MUISAMBO WA KULONGA 4
LOONO 30 Nshami, Efile ande na kuuku ande
Yehowa e nobe kifulo kikata
“Yehowa e na kifulo kikata.”—YAK. 5:11.
KI’ATUISAMBILA
Kifulo kia Yehowa akitukakaa kuadi, akituikashaa bua’shi tuipushe mu bulami, akimutakukulaa buadia kuitupasukila, na kuitupa dingi bukome.
1. Nkinyi akikufikilaa mu binangu nsaa y’onangushena pabitale Yehowa?
TOBOTOMPELE kupuandikisha bua kumona Yehowa su e bu kinyi? Nsaa yuesamba naye mu luteko, nkinyi akikufikilaa mu binangu biobe? Sunga Yehowa t’amuekaa, Bible kuete amulesha mu mishindo i bungi. Yehowa mbamuitanyine bu “nguba na bu ngabo” na bu “kaalo akabutulaa.” (Mis. 84:11, EEM; Eb. 12:29) Esekiele baadi mupatuule mu kimonua’shi, Yehowa e bu ebue dia safire, kilonda akibadima na bu nkongolo. (Es. 1:26-28) Bingi biabadi baleshe Yehowa bi kuitupushisha mpaa na moo, sunga kuitukutshishua mpaa na bishima biatudia kumulesha biinyi biadi.
2. Buakinyi mbilombene kuituikeela bukopo bua kuifubuila kui Yehowa?
2 Muanda t’atumonaa Yehowa, bi kuituikeela bukopo buatudia kukumiina’shi mmuitufule. Bangi abanangushenaa’shi Yehowa t’aan’ebafule muanda wa mianda i bukopo itababamuene mu nshalelo aabo. Be kunangushena bino muanda pangi bamashabo ta mbebafule. Aku namu, Yehowa auku kalolo mushindo w’atuipusha na auku kalolo buakinyi bi kuituelela bukopo bua kuifubuila kuadi. Bua kuitukuasha, mmuleshe bumuntu buaye bui buwa Muiyi diaye.
3. Buakinyi abitungu tunyiishe kuuka bi kifulo kia Yehowa?
3 Kishima kimune akileshaa kalolo bi Yehowa, nyi nkifulo. (1 Yo. 4:8) Yehowa nyi nkifulo. Kifulo nyi akimutakulaa bua kukita kintu kioso kiakia. Efile Mukulu aleshaa kifulo kiaye kui bantu booso abamuuku na bash’abamuuku. (Mat. 5:44, 45) Mu uno muisambo atukanyiisha kuuka bi Yehowa na bi kifulo kiaye. P’atunyiisha kulonga pabitale Efile Mukulu eetu, atunyiisha kumufula.
YEHOWA MMUITUFULE NGOFU
4. Opushaa namu naminyi bua lusa lukata lua Yehowa? (Tala dingi kifuatulo.)
4 “Yehowa e na kifulo kikata.” (Yak. 5:11) Mu Bible Yehowa mmuipuandikishe aye nabene na kifulo akikalaa nakio nyina muana. (Yesh. 66:12, 13) Banda nka penda kupuandikisha nyina muana bi’ekalaa na kifulo kia kupasukila muana aaye. Asemunaa muana aaye na kifulo kioso amutuula pa mikoolo yaye, na abanga kuakula naye na kalolo kooso na kayi ke buwa. Su muana abanga kudila sunga’shi apeta lukalakashi, nyinaye akimbaa bia kushinkamisha kiadi nakio lukalo. Nsaa yatudi benyongole, tui balombene kukulupila kifulo kia Yehowa. Kayimba ka misambo bafundile’shi: “Panaadi mutondekue na tuinyongoshi, boodi munkankamikie na onkuatshishena.”—Mis. 94:19, NWT.
“Nka bu nyina muana bi’atungunukaa na kunyingisha muana aaye, biabia ami namu natungunuka na kuinunyingisha” (Tala kikoso 4)
5. Kifulo ki na lulamato kia Yehowa akipushisha kinyi koodi?
5 Yehowa e na lulamato. (Mis. 103:8) T’akutuaa kuitufula sunga nsaa y’atukitshi muanda wi bubi. Muilo wa bena Isalele ubaadi awinyongosha Yehowa misuusa na misuusa; kadi, nsaa ibaabadi abenyongola na kuleka kukita mianda i bubi, Yehowa baadi ebashinkamiisha na bino bishima’shi: “We na muulo ukata ku meeso kwande, we na kineemo, n’ami nee mukufule.” (Yesh. 43:4, 5) Kifulo ki’Efile Mukulu ta nkishintulukie. Misuusa yoso tui balombene nka kuikikulupila. Sunga tuakita bilubilo bikata, Yehowa t’anetusumbushene. Nsaa y’atuilanga ku mashimba na kualukiila kui Yehowa, paapa atumono kalolo’shi ki nka muitufule. Yehowa mmulee’shi: ‘Aketufwila lusa lukata.’ (Yesh. 55:7, EEM) Bible alesha luno lusa bu, “bipungo bia kupetuula bukome bifikie kui Yehowa nabene.”—Bik. 3:19.
6. Mukanda wa Sekadya 2:8, awitulongiesha kinyi pabitale Yehowa?
6 Badika Sekadya 2:8. Ku muanda mmuitufule, Yehowa etupasukilaa lubilolubilo ku bi’atuipusha na kuitukaluila. Na enyongolaa bikile nsaa y’atuinyongola n’atue. Biabia, tui kushinkamisha’shi aketualuula nsaa y’atumutekie’shi: ‘Ndame nka m’olaminâ mwan’ôbe’eyiso.’ (Mis. 17:8, EEM) Eyiso adikalaa dipasukie bikile na nkipindi kia ku mbidi ki na muulo ukata. Apetupuandikisha Yehowa na muana aaye a eyiso e nka bu bakula’shi: ‘Muntu ooso e nukumu, bakumu muilo wande wi na muulo ukata kuandi.’
7. Buakinyi abitungu tunyingishe kishinkamiisho kietu kia’shi Yehowa mmuitufule?
7 Yehowa akumiinaa tuikale bashinkamishe’shi mmuitufule pa bupenka. Anka auku’shi pa muanda wa nkalakashi i bukopo itatubamuene, tui kuiyipusha su Yehowa mmuitufule. Sunga’shi tui kupeta mianda i bukopo ilombene kubanga kutompa kishinkamiisho kietu kia’shi Yehowa mmuitufule. Tui kunyingisha kishinkamiisho kietu naminyi? Mpa kulonga mushindo wi Yehowa aleshaa kifulo kiaye kui Yesu, kui bedibue muimu, na kuatudi atue booso.
MUSHINDO AULESHAA YEHOWA KIFULO KIAYE
8. Buakinyi Yesu baadi mushinkamishe’shi Nshaye mu mufule?
8 Yehowa na Muana aaye a kifulo, babaadi befulene kumpala kua kupanga bintu bioso. Munda a bino bipua bioso, kipuano kiabo na kifulo kiabo mbinyiishe kutama. Yehowa baadi muleshe kifulo bua Yesu pa butooka nka bu bi’atuibibadika mu mukanda wa Mateo 17:5. Yehowa baadi mulombene kuakula nka penda’shi: ‘Uno nyi muntu andi mufule.’ Anka baadi mukumiine’shi tuukie bi bukata bua kifulo kiaye kui Yesu, ngi aye nkumuitanyina’shi: “Uno nyi Muana ande, andi mufule.” Yehowa baadi na nfiedi bua bibaadi Yesu, bikishekishe bua bibaadi mukumiine bua’shi atushe muwa waye. (Ef. 1:7) Yesu namu ta baadi na mpaka bua bibaadi abipusha Nshaye pabimutale. Yehowa baadi mushinkamiishe Yesu binyibinyi bua’shi anyiishe kuipusha’shi mu mufule ngofu. Yehowa baadi alesha Yesu kishinkamiisho misuusa na misuusa bua kumulesha’shi mu mufule.—Yo. 3:35; 10:17; 17:24.
9. Nkishima kinyi akilesha bi kifulo kia Yehowa kui bedibue muimu? Patuula. (Bena Loma 5:5)
9 Yehowa ashinkamiishaa dingi bedibue muimu kifulo kiaye. (Badika Bena Loma 5:5.) Tala kino kishima “kupongoola.” Dingi dictionnaire dia Bible adikilesha’shi kifulo “akifiki kuatudi nka bu muela.” Kino kishima akishimika kasele pa bukata bua kifulo kia Yehowa kui bedibue muimu! Bedibue muimu abawuku’shi “mbafudibue n’Efile Mukulu.” (Yu. 1) Yowano mutumibua balesheshe bi’epusha nsaa ibafundile’shi: “Talayi bukata bua kifulo kiabadi betuleshe kui Yaya, bua’shi tuitaminyibue bu bana b’Efile Mukulu!” (1 Yo. 3:1) Kifulo kia Yehowa nkimeene nka penda pe bedibue muimu su? Nya, atue booso Yehowa mmuituleshe kifulo.
10. Nkishinkamiisho kinyi kikata kia kifulo kia Yehowa koodi?
10 Nkishinkamiisho kinyi kikata kia kifulo kia Yehowa? Nyi nkuulo. Kukiila ku ino nkuulo, Yehowa mmuleshe kifulo kikile bukata kiabashi bia kuitukulesha kui ungi muntu! (Yo. 3:16; Lom. 5:8) Yehowa batushiishe muana aaye a kifulo, atadiila bua’shi afue bua bantu booso bua’shi miluisho yetu imone bia kufuidibua lusa, na’shi tumone bia kuikala naye mu bu kuuku. (1 Yo. 4:10) P’atunyiisha kunangushena ku muulo wabadi bafute kui Yehowa na Yesu, atunyiisha kupusha bi bukata bua kifulo kiabo kui muntu ooso a kuatudi. (Nga. 2:20) Nkuulo ta ngifutshibue bu kitungo kibaadi akitungu’shi Yehowa afute ku mbulamatadi nya. Nkuulo nyi nkia buntu kia kifulo. Yehowa mmuituleshe kifulo pa kutusha mulambu wa kintu ki na muulo ukata kuadi, Yesu. Yehowa baadi mutadiile bua’shi Muana aaye akiengie na kufua bu’etu.
11. Tubalongiela kinyi ku mukanda wa Yeelemiya 31:3?
11 Anka bu bibatuibimono, Yehowa ta mulame kifulo kiaye nka penda bua aye nabene nya, kadi mmuituleeshe kianka na muloo ooso. (Badika Yeelemiya 31:3.) Yehowa mmuitukakie kuadi muanda muitufule. (Puandikisha na Miiya Ikituulwe 7:7, 8.) Ta kui kintu sunga muntu akuituabuula ku kino kifulo. (Lom. 8:38, 39) Opushaa namu naminyi pabitale kino kifulo? Badika Mukanda wa Misambo 23, omone bukitshishi bui naabo kifulo kia Yehowa na bibaadi mufule Davide, na bukitshishi buakidi kilombene kuikala nakio kuatudi atue booso.
OPUSHAA NAMU NAMINYI PABITALE KIFULO KIA YEHOWA?
12. We kupatuula mukanda wa Misambo 23 mu kikoso naminyi?
12 Badika Misambo 23:1-6. Mukanda wa Misambo 23 nyi ndono alulesha kishinkamiisho kia kifulo kia Yehowa. Davide bafundile uno musambo bua kulesha bukata bua kifulo kibaadi pankatshi p’aye na pa Mulami aaye Yehowa. Davide baadi mupushe bibulami bua Yehowa, na baadi mumukulupile nka aye. Davide baadi muukie’shi Yehowa amuleesha kifulo kiaye efuku dioso. Nkinyi kibaadi kimushinkamiishe bino?
13. Buakinyi Davide baadi mushinkamishe’shi Yehowa amupasukila?
13 “Tankakutua kintu su nkimune.” Davide baadi muipushe’shi mbamufule ngofu muanda Yehowa baadi amulombeesha nkalo yaye ooso. Davide baadi dingi musangeele kipuano kiaye na Yehowa, na bibaadi Yehowa mumukumiine. Ngi buakinyi baadi mushinkamishe’shi, sunga kuakamukitshikila muanda mu mafuku aafiki, Yehowa atungunuka na kumupasukila mu bioso. Muanda Davide baadi mukulupile’shi Yehowa mmumufule na amupasukila, bibaadi bimukuashe bua’shi tekalanga ekalakasha, kadi ekadikie nka na muloo na kusanka na kiadi nakio.—Mis. 16:11.
14. Yehowa etupasukilaa na kifulo kioso mushindo kinyi?
14 Yehowa etupasukilaa na kifulo kioso, bikishekishe nsaa ayitukitshikila mianda i bubi mu nshalelo etu. Claire a mukuetu mufube ku Betele munda a bipua 20, ta baadi auku biadia kukuasha kifuko kiaye nsaa ibakipetele mianda ibukopo nya. Nshaye baadi akumbu maladi a AVC, umune a ku bakuabo bakashi baadi mutuushibue mu kakongie, na kifuko kiaye kibaadi kishimishe mudimo wabo mpaa na nshibo yabo. Yehowa mmuleshe’shi ebapasukilaa na kifulo kioso naminyi? Claire amba’shi: “Yehowa mmuleshe’shi apasukilaa kifuko kiande misuusa yooso pa kuibapa kiakia kiabadi nakio lukalo efuku dioso. Biabia, misuusa i bungi Yehowa etupeyaa kukila biabia biatudi nabio lukalo! Panangushena ku mushindo witukuashe Yehowa, tanandube kifulo kiaye. Kutentekesha ino mianda nkunkuashe buandia kutungunuka na kufubila Yehowa na muloo, sunga nsaa ayintuukila ingi mianda ibukopo mu nshalelo ande.”
15. Buakinyi Davide baadi mupete dingi bukome? (Tala dingi kifuatulo.)
15 ‘Ampeyaa dingi bukome.’ Ingi nsaa, Davide baadi enyongola muanda wa mianda yooso na nkalakashi bibaadi apete. (Mis. 18:4-6) Anka, kifulo kikata kia Yehowa na bibaadi amupasukila, bibaadi abimupa dingi bukome. Yehowa baadi mukunkushe kuuku aaye baadi mukookie ku, “kimwa ki buwa” na ‘ku bukunkula bua meema ataale.’ Yehowa pa bakitshine bino, Davide baadi mupete dingi bukome na apeta mushindo wadia kutungunuka na luendo.—Mis. 18:28-32.
Sunga mbibaadi Davide muinyongole ngofu Yehowa baadi mmufule ngofu, amupasukila na kumupa dingi bukome (Tala kikoso 15)
16. Kifulo kia Yehowa akikupeyaa dingi bukome mushindo kinyi?
16 Mu mushindo umune lelo uno: “Muanda Yehowa e na kifulo ki na lulamato, ta tui balombene kuamba’shi tubafudiila” nsaa y’atufumankana na nkalakashi ibukopo mu nshalelo eetu na kuiyinyingiila. (Kwi. 3:22; Kol. 1:11) Tubandeyi kutala kileshesho kia mukuetu mukashi Rachel. Baadi mutshobolokie ngofu nsaa ibaadi mulume aaye mutombokiele Yehowa, na kusumbushena Rachel mu kipungo kia COVID-19. Yehowa baadi mukitshine Rachel kinyi? Rachel amba’shi: “Yehowa baadi mukite bia’shi nepushe’shi mmufule. Yehowa baadi mmuntumine ba kuuku babaadi abakisha n’ami nsaa pamune, abantuadila bidibua, abantumina mesaje na bifundue bibaadi abinkankamika, abansepesha, na kunkitshina mianda ibaadi ayitentekiesha’shi Yehowa ngi baadi ampasukila. Natumbulaa Yehowa bu biadi mmupe kifuko kikata ki na kifulo.”
17. Buakinyi Davide ta baadi “atshinyi kintu”?
17 ‘Tantshînyi kintu, muanda we n’ami.’ Muwa wa Davide ubaadi misuusa ibungi nka mu masaku, na baadi na beshikuanyi be bukome bukile. Biabia, kifulo kia Yehowa kibaadi kimukuashe buadia kuipusha mufudibue na mulamiibue. Davide baadi epusha’shi Yehowa baadi naaye mu muanda ooso wawa, na Yehowa ngi bibaadi mumushinkamiishe. Ngi buakinyi Davide bayimbile’shi: ‘[Yehowa] bankatwishe mô oso unádi n’ao.’ (Mis. 34:5, EEM) Sunga Davide baadi apusha moo ukile ingi nsaa, baadi na mushindo wa kukambila moo waye muanda baadi auku’shi Yehowa mmumufule.
18. Kuuka’shi Yehowa mmukufule akukunyingisha naminyi nsaa y’opusha moo?
18 Kuuka’shi Yehowa mmuitufule, kui kuitunyingisha nsaa y’atupete muanda awitukuatshisha moo naminyi? Ungi mbala-mashinda abetanyinaa bu Susi alesha bibaabadi bepushe nsaa ibabafuishiishe muana aabo mulume, amba’shi: “Nsaa ayikukitshikila muanda wi bubi ngofu mu nshalelo oobe, awikuinyongosha na wepusha’shi we na lukalo na bukuashi bua bangi. Anka kifulo kikata kia Yehowa nkitukuashe biatudia kuipusha bafudibue na be mu bulami.” Rachel atatupuile kuteemuna kunundu akula dingi’shi: “Dingi efuku bufuku pa naadi mupushe eshimba diande dibakalakashua, naadi muinyongole ngofu, na napusha moo ukile, ngi ami nkubanga kuteka Yehowa n’eyi di bukopo. Musuusa nka umune napushiishe’shi Yehowa bafukamisha eshimba diande na bampa butaale, nka abikalaa nyina muana akitshina muana aaye, na napushiishe tulo. Ntanandube kiakia kipungo’mi.” Ungi mukulu mu kakongie abetanyina bu Tasos baadi mukite bipua binanka mu lukano muanda wa kupela kutuela busalayi. Baadi mumone bi kifulo kia Yehowa na bi’amupasukila naminyi? Amba’shi: “Yehowa baadi ampasukila ku nkalo yande yooso, na kunkitshina bikile paapa. Bino bibaadi binyingishe kishinkamiisho kiande’shi abitungu nkulupile nka muadi. Dingi, ku bukuashi bua kikudi kiaye, Yehowa bampeele muloo, sunga mbinaadi mu lukano mubaadi amunkalakasha mu binangu. Bino mbishinkamiishe’shi su nanyiisha kumufubila, nanyiisha kupeta miabi ya kalolo kaaye. Ngi ami nkubanga kufuba bu mbala-mashinda a mieshi yoso sunga mbinaadi mu lukano.”
EFUBUILE KUI EFILE MUKULU OOBE SHA LUSA LUKATA
19. (a) Kuuka’shi Efile Mukulu mmuitufule kui kuikala na bukitshishi ku kiatudi balombene kumulungula mu nteko yetu naminyi? (b) Bino bioso bibaabalesha kifulo kia Yehowa bibakukumu pa bupenka su? (Tala kashibo akamba’shi: “ Bishima abitukuasha buatudia kuipusha’shi Yehowa muitufule bikata.”)
19 Mianda y’atumonaa na bino bioso bibatukatuka mu kuisambila, abilesha’shi Yehowa, “Efile Mukulu a kifulo e netu.” (2 Ko. 13:11) Etupasukilaa pa bupenka. Tui bashinkamishe’shi tui ‘befunyishue na kifulo Kiaye ki na lulamato.’ (Mis. 32:10) Su tubanyiisha kunangushena ku mushindo w’etuleshaa kifulo kiaye, atunyiisha kuipusha mu kipuano ki bukopo naye. Atuipusha mu bulungantu bua kuifubuila kuadi mu luteko na kumulungula biatudi na lukalo lukata lua kifulo kiaye, atumulungula nkalakashi yetu yooso bashinkamishe’shi eyiuku kalolo na akumiina kuitukuasha.—Mis. 145:18, 19.
20. Kifulo kia Yehowa akitukakaa bua kuifubuila kuadi naminyi?
20 Nka bi’atuifubuilaa peepi na kaalo efuku di mashika, ngi biatudia kuifubuila namu ku kifulo kia Yehowa. Bu bikale’shi kifulo kia Yehowa ngi akimutakulaa bua kukita mianda, nakio kimuikashe dingi na lusa lukata. Biabia kumiina kifulo kia Yehowa mu nshalelo oobe. Atue booso atualuula ku kifulo kiaye p’atualuula’shi: “Ne mufule Yehowa”!—Mis. 116:1.
WE KUALUULA NAMINYI?
-
We kupatuula bi kifulo kia Yehowa naminyi?
-
Buakinyi we kuikala mushinkamishe’shi Yehowa mmukufule ngofu?
-
Wepushaa naminyi pabitale kifulo kia Yehowa?
LOONO 108 Kifulo kya Yehowa ki na lulamato
a Angi mashina mbeashintule.