusha nya. Buakinyi? Muanda, ne mushinkamishe’shi akisankishaa Yehowa ngofu mp’atumufubila na kuiyisha na p’atumutumbisha n’eshimba diule na kifulo, na lutumbu. (Mik. 6:8; Mak. 12:​32-34) Bua kutumbisha Yehowa, t’abitungu’shi tuikale nka na mashito kampanda e pa buawo nya.

Pangalusha binangu kapeela kunyima mushindo unaadi mupete ano mashito, nasangana’shi ntshi muiapete pa muanda wa’shi ne mukile bangi nya. Na dingi ntshi mupete aa mashito pa muanda wa ngobesha i pa buayo yandi nayo nya. Kukatusha biabia! Yehowa baadi mmupe ino midimo nka pa muanda wa buntu buaye. Baadi mmupe ano mashito sunga mbiandi na kuno kubofula kuande. Na dingi, nawuku’shi ne mulombashe bino bioso nka ku bukuashi bua Yehowa. Ngi buakinyi kubofula kuande nkutumbishe bukome bu’Efile Mukulu.—2 Ko. 12:9.