1. Muilo wa Yehowa ubaadi wilumbuule naminyi mu siekele a kumpala?

 BIABIA, Yehowa nsaa y’apa muilo waye mudimo wa kukita, akumiina’shi beukite kushi mu kafutakanyi. (1 Ko. 14:33) Bu kileshesho, kikiebe ki’eshimba di’Efile Mukulu nkia’shi mukandu wi buwa ulungulue pa nsenga yooso ishadibue. (Mat. 24:14) Yehowa mmupe Yesu bushito bua kukunkusha wawa mudimo. Na Yesu namu mmushinkamishe’shi wawa mudimo abeukitshi mu mushindo wi buwa. Mu siekele a kumpala nsaa ibaabadi batuule tukongie, babaadi batuule bakulu bua kukunkusha na kutuusha buludiki. (Bik. 14:23) Mu Yelusalema ngi mubaadi mushaleele kasaka ka bakunkushi-bakulu, kabaadi kakitshibue na batumibua, na bakulu bua kutuusha buludiki kui tukongie tooso bua’shi tukongie tooso tukookiele buabua buludiki. (Bik. 15:2; 16:4) Ngi buakinyi, bu bibaadi abakookiela ku buno buludiki bubaabadi abapete, “tukongie tubaadi atutungunuka na kunyingishibua mu lukumiino, na bungi bua bena kukumiina bubaadi abuende na kufuima kuifuku n’efuku.”—Bik. 16:5.

2. Kubanga nka mu kipua kia 1919, Yehowa mmukunkushe muilo waye na kuiwupa bidibua bia mu kikudi mushindo kinyi?

² Mpaa na lelo uno, Yehowa ki’atungunukaa na kulumbuula muilo waye. Kubanga nka mu kipua kia 1919, Yesu baadi mutuule kasaka kapeela ka bana balume bedibue muimu wa kikudi kiselele, buabadia kulumbuula mudimo wa bulungudi na kutuusha bidibua bia mu kikudi bua balongi baaye. a (Luk. 12:42) Abimueneka kalolo’shi Yehowa kuete kuelela mudimo wabo miabi.—Yesh. 60:22; 65:​13, 14.

3-4. (a) Leesha mushindo w’abitukuasha bu biatudi belumbuule. (b) Nkinyi ki’atukataluula mu uno muisambo?

³ Su ta tubaadi belumbuule, ta tubadia kupeta mushindo wa kulombasha uno mudimo wabadi betupe kui Yesu bua kukita  nya. (Mat. 28:​19, 20) Bu kileshesho, tubande kupuandikisha’shi ta mbape muntu su ngumune terituare; muntu ooso alungula mukandu wi buwa mbalo yooso y’akumiina. Tubadia kulungula mukandu wi buwa mu angi ma terituare misuusa na misuusa, anka angi namu akutua muntu eakumu. We kunangushena ingi mishindo y’abitukuasha p’atue kuikala belumbuule su?

⁴ Yesu ki’atungunuka na kulumbuula muilo w’Efile Mukulu lelo uno, nka bibaadi mulumbuule balongi baaye pa baadi pa nsenga. Mu uno muisambo, atukataluula kileshesho kibaabadi betulekiele kui Yesu na mushindo aulondo ndumbuluilo eetu kileshesho kiaye. Atukataluula dingi mushindo watudi balombene kulesha’shi tui na lukulupilo mui ndumbuluilo a Yehowa.

NDUMBULUILO EETU KUETE ALONDO KILESHESHO KIA YESU

5. Mmushindo kinyi umune wa tukuete kulonda kileshesho kia Yesu? (Yowano 8:28)

⁵ Yesu baadi mulongiele kui Nshaye e muiyilu kiadia kukita na kiadia kuakula. Ndumbuluilo a Yehowa kuete alondo kileshesho kia Yesu pa kufubisha Eyi di’Efile Mukulu bua kuitukuasha bua’shi tuiwukie ki buwa na ki bubi na etupa buludiki mu nshalelo eetu. (Badika Yowano 8:28; 2 Ti. 3:​16, 17) Ndumbuluilo a Yehowa kuete etutentekiesha misuusa yooso buatudia kubadika Eyi di’Efile Mukulu na kuiditumikila. P’atulondo dino elango bikuete kuitukuasha naminyi?

6. Mmushindo kinyi wi na muulo awitukuasha kuilongiela kuetu kua Bible?

⁶ Abitukuasha ngofu nsaa y’atuilongiela Bible na kufubisha mikanda yetu ayipatuula Bible. Bu kileshesho, tui na mushindo wa kupuandikisha malongiesha aatukila mu Bible na buludiki bu’atupete mu ndumbuluilo a Yehowa. Nsaa y’atumono’shi buludiki bu’atupete mu ndumbuluilo a Yehowa mbuimeene mu Bible, lukulupilo luetu mui ndumbuluilo a Yehowa alunyiisha kunyinga.—Lom. 12:2.

7. Yesu balunguile mukandu kinyi, ndumbuluilo a Yehowa kuete alondo kileshesho kiaye mushindo kinyi?

⁷ Yesu baadi mulungule“mukandu wibuwa wa Bufumu bu’Efile Mukulu.” (Luk. 4:​43, 44) Akupu, Yesu baadi mutumine balongie baaye eyi dia kulungula mukandu wi buwa pabitale Bufumu. (Luk. 9:​1, 2; 10:​8, 9) Lelo uno, booso bakuete kutuela mu ndumbuluilo a Yehowa, bakuete kulungula mukandu wi buwa wa Bufumu, sunga bekala bashaleele mbalo kinyi sunga bekala na mashito kinyi mu ndumbuluilo a Yehowa.

8. Nkineemo kinyi kiabadi betupe?

⁸ Tui na kineemo kikata kia kulungula bangi bia binyibinyi pabitale Bufumu bu’Efile Mukulu! Ta mbantu booso be na kino kineemo nya. Bu kileshesho, Yesu pa baadi pa nsenga ta mmulekiele bikudi bibi bua’shi bituule bukamonyi pa bimutale nya. (Luk. 4:41) Lelo uno, kumpala kua’shi muntu abangie kulungula mukandu wi buwa na Tumonyi tua Yehowa, abitungu ekale na nshalelo asankisha Yehowa. Atulesha biatudi na lutumbu lui bungi lua kineemo kia kulungula mukandu wi buwa pa kutuula bukamonyi mbalo yooso na nsaa y’atukumiina. Nka bu Yesu, kepatshila keetu nka kukuna na kumiamina meema ku mbio ya bia binyibinyi bia Bufumu mu mashimba a bantu.—Mat. 13:​3, 23; 1 Ko. 3:6.

9. Ndumbuluilo a Yehowa kuete awukisha eshina di’Efile Mukulu mushindo kinyi?

⁹ Yesu baadi muukishe eshina di’Efile Mukulu. Pa baadi Yesu atekie Nshaye e muiyilu bambile’shi: “Ne muibaukishe eshina diobe.” (Yo. 17:26) Mu kuipushena na kileshesho kia Yesu, ndumbuluilo a Yehowa kuete ekitshisha bua kukuasha bangi bua’shi bafikie mu kuuka eshina di’Efile Mukulu. Bible Ngaluluilo a nsenga ipia mmukite mudimo ukata pa kualushuula eshina di’Efile Mukulu mu ma mbalo ooso abaabadi bedifunde mu ndimi ya ku kibangilo mu babaadi bafunde Bible. Bible Ngaluluilo a nsenga ipia, e kuanka binobino mu bushima sunga mu bipindi mu ndimi ikile pa 270. Mu Apandise A4 na A5 a uno Bible,  opete mianda i bungi itale kualushuula eshina di’Efile Mukulu mu Bible. Mu Apandise C namu, atupete mu Bible a kuilongiela, alesha bishinkamiisho abilesha’shi eshina di’Efile Mukulu dibaadi adimueneka mu Bifundue bia mu kiina Greke bia bena Nkidishitu misuusa 237.

10. Bishima biakule uno muana mukashi a mu Myanmar bibakulongiesha kinyi?

¹⁰ Nka bu Yesu, atukumiina kukuasha bantu be bungi pa kuki mushindo buabadia kuuka eshina di’Efile Mukulu. Ungi muana mukashi e na bipua 67, a mu kibundi kia Myanmar pa bawukile’shi Efile mukulu e na eshina baadi mutuushe mpolo na bambile’shi: “Uno ngi musango wande wa kumpala mu nshalelo ande wa kupusha’shi eshina di’Efile Mukulu nyi Yehowa. . . . Bondongiesha kintu ki na muulo ukata kiansha ndongiele kashaa.” Nka bu bi’abalesha mu uno muanda, kuuka eshina di’Efile Mukulu, nkulombene kuikala na bukitshishi bukata kui bantu ba sha mashimba alulame.

TUNGUNUKA NA KULESHA’SHI WE NA LUKULUPILO MUI NDUMBULUILO EETU

11. Bakulu be kulesha’shi mbakulupile mui ndumbuluilo a Yehowa mushindo kinyi? (Tala dingi kifuatulo.)

¹¹ Mmushindo kinyi umune ulombene bakulu kulesha’shi mbakulupile mui ndumbuluilo a Yehowa? Nsaa i bakulu abapete buludiki, abitungu bebubadikie kalolo na bekitshishe ngofu bua kuibutumikila. Bu kileshesho, abapetaa buludiki bush’abulesha nka penda bia kukita bipindi bia mu bisangilo, sunga bia kuela nteko, kadi abulesha dingi mushindo wa kupasukila mikooko ya Nkidishitu. Nsaa i bakulu abatumikila buludiki booso bu’abapete mu ndumbuluilo, bakuetu balume na bakashi abapusha’shi Yehowa mmuibafule na kuete ebapasukila.

12. (a) Buakinyi abitungu tukuatshishene bano bakuete kuitukunkusha? (Bena Ebelu 13:​7, 17) (b) Buakinyi abitungu tutuule binangu bietu nka ku ngikashi i buwa ya bano bakuete kuitukunkusha?

¹² Nsaa y’atupete buludiki abufiki kui bakulu, abitungu tuibulonde na kalolo kooso. Nsaa y’atukitshi biabia, atubofuisha baaba booso bakuete kuituludika bua kukita mudimo wabo kalolo. Bible etunyingisha buatudia kukookiela baaba bakuete kuitukunkusha na kuiyisha kuabadi. (Badika Bena Ebelu 13:​7, 17.) Ingi nsaa bino t’abikalaa bibofule nya. Buakinyi? Muanda bakulu mbantu bakutue kupuidika. Biabia, su tuatuula binangu bietu nka ku ngikashi yabo i bubi na kuleka kutala ku ngikashi yabo i buwa, atukuasha beshikuanyi neetu. Mu mushindo kinyi? Muanda beshikuanyi neetu abakumiina tuikale na mpaka ya’shi Efile Mukulu ta kuete kufubisha ndumbuluilo bua kuitukunkusha nya. Su tuabanga kunangushena bi bubi pabitale bakulu, tui balombene kubanga kunangushena bi bubi pabitale ndumbuluilo na tuabanga kushimisha lukulupilo luetu muadi. Abitungu tukite kinyi bua kutundula na kusumbushena madimi ooso a beshikuanyi neetu?

TOTADIILANGA BANGI BABOFUSHA LUKULUPILO LOOBE MUI NDUMBULUILO A YEHOWA NYA

13. Mmushindo kinyi wa bakuete kuikitshisha kui beshikuanyi b’Efile Mukulu bua kulesha ndumbuluilo aaye bu e bubi?

¹³ Beshikuanyi b’Efile Mukulu bakuete kuikitshisha bua’shi tumone mianda yooso i buwa i mu ndumbuluilo a Yehowa bu i bubi. Bu kileshesho, tui balongie mu Bifundue’shi Yehowa akumiina’shi balanguidi baaye bekale batookane ku mbidi, mu muikeelo, na mu kikudi. Na amba’shi muntu ooso sh’elanga ku miluisho n’atungunuka na kukita mianda i butete, abitungu atushibue mu kakongie. (1 Ko. 5:​11-13; 6:​9, 10) Atue atukookielaa nka ku biabia abiakula Bifundue. Anka p’atukookiela ku bino Bifundue, beshikuanyi neetu abambaa’shi ta tui bafule bantu, tukuete kuibatshibila kiimu, na’shi t’atulekielaa muntu ooso yawa muilekeene neetu.

14. Nnanyi muikale nsulo a mianda yooso ya madimi pabitale ndumbuluilo a Yehowa?

¹⁴ Uuka winyi kuete etuluisha. Satana Diabulu ngi kuete atuusha ino mianda yooso ya madimi  pa bitale ndumbuluilo a Yehowa. Muanda nnaye “nshaye na madimi.” (Yo. 8:44; Kib. 3:​1-5) Biabia, abitungu tushinkamishe’shi Satana afubisha baaba booso abamukuatshishena buabadia kupalakasha mianda ya madimi pabitale ndumbuluilo a Yehowa. Bino ngi bibaadi bikitshikile Yesu na bena Nkidishitu ba mu siekele a kumpala.

15. Bakata ba bipuilo babaadi bakitshine Yesu na balongi baaye mianda kinyi?

¹⁵ Sunga mbibaadi Yesu Muana a Efile Mukulu mupuidikie na mukite bilengieleshi bia kukaanya, Satana baadi mufubishe bangi bantu buabadia kupalakesha Yesu mianda ya madimi. Bu kileshesho, bakata ba bipuilo bia madimi babaadi abalungula bantu’shi bukome bua Yesu bu’abingi nabo ba demo, mbamupe buanka kui “mukata a ba demo.” (Mak. 3:22) Nsaa ibaadi Yesu mu kitompuanga, bakata ba bipuilo babaadi bamudimbiile’shi kuete asabuula Efile Mukulu, na abo nkutakula bantu buabadia kumuipaa. (Mat. 27:20) Kunyima kua mafuku, pa baadi balongi ba Yesu abalungula mukandu wi buwa, beshikuanyi baabo babaadi bape “bantu ba ingi miilo binangu bibubi buabadia kuluisha bakuetu” bena Nkidishitu. (Bik. 14:​2, 19) Pabitale mukanda wa Bikitshino 14:​2, Kitenta kia Mulami kia 1/12/1998, kibaadi kipatuule’shi: “Baaba booso babaadi abakuatshishena Satana na kupela mukandu wa bena Nkidishitu ubaabadi abalungula, babaadi dingi abakula mianda i bubi pa bibatale ngi buakinyi bantu bababangile kupela kuteemesha bena Nkidishitu na kubanga kuibashikua.”

16. Abitungu tutentekieshe kinyi su tuapusha mianda ya madimi?

¹⁶ Satana ki’atungunuka na kudimba mpaa na lelo uno. Lelo uno, Satana ki’atungunuka nka na “kupambusha boso ba pa nsenga.” (Kbf. 12:9) Su opusha mianda i bubi pabitale ndumbuluilo a Yehowa, sunga pabitale bakuetu abakunkusha, tentekiesha mushindo ubaadi beshikuanyi  b’Efile Mukulu bakitshine Yesu na balongi baaye mianda mu siekele a kumpala. Yesu bakuile’shi: Bantu abakashikua baaba booso abafubila Yehowa, na abakebadimbiila mianda ya madimi, ngi nka bikuete kukitshika lelo uno. (Mat. 5:​11, 12) T’atukakumiina mianda ya madimi su tuatundula winyi eyifuisha, na su tuakita kioso akitungu bua kuikaluila. Tui kuikaluila mushindo kinyi?

17. Mmushindo kinyi watudi balombene kusuuka masaku aatukila ku mianda ya madimi? (2 Timote 1:13) (Tala dingi kashibo akamba’shi: “ Biatudia kukita apamueneka mianda ya madimi.”)

¹⁷ Suuka mianda ya madimi. Mpoolo mutumibua baadi mutuushe malango aapushika kalolo na kiatudi balombene kukita su tuapetekielua mu masaku a mianda ya madimi. Balunguile Timote bua “kupelesha bantu . . . bua’shi ta batuulanga binangu ku miisambo ya madimi” na bua’shi “basumbushene mianda ya bisumanga ya madimi.” (1 Ti. 1:​3, 4; 4:7) Muana mukinga, e kusangula kintu ki mu nsenga ekieela mukanua muanda t’awuku’shi ki kumukumbisha maladi, anka muntu mukulu namu, ta mmulombene kuela kiakia kintu ki biabia mukanua muanda awuku’shi e kukumba maladi. Tusuukieyi mianda ya madimi muanda atuuku nsulo yayo. Biabia, tulameyi “mayi eselele” a bia binyibinyi.—Badika 2 Timote 1:13.

18. Mmushindo kinyi watudi balombene kulesha’shi tui na lukulupilo mui ndumbuluilo a Yehowa?

¹⁸ Tubamono mishindo isatu ya ku mishindo i bungi ikale ndumbuluilo a Yehowa ambulaa Yesu. Puelongiela Bible, lamiina ingi mishindo ayilesha ndumbuluilo a Yehowa bi’alondaa kileshesho kia Yesu. Kuasha bangi mu kakongie keenu buabadia kunyingisha lukulupilo luabo mui ndumbuluilo a Yehowa. Tungunuka na kulesha bi lukulupilo loobe mui ndumbuluilo a Yehowa pa kutungunuka na kumufubila na lulamato, na w’ekitshishe bua kushaala mu ndumbuluilo akuete afubisha bua kulombasha kikiebe ki’eshimba diaye. (Mis. 37:28) Tuikaleyi na lutumbu efuku dioso bua kineemo kiatudi nakio kia kuikala munkatshi mua muilo wa Yehowa wifuleene na wi na lulamato.