Mu wawa muisambo, tubaadi balongie’shi, kui muntu umune e na muulo wi bungi na e na matalua kui bantu boso na kui ba mikeyilu: biobino ngi kutumbisha eshina dikata dia Yehowa. Mu uno muanda wa matalua a kumunana, kuamba’shi Yehowa ngi auku kumunana kalolo, uno ngi umune wa ku muanda wi na muulo ukata. Mu mushindo umune, kululama kua bantu nyi ungi muanda ubaabadi besambile mu uno muanda wi na muulo.

Buakinyi atushimika kasele’shi muanda ukata nguimene p’eshina dia Yehowa na kuiditumbisha? Tubandeyi kutaluula tubingilo tusatu.

Ka kumpala, Satana baadi muluishe eshina dia Yehowa, sunga nkumo yaye, mu efuba dia Edene. Lukonko lubaadi Satana muele Eeva, lubaadi alulesha’shi Yehowa te na kalolo ka kupaana na’shi Mmuelele Adame a Eeva miya ibukopo. Satana baadi mutombokiele mayi abaadi Yehowa muakule, mu binybinyi baadi muambe’shi Efile Mukulu nsha madimi. Baadi musabuule eshina dia Yehowa. Na aye nkufika “diabulu,” abilesha’shi nsha “madimi.” (Yo. 8:44) Pa muanda wa’shi Eeva baadi mukumiine madimi a Satana, baadi mukutue kukokiela Efile Mukulu, na aye nkutombokiela matalua a kumunana a Efile Mukulu. (Kib. 3:1-6) Mu ano eetu mafulu, Satana ki’atungunuka na kusabulusha eshina di’Efile Mukulu, pa kupalakasha mianda ya madimi pabitale bu muntu bua Yehowa. Boso abakumiina ano madimi, bakuete kunyinsha kupela kukookiela Yehowa. Bua muilo w’Efile Mukulu, kusabulusha eshina dia Yehowa dia kishila muanda wibubi bukile wa kukutua kululama. Ngi nsulo ya makienga na mianda yooso i bubi i mu nsenga.

Ka kabidi, bua kukuasha bipangua biaye bioso, Yehowa mmuate kistshibilo kia kukaluila nkumo y’eshina diaye, na kuidisuula ku mianda yoso ya madimi yabadi bamudimbiile. Uno ngi muanda wi na muulo ukata bua Yehowa. Bakuile’shi: “Naleesha bwiselele bwa eshina dyande dikata.” (Es. 36:23) Na Yesu baadi muleshe patooka’shi, kintu ki na muulo ukata mu nteko ya bafubi boso ba sha lulamato ba Yehowa, mpa bambile’shi: “Eshina dyobe dyende ntumbo.” (Mat. 6:9) Bible ashimika kasele misuusa na misuusa pabitale muulo wa kutumbisha eshina dia Yehowa. Tubandeyi kutala tuno tu bileshesho tupeela tua mu Bible: “Paayi Yehowa ntumbo y’eshina diaye.” (1 Mya. 16:29; Mis. 96:8) “Imbayi ngono ya kutumbisha nayo eshina diaye.” (Mis. 66:2, NWT) ‘Nakatumbisha eshina dyobe bwa looso.’ (Mis. 86:12) Umune wa ku misuusa ubaadi Yehowa muakule aye nabene kukatukila muiyilu, mpa baadi Yesu mu ntempelo a mu Yelusaleme pabakuile’shi: “Yaya, tumbisha eshina diobe.” Yehowa namu bamualulule’shi: “Ne muiditumbishe na nakeditumbisha dingi.”—Yo. 12:28. a

Ka kasatu, mpango ya Yehowa aikalaa misuusa yoso ipushene n’eshina diaye, sunga nkumo yaye. Tubandeyi kutala kunyima kua kitompuanga kia nfudiilo, ku nfudiilo a bipua kinunu bia kumunana kua Nkidishitu nkinyi akikakitshika? Ba mikeyilu na bantu abakapusha naminyi pabitale kutumbisha eshina  dia Yehowa mu kiakia kupungo? Bua’shi lualuulo ku luno lukonko luitukuashe, tubandeyi kutentekiesha mianda ibidi yabadi bakuile pabitale uno muanda, kululama kua bantu na matalua a kumunana akile a bantu boso. Bantu beleshe’shi mbashale na lulamato abakatungunuka na kupeta nkalakashi ayitompo lulamato luabo su? Nya. Abakekala bapuidikie na babakambila bitompuanga bioso. Abakapete muwa wa ikalaika. Bantu na ba mikeyilu abakatungunuka na kuisambila pabitale matalua a kumunana akile ooso, na kuiabulushena munkatshi muabo su? Nya. Mu kiakia kipungo, bipangua bioso bi muiyilu na pa nsenga abikekala mu buumune na bikakumiine bukunkushi bua Yehowa. Kadi abikekala naminyi pabitale eshina dia Yehowa?

Mu kiakia kupungo muntu ooso akauku bia binyibinyi pabitale Yehowa n’eshina diaye adikeende ntumbo bua losoo. Na dingi, Yehowa akatungunuka na kupasukila bafubi baaye basha lulamato be muiyilu na be pa nsenga. Buakinyi? Muanda abakamono Yehowa bia katungunuka na kukita bintu bia kukaanya. Tutaleyi uno muanda: Bu Yesu biakaluisha Yehowa matalua ooso a kumunana na kuiyisha kooso, Efile Mukulu akekala “panundu a bintu bioso na kui muntu oso.” (1 Ko. 15:28) Kunyima kua biabia, bantu boso be pa nsenga abakekala na muloo wa “bulungantu bua ntumbo ya bana b’Efile Mukulu.” (Lom. 8:21) Na Yehowa akalombasha mpango yaaye ya kuikasha kifuko kimune, ki mu buumune kia bana baaye be muiyilu na be pa nsenga.—Ef. 1:10.

Kunyima kua ino mianda yoso kukitshika, kifuko kia Yehowa kia bana baaye be muiyilu na be pa nsenga abakepusha naminyi? Kushi mpaka atukatungunuka na kuikala na lukalo lui bukopo lua kutumbisha eshina dia Yehowa. Kayimba ka misambo Davide baadi muyokielue bafundile’shi: “Yehowa Efile Mukulu eende ntumbo . . . Eshina dyaye dya kineemo ditumbishibwe losoo.” (Mis. 72:18, 19) Biabia atukatungunuka na kupeta mianda ipia na tubingilo tui buwa tua kutumbisha eshina dia Yehowa bua losoo.

Eshina dia Yehowa adikalesha mianda yooso pa bimutale. Bua binobino dingi, eshina diaye adituntentekiesha bi kifulo kiaye. (1 Yo. 4:8) Atukatungunuka na kutentekiesha misuusa yooso’shi Yehowa muitupangie ku kifulo kiaye. Na kiakia kifulo ngi kimutakule buadia kuitupa nkuulo. Na dingi kiakia kifulo nkileshe’shi mushindo waye wa kumunana ngululame. Biabia atukutungunuka na kupusha bi kifulo kia Yehowa kuatudi bua losoo. Atukefubuila kuadi bu Nshetu na kuyimba ngono ayitumbisha eshina diaye bua losoo.—Mis. 73:28.