1. Baledi abakumiinaa kukita kinyi bua bana baabo?

 BALEDI, atuuku’shi anukumiina kukuasha bana beenu buabadia kufika mu kuiuka Yehowa na kumufula. Anka Efile Mukulu t’amuekaa. Mmushindo kinyi oodi mulombene kukuasha bana boobe buabadia kumumona bu muntu a binyibinyi na kuifubuila kuadi?—Shak. 4:8.

2. Baledi mbalombene kulongiesha bana baabo pabitale ngikashi ya Yehowa naminyi?

² Mushindo umune wi na muulo wa kukuasha bana baabo bua’shi befubuile kui Yehowa, mpa kulonga naabo Bible. (2 Tim. 3:14-17) Biabia, Bible alesha ungi mushindo ulombene bana kulonga pabitale Yehowa. Mu mukanda wa Nkindji, nshe muana atentekisha muana aaye biasha kuleka kulonga ngikashi ya Yehowa, y’abamulesha mu bipangua. (Nki. 3:19-21) Atukataluula ingi mishindo ilombene ba nambutuile kufubisha bipangua bua kukuasha bana baabo buabadia kulonga pabitale bumuntu bua Yehowa.

3. Ba nambutuile mbalombene kupa bana baabo bukuashi kinyi?

³ Bible aakula pabitale Efile Mukulu’shi “ngikashi yaaye ishayimuekaa na meeso kasha nsenga ibapangilue, mgipue kumueneka patooka ku biabia bibapangile.” (Lom. 1:20, NWT) Ba nambutuile, anusangelaa kukisha nsaa paasha na bana beenu. Fubishayi yaya nsaa bua kukuasha bana beenu buabadia kumona kuipushena kui pankatshi pa “bintu biabadi bapangie,” na ngikashi i buwa ya Yehowa. Mu uno muanda, tubandeyi kutala kilombene ba nambutuile kulongiela ku kileshesho kia Yesu.

4. Yesu baadi mufubishe bipangua bua kulongiesha balongi baaye mushindo kinyi? (Luka 12:24, 27-30)

 ⁴ Tala mushindo ubaadi Yesu mufubishe bipangua bua kulongiesha. Dingi efuku, balunguile balongi baaye buabadia kubandila toonyi tua manganga na bilongo. (Badika Luka 12:24, 27-30.) Yesu baadi mulombene kuteemuna nyema ooso yawa sunga mutshi ooso wawa, anka baadi musangule koonyi na bilongo bibaabadi abauku kui balongi baaye kalolo. Balongi babaadi abamono manganga aapapama muiyilu na bilongo muifuba. We kubanda kunangushena kibaadi Yesu musanguile bino bintu bua kuibiakuila? Na nkinyi kibaadi mukite kunyima kua kuteemuna bino bileshesho? Baadi mulongieshe balongi baaye dilongiesha di na muulo, pabitale kalolo ka Nshaye e muiyilu adiamba’shi: Yehowa adishaa na kufuadika bafubi baaye baasha lulamato, anka bu manganga na bilongo bi muifuba.

5. Mbileshesho kinyi bi’atupete mu bipangua bilombene ba nambutuile kufubisha bua kulongiesha bana baabo pabitale Yehowa?

⁵ Ba nambutuile, nsaa y’anulongiesha bana beenu nui kuambula kileshesho kia Yesu naminyi? We mulombene kulungula muana oobe pabitale kipangua kampanda, ki’okambaa kusangeela obe nabene, bu nyema kampanda sunga mutshi oodi mukambe kufula. Nsaa y’olungula muana oobe pabitale ino mianda, abitungu omupatuluile ino mianda yooso ki’ayitulongisha pabitale Yehowa. We kuipusha muana oobe bua’shi akulungule pabitale nyema kampanda sunga mutshi kampanda wadi mufule. Su bofubisha kipangua kampanda kia mu bipangua kiadi mupue kuuka kalolo, mmulombene pangi nkuteemesha kalolo nsaa y’omulungula pabitale ngikashi ya Yehowa.

6. Nkinyi kilombene kuitulongiesha kileshesho kia nyinaye na Christopher?

⁶ Baledi, ta nui balombene namu kukisha nsaa i bungi bua kukimbuula nyema kampanda sunga mutshi kampanda kumpala kua’shi nuisambile akilesha bino bipangua pabitale Yehowa? Ta bi na muulo. Yesu ta baadi mupatuule mianda i bungi pabitale abidiiya manganga sunga abikulaa bilongo nya. Su muana oobe akumiina kulonga mianda i bungi kantu pa kantu pabitale bintu biabadi pabangie kui Yehowa, we kumulungula tu mianda tupeela, sunga kumuela lukonko lui na muulo alukuasha muana oobe buadia kupusha muanda kalolo. Tala mukuetu mulume abetanyina bu Christopher bi’atentekiesha mianda ibaadi mumone ku bukinga amba’shi: “Mama baadi etulungula tu mianda tupeela tubaadi atuitukuasha bua kusankila bipangua bituifunyishe. Bu kileshesho, nsaa ibaatudi peepi na miengie, baadi etulungula’shi: ‘Talaayi bula na buwa bui aya miengie! T’anumono’shi Yehowa nga kukaanya?’ Sunga nsaa ibaatudi peepi na meema akata, baadi etulungula’shi: ‘Talaayi bukome bui na yaya mbunda-mbunda! T’anumona’shi Efile Mukulu e na bukome bukile?’” Christopher afudiisha’shi: “Kubukuashi bua ino mianda ipeela, mama baadi etupatuluila mianda i bungi ibaadi na bukitshishi kuatudi.”

7. We mulombene kulongiesha bana boobe buabadia kunangushena pabitale bipangua naminyi?

⁷ Bu abiende bana boobe na kukula, we mulombene kuibalongiesha biabadia kunangushena ngofu pabitale bipangua na kulonga pabitale Yehowa. We mulombene kushimika kasele pa kipangua kimune ki’Efile Mukulu, na oyipushe bana boobe’shi, “Bino abinulongiesha kinyi pabitale Yehowa?” Bino, bi nkukaanyisha nsaa y’opusha abiakula bana boobe.—Mat. 21:16.

8. Mmishindo kinyi ibaadi naayo ba nambutuile bena Isaleele ya kulongiesha bana pabaabadi ‘muishinda’?

⁸ Ba nambutuile bena Isaleele, babaadi abalungula bana baabo bua kuibalongiesha mayi a ku miiya ya Yehowa, nsaa ibaabadi ‘abatambuka mwishinda.’ (Miy. 11:19) Mu mashinda mu baabadi abatambukila, babaadi abakiila mbuipi mueumbo dia bena Isaleele. Muanka babaadi abamono nyema ilekeene, toonyi tui  lekeenelekeene, na bilongo. Bifuko bia bena Isaleele pabaabidi abitambuka muishinda, ba nambutuile babaadi na mushindo wa kulungula bana baabo pabitale bintu biabadi bapangie kui Yehowa. Anue ba nambutuile, kumiinayi ino mishindo i bino ya kufubisha bipangua bua kulongiesha bana beenu. Tubandeyi kutala mushindo w’abakitaa bino kui bangi ba nambutuile.

9. Nkinyi ki’atulongiela kui Punitha na Katya?

⁹ Nyina bana abetanyina bu Punitha mushaleele mu kibundi kikata kia mu Inde amba’shi: “Nsaa ibaatudi atuende mu kutembela kingi kifuko ki peepi na kibundi kietu, tubamuene bino bu mushindo wa kukuasha bana beetu bua kulonga pabitale bipangua bi buwa bia Yehowa. Naadi mukaanye pa kumona’shi bana bande babaadi abapusha bipangua kalolo, nsaa ibatuyiile kula n’eshinda na mu tu bibundi tupeela.” Ba nambutuile bana beenu ta banaalube nsaa i buwa yanukisha naabo pamune. Mukuetu mukashi abetanyinaa bu Katya a mu Moldovie amba’shi: “Mianda i na muulo ya nkambaa kutentekiesha ya ku bukinga buande, nsaa ibaatudi atukisha na baledi bande mu kibundi ki peepi na kietu. Natumbula baledi bande p’abo kundongiesha ami ki mukinga bua kuimana na kutala bintu biabadi bapangie kui Yehowa, na kumumona kukiila ku bipangua biaye.”

10. Nkinyi kilombene kukita baledi su baamona’shi bi bukopo buabadia kuenda mu kingi kibundi? (Tala kashibo akamba’shi: “ Bukuashi kui ba nambutuile.”)

¹⁰ Nui kukita kinyi su ta kui mushindo wa kuenda mu kingi kibundi ki peepi neenu? Amol mushaale dingi mu kibundi kia mu Inde amba’shi: “Mbalo yandi mushaalele baledi bande abafubaa nsaa i bungi, na ta tui balombene nkakisha nsaa mu kingi kibundi ki peepi neetu. Anka, tui kubandila bipangua bia Yehowa na kuakula pabitale ngikashi yaaye, nsaa y’atuende ku ka parke kapeela sunga nsaa y’atuimana ku kisanga kia etaje.” Nsaa y’otala na kalolo kooso okatundula’shi mbuipi mua nshibo yoobe mui bipangua bi bungi biodi mulombene kulesha bana boobe. (Mis. 104:24) We mulombene kumona toonyi, tuishi, mitshi  na bingi bintu bi bungi. Karina mukuetu mukashi a mu Allemagne amba’shi: “Nyin’ami mmufule bilongo ngofu, pa naadi nki mukinga baadi andesha bilongo nsaa ibaatudi atutambuka naaye pamune.” Ba nambutuile nui balombene dingi kufubisha ma video e bungi na mikanda ayakuila bipangua y’abatuushaa kui ndumbuluilo a Yehowa bua kulongiesha bana beenu. Biabia, sunga wekala na nshalelo e naminyi we mulombene kukuasha bana boobe bua kubandila bipangua bi’Efile Mukulu. Binobino tutaluuleyi ingi ngikashi ya Yehowa yanudi balombene kulongiesha bana beenu.

11. Ba nambutuile mbalombene kukuasha bana baabo naminyi buabadia kutundula kifulo kia Yehowa?

¹¹ Bua kukuasha bana boobe buabadia kumona kifulo kia Yehowa, we mulombene kuibalongiesha na kalolo kooso mushindo aupasukilaa nyema i bungi bana baayo. (Mat. 23:37) We mulombene kushimika kasele pa bipangua bi buwa bilekeenelekeene bi’atusangeelaa ngofu. Karina atatupuile kuteemuna kunundu amba’shi: “Nsaa ibaatudi atuende mu kutemba na mama baadi anyingisha bua kuimana na kutala bi kilongo kioso nkilekeene na bingi, na mushindo wi buwa buakio auleesha kifulo kia Yehowa. Kunyima kua bipua, nkia ntungunukaa na kubekiela bilongo, mushindo wabidi bilekeenelekeene, biabadi bebipangie na malangi aabio. Abitungunukaa na ku ntentekiesha mushindo witufule Yehowa ngofu.”

12. Ba nambutuile mbalombene kukuasha bana baabo naminyi buabadia kutundula binangu bi’Efile Mukulu? (Misambo 139:14) (Tala dingi kifuatulo.)

¹² Kuasha bana boobe buabadia kutundula binangu bi’Efile Mukulu. Yehowa e na binangu bi bungi bitukile. (Lom. 11:33) Bu kileshesho, we kulongiesha bana boobe mushindo wi meema aebungu makumbi, na aa makumbi aende na kutambuka. (Yob. 38:36, 37) We kushimika dingi kasele biabadi bapangie mbidi ya muntu mu mushindo wa kukaanya. (Badika Misambo 139:14.) Tutaleyi mushindo ubaadi nshe muana abetanyinaa bu Vladimir mukite bino. Amba’shi: “Dingi efuku muana eetu mulume baadi mupone na nkinga yaaye ayo nkumutapa. Kunyima kua mafuku apeela elonda dibapandile. Ami na mukashi ande tubaadi bamupatuluile’shi, Yehowa mmupangie mbidi yeetu na ngobesha ya kuibuka ayo inabene. Tubamulunguile’shi kashaa tatuamuene namu kingi kintu ki bino, ku bintu biabadi bapue kui bantu. Bu kileshesho, mootoka ta ngulombene kuilumbuula awo unabene kunyima kuao kuluila. Ano mayele ngakuashe muana eetu buadia kumona bi binangu bia Yehowa.”

13. Ba nambutuile mbalombene kukuasha bana baabo naminyi buabadia kutundula bukome bu’Efile Mukulu? (Yeeshaya 40:26)

 ¹³ Yehowa etutekie buatudia kubuusha meeso eetu bua kutala eyilu na kunangushena mushindo wi bukome buaye bua kukaanya, bulame bintu bioso bi muanka pa mbalo imune. (Badika Yeeshaya 40:26.) We mulombene kunyingisha bana boobe buabadia kutala muiyilu na kunangushena ku bi’abamono. Tala mukuetu mukashi abetanyina bu Tingting a mu Taiwan bi’atentekiesha pabaadi ki mukinga amba’shi: “Ami na mama pabaatudi atutembe mu ka kibundi kapeela, tu baadi na mushindo wa kumona nyenyenyi i bungi muiyilu, muanda mu kaaka ka kibundi ta mubaadi kaalo ka nsembue. Mu aa mafuku, naadi nekalakasha ngofu muanda ntshi naadi na mushindo wa kushaala na lulamato kui Yehowa, bua bena kalaasa naami babaadi abamfuishiisha lukalashi bua kukookiela Yehowa. Mama baadi munyingishe bua kunangushena pabitale bukome bufubishe Yehowa bua kupanga nyenyenyi yooso, na bua kutentekiesha’shi, Yehowa mmulombene kufubisha buabua bukome bua kunkuasha buandia kukambila kitombuanga kioso kiakia. Kunyima ku’ami kubandila biabia bipangua mu lualua luendo, bibaadi bi ntakule bua kuuka Yehowa kalolo na naadi munyingishe kitshibilo kiande kia kumufubila.”

14. Ba nambutuile mbalombene kufubisha bipangua bua kukuasha bana baabo bua kumona Yehowa bu Efile Mukulu shaa muloo naminyi?

¹⁴ Bintu biabadi bapangie kui Yehowa abilesha’shi e na muloo, na akumiina’shi tuikadikie na muloo namu. Bena Sianse bababandiile nyema i bungi ayashaa, mu yaya nyema mui toonyi na mishipa. (Yob. 40:20) Bana boobe tababasepele namu p’abamono nyema ku’ayasha maasha su? Pangi tababamuene ka mpuusu kaana akalondo kinue kia buanda lubilo, sunga tubua atuasha maasha pamune. Ungi musuusa oomono bana boobe abasepe ku’ababandila nyema ku’ayasha maasha, ebatentekieshe’shi tukuete kufubila Efile Mukulu shaa muloo.—1 Tim. 1:11.

15. Nkinyi kilombene kukuasha ba nambutuile buabadia kuuka abinangushena bana baabo? (Nkindji 20:5) (Tala dingi kifuatulo.)

¹⁵ Ingi nsaa, ba nambutuile mbalombene kumona bu bi bukopo bua kuisamba na bana baabo pabitale nkalakashi y’abafumankana nayo.  Su obe namu abikuelelaa bukopo, abitungu oukie bi binangu bia bana boobe. (Badika Nkindji 20:5.) Bangi ba nambutuile mbasangane’shi, mbibofule bua kuibikita nsaa y’abasangeela bipangua pamune na bana baabo. Mushindo nkinyi? Kabingilo kamune nka’shi kui mianda ipeela ayikumbaa binangu bia bana na ba nambutuile. Ungi nshe bana a mu Taiwan abetanyinaa bu Masahiko aleesha kangi kabingilo amba’shi: “Pabaatudi atukisha nsaa paasha pa kibundi na bana beetu, atukaamina miengie na kutambuka ku kiese, babaadi abapusha buwa bukile. Tui basangane’shi mbibofule bua kuibauuka kalolo na kuuka bi’abanangushena.” Katya atatupuile kuteemuna kunundu amba’shi: “Ami batuuku mu kalaasa mama baadi antuala bua nkabandila parke e buwa bukile. Mu yaya nsaa ya kukisha kapapi ke buwa bukile, naadi mumone’shi mbibofule bua kumulungula bibakitshika mu kalaasa, sunga mianda ayinkalakasha.”

16. Bena kifuko mbalombene kukisha kapapi na kuasha maasha nsaa y’abasangeela bipangua bia Yehowa naminyi?

¹⁶ Nsaa ayisangeela bena kifuko bintu biabadi bapangie kui Yehowa mbalombene kukisha kapapi na kuasha nabio pamune. Bino abibakuasha buabadia kuifuleena ngofu. Bible amba’shi kui “kipungo bwa kusepa” na “kipungo bwa kudila.” (Mul. 3:1, 4) Yehowa mmupangie ma mbalo e buwa bukile pano pa nsenga, muatudi balombene kukita bintu biatudi bafule. Bifuko bi bungi abikumiinaa nkabandila bipangua pamune, kuenda mu kibundi ki peepi naabo, ku miengie sunga ku biese bia meema akata. Bangi bana mbafule kusuuka lubilo, kuasha ku parke, kubandila nyema, sunga kuyua mu miela, mu bishima, sunga mu meema akata. Tui na mishindo i bungi bukile yatudi balombene kusangeela bipangua biabadi bapangie kui Yehowa!

17. Buakinyi ba nambutuile mbalombene kukuasha bana baabo buabadia kusangeela bipangua bi’Efile Mukulu?

¹⁷ Mu nsenga ipia y’Efile Mukulu, ba nambutuile na bana baabo, abakasangiela bipangua bia Yehowa kukila mushindo wabebisangeela lelo uno. Mu kuilekeena na lelo uno, t’atukekala na kabingilo ka kutshina nyema, na ayo namu t’ayiketutshinyi nya. (Yesh. 11:6-9) Atukeekala na kipungo kishi na mpuilo kia kusangeela bintu biabadi bapangie kui Yehowa. (Mis. 22:27) Baledi tanutengielanga nka kiakia kipungo buanudia kukuasha bana beenu bua’shi babangie kusangeela bipangua nya. Bu bi’ofubisha bipangua bua kulongiesha bana boobe pabitale Yehowa, be nkakumiina kibakuile Mfumu Davide pabitale Yehowa’shi: “Yehowa byookitshi tabii kupwandikishwa.”—Mis. 86:8.