1. Mmushindo kinyi ubaadi Yehowa munyingishe bafubi baye baasha lulamato ba kala?

 MISUUSA i bungi, Eyi di’Efile Mukulu adileshaa bantu baasha lulamato bu be bukome. Sunga baaba abamueka’shi be na bukome ngofu munkatshi muabo, kadi misuuso yoso t’abepushaa nka na bukome nya. Bu kileshesho, ungi musuusa Nfumu Davide bapushiishe’shi baadi ‘mukankamishibue nka bu ngulu,’ anka angi mafuku ‘mô ukata ubamukuatshile.’ (Mis. 30:​7, EEM) Kikudi ki’Efile Mukulu ngi kibaadi akipa Samesone bukome bua mbidi bui bungi, anka Samesone baadi awuku’shi kushi bukome bu’Efile Mukulu, akekala na ‘bukome bupeela nka bi muntu êse yawa.’ (Bans. 14:​5, 6; 16:​17, EEM) Baaba bana balume baasha lulamato babaadi na bukome nka penda muanda wa’shi Yehowa ngi baadi ebapa buanka.

2. Buakinyi Mpoolo mutumibua akula’shi baadi na mianda ibidi, kubofula na bukome? (2 Bena Kodinda 12:​9, 10)

² Mpoolo mutumibua baadi awuku’shi n’aye namu baadi na lukalo lua bukome abufiki kui Yehowa. (Badika 2 Bena Kodinda 12:​9, 10.) Nka bu be bungi ba kuatudi, Mpoolo baadi mukuatshikie na mikumbo i bungi. (Nga. 4:​13, 14) Ingi misuusa, bibaadi abimuelela mpaa na bukopo bua kukita mianda ilulame. (Lom. 7:​18, 19) Na ingi misuusa namu baadi enyongola na kupusha moo bua kilombene kumufikila. (2 Ko. 1:​8, 9) Anka, pa baadi Mpoolo mubofule ngi pa baadi na bukome. Mmushindo kinyi? Yehowa baadi apa Mpoolo bukome bubaadi nabo lukalo, bua kunyingiila nkalakashi ibaadi apete.

3. Nkonko kinyi y’atukataluula mu uno muisambo?

³ Yehowa mmuitule’shi etupa bukome n’atue namu. (1 Mp. 5:10) Anka ta tui balombene kupeta buabua bukome su ta tui bekitshishe atue banabene. Tubande kuata kileshesho, motere ngulombene kupa mootoka bukome bua kuenda. Biabia, abitungu’shi atambusha ashine pa axeleratere bua kuenda mbalo yoso y’akumiina.  Mu mushindo umune, Yehowa e kuanka bua kuitupa bukome buatudi nabo lukalo, kadi abitungu tukite matabula bua kuibupeta. Yehowa mmuitupe kinyi bua kuitunyingisha? Na abitungu tukite kinyi bua kupeta buabua bukome? Atukapete ngaluulo ku ino nkonko, p’atuende na kulonga mushindo ubaadi Yehowa munyingishe bantu basatu ba mu Bible: Mutemuki Yona, Madiya nyinaye na Yesu, na Mpoolo mutumibua. Mu mushindo umune, atukamono biki’abitungunuka Yehowa na kunyingisha bafubi baye lelo uno.

4. Tui kupeta bukome abufiki kui Yehowa naminyi?

⁴ Mushindo umune watudi balombene kupeta bukome abufiki kui Yehowa, mpa kuifubuila kuadi mu luteko. Yehowa p’aluula ku nteko yetu, mmulombene kuitupa “bukome bukile bua mafuku oso.” (2 Ko. 4:7) Tui kuikala dingi na bukome p’atubadika Eyi diaye na kunangushena ku bi’atubadika. (Mis. 86:11) Mukandu wa Yehowa wi mu Bible “wi na bukome” kuatudi. (Eb. 4:12) Nsaa y’otekie Yehowa na kubadika Eyi diaye, okapete bukome boodi nabo lukalo bua kunyingiila, kulama muloo oobe, na kulombasha midimo i bukopo. Tala bibaadi Yehowa mupe mutemuki Yona bukome.

5. Buakinyi mutemuki Yona baadi na lukalo lua kunyingishibua?

⁵ Mutemuki Yona baadi na lukalo na bukome. Baadi na moo wa kuenda mbalo ibaabadi bamutume kui Yehowa, ngi aye nkukaamina mu buato bu baadi abuende ingi mbalo. Pa muanda wa bino, aye na bantu babaadi nabo mu buato babaadi peepi na kufua pa muanda wa kipapi kikata. Nsaa ibaabadi bamuase mu meema, Yona nabene baadi muisangane mu mbalo ya sha fikile kashaa, munda a mushipa ukata mui mufito wi moo. We kunangushena naminyi pabitale bibaadi Yona epusha? Kia kumpala bapetele binangu bia’shi afuila munda a wawa mushipa. Baadi muiyipushe’shi Yehowa bamusumbushena su? Yona baadi muinyongole ngofu.

6. Muyile mukanda wa Yona 2:​1, 2, 7, nkinyi kibaadi kinyingishe Yona pa baadi munda mua mushipa?

⁶ Yona bakitshiine kinyi bua kupeta bukome pa baadi bupenka muamua munda mua mushipa? Batekiele Yehowa. (Badika Yona 2:​1, 2, 7.) Sunga mbibaadi Yona mukutue kukookiela Yehowa, baadi muilangie muishimba na apeta lukumiino’shi Yehowa mmulombene kumuteemesha ku luteko luaye. Yona baadi dingi munangushene ku Bifundue bibaadi mubadikie kala. Buakinyi atuamba biabia? Muanda luteko luaye ndufundibue mu mukanda wa Yona shapitre 2, bishima bi bungi bi muanka bi mumune na bi’atusangana mu mukanda wa Misambo. (Bu kileshesho, puandikisha mukanda wa Yona 2:​2, 5 na wa Misambo 69:1; 86:7.) Abimueka patooka’shi Yona baadi muwukie bino bifundue kalolo. Na pa baadi anangushena pabitale biabia bifundue mu kipungo kiaye kia malua, baadi mushinkamishe’shi Yehowa mmulombene kumukuasha. Yehowa baadi mupaashe Yona, na kunyima Yona baadi na bukidi bua kukumiina kukita midimo yoso ibabamupeele kui Yehowa.—Yon. 2:10–3:4.

7-8. Mukuetu mulume a mu Taïwan baadi mupete kunyingishibua pa baadi mu nkalakashi naminyi?

⁷ Kileshesho kia Yona ki kuitukuasha p’atufumankana na nkalakashi ilekeenelekeene. Bu kileshesho, mukuetu Zhiming, b a mu Taïwan, bakatuka mu kukumba mikumbo i bukopo. Kukatusha biabia, mmunyingiile mushikua wi bukopo wa bena kifuko naye pa muanda wa lukumiino luaye mui Yehowa. Mmunyingishibue na Yehowa kukiila ku luteko na mu kuilongiela. Amba’shi: “Ingi nsaa, apatukaa muanda, napushaa kenyongoshi, akankutshishuaa bia kuishinka bua kuibadikila.” Sunga mbiabia, mmukulupile nka mu bukuashi bua Yehowa. Amba  dingi’shi: “Kia kumpala, nelaa luteko kui Yehowa, dingi nateemeshaa ngono ya Bufumu mu telefone ande. Ingi nsaa, neyiyibaa n’eyi dikie na abinkuashaa bua kulama butaale bua mu binangu. Akupu, nabanga kuilongiela.”

⁸ Kuilongiela kua pa bupenka nkunyingishe Zhiming mu mishindo ya kukaanya. Bu kileshesho, pa baabadi abakiebe kumubaala bua mukumbo ukata ubaadi nao, munganga bamulunguile’shi te na globile imonga i bungi nya, abitungu kumuela mase. Bufuku bua kumpala kua’shi bamubaale, Zhiming baadi mubadikie muisambo wa ungi mukuetu mukashi abaabadi babaale nka uno mukumbo umune. Globile imonga ya uno mukuetu mukashi ibaadi ipeela kukila ya mukuetu Zhiming; kadi, yawa mukuetu mukashi ta baadi mukumiine’shi bamuele mase nya, anka baadi mupande. Uno muanda wa mukuetu mukashi ubaadi unyingishe lulamato lua Zhiming.

9. Su omona’shi lukalakashi lubakubofusha we kukita kinyi? (Tala dingi kifuatulo.)

⁹ Poodi mu bitompuanga, opushaa namu n’obe tuinyongishi tua kulungula Yehowa mianda yobe yoso pa butooka mu luteko su? Opushaa’shi we mukookie bua kuilongiela? Tentekiesha’shi Yehowa awuku muanda oobe kalolo. Sunga wela luteko luipi, shinkamiisha’shi Yehowa akakupa nka kiakia kiodi nakio lukalo. (Ef. 3:20) Su opusha’shi mbidi yobe na binangu biobe mbikookie, na’shi bi bukopo bua kuibadikila na kuilongiela, we mulombene kuteemesha Bible abadi bakobole sunga mikanda ayakuila Bible ikobolue. Bi nkukuasha dingi p’oteemesha ingi ngono yetu sunga kubandila video mu jw.org. Yehowa akumiina kuitunyingisha, na akitshi biabia p’atumutekie na kukimba ngaluulo ya nteko yetu mu Bible na mu mikanda yakuete kuitutushiisha.

10. Mmushindo kinyi awitunyingishaa bakuetu balume na bakashi?

¹⁰ Yehowa mmulombene kufubisha bakuetu balume na bakashi bua kuitunyingisha. Mbalombene kuikala bu “nsulo ya kuitunyingisha” nsaa y’atufumankana na muanda sunga y’atuikitshisha bua kulombasha mudimo wi bukopo. (Kol. 4:​10, 11) Tui na lukalo na ba kuuku bikishekishe mu “kipungo kya mpombo.” (Nki. 17:17) P’atuipusha babofule, bena Nkidishitu netu  mbalombene kuitukuasha ku mbidi, mu binangu, na mu kikudi. Tutaleyi bibaabadi banyingishe Mariya nyinaye na Yesu, kui bangi.

11. Buakinyi Mariya baadi na lukalo lua kunyingishibua?

¹¹ Mariya baadi na lukalo na kunyingishibua. Banda kunangushena bibaadi mulombene kupusha kunyima ku’aye kupeta mukandu ubaabamulunguile kui muikeyilu Gabriele. Ta baadi muibakilue nya; kadi, baadia kuimita. Ta baadi awuku bia kukusha bana aye nabene nya, anka baadi mupasukile muana mulume baadi na kia kufika Mesiya. Na ta baadi mubande kulaala na muana mulume nya, mmushindo kinyi ubaadia kupatuluila Yosefe baadi amuyiila ino mianda yoso?—Luk. 1:​26-33.

12. Muyile mukanda wa Luka 1:​39-45, Mariya baadi mupete kunyingishibua kubaadi nako lukalo naminyi?

¹² Mariya baadi mulombene kupeta kunyingishibua kubaadi nako lukalo bua kulombasha mudimo ukata ubaadi mupete naminyi? Baadi mukulupile’shi bangi abamukuasha. Bu kileshesho, bayipuishe muikeyilu Gabriele buadia kumupatuluila mianda yoso pabitale wawa mudimo. (Luk. 1:34) Kunyima kua paapa, Mariya bayile mu luendo “ku eumbo dia ku miengie” dia ku kibundi kia mu Yudeya bua nkatembela mukuabo mukashi Elizabete. Luno luendo lubaadi buwa bukile. Elizabete baadi mutumbule Mariya n’ayokielua na Yehowa bua kunyingisha Mariya pabitale butemuki bua muana mulume akatanda. (Badika Luka 1:​39-45.) Mariya bakuile’shi Yehowa “bakitshi mianda ya bukome na mboko yaye.” (Luk. 1:​46-51) Kukiila kui Gabriele na Elizabete, Yehowa baadi munyingishe Mariya.

13. Nkinyi kibakitshikile pa batekiele mukuetu mukashi bukuashi kui bakuabo balume na bakashi bena Nkidishitu?

¹³ Nka bu Mariya, n’obe namu we kunyingishibua kui bena Nkidishitu nobe. Dasuri mukuetu mukashi a mu Bolivie, baadi na lukalo lua kuno kunyingishibua. Nsaa ibabakuatshile nshaye na mukumbo wi bukopo na ushi bia kupua, Dasuri baadi mukumiine kuata bushito bua kupasukila nshaye. (1 Ti. 5:4) Kadi ta bibaadi bibofule nka musuusa ooso nya. Amba’shi: “Misuusa i bungi naadi nepusha’shi ntshi mulombene kutungunuka na kumupasukila.” Baadi mutekie bukuashi su? Ku mbangilo ta baadi atekie bukuashi nya. Apatuula’shi: “Ntshi naadi nakumiina kunyenyeka bakuetu balume na bakashi bushito bisumanga nya.” Kadi “Naadi nanangushena’shi: ‘Nka Yehowa ngi akampa bukuashi buandi nabo lukalo.’ Anka nafikile mu kumona’shi pa muanda ntshi mukimbe bukuashi bua bangi, naadi nekitshisha bua kuipuila mianda yande ami nabene.” (Nki. 18:1) Ngi buakinyi Dasuri batshile kitshibilo kia kufundila ba kuuku baye tu mayi tupeela bua kuibapatuluila bi muanda waye. Amba’shi: “Ntshi bia kubadika mianda yabadi bankitshiine kui bakuetu bena Nkidishitu bua kunyingisha nya.” Amba dingi’shi: “Babaadi abantuadila bidibua ku lupitaalo na kumbadikila ma verse. Bi muloo ukata wa kuuka’shi ta tui bupenka. Atue booso tui mu kifuko kikata kia Yehowa, kifuko akikumiina nkukuatshishena, kudila n’obe na nkunyingisha bua kutungunuka na kufubila Yehowa pamune n’abo.”

14. Buakinyi abitungu tukumiine bukuashi abutukila kui bakulu?

¹⁴ Mushindo umune awitunyingishaa Yehowa nku bukuashi bua bakulu. Abo ngi bekale bia buntu bia kuete kufubisha bua nkunyingisha na nkukankamika. (Yesh. 32:​1, 2) Biabia, poodi na tuinyongoshi lungula bakulu. Nsaa y’abakupa bukuashi ebukumiine na muloo ooso. Kukiila kuabadi Yehowa mmulombene nkupa bukome.

15. Bena Nkidishitu booso be na lukulupilo kinyi?

¹⁵ Lukulupilo luetu luimeene mu Bible, ndulombene kuitupa bukome bui bungi. (Lom. 4:​3, 18-20) Bangi bena Nkidishitu be na lukulupilo  lua kuikala na muwa wa losoo muiyilu, kadi bangi namu be na lukulupilo lua kushaala losoo pa nsenga mu mpaladiiso e buwa bukile. Lukulupilo luetu aluitupa bukome bua kunyingiila nkalakashi, kulungula mukandu wibuwa, na kukita ingi midimo mu kakongie. (1 Te. 1:3) Lualua lukulupilo lumune ngi lubaadi lunyingishe Mpoolo mutumibua.

16. Buakinyi Mpoolo mutumibua baadi na lukalo lua kunyingishibua?

¹⁶ Mpoolo baadi na lukalo lua kunyingishibua. Mu mukanda waye ubaadi mufundile Bena Kodinda, aye nabene mmuipuadikishe bu kipulu kia nsenga. Baadi “mufinakashue,” “mukalakashue kuishimba,” “mukiengieshibue,” na “kuponeshua mu nsenga.” Muwa waye ooso ubaadi nka mu masaku. (2 Ko. 4:​8-10) Mpoolo bafundile ano mayi ooso pa baadi mu luendo luaye lua kasatu lua bu misionere. Na kunyima ku’aye kufunda ano mayi, baadi mufumankane na nkalakashi i bungi i bukopo. Baadi mufumankane na buntomboshi bui bukopo, kukuatshibua, kupona na buato mu meema, na kuedibua mu nkano.

17. Muyile mukanda wa 2 Bena Kodinda 4:​16-18, nkinyi kibaadi kinyingishe Mpoolo pa baadi mu nkalakashi?

¹⁷ Mpoolo baadi mupete bukome bua kunyingiila p’aye kutuula binangu biaye ku lukulupilo luaye. (Badika 2 Bena Kodinda 4:​16-18.) Balunguile bena Nkidishitu ba mu Kodinda’shi sunga bu muntu buaye bua paasha bualuila “t’akooko” nya. Mpoolo baadi mutuule binangu nka ku mafuku aaye e kumpala. Lukulupilo luaye lua muwa wa losoo muiyilu lubaadi “alumufuishisha ntumbo ikata ya kukaanya,” kukila lukalakashi looso lubaadi apete. Mpoolo baadi anangushena pabitale luno lukulupilo, na p’aye kukita bino, baadi epusha’shi “bumuntu buaye bua munda abulumbulua kuifuku n’efuku.”

18. Lukulupilo ndunyingishe Tihomir na kifuko kiaye naminyi?

¹⁸ Lukulupilo lua mafuku aafiki lubaadi lunyingishe Tihomir, mukuetu mulume a mu Bulgarie. Kunyima kua bipua bipeela, muina aaye mulume Zdravko, bafuile mu masaku. Angi mafuku kunyima kua lufu lua muina aaye, Tihomir baadi mupete kenyongoshi ke bukopo. Bua kuikakambila, aye na kifuko kiaye babaadi abanangushena  abikekala lusangukilo. Apatuula’shi: “Bu kileshesho, tubaadi atuisambila pabitale bi’atukafumankana na Zdravko, bidibua bi’atukadi naye pamune, akamuitanyina kumpala kuaye ku nshibo nsaa y’akasanguka, na mianda y’atukamulungula itale mafuku a ku nfudiilo.” Tihomir amba’shi kutuula binangu ku lukulupilo luabo nkunyingishe kifuko kiaye buakidia kutungunuka na kunyingiila, na kutungunuka na kutengiela kipungo ki’abakasangula mukuabo kui Yehowa.

19. Abitungu okite kinyi bua kunyingisha lukulupilo lobe? (Tala dingi kifuatulo.)

¹⁹ We kunyingisha lukulupilo lobe naminyi? Bu kileshesho, su we na lukulupilo lua kushaala pa nsenga bua losoo, badika mu Bible biabadi baleshe Mpaladiiso na onangushene. (Yesh. 25:8; 32:​16-18) Nangushena abikekala muwa mu nsenga ipia. Epuandikishe obe nabene muanka. Bomono muntu kinyi? Eyi kinyi dibopusha? W’epusha naminyi? Bua kunyiisha kunangushena kalolo, kimba mu mikanda yetu bifuatulo bi na Mpaladiiso sunga kutala mizike i na ma video aamba’shi: Mu nsenga ipia ayifiki, Enka mu bwipi muno, na a’shi Puandikisha nsaa. Su tubashaala bashimate pepoo na lukulupilo luetu lua nsenga ipia, “makienga eetu aekala a kapindi kapeela.” (2 Ko. 4:17) Biabia, bukome bu’abakakupa kui Yehowa, abukakunyingisha.

20. Sunga tuepusha’shi tui babofule, mmushindo kinyi watudi balombene kupeta bukome?

²⁰ Sunga nsaa y’atuipusha babofule, “ku bukuashi bu’Efile Mukulu atupete bukome.” (Mis. 108:​13, NWT) Yehowa mmukupe bintu bioso biodi nabio lukalo bodia kupeta bukome abutukila kuadi. Su we na lukalo na bukuashi bua kulombasha mudimo oobe, kunyingiila lukalakashi, sunga bua kulama muloo oobe, efubuile kui Yehowa mu luteko, omufunguile eshimba diobe, na olonde buludiki buaye p’obe kuilongiela. Kumiina kunyingishibua akufiki kui bakuenu balume na bakashi bena Nkidishitu. Ikala wata nsaa ya kunangushena pabitale lukulupile lobe lua mafuku aafiki. Na dingi, atukekala ‘banyingishibue na bukome booso muyile bukome buaye bua ntumbo buatudia kumona bia kunyingiila mu mianda yoso na luishinko na muloo.’—Kol. 1:11.