1-2. Su tue muilumbuule bua kubatshishibua, buakinyi t’abitungu’shi otshobolokie? (Tala kifuatulo kia ku kipusu.)

 SU OKUMIINA kubatshishibua, abitungu weatshile kepatshila ke buwa obe nabene. We muilumbuule bua kubatshishibua binobino su? Su okumiina kubatshishibua na’shi bakulu babakumiina, tuetutuushanga bua kubatshishibua mu kikongeno akilondo su kui mushindo. Su bokitshi biabia, okapete efuto mu nshalelo oobe mu mudimo wa Yehowa.

² Ku lungi lupese, ungi muntu mmukulungule’shi abitungu kukita mianda kampanda, kumpala kua kubatshishibua su? Su nnobe nabene bakumiina kuibikita? Su mbiabia, totshobolokanga nya. Sunga wekala nsongua sunga mukulu, we mulombene kulombasha nka kano kepatshila kakata ke na muulo.

3. Ungi muntu mukata a mu’Etshopi bayipuishe Fidipe kinyi, na ndukonko kinyi lukata lubaadi lutukie panka? (Bikitshino 8:36, 38)

³ Badika Bikitshino 8:36, 38. Ungi muntu mukata a mu Etshopi bayipuishe Fidipe mulungudi a mukandu wi buwa’shi: “A kya kunkutshishwa kubatshishibua nkinyi?” Uno muana mulume muin’Etshopi baadi na lukalo lua kubatshishibua, anka baadi muilumbuule bua kuela dino etabula di na muulo su?

4. Mmushindo kinyi ubaadi muana mulume muin’Etshopi muleshe’shi baadi na kitshibilo kia kutungunuka na kulonga?

⁴ Muana mulume muin’Etshopi “bádi mufikye ku Yelusalema mu kulangwila Efile Mukulu.” (Bik. 8:27, EEM) Kumpala baadi muntu a ingi miilo; ngi aye nkushintuula nkufika muina Yuda. Kushi mpaka, baadi mulongie pabitale Yehowa mu Bifundue bi selele bia kina Ebelu. Biabia, baadi muilumbuule bua kulonga bi bungi. Biabia, Fidipe pa basangeene uno muntu mu kilayi, bamusangeene akitshi kinyi? Bamusangeene abadika mufungofungo ufundue butemuki bua Yeshaya. (Bik. 8:28) Bino bibaadi bidibua bia mu kikudi binyingie. Yawa muntu mukata a mu’Etshopi, ta  baadi akumiina kulonga mianda ipeela ya mu Bible nya; anka baadi akumiina kutungunuka na kulonga mianda i bungi.

5. Uno muin’Etshopi baadi mmukite kinyi na mianda ibaadi alongo?

⁵ Yawa muana mulume, ngi baadi bu mufubi muneeme mukulupilue a Kandase mu Etshopi; yawa muntu ngi “bádi na bushito bwa bupeta boso bwa yawa nfumu.” (Bik. 8:27, EEM) Uno muntu baadi na bi bungi bia kukita na mashito e bungi. Anka, baadi aata nsaa ya kulanguila Yehowa. Biabia, ta baadi ayimeena nka penda mu kulonga bia binyibinyi nya; kadi baadi atumikila biabia bibaadi alongo. Biabia, misuusa yooso baadi akatuka mu Etshopi endanga mu kulanguila Yehowa ku ntempelo mu Yelusaleme. Mu luno luendo luaye, lubaadi alumutekie nsaa i bungi na makuta e bungi, anka uno muntu baadi akumiina kulanguila Yehowa sunga biamuteka kinyi.

6-7. Kifulo kia muin’Etshopi bua Yehowa kibatungunukile na kutama mushindo kinyi?

⁶ Muin’Etshopi baadi mulongie bingi bia binyibinyi bi na muulo kui Fidipe, mu biabia bia binyibinyi mubaadi mpaa na mushindo wa kutundula Mesiya. (Bik. 8:34, 35) Uno muntu mukata, baadi na muloo wi bungi p’aye kuuka kibaadi kimukitshiine Yesu. Nkinyi kibaadi mukite kunyima kua kulonga ino mianda? Baadi mulombene kushaala nka bu bibaadi kumpala, muntu a kuneemeka, baadi mukumiine malongiesha a bena Yuda ngofu. Mu kuilekeena na biabia, kifulo kiaye bua Yehowa na bua Muana aaye kibatamine. Kifulo kiaye kibaadi kimutakule bua kuata kitshibilo ki na muulo mu nshalelo aaye, kia kubatshishibua bu mulongi a Yesu Kidishitu. Fidipe bamuene’shi uno muntu baadi muilumbuule bua kubatshishibua, na aye nkumubatshisha.

⁷ Su bolondo kileshesho kia muin’Etshopi, wekala muilumbuule bua kubatshishibua. Nnobe namu okekala na ngobesha ya kuakula na kishinkamiisho kioso’shi, “A kya kunkutshishwa kubatshishibwa nkinyi?” Bua binobino, tala mushindo oodi mulombene kukita mianda i mumune na ibakitshiine uno muntu muin’Etshopi: Batungunukile na kulonga, atumikila bibaadi alongo, na atungunuka na kutamisha kifulo kiaye bu’Efile Mukulu.

8. Mukanda wa Yowano 17:3, awamba’shi abitungu okite kinyi?

⁸ Badika Yowano 17:3. Ano mayi a Yesu aakukuasha bodia kuata kitshibilo kia kubanga kulonga Bible su? Bino ngi bikite be bungi ba kuatudi. Ano mayi amune aetulungula dingi buatudia kutungunuka na kulonga su? Oolo. Ta tuanaalekie ‘kuuka Efile Mukulu umune a eyondo.’ (Mul. 3:11) Mpaa na ku ikalaika, atukatungunuka nka na kulonga. P’atunyiisha kulonga, atunyiisha kuifubuila kui Yehowa.—Mis. 73:28.

9. Nkinyi akitungu’shi tukite kunyima kua kulonga bia binyibinyi bia kitako?

 ⁹ Abipushika’shi, nsaa y’atubanga kulonga pabitale Yehowa, atulongo nka penda malongiesha a kitako a mu Bible. Mu mukanda waye kui bena Ebelu, Mpoolo mutumibua bakuile bua malongiesha a kitako bu “myanda ya ku kibangilo.” Ta baadi abepuula “ndambukisho ya ku kibangilo” nya. Anka, baadi eyipuandikisha na mabeele abapeya bana. (Eb. 5:12; 6:1, EEM) Baadi munyingishe dingi bena Kidishitu booso buabadia kutungunuka na kulonga malongiesha a kitako na kulonga ngofu bia binyibinyi bia Muiyi di’Efile Mukulu. Obe namu we mutamishe lukalo lua kulonga malongiesha a mu Bible a kitako su? Okumiinaa kutungunuka na kutama, bua kutungunuka na kulonga pabitale Yehowa na mpango yaye su?

10. Buakinyi abikeelaa bangi bukopo bua kulonga?

¹⁰ Bua be bungi ba kuatudi, abibekeelaa lukalakashi bua kulonga. Opushaa naminyi pabitale kulonga? Ku kalaasa, we mulongie bia kuibadikila na bia kuilongiela kalolo su? Osankila kulonga na kupusha’shi okuete kuuka mianda i bungi p’olongo? Sunga’shi, we mushinkamishe’shi t’olongaa kalolo mu mikanda? Su mbiabia, tue bupenka’be. Biabia, Yehowa mmulombene nkukuasha. Aye mmupuidikie na mmuikale Mulongieshi e buwa kukila booso.

11. Mmushindo kinyi auleshaa Yehowa’shi mmuikale “Mulongieshi Mukata”?

¹¹ Yehowa eyitanyinaa aye nabene bu “Mulongieshi oobe Mukata.” (Yesh. 30:20, 21, NWT) Yehowa Mmulongieshi e na luishinko, na kalolo, na apushiishaa bangi. Atalaa mianda i buwa i mui balongi baye. (Mis. 130:3) Na t’etutekaa bintu bi bungi biatushi balombene kukita nya. Tentekiesha mushindo wadi mupangie bongo bobe, kia buntu ki buwa bukile. (Mis. 139:14) Atutandikuaa na lukalo lua kulonga. Mupangi eetu akumiina’shi tutungunukie na kulonga bua losoo, na tusangeele biinyi bi’atulongo. Biabia, bi buwa “kulakila” bia binyibinyi bia mu Bible lelo uno. (1 Mp. 2:2) Eatshile bipatshila biodia kulombasha, na w’ekitshishe bodia kuikala na programe a kuibadikila Bible na kuilongiela. (Yos. 1:8) Ku bukuashi bua Yehowa, okasangeela kubadika na kulonga pa bimutale ngofu.

12. Buakinyi abitungu tutuule binangu bietu kui Yesu nsaa y’atuilongiela atue banabene?

¹² Ikala okisha nsaa efuku dioso na kunangushena ku nshalelo a Yesu na mudimo waye wa bulungudi. P’atuambula Yesu bi na muulo su atukumiina kufubila Yehowa kalolo, bikishekishe mu kino kipungo ki bukopo. (1 Mp. 2:21) Yesu baadi muakule patooka pabitale nkalakashi ibaadi ilombene balongi baye kufumankana nayo. (Luk. 14:27, 28) Biabia, baadi mushinkamishe’shi balongi baye ba binyibinyi, abashaala na lulamato kui Efile Mukulu, anka bu bibaadi muibikite. (Yo. 16:33) Longa nshalelo a Yesu kantu pa kantu, na weatshile bipatshila biodia kumuambula mu nshalelo oobe a kuifuku n’efuku.

13. Nkinyi kiodi mulombene kutungunuka na kuteka Yehowa, na buakinyi?

¹³ Kuikala na penda kiukilo ta ndio kupua kua muanda nya. Kintu kia kumpala ki na muulo, nyi mushindo aukukuasha kiukilo bua kulonga mianda i bungi pabitale Yehowa, na kutamisha ngikashi bu ino, kifulo, na lukumiino muadi. (1 Kod. 8:1-3) Nsaa y’otungunuka na kulonga, teka Yehowa bua’shi akukuashe bua kunyiisha kutamisha lukumiino loobe. (Luk. 17:5) Aluulaa na kalolo kooso ku nteko i bino. Lukumiino lua binyibinyi luimeene pa kiukilo kilombane ki’Efile Mukulu eetu, alukakukuasha bodia kutamisha ino ngikashi.—Shak. 2:26.

14. Mmushindo kinyi ubaadi Mpiele mutumibua mushimikie kasele pa muulo wa kutumikila mianda y’atulongo? (Tala dingi kifuatulo.)

¹⁴ Mpiele mutumibua baadi mushimikie kasele pa buakinyi bi na muulo bua balongi  ba Kidishitu kutungunuka na kutumikila mianda y’abalongo. Baadi muteemune muanda wa mu Bible pabitale Nowa. Yehowa balunguile Nowa’shi kukiila ku mpeshi, akabutula bantu be bubi ba mu aa mafuku. Kuuka penda’shi mpeshi akafiki, ta ndio kubaadi kulombene kupaasha Nowa na kifuko kiaye nya. Lamiina’shi Mpiele ateemuna kipungo kia kumpala kua’shi mpeshi anokie “pabaadi bwato abwibakibwa.” (1 Mp. 3:20, Kilombeeno Kipya 2014) Eyendo, Nowa na kifuko kiaye, babaadi abatumikila mianda ibaabadi abalongo kui Efile Mukulu, pa kuibaka buato bukata. (Eb. 11:7) Mpiele baadi dingi mupuandikishe kibaadi Nowa mukite, na lubatshisho pa bafundile’shi: ‘Lubatshisho ndwipushene na kino, alo alwinupaasha binobino.’ (1 Mp. 3:21) Mu ungi ngakuilo, tui balombene kupuandikisha mudimo ofubu binobino na kuilumbuula bua lubatshisho, na mudimo ubaadi Nowa na kifuko kiaye bakite munda a bipua bua kuibaka buato. Mmudimo kinyi autungu’shi okite bua kuilumbuula bua kubatshishibua?

15. Tui kulesha naminyi’shi tui belangie kuishimba mu binyibinyi?

¹⁵ Kintu kia kumpala kia ku bintu abitungu’shi tukite, nkuilanga kuishimba mu binyibinyi ku miluisho yetu. (Bik. 2:37, 38) Kuilanga kua binyibinyi, akuitutakula mu kushintuluka kua binyibinyi. We mupue kuleka kukita mianda yooso ish’ayisankisha Yehowa, bu bukitekite, kutoma mfuanka, madimi na ngakuilo e bubi su? (1 Kod. 6:9, 10; 2 Kod. 7:1; Ef. 4:29) Su t’olekiele kukita ino mianda, tungunuka na kuikitshisha bodia kushintuluka. Ipusha muntu olongaa naye Bible sunga bakulu ba mu kakongie, buabadia nkukuasha na kukuludika. Su oki nsongua mushaale pamune na baledi bobe, tungunuka na kuibayipusha bua’shi bakukuashe biodia kukatusha kiubishi kioso ki bubi kilombene nkukutshishua bodia kubatshishibua.

16. Mu kiubishi ki buwa kia mianda ya mu kikudi mui mianda kinyi?

¹⁶ Bi na muulo dingi bua kuikala na biubishi bi buwa bia mianda ya mu kikudi. Mu ino mianda mui, kutuela kua mu bisangilo bia buina Kidishitu na kutuusha ngaluulo muanka. (Eb. 10:24, 25) Na dingi, su bolombasha ngikashi itekibue bodia kubanga kuenda mu mudimo wa bulungudi, shinkamisha’shi wekala webikitshi pa kiubishi. P’onyiisha kukita uno mudimo wa  bulungudi aupaasha miuwa, onyiisha kuiwusankila ngofu. (2 Tim. 4:5) Su oki nsongua na we mushaale pamune na baledi bobe, eyipushe obe nabene’shi: ‘Abitungu baledi bande bantentekieshe bua kutuela mu bisangilo na kuenda mu mudimo wa bulungudi su? Su neatshilaa mpango ami nabene?’ P’okitshi ino mianda obe nabene, olesha lukumiino lobe na kifulo kiobe, na lutumbu lobe bua Yehowa Efile Mukulu. Bino bikitshiino bia “kulamata Efile Mukulu,” mbia buntu biopa Yehowa. (2 Mp. 3:11, NWT; Eb. 13:15) Bia buntu bioso bi’atupeyaa Yehowa mu kukumiina kuetu, abimusankishaa. (Puandikisha na 2 Bena-Kodinda 9:7.) Atukumiinaa kukita ino mianda yooso muanda, tui na muloo wa kupa Yehowa bintu bietu bi buwa.

17-18. Eyikashi kinyi di na muulo adikakukuasha bodia kuenda kumpala mu kubatshishibua, na buakinyi? (Nkindji 3:3-6)

¹⁷ Bu bi’otungunuka na kuenda kumpala mu kubatshishibua, okafumankana na nkalakashi i bungi. Bangi bantu mbalombene nkubepuula bua lukumiino lobe lupia, be nkushikua sunga kukubingabinga. (2 Tim. 3:12) Pangi okuete kuikitshisha ngofu, bua kuimika kukita ingi mianda y’ouku’shi i bubi. Anka ingi nsaa otungunukaa nka na kuiyikita. Pangi we kubanga kukutua luishinko na kuinyongola pa muanda wa’shi omono’shi kepatshila koobe t’akalombana. Nkinyi akikakukuasha bua kunyingiila? Nyi eyikashi di na muulo ukata, kifulo bua Yehowa.

¹⁸ Kifulo kiobe bua Yehowa nyi eyikashi di buwa bukile, bi buwa wekale nadio. (Badika Nkindji 3:3-6.) Kunyingisha kifulo bu’Efile Mukulu nkulombene nkukuasha bodia koobesha kunyingiila nkalakashi y’ofumankana naayo mu nshalelo oobe. Bible alesha dingi bi Yehowa na kifulo ki na lulamato bua bafubi baye. Kifulo ki na lulamato akipushisha’shi, tanaasumbushene bafubi baye sunga kuleka kuibafula. (Mis. 100:5) Tui bapangibue ku kimfuanyi ki’Efile. (Kib. 1:26) Mbikunyi biodi mulombene kulesha kino kifulo?

19. Mmushindo kinyi oodi mulombene kutamisha lutumbu loobe bua bioso biabadi bakukitshiine kui Yehowa? (Bena-Ngalatea 2:20)

¹⁹ Tubangie na lutumbu. (1 Tes. 5:18) Efuku dioso, eyipushe obe nabene’shi: ‘Yehowa mmundeshe kifulo mushindo kinyi?’ Na dingi, ikala mushinkamishe’shi otumbulaa Yehowa mu nteko yobe, na kuteemuna bintu kampanda biadi mupue nkukitshiina. Uuka’shi Yehowa mmukukitshiine mianda i bungi i buwa pa bupenka  muanda mmukufule, anka bu bibaadi Mpoolo mutumibua muibitundule pabitale Yehowa. (Badika Bena-Ngalatea 2:20.) Eyipushe obe nabene’shi: ‘Nnami namu nakumiinaa kumulesha’shi ne mumufule su?’ Kifulo bua Yehowa akikukuasha bodia kutungunuka na kunyingiila bitompuanga na nkalakashi y’ofumankana nayo na kuiyikambila. Akikutakula dingi bodia kutungunuka na kulanguila Yehowa Efuku dioso, na kumulesha’shi we mumufule ngofu.

20. Nkinyi kiodi mulombene kukita bua kulambula muwa oobe kui Yehowa, na buakinyi kino kitshibilo ki na muulo?

²⁰ Ingi nsaa, kifulo kiobe bua Yehowa akikakutakula bodia kuela nteko i pabuayo. Okelambula obe nabene kui Efile Mukulu. Tentekiesha’shi, puelambula kui Yehowa, opete lukulupilo lui buwa bukile: Lua kuikala muntu aaye bua losoo. Kulambula muwa oobe kui Yehowa, omulaa bua kumufubila mu bipungo bioso bibidi, ki buwa na ki bubi. Tue na lukalo lua kukita mutshipo dia kabidi nya. Eyendo, nsaa y’atuilambula, atuata kitshibilo ki na muulo ukata. Tubande kunangushena ku uno muanda: Okaata bitshibilo bi bungi mu nshalelo oobe, bingi bia kuabidi abikekala buwa, anka t’onokaate kitshibilo ki buwa kukila kino kia kulambula muwa oobe kui Yehowa. (Mis. 50:14) Satana akekitshisha bua kubofusha kifulo kiobe bua Nshobe, mmukulupile’shi okalekie kululama koobe. T’olekieelanga Satana akukambila! (Yob. 27:5) Kifulo kiobe ki bukopo bua Yehowa akikakukuasha bodia kuikala na nshalelo muipushene na kuilambula koobe, na okanyiisha kuifubuila kui Nshobe e muiyilu.

21. Buakinyi tui balombene kuamba’shi lubatshisho nta mfudiilo, kadi ngi mbangilo?

²¹ Kunyima kua kuilambula kui Yehowa, lungula bakulu ba mu kakongie kenu pabitale matabula e na muulo ookiebe kuela. Ikala otentekiesha misuusa yooso’shi, lubatshisho nta mfudiilo kadi ngi mbangilo. Lubatshisho mbangilo a nshalelo shi na mpuilo mu kufubila kua Yehowa. Biabia, nyingisha kifulo kiobe bua Nshobe kubanga binobino. Ata bipatshila bia’shi kifulo kiobe kinyiishe kutama efuku dioso. Bino ngi abikakutakula bodia kubatshishibua. Diadi’efuku, adikekala buwa bukile. Kadi uno ngi mbangilo. Biabia, kifulo kiobe bua Yehowa na bua Muana aaye kitungunukie na kutama bua losoo!