1. Mmushindo kinyi watuuku’shi Yehowa akumiina kuifubuila kuatudi?

 YEHOWA etuitamina, buatudia kuifubuila kuadi. (Shak. 4:8) Akumiina kuikala Efile etu, Nshetu na kuuku etu. Alulaa ku nteko yetu na kuitukuasha mu kipungo ki bukopo. Na afubishaa ndumbuluilo aaye bua kuitulongiesha na kuitukaluila. Kadi abitungu tukite kinyi bua kuifubuila kui Yehowa?

2. Tui kuifubuila kui Yehowa naminyi?

² Tui balombene kuifubuila kui Yehowa p’atuele luteko, p’atubadika Eyi diaye, na p’atunangushena ku dianka. Su tubakitshi biabia atulesha’shi tui bamufule na, tukuete kumutumbula. Bino abitutakula mu kumukookiela, na kumupa ntumbo yadi mulombene. (Kibaf. 4:11) Patunyiisha kuuka Yehowa, atunyiisha kumukulupila na kukulupila ndumbuluilo aadi muitupe bua kuitukuasha.

3. Satana kuete kutompa kuitulamuuna kui Yehowa mushindo kinyi, na nkinyi akiketukuasha biatusha kusumbushena Efile Mukulu eetu na ndumbuluilo aaye? (Misambo 31:13, 14)

³ Diabulu kuete kutompa kuituabuula na Yehowa, bikishekishe nsaa y’atufumankana na nkalakashi. Mmayele kinyi afubishaa? Atompaa kubofusha lukulupilo luetu mui Yehowa bipeelabipeela na mui ndumbuluilo aaye. Anka tui kukambila ano mayele aaye. Su lukumiino luetu ndunyingie na lukulupilo luetu namu mui Yehowa alunyingi, na t’atukasumbusheena Efile Mukulu eetu na ndumbuluilo aaye.—Badika Misambo 31:13, 14.

4. Nkinyi kiatukesambila mu uno muisambo?

⁴ Mu uno muisambo atukataluula nkalakashi isatu ilombeene kutukila paasha pa kakongie; lukalakashi looso lua ku ino isatu ndulombene kubofusha lukulupilo luetu mui Yehowa na mui  ndumbuluilo aaye. Ino nkalakashi i kuituabuula na Yehowa mushindo kinyi? Na tui kukita kinyi bua kukambila kuno kuikitshisha kua Satana?

5. Nkalakashi ibukopo i kubofusha lukulupilo luetu mui Yehowa na mui ndumbuluilo Aaye naminyi?

⁵ Ingi nsaa, atupetaa nkalakashi i bukopo, bu kubinguabingua kua mu kifuko sunga kushimisha mudimo wetu. Ino nkalakashi i bukopo i kubofusha lukulupilo luetu mui ndumbuluilo a Yehowa na kuituabuula naaye naminyi? Nsaa y’atunyingiila nkalakashi munda mua kipungo kibula, tui balombene kupusha bu lukulupilo luetu lubabofola na bu babakalakashua mu binangu. Satana afubishaa kino kipungo ki bino, bua’shi tunangushene’shi Yehowa ta mmuitufule. Satana akumina’shi tunangushe’shi Yehowa na ndumbuluilo Aaye, nyi bakuete kuitufuishisha makienga. Uno muanda wi mumune ubaadi ufikile bena Isaleele abaadi mu Ejipitu. Ku mbangilo, babaadi bakumiine’shi Yehowa baadi mutume Moyise na Aarone buadia kuibapoososha mu bupika. (Efi. 4:29-31) Anka kunyima, nsaa ibebakiengeshele Faraone, babaadi batopekie Moyise na Aarone’shi nnabo abebafuishisha nkalakashi yaabo, bebalungula’shi: ‘Pa muanda wenu Faraone na bafubi bê babetushikwa, bi nka bu’nwe babebapa lupete lwa ngoshi bwabadya kwitwipaa.’ (Efi. 5:19-21, EEM) Babatopekiele bafubi b’Efile Mukulu baasha lulamato. Uno muanda ubaadi bubi ngofu! Su okuete kunyingiila lukalakashi luibukopo, munda mua kipungo kibula, mmushindo kinyi oodi mulombene kunyiisha kukulupila mui Yehowa na mui ndumbuluilo aaye?

6. Nkinyi kibatulongiela kui mutemuki Abakuke pabitale mushindo wa kunyingiila nkalakashi i bukopo? (Abakuke 3:17-19)

⁶ Funguila Yehowa eshimba diobe mu nteko, na okimbe bukuashi buaye. Mutemuki Abakuke baadi mupete nkalakashi i bukopo ibungi. Angi mafuku, baadi mubangie kuikala na mpaka’shi Yehowa ta mupasukilaa, anka baadi mulungule Yehowa bi’epusha mu luteko. Bambile’shi: “Obe Yehowa, kasha nabanga kwidila bukwashi kodi, a okampushîsha pa kipindji kinyi? . . . Mmwanda kinyi okwete kutadîla kuno kumweshana kwa malwa?” (Aba. 1:2, 3, EEM) Yehowa baadi mualuule ku luteko alutuukila kuishimba lua mufubi aye sha lulamato. (Aba. 2:2, 3) Kunyima kua Abakuke kunangushena ngofu pabitale mushindo ubaadi Yehowa mupashe muilo waye, bapatele dingi muloo. Baadi mushinkamishe dingi’shi, Yehowa kuete kumupasukila na amukuasha bua kunyingiila lukalakashi looso lualua. (Badika Abakuke 3:17-19.) Bino abitulongiesha kinyi? Nsaa y’opete nkalakashi i bukopo, teka Yehowa na omulungule bi’epusha. Akupu okimbe bukuashi buaye. Su bokitshi bino, okashinkamisha’shi Yehowa akakupa bukome bodi nabo lukalo bua kunyingiila. Na nsaa yomono bia kukuasha, lukumiino lobe luadi alunyisha kunyinga.

7. Mukuabo na Shirley baadi mutompe kumukuminyisha kinyi, na nkinyi kibaadi mutungunuke na kukita bua kupela kushimisha lukulupilo mui Yehowa?

⁷ Lama biubishi biobe bia mu kikudi. Tala kulama biubishi bia mu kikudi bibakudi kukuashe mukuetu mukashi Shirley, a mu Papouasie-Nouvelle-Guinée, nsaa ibaadi mupete nkalakashi i bukopo. b Kifuko kia Shirley kibaadi kilanda, ingi nsaa, babaadi abakutua mushindo wa kupeta bidibua. Mukuabo mulume baadi mutompe kubofusha lukulupilo luaye mui Yehowa. Bambile’shi: “Anuakula’shi nui na kikudi kiselele ki’Efile Mukulu akinukuasha, kadi bukuashi buakio buikunyi? Kifuko kienu ki nka kilanda. Anukisha nsaa yenu bisumanga mu mudimo wa bulungudi.” Shirley amba’shi: “Nadi muiyipushe’shi:  ‘Efile Mukulu kuete kuitupasukila su te tupasukila?’ Nadi mukite nka paapa luteko kui Yehowa, n’ami nkumulungula bioso binadi nabio mu binangu biande. Ntshi mulekie kubadika Bible na mikanda yetu, na kutungunuka na kulungula mukandu wibuwa na kutuela mu bisangilo.” Mu kapindi kapela, babangile kumona’shi Yehowa kuete kupasukila kifuko kiaye. Kifuko kiaye takibaadi na nsala, kibaadi nka na muloo. Shirley abamba’shi: “Nadi mupushe bi Yehowa aluula ku nteko yande.” (1 Tim. 6:6-8) Su boshaala nka na biubishi bia mu kikudi, noobe namu tokatadiila nkalakashi i bukopo sunga mpaka ikuabuule na Yehowa.

8. Nkinyi kilomene kufikila bakuetu be na mashito mu ndumbuluilo a Yehowa?

⁸ Kukiila ku bisaashi na mu internete, beshikuanyi betu bakuete kupalakasha mianda ya madimi pabitale bakuetu bena mashito mu ndumbuluilo a Yehowa. (Mis. 31:13) Bangi bakuetu bakuete kuibakuata na kuibadimbiila mianda’shi mbatomboshi. Bena Kidishitu ba mu Siekele a kumpala, babaadi bapete namu mianda nka i biabia nsaa ibaabadi bakuate Mpoolo mutumibua na kumudimbiila mianda ibubi. Babakitshine kinyi?

9. Bangi bena Kidishitu babakitshine kinyi nsaa ibaadi Mpoolo mutumibua mu lukano?

⁹ Bangi bena Kidishitu ba mu siekele a kumpala, babaadi balekie kukuatshishena Mpoolo mutumibua nsaa ibaadi mu lukano ku Loma. (2 Tim. 1:8, 15) Buakinyi? Babaadi na buufu muanda bantu be bungi abaadi abamono Mpoolo bu ntomboshi su? (2 Tim. 2:8, 9) Sunga’shi babaadi abebakitshisha ku bukopo, abo namu batshinanga’shi tala bebabingabinga? Pangi babaadi na kabo kabingilo, nangushena mushindo ubaadi ulombene kupusha Mpoolo. Baadi munyingiile nkalakashi i bukopo na kutuula mpa na muwa waye mu masaku pa muanda wabo. (Bik. 20:18-21; 2 Kod. 1:8) Ta tuikalanga bu bano bantu abaadi basumbushene Mpoolo mu kipungo kibaadi na lukalo na bukuashi! Nkinyi kiatudia kulamiina mu binangu nsaa y’ababingabinga bakuetu balume be na mashito?

10. Nkinyi kiatudi balombene kutentekiesha nsaa yababingabinga bakuetu balume be na mashito, na buakinyi?

 ¹⁰ Tentekiesha buakinyi bakuete kuitubingabinga na benyi abebikitshi. Mukanda wa 2 Timote 3:12 awamba’shi: “Biabia, baaba boso abakiebe kuikala balamate kui Efile Mukulu mu buumune na Kidishitu Yesu abakabinguabingua.” Ta tui balombene kukaanya’shi Satana, nyi kuete kuluisha bano bakuetu be na mashito. Kepatshila kaye nka’shi, yaaya ngoshi yaaye ibofushe lulamato luetu, na etutshinyishe.—1 Mp. 5:8.

11. Kileshesho kia Onesifore kibetulongiesha kinyi? (2 Timote 1:16-18)

¹¹ Tungunuka na kukuatshishena bakuetu balume na kushaala na lulamato kuabadi. (Badika 2 Timote 1:16-18.) Mungi muina Kidishitu a mu siekele a kumpala abaabadi abetanyina bu Onesifore bakitshine bilekeene na bangi, nsaa ibaadi Mpoolo mutumibua mu lukano. ‘Tamupushe lukano luande [Mpoolo] na mioshi yande bufu nya. (Kilomeno kipya 2014)’ Biabia Onesifore bakimbile Mpoolo, na nsaa ibamupetele bamukuashishe na biabia bibaadi nabio lukalo. Nsaa ibakitshine Onesifore bino, baadi mutuule muwa waye aye nabene mu masaku. Bino abitulongiesha kinyi? T’abitungu tutadiile moo wa bantu wabakuete kuitutshinyisha nao witukutshishue bua kukuatshishena bakuetu ba bakuete kubingabinga nya. Pamutue pa biabia, tuibakaluileyi na kuibakuasha. (Nki. 17:17) Be na lukalo na kifulo na bukuashi buetu.

12. Kileshesho kia bakuetu balume na bakashi ba mu Russie, kibetulongiesha kinyi?

¹² Tutaleyi bakuetu balume na bakashi ba mu Russie biabakuete kukuasha bakuabo abakuatshibua mu nkano. Nsaa i bangi mu nkalakashi, bakuetu balume na bakashi be bungi bakuete kuenda ku tumiladi bua nkebakuatshishena. Bino abitulongiesha kinyi? Nsaa y’abakuete, kudimbiila, sunga kubingabinga bakuetu be na mashito, bino t’abitutshinyishanga. Ebatekiele, opasukile bifuko biabo, na okimbe ungi mushindo wa kuibalesha’shi webakuatshishena.—Bik. 12:5; 2 Kod. 1:10, 11.

13. P’abetuisha milongo, bikubofusha lukupilo luetu mui Yehowa na mui ndumbuluilo aaye naminyi?

¹³ Bena kifuko netu, bena mudimo netu na bena kalasa netu bashi Tumonyi tua Yehowa, abetuisha milongo muanda wa mudimo wetu wa kulungula mukandu wibuwa, na’shi muanda tui na nshalelo muipushene na mayi a kulonda a Yehowa. (1 Mp. 4:4) Be kuamba pangi’shi: “Ne muinufule nka bu bantu boso, anka kipuilo kienu ki na miiya ikilekile bukopo, kui ingi mianda yanush’abauku.” Bangi be kuituipula bua mushindo watukitshina bantu batushibue mu kakongie mianda, bamba’shi: “Mushindo kinyi wanudi balombene kuamba’shi nuibefuleene?” Ino mianda i kuitutakula mu kuiyipusha atue nabene su miiya ya Yehowa ilulame. Tui kubanga kuiyipusha’shi: ‘Yehowa antekaa mianda ibungi su? Ndumbuluilo aaye, e na miiya i bukopo su?’ Su bofumakana na muanda wi bino, mushindo kinyi odia kuifubuila kui Yehowa na kui ndumbuluilo aaye?

14. Tuikukita kinyi nsaa ibangi abetuisha milongo muanda tui na nshalelo muipushene na mayi a kulonda a Yehowa? (Misambo 119:50-52)

¹⁴ Tungunuka na kukita kiakia akiamba Yehowa’shi nkilulame. Yobo baadi muntu baadi alondo mayi a kulonda a Yehowa sunga bibaabadi abamuisha milongo p’aye kuibikita. Umune a ku baaba bababaadi abetanyina bu ba kuuku ba Yobo, baadi mutompe kumukuminyisha’shi Efile Mukulu takuete kumupasukila, muanda Yobo takuete kukita mianda ilulame. (Yob. 4:17, 18; 22:3) Anka Yobo baadi mupele kukumiina ano madimi. Baadi muukie’shi mayi a kulonda a Yehowa a kibuwa na kibubi ngalulame, na baadi na kitshibilo kia kushala mulamate nka ku anka. Ta mulekie bangi  buabadia kumukutshishua kululama kuaye. (Yob. 27:5, 6) Bino abitulongiesha kinyi? Tatutadiilanga abetuisha milongo betutakula mu kuiela nkonko pabitale mayi a kulonda a Yehowa. Banda kunangushena pabitale mianda ipue nkukitshikila obe nabene mu nshalelo oobe. Tomuene namu misuusa ibungi’shi mayi a kulonda a Yehowa ngalulame na ngakukuashe su? Ikala na kitshibilo kia kukuatshishena ndumbuluilo kuete kuitupa yaya miiya. Sunga bantu be bungi betuisha milongo naminyi, tatulekielanga bua’shi betuabuule na Yehowa.—Badika Misambo 119:50-52.

15. Buakinyi abaadi bayishe Brizit milongo?

¹⁵ Tutaleyi kileshesho kia Brizit, mukuetu mukashi a mu Inde. Babaadi bamuishe milongo kui bantu ba mu kifuko kiaye pa muanda wa lukumiino luaye. Anka mu kapindi kapela kunyima kua lubatshisho luaye mu 1997, mulume aye shi baadi kamonyi ka Yehowa, baadi mushimishe mudimo waye. Nyi buakinyi baadi muate kitshibilo kia’shi, Brizit, na tu nsonguakashi tuabo bafilukie mu Inde, bende kui baledi baabo mu kingi kibundi. Anka Brizit, baadi mulombene kupeta nkalakashi i bukopo, muanda mulume aye tabaadi na mudimo, Brizit baadi mulombene kufuba nsaa yoso bua kukuatshishena kifuko kiaye. Kukatusha biabia, kakongie kabaadi pepi na mbalo ibaadi mushaale kabaadi mu kilometele 350. Muanda wa malua, kifuko kia mulume aye kibaadi kibangie kumubingabinga muanda wa lukumiino luaye. Kumubingabinga kubaadi kufikie kui bukopo na kuibubi ngofu, kifuko kia Brizit nkufiluka dingi. Dingi, mulume aye bafuile mu kipaso kia kukaanya. Ka nsonguakashi kabo ka bipua 12 kabafuile na maladi a kansere. Mianda ibaluikile ngofu, bakuabo na Brizit nkubanga kumutopeka bua ino nkalakashi yoso. Abo nkubanga kumuamba’shi su tamuikale Kamonyi ka Yehowa, ino mianda yoso tayibadia kumukitshikila. Anka baadi nka mutungunukie na kukulupila mui Yehowa na kushaala mulamate ku ndumbuluilo aaye.

16. Mushindo kinyi upete Brizit miabi p’aye kushaala mulamate kui Yehowa na kui ndumbuluilo aaye?

¹⁶ Kubanga nka paapa, Brizit baadi muende kula na kakongie. Mukunkushi a kifunda baadi mumunyingishe buadia kulungula mukandu wibuwa mbalo y’adi mushaale na kukunkusha bisangilo mu nshibo yaye. Ku mbangilo, baadi  mutshobolokie. Anka kunyima baadi mulonde elango dibabamupele kui mukunkushi a kifunda. Babangile kulungula mukandu wi buwa, kukunkusha bisangilo mu nshibo muaye, na kukimba nsaa ya kukunkusha lulanguilo lua mu kifuko na bana baye bakashi. Mbipeta kinyi bibatukile? Brizit bapetele ngobesha ya kubanga kulonga Bible na bantu be bungi, na be bungi ba ku balongi baye abaadi babatshishibue. Mu kipua kia 2005, Brizit babangile mufobo wa bu mbala-mashinda bua mieshi yoso. Lukulupilo luaye mui Yehowa, na lulamato luaye kui ndumbuluilo aaye kubaadi kufutshibue. Bana baye bakashi bakuete kufubila Yehowa na lulamato loso, na binobino, mu kiakia kibundi tamudi tukongie tubidi. Brizit mmushinkamishe’shi Yehowa mumupe bukome bua kunyingiila nkalakashi yaye i bukopo, na kunyingiila dingi kuishibua kua milongo akufiki kui bena kifuko naye.

17. Abitungu tuikale na kitshibilo kia kukita kinyi?

¹⁷ Satana akiebe tukumiine’shi Yehowa etusumbushena patudi na nkalakashi i bukopo, na’shi kukuatshishena ndumbuluilo a Yehowa akuitufuishisha nkalakashi ibungi mu nshalelo eetu. Satana akumiina’shi tupushe moo nsaa y’abandimbiila, y’ababingabinga na kuela bakuetu balume be na mashito mu nkano. Na kukiila mu kuituisha milongo, akumiina’shi lukulupilo luetu mu mayi a kulonda a Yehowa na mui ndumbuluilo Aaye lubofule. Biabia, atuuku mayele oso aadi nao, na tatuibabulakane nya. (2 Kod. 2:11) Biabia tuateyi kitshibilo kia kusumbula madimi oso a Satana, na kushaala na lulamato kui Yehowa na kui ndumbuluilo Aaye. Tutentekieshe’shi Yehowa tan’etusumbushene. (Mis. 28:7) Nyi buakinyi, tatutadiilanga kintu su nkimune ki’etuabuula na Yehowa!—Lom. 8:35-39.

18. Nkinyi ki’atukataluula mu muisambo aulondo?

¹⁸ Mu uno muisambo, tubakatuka mu kumona nkalakashi yatudi balombene kupeta ayituukila paasha pa kakongie. Anka, lukulupilo luetu mui Yehowa na mui ndumbuluilo aaye, ndulombene dingi kotompibua nsaa y’atufumakana na nkalakashi ayituukila mu kakongie. Mmushindo kinyi watudi balombene kukambila ino nkalakashi? Atukataluula uno muanda mu muisambo aulondo.