1. Nkinyi kiatudi balongie mu kisangilo kia ku kipua kia 2023?

 MU KISANGILO kia ku kipua kia 2023, a tui bapete mpushisho mutookane a ingi mianda yatudi bakumiine na ingi ngukisho pabitale mudimo wetu wa bulungudi. Bu kileshesho, tui balongie’shi bangi bantu abakebungu pamune na muilo wa Yehowa sunga kunyima kua kuluishibua kua Babilone mukata. Abaadi dingi betuukishe’shi kubanga mu mueshi w’Ekumi na umune 2023, balungudi ba Bufumu t’abatuulu dingi luapolo luabo loso lua mudimo wa bulungudi. Kuno kushintuluka akukiebe kulesha’shi mudimo wetu wa bulungudi tauki ukambe kuikala na muulo bu biabikalanga kumpala su? Nya ta mbiabia!

2. Buakinyi mudimo wetu wa bulungudi ukuete kunyiisha kuikala na muulo efuku dioso adikidi? (Maako 13:10)

² Efuku dioso adikidi, mudimo wetu wa bulungudi ukuete kunyiisha kuikala na muulo. Buakinyi? Muanda nsaa ikuete kuenda lubilo. Tala bibakuile Yesu pabitale mudimo wa bulungudi mu ano mafuku a ku nfudiilo. (Badika Maako 13:10.) Muyile muisambo wa Mateo, Yesu bakuile’shi, abitungu kulungula mukandu wi buwa kui miilo yoso kumpala kua’shi “nfudiilo” ifikie. (Mat. 24:14) Kino kishima akilesha nfudiilo a uno ndumbuilo e bubi a Satana. Yehowa mmupue kutshiba “efuku na nsaa” ayikakitshika ino mianda mu mafuku apela’mu. (Mat. 24:36; 25:13; Bik. 1:7) Efuku dioso dikuete kukila, dikuete kuitutuala  peepi na nfudiilo. (Lom. 13:11) Patuki’atutengiela, tutungunukieyi na kulungula mukandu wi buwa.

3. Nkinyi akitutakulaa bua kulungula mukandu wi buwa?

³ P’atunangushena ku mudimo wetu wa bulungudi, bi buwa tuiyipushe luno lukonko lui na muulo ukata: Buakinyi atulungulaa mukandu wi buwa? Bua kuakula kalolo, Kifulo nyi akitutakulaa bua kulungula mukandu wi buwa. Nsaa y’atulungula mukandu wi buwa atulesha kifulo kietu bua bulungudi, bantu, na kikile bioso atulesha kifulo kietu bua Yehowa n’eshina diaye. Tutaluuleyi ka muanda koso pa bupenka buako.

ATULUNGULA MUKANDU WI BUWA MUANDA TUIBEUFULE

4. Opushaa naminyi nsaa y’opete mukandu wi buwa?

⁴ Nangushena bibopushishe mukandu wi buwa kampanda, bu kutandikua ku muana mu kifuko kienu, sunga kupeta mudimo ubodi nao lukalo. Kushi mpaka, bodi na muloo wi bungi wa kuiwulungula bangi bena kifuko nobe na bakuuku bobe. Bodi mupushe bino nsaa ibopushishe mukandu wi buwa ukile yoso: mukandu wi buwa wa Bufumu su?

5. Bopushishe naminyi nsaa ibolongiele bia binyibinyi bi Muiyi di’Efile Mukulu bua musuusa wa kumpala? (Tala dingi kifuatulo.)

⁵ Tentekiesha bibopushishe nsaa ibolongiele bia binyibinyi bi Muiyi di’Efile Mukulu bua musuusa wa kumpala. Bolongiele’shi Nshobe e muiyilu mmukufule, akumiina’shi wekale mu kifuko kia balanguidi baye, mulee’shi akafudiisha makienga na mpombo, na’shi we mulombene kukulupila kumona bakuenu bodi mufule babafuile p’abakasanguka mu nsenga ipia, na ingi mianda i bungi yodi mulongie. (Mak. 10:​29, 30; Yo. 5:​28, 29; Lom. 8:​38, 39; Kbf. 21:​3, 4) Bino bia binyibinyi bioso bibodi mulongie, bibaadi bikume eshimba diobe. (Luk. 24:32) Bodi mufule bibodi mulongie, na bodi okumiina kuibilungula bangi bantu!—Puandikisha na Yeelemiya 20:9.

6. Nkinyi kibolongiela ku kileshesho kia Ernest na Rose?

⁶ Tala kino kileshesho. Mukuetu mulume  abetaminaa bu Ernest b baadi na bipua ekumi nsaa ibafuile nshaye. Ernest amba’shi: “Naadi neyipusha’shi: ‘Bende muiyilu su? Sunga’shi baafu bua loso?’ Naadi naabila bangi bana ba ki na ba nshabo.” Ernest baadi ende ku mashama a nshaye efuku dioso, baadi akunama na kuteka’shi: “Bua lusa, Efile Mukulu, ndungule namu kui nshami.” Bipua 17 kunyima kua lufu lua nshaye, babatekiele Ernest kui Tumonyi tua Yehowa bua’shi balongie naye Bible, aye nkukumiina kushi kunyengakana. Baadi na muloo wa kulonga’shi bafue t’abauku kintu, be’nka bu balaale, na’shi Bible alaa lusangukilo mu mafuku aafiki. (Mul. 9:​5, 10; Bik. 24:15) Nfudiilo a bioso, bapetele ngaluulo ku nkonko ibaadi ayimukalakasha munda mua mafuku e bungi! Ernest baadi na muloo wi bungi bua bia binyibinyi bia mu Bible bibaadi mulongie. Mukashi aaye Rose, baadi mubangie kulonga, na aye namu nkufula mukandu wa Bufumu. Mu kipua kia 1978 babaadi babatshishibue. Babaadi na muloo wa kulungula bena kifuko nabo, bakuuku, na muntu oso baadi akumiina kuibateemesha bia binyibinyi bi baabadi bafule. Bu kipeta, Ernest na Rose mbakuashe bantu bakile 70 bua kufula Yehowa na kubatshishibua.

7. Nkinyi akikitshika nsaa ayimene kifulo kia binyibinyi mishi bia mu Bible muishimba dietu? (Luka 6:45)

⁷ Abimueka patooka’shi, nsaa i kifulo kia bia binyibinyi bia mu Bible akimene mishi muishimba diobe, t’omono bia kuumiina. (Badika Luka 6:45.) Atuipusha nka bu balongi ba Yesu ba mu siekele a kumpala abakuile’shi: “Tatui balombene kuleka kuakula pabitale mianda yatudi bamone na yatudi bapushe.” (Bik. 4:20) Tui bafule bia binyibinyi ngofu, nyi buakinyi atukumiina kuibilungula bantu be bungi.

ATULUNGULA MUKANDU WI BUWA MUANDA TUI BAFULE BANTU

8. Nkinyi akitutakula bua kulungula bangi mukandu wi buwa? (Tala kashibo akamba’shi: “ Fula bantu bua kuibekasha bu balongi.”) (Tala dingi kifuatulo.)

⁸ Tui bafule bantu nka bu Yehowa na Muan’aye. (Nki. 8:31; Yo. 3:16) Tui na lusa bua baaba ‘bash’abauku Efile Mukulu,’ na ‘bash’abakulupila muadi.’ (Ef. 2:12) Pa muanda wa nkalakashi yabadi nayo, be’nka bu be mu buina bula. Anka atue tui na mooshi ulombene kuibatusha muanka: mmukandu wi buwa wa Bufumu. Kifulo kietu na lusa bua bantu be bino akitutakula bua kuikitshisha ngofu bua kuibalungula mukandu wi buwa. Uno mukandu wi buwa ngulombene kuibapa lukulupilo na kuibakuasha bua kupeta nshalelo e buwa binobino, na kuibapa lukulupilo lua kuikala na “muwa wa binyibinyi,” kuamba’shi muwa wa ikalayika mu nsenga ipia y’Efile Mukulu.—1 Ti. 6:19.

9. Nkudimusha kinyi kuatudimushaa bantu bua mafuku aafiki, na buakinyi? (Esekyele 33:​7, 8)

 ⁹ Kifulo kietu bua bantu akitutakula dingi bua kuibadimusha pabitale kabutu ka uno ndumbuluilo e bubi ka takadi peepi. (Badika Esekyele 33:​7, 8.) Tui na lusa bua bantu boso, mpaa na bena kifuko netu bashi Tumonyi tua Yehowa. Bantu be bungi mbepaane ku midimo yabo kushi kuuka’shi akukekala “mpombo ikata ishakitshikile dingi kubanga kasha nsenga yekala kuanka mpaa na binobino, na tayana’kitshikie dimo.” (Mat. 24:21) Atukumiina’shi bawukie akikakitshika mu kiakia kipungo kia kiimu. Kia kumpala abakabutula bipuilo bia madimi, akupu akuikala kabutu ka ndumbuluilo oso e bubi ku Armagedone. (Kbf. 16:​14, 16; 17:​16, 17; 19:​11, 19, 20) Atutekie bua’shi bantu be bungi bateemeshe kuno kudimusha, na besangie netu mu lulanguilo lui selele. Kadi nkinyi akikakitshikila bano abapele kuteemesha mukandu wa kudimusha, mpaa na be na kifuko netu?

10. Buakinyi bi na muulo tutungunukie na kudimusha bantu?

¹⁰ Nka bu biabadi bapatule mu muisambo ushaale, abimueka’shi Yehowa akapaasha bantu abashintuula binangu biabo nsaa y’abakamono kubutudibua kua Babilone Mukata. Su mbiabia, bi na muulo tutungunukie na kuibalungula uno muanda binobino. Uuka bino: Mianda y’atuibalungula binobino mbalombene nkeyitentekiesha aa mafuku. (Puandikisha na Esekyele 33:33.) Pangi abakatentekiesha kudimusha kubabaadi bapushe kuatudi na bino abikebatakula bua kuibunga netu mu lulanguilo lui selele pa baki na mushindo wa kuibikita. Nka bu bibaadi mulami a lukano a mu Fidipe mushintuule binangu biaye kunyima kua “kutshinkatshinka kukata kua nsenga,” pangi bangi bash’abakumiina mukandu wetu lelo uno, mbalombene nkashintula binangu biabo kunyima kua kabutu ka mu kimpulu-nkamba ka Babilone Mukata.—Bik. 16:​25-34.

ATULUNGULAA MUKANDU WI BUWA MUANDA TUI BAFULE YEHOWA N’ESHINA DIAYE

11. Tui kupa Yehowa ntumbo, kineemo, na bukome naminyi? (Kibafumbuilue 4:11) (Tala dingi kifuatulo.)

¹¹ Kabingilo kakata aketutakulaa mu kulungula mukandu wi buwa nka’shi, mmuanda tui bafule Yehowa Efile Mukulu n’Eshina diaye. Na dingi atumonaa bulungudi buetu bu mushindo wa kutumbisha Efile Mukulu atudi bafule. (Badika Kibafumbuilue 4:11.) Atusankilaa mayi aamba’shi: Yehowa Efile Mukulu etu, we mulombene kupeta ntumbo, kineemo na bukome abifiki kui balanguidi bobe basha lulamato. Atumupa ntumbo na kineemo nsaa y’atulungula bangi na kishinkamiisho’shi nnaye “bapangile bintu bioso” na’shi tui na muwa  muanda nnaye muitupe wanka. Atumupa bukome, kuamba’shi bukome buetu, p’atufubisha nsaa yetu, bukome buetu, na bintu bietu bua kulungula mukandu wi buwa ngofu muyiile nshalelo atudi naaye. (Mat. 6:33; Luk. 13:24; Kol. 3:23) Bua kuakula kalolo, atukuminaa kuakula pabitale Efile Mukulu atudi bafule. Na dingi atuikalaa na kisukusuku kia kulungula bangi Eshina diaye na bi Buifile buaye. Buakinyi?

12. Tui kutumbisha eshina dia Yehowa mu mudimo wetu wa bulungudi naminyi?

¹² Kifulo kietu bua Yehowa akitutakula bua kutumbisha eshina diaye. (Mat. 6:9) Bino abipushisha’shi mianda yabakuete kuakula kui Satana pabitale Yehowa, ngia madimi. (Kib. 3:​1-5; Yob. 2:4; Yo. 8:44) Mu mudimo wetu wa bulungudi atuikalaa na lukalo lukata lua kulungula bantu abetuteemesha bia binyibinyi pabitale Efile Mukulu etu. Atukumiina kuwukisha bantu booso’shi eyikashi dikata dia Yehowa nyi nkifulo. Na’shi kumunana kuaye kui buwa na nkululame, na dingi Bufumu buaye abufiki binobino bua kukatusha makienga oso, na butuadile bantu booso butaale na muloo. (Mis. 37:​10, 11, 29; 1 Yo. 4:8) P’atukaluila nkumo ya Yehowa mu mudimo wetu wa bulungudi, atutumbisha eshina diaye. Atuikala dingi na muloo wa kuuka’shi tui na nshalelo muipushene n’eshina dietu. Buakinyi atuamba biabia?

13. Buakinyi tui na kineemo kia kuitanyinua bu Tumonyi tua Yehowa? (Yeeshaya 43:​10-12)

¹³ Yehowa mmuituitanyine buatudia kuikala bu “tumonyi.” tuaye. (Badika Yeeshaya 43:​10-12.) Bingi bipua bi bungi kumpala, Kasaka ka Bakunkushi-Bakulu ka Tumonyi tua Yehowa, kabafundile mukanda ubaadi awamba’shi: “Nkineemo kikata kiatudi balombene kusangeela, nkia kuitanyinua bu Tumonyi tua Yehowa.” c  Buakinyi atuamba biabia? Tuateyi kileshesho. Su okumiina’shi muntu kampanda akuakuile bu kamonyi bua muanda ku mbulamatadi, osangula muntu owuku na oodi mukulupile, muntu muwukibue kalolo’shi e na nkumo i buwa na bu kamonyi buaye a bebukumiina. P’aye kuitusangula bu Tumonyi tuaye, Yehowa mmuleshe’shi etuiwuku kalolo, na mmuitukulupile’shi atulungula bangi’shi, anka penda aye ngi Efile Mukulu a binyibinyi. Tui na kineemo kia kuikala Tumonyi tuaye, na atukimbi mishindo yooso bua kuwukisha eshina diaye na kulesha’shi, mianda yoso i bubi yabadi bakule pabimutale ngia madimi. P’atue kukita bino, atuikala na nfiedi ya kukita mianda muyile eshina dietu: Tumonyi tua Yehowa!—Mis. 83:18; Lom. 10:​13-15.

ATUTUNGUNUKA NA KULUNGULA MUKANDU WI BUWA MPAA NA KU NFUDIILO

14. Mmianda kinyi ayikakitshika mu mafuku apeela abashaala kumpala ku?

¹⁴ Tui na muloo wa kumona akikakitshika mu mafuku apeela abashaala kumpala ku! Ku bukuashi bua Yehowa, tui bakulupile’shi bantu be bungi abakumiina bia binyibinyi kumpala kua’shi mpombo ikata ibangie. Na dingi, tui na muloo wa kumona sunga mu kipungo kia mpombo ikata, kipungo ki bukopo kishekeele dingi kuanka kashaa, bantu be bungi biabakatuka mu ndumbuluilo a Satana na kufika kuatudi bua kutumbisha Yehowa pamune neetu!—Bik. 13:48.

15-16. Nkinyi ki’atutungunuka na kukita, mpaa na nsaa kinyi?

¹⁵ Pa tuki’atutengiela, tui na mudimo wa kukita. Tui na kineemo kia kukita mudimo ukata watush’anakakite dingi, kineemo kia kulungula mukandu wi buwa wa Bufumu bu’Efile Mukulu mu nsenga ishima. Mu kino kipungo kimune, abitungu tudimushe bantu bua mianda aayikatshika binobino. Bantu be na lukalo lua kuuka’shi nfudiilo a uno ndumbuluilo e bubi, banyiisha kuifubuila peepi ngofu. Na dingi apakafiki kiimu kia Yehowa, abakawuku’shi mukandu ubatudi atuibalungula, ubaadi aufiki kui Yehowa Efile Mukulu.—Es. 38:23.

¹⁶ Abitungu tuikale dingi na kitshibilo kia kukita kinyi? Kifulo bua mukandu wi buwa, kifulo bua bantu, na kikile bioso, kifulo bua Yehowa Efile Mukulu na bu’Eshina diaye, kitutakule bua kulungula mukandu wi buwa na kisukusuku na kisumi mpaa na apakamba Yehowa’shi: “Kubapu!”