1. Nka bu biabidi bifundue mu Mulungudi 7:20, Mfumu Salomone bakuile bia binyibinyi kinyi?

 MFUMU Salomone bafundile’shi: “Mwanda takwi muntu su ngumune mululame bikumbane pa nsenga bwa kukita biibuuwa, kushii kukita mulwisho.” (Mul. 7:20) Bino mbia binyibinyi! Atue booso atukitaa miluisho. (1 Yo. 1:8) Biabia atue booso tui na lukalo lua’shi betufuile lusa kui Efile Mukulu na kui bantu neetu.

2. Su kuuku eetu a p’eshimba etufuila lusa atupushaa naminyi?

² Kushi mpaka, otentekieshaa ingi nsaa iboodi mufiitshishe kuuku oobe a p’eshimba munda. Boodi okumiina’shi nupudishe muanda na’shi nulumbuule kipuano kienu, na dingi boodi mutekie lusa n’eshimba diobe dioso. Bopushishe naminyi nsaa ibaadi ikufuile kuuku oobe lusa? Bobangile kupusha bi buwa? Oolo, obe nkupusha mpaa na muloo!

3. Nkinyi kiatukesambila mu uno muisambo?

³ Atukumiina’shi Yehowa ekale Kuuku eetu a p’eshimba, anka ingi nsaa atukitaa sunga kuakula mianda ayimufitshisha munda. Buakinyi atukumiina kushinkamisha’shi Yehowa akumiina kuitufuila lusa? Nkuilekena kinyi kui pankatshi pa lusa lua Yehowa lu’afuila muntu kampanda na lusa lu’atufuila muntu? Nnanyi mulombene kufuidibua lusa n’Efile Mukulu?

4. Buakinyi tui balombene kushinkamiisha’shi Yehowa e kuanka bua kufuilana lusa?

⁴ Eyi di’Efile Mukulu aditushinkamiisha’shi, Yehowa e kuanka  bua kuitufuila lusa. Nsaa ibaadi Yehowa muileshe aye nabene kui Moyise ku Muengie wa Sinaayi, batumine muikeyilu bua kumulungula’shi: “Yehowa, Yehowa, Efile sha lusa na kalolo, sha kuataa nsungu bukidi muule ndaa na kifulo ki na lulamato na binyibinyi kui binunu bia ntandua afuila bantu lusa ku bilema, kuitombo, na ku miluisho.” (Efi. 34:6, 7, NWT) Yehowa nyi Efile Mukulu sha kalolo na lusa, e kuanka misuusa yoso bua kufuila bankitshishi ba miluisho lusa.​—Ne. 9:17; Mis. 86:15.

5. Muyile mukanda wa Misambo 103:13, 14, bu abituwuku Yehowa kalolo abimutakulaa buadia kuitukitshina mianda naminyi?

⁵ Bu biadi Mupangi eetu, Yehowa auku mianda yoso pa bitutale. Banda kunangushena! Auku muanda ooso pabitale muntu ooso e pano pa nsenga. (Mis. 139:15-17) Biabia mmulombene kumona kukutua kooso kua kupuidika kuatudi bapiane kui baledi beetu. Auku mianda ayitufikilaa mu nshalelo eetu, kikashe bumuntu buetu bino biatudi beekale. Bu abituwuku Yehowa kalolo, abimutakulaa bua kuitukitshina mianda naminyi? Bino abimutakulaa bua’shi etukitshine mianda na lusa.​—Mis. 78:39; badika Misambo 103:13, 14.

6. Yehowa baadi muleshe naminyi’shi e kuanka bua kuitufuila lusa?

⁶ Yehowa mmuleshe’shi e kuanka bua kuitufuila lusa. Yehowa auku’shi pa muanda wa bikitshino bia muntu a kumpala Adame, atue booso tui mu mulua wa muluisho na lufu. (Lom. 5:12) Takubaadi kintu su nkimune kibatudi balombene kukita, kilombene kuituikasha bulungantu atue banabene, sunga muntu su ngumune mulombene kuitupoososha ku muluisho wa ku lufu nya. (Mis. 49:7-9) Anka, Efile Mukulu eetu sha kifulo balesheshe lusa na aye nkuata mpango ya kuituikasha bulungantu. Baadi mukite kinyi? Yowano 3:16 alesha’shi, Yehowa batumine Muana’ye umunenka eleka buadia kufua pa muanda wetu. (Mat. 20:28; Lom. 5:19) Yesu baatshile mbalo yeetu, aye kukienga mpaa na ku lufu, bua kuikasha muntu ooso akumiina muadi mu bulungantu. (Eb. 2:9) Yehowa baadi mukalakashue ngofu p’aye kumona Muana’ye a kifulo afu, lufu lua makienga na lua buufu! Mu binyibinyi, Yehowa tabaadi mulombene kukumiina’shi Muana’ye afue su Ta mukumiine kuitufuila lusa.

7. Mbingi bileshesho kinyi bi mu Bible bia bantu babaabadi bafuile lusa kui Yehowa?

⁷ Mu Bible mui bileshesho bi bungi bia bantu  babaabadi bafuile lusa kui Yehowa. (Ef. 4:32) Muntu kinyi akufikila mu binangu biobe? Pangi bonangushena Mfumu Manasee. Uno muntu e bubi baadi muluishishe Yehowa mu mishindo i bungi bukile, babangile kulanguila b’efile ba madimi. Na kunyingisha bangi buabadia kuibalanguila. Bayipayile bana baye’ye nabene e balambula kui b’efile baba mpagano. Baadi mukatuule mpaa na nkishi ya b’efile ba madimi mu ntempelo a kishila a Yehowa. Bible akula bino pa muanda waye: ‘Baakitshiine myanda ibi ku meeso kwa Yehowa, bamwinyongweshe.’ (2 Mya. 33:2-7) Manasee pabaadi muleshe’shi belanga kuishimba, Yehowa bamufuidiile lusa. Efile Mukulu bamualuishe mpaa na pa muasu waye wa bu mfumu. (2 Mya. 33:12, 13) Pangi we mulombene kunangushena dingi Mfumu Davide baadi mukitshine Yehowa miluisho, aye kukita lusandi mpaa na kuipayishena. Biabia, nsaa ibaadi ilangie Davide kuishimba mu binyibinyi na kutundula bilubilo biaye, Yehowa baadi mu mufuile lusa. (2 Sam. 12:9, 10, 13, 14) Oolo, tui balombene kushinkamisha’shi Yehowa e kuanka bua kufuidishena lusa. Na dingi, nka bu bi’atukebimono ngobesha yaye ya kufuidishena lusa ngilekene ngofu patuiyipuandikisha na ya bantu.

8. Bu bikadikie Yehowa’shi nka aye nyi Nsushi e buwa, bino bi na bukitshishi kinyi ku ngobesha yaye ya kufuilana lusa?

⁸ Yehowa nyi “nsushi a boso be pa nsenga.” (Kib. 18:25, EEM) Nsushi e buwa abitungu ekale apusha miya kalolo. Mu binyibinyi, bino nyi bi Yehowa, muanda kukatusha kuikala bu nsushi, aye ngi mutuushe Miya. (Yesh. 33:22) Ta kui muntu auku ki buwa na ki bubi kalolo bu abiwuku Yehowa nya. Nsushi e buwa abitungu aukie kinyi? Nsushi e buwa abitungu aukie mianda yoso kalolo kumpala kua’shi atshibe kiimu. Biabia Yehowa nyi Nsushi mukile buwa muanda misuusa yoso aukaa mianda yoso kalolo.

9. Yehowa auku mianda kinyi nsaa y’akiebe kuata kitshibilo kia kufuilana lusa?

⁹ Kuilekeena na ba nsushi ba bana ba bantu, Yehowa ekalaa na mpushisho mupuidikie a mianda yoso, na mu muanda ooso w’abamulungula. (Kib. 18:20, 21; Mis. 90:8) Aye t’ayimenaa pa kiakia akimono bana ba bantu sunga kiabapusha nya. Apushaa mu mushindo upuidikie bi bikitshino bia muntu, bi’abikalaa na bukitshishi kueyikahi diadi mupiane kui bamutande, na biabadi bamulongieshe, mbalo yadi mushaale mpaa na biapuandikisha mu binangu. Na dingi, Yehowa auku bi mu mashimba a bantu. Auku kalolo buakinyi muntu bakitshi muanda kampanda. Ta kui kintu kifuame kumpala kua Yehowa su nkimune. (Eb. 4:13) Biabia, Yehowa afuilaa muntu lusa muanda auku mianda yoso kalolo.

10. Buakinyi tui balombene kuamba’shi biimu bia Yehowa misuusa yoso abikalaa nka bilulame na bilombane? (Miiya Ikituulwe 32:4)

¹⁰ Biimu bia Yehowa abikalaa misuusa yoso nka bilulame na bilombane. Aye t’ekalaa na ntondo. Yehowa t’afuilaa muntu lusa muanda wa’shi amueneka e buwa, mpeta, e na muulo sunga’shi e na ngobesha i bungi nya. (1 Sam. 16:7; Shak. 2:1-4) Ta kui muntu mulombene kukitshisha Yehowa kintu su nkimune pa bukopo, sunga kumutshiba milomo nya. (2 Mya. 19:7) Bitshibilo biaye t’ebiataa pa muanda wa nsungu, sunga pa muanda wa biepusha nya. (Efi. 34:7) Kushi mpaka, kiukilo kia Yehowa na kapatupatu kaye ngi bimuikashe bu Nsushi mulombane.​—Badika Miiya Ikituulwe 32:4.

11. Lusa lua Yehowa lui pabualo mushindo kinyi?

¹¹ Bafundi ba Bifundue bia ki na Ebelu babaadi baukie’shi lusa lua Yehowa lui pabualo. Mu ingi mianda, babaadi bafubishe kishima kia ki na Ebelu ki mu ungi mukanda awamba’shi, “kino kishima akilesha nka penda mushindo wi Efile Mukulu afuila bankitshishi ba miluisho  lusa, ta mbekifubishe bua mushindo wi bantu abafuila bantu nabo lusa nya.” Nka penda Yehowa ngi e na matalua a kufuila muntu belanga kuishimba lusa mu binyibinyi. Mbipeta kinyi abitukaa nsaa ayitufuila Yehowa lusa?

12-13. (a) Mmuloo kinyi aupushaa muntu nsaa y’abamufuila lusa kui Yehowa? (b) Mmiabi ya lusa lua Yehowa i bukata bui naminyi?

¹² Nsaa y’atukumiina’shi Yehowa betufuila lusa, atukasangeela “kipungo kia kuikisha,” mpaa na butaale bua mu binangu na kondo k’eshimba katokane. Luno lusa ta ndulombene kufika kui bantu nya, anka ndulombene kufika kui “Yehowa aye nabene.” (Bik. 3:19, NWT) Nsaa ayitufuila, Yehowa lusa alusha dingi netu kipuano naye, anka bu’tue bashakitshine dingi muluisho.

¹³ Biabia, su Yehowa betufuila lusa t’etutopekaa dingi sunga kuitupa kibawe bua muluisho watudi bakite nya. (Yesh. 43:25; Yel. 31:34) Yehowa asumbulaa miluisho yeetu kula “nka bi bula bwi pankatshi pa kutunduka nguba na kupona.” * (Mis. 103:12, Ñono na malango) Nsaa y’atunangushena mushindo wi bukata bua kifulo kia Yehowa, atuikala na lutumbu lui bungi na kumutshina. (Mis. 130:4) Nnanyi abadi balombene kufuila luno lusa alufiki kui Yehowa?

14. Nkinyi kiatudi balongie pabitale kitshibilo kia Yehowa kia kufuila bantu lusa?

¹⁴ Nka bu biatuibimuene, bitshibilo bia Yehowa bia kufuila muntu lusa, ta mbimeene ku bukata bua muluisho sunga bupeela nya. Na dingi, tumuene’shi Yehowa afubishaa kinangu kiaye kia bu Mupangi, na etuelelaa Miya, na bu Nsushi, nsaa y’akiebe kuata kitshibilo kia kufuila muntu mukite muluisho lusa. Mmianda kinyi y’abatalaa kui Yehowa?

15. Muyile Luka 12:47, 48, ungi muanda kinyi w’abatalaa kui Yehowa?

¹⁵ Muanda ukata wi na muulo w’abatalaa kui Yehowa, nkuuka’shi kitshishi a bubi batundula’shi kiadi mukite ki bubi. Yesu baadi mupatuule uno muanda kalolo bu biabebilesha mu Luka 12:47, 48. (Badika.) Nsaa ayata muntu mpango ya kukita kintu kampanda ki’auku’shi Efile Mukulu mmuikipele, kadi bekikitshi yawa muntu, bakitshi muluisho ukata. Yawa muntu, e mu masaku a kukutua kufuidibua lusa. (Mak. 3:29; Yo. 9:41) Abitungu tukumiine muanda ingi nsaa y’atuitopekaa’shi kiakia kintu kiatudi bakite ki  bubi. Tui kuikala na lukulupilo’shi mu uno muanda abetufuila lusa su? Oolo! Bino abitutuala ku ungi muanda dingi wabatalaa kui Yehowa pabitale nsaa y’ata kitshibilo kia kuitufuila lusa.

16. Kuilanga kuishimba akupushisha kinyi, na buakinyi abitungu tuilangie kuishimba su atukumiina’shi Yehowa etufuile lusa?

¹⁶ Ungi muanda wabatalaa kui Yehowa, ngutale kitshishi a bubi belanga kuishimba mu binyibinyi. Kuilanga kuishimba akupushisha kinyi? Kuilanga kuishimba akupushisha “kushintuluka mu binangu, ku muikeelo, na ku bipatshila.” Akulesha kinangu kia muntu etopeka, enyongola bua mianda ibi yekalanga mukite, sunga pabitale mianda i buwa ibadia kukita, kadi yashi mukite. Muntu elanga kuishimba ta mulombene nka penda kuinyongola kuishimba bua mianda i bubi yadi mukite nya, anka mmulombene dingi kuinyongola bua kipuano kiaye na Yehowa kiluikie na akikalanga kimutakule bua kukita yaya mianda yoso i bubi. Tentekiesha’shi Mfumu Manasee na Mfumu Davide booso babidi babaadi bakite miluisho ikata, anka Yehowa baadi muibafuile lusa muanda babaadi belangie kuishimba mu binyibinyi. (1 Bf. 14:8) Oolo, Yehowa akumiina kumona bishinkamiisho abilesha’shi muntu belanga kuishimba, buabadia kumufuila lusa. Anka, t’abitungu penda’shi tupushe kenyongoshi ka muanda sunga ka muluisho watuikalanga bakite nya. Anka, abitungu tuikale belumbuule bua kuibilesha mu bikitshino. * Bino abitutuala mu kutaluula ungi muanda wabatalaa kui Yehowa.

17. Ntentekieshi nkinyi, na buakinyi bi na muulo buatudia kuleka kukita dingi miluisho yeetu ya kala? (Yeeshaya 55:7)

¹⁷ Ntentekieshi, ngi ungi muanda wi na muulo ukata wabataluulaa kui Yehowa. Ntentekieshi ayipushisha “kualukiila.” Mu ungi ngakuilo, abitungu muntu alekie kukita mianda i bubi, na ekale na nshalelo abakumiina kui Yehowa bua muilo waye. (Badika Yeeshaya 55:7.) Muntu mmulombene kushintula binangu biaye, nsaa y’akumiina kukunkushibua na binangu bia Yehowa. (Lom. 12:2; Ef. 4:23) Abitungu alekie bikitshino biaye bi bubi, na binangu biaye bi bubi. (Kol. 3:7-10) Oolo, lukumiino luetu mu mulambu wa Kidishitu, ngi akikalaa bu kitako kia binyibinyi akikuasha Yehowa, bua’shi etufuile lusa na’shi etutooshe ku miluisho yeetu. Yehowa,  aketufuila lusa ku miluisho yeetu ku bukuashi bua kineemo kia mulambu wa nkuulo, nsaa yetumono atuikitshisha ngofu buatudia kushintuluka mu muikeelo wetu.​—1 Yo. 1:7.

18. Nkinyi kibatukatuka munkataluula pabitale lusa lua Yehowa?

¹⁸ Binobino, tutaluuleyi mu kikoso mianda ikata ibatukatuka mu kuisambila. Yehowa ngi afuidishenaa Lusa lukata kukila booso muiyilu na pa nsenga. Buakinyi tui balombene kuakula bino? Kia kumpala, e kuanka misuusa yoso bua kufuidishena lusa. Kia kabidi, auku mianda yoso pa bitutale. Auku mu mushindo upuidikie bi muikeelo wetu, na aye ngi e na ngobesha ya kuuka su tui belangie kuishimba mu binyibinyi. Kia kasatu, nsaa ayitufuila Yehowa lusa, ayiluankanaa nka bu atue bashakitshine dingi muluisho efuku su ndimune. Na bino abitukuasha buatudia kuikala na kondo k’eshimba katookane na buatudia kuikala bakuminyibue naye.

19. Sunga biatudi bantu bakutue kupuidika na abakatungunuka nka na kukita miluisho, buakinyi tui balombene kuikala na muloo?

¹⁹ Mu binyibinyi, bu biatudi bantu bakutue kupuidika, atutungunuka nka na kukita miluisho. Nyi buakinyi, tui balombene kupeta mayi aakankamika e mu mukanda wa Étude perspicace des Écritures, volume 2, esak. 765’shi: “Bu bi Yehowa e na lusa ataa bafubi baye na muulo sunga mbiabadi na kubofula akutuukila ku mbidi, na mbalombene kuinyongola muanda wa bilubilo biabo abifiki ku kukutua kuabo kua kupuidika, kuabadi bapiane. (Mis 103:8-14; 130:3) Su abekitshisha muabo mooso buabadia kuikala na nshalelo muipushena na mashinda a Efile Mukulu, mbalombene kuikala na muloo. (Fid. 4:4-6; 1 Yo. 3:19-22).” Bino binangu abitunyingisha ngofu!

20. Nkinyi ki’atukamono mu muisambo aulondo?

²⁰ Tui na lutumbu lukata, bu bi Yehowa e kuanka bua kuitufuila lusa, nsaa y’atuinyongola mu binyibinyi bua miluisho y’atuikalanga bakite. Mmushindo kinyi watudi balombene kuambula lusa lua Yehowa? Lusa luetu nduifuanene na lua Yehowa mu mushindo kinyi, kadi nduilekene na lua Yehowa mu mushindo kinyi? Mbuakinyi kuuka kuno kuilekeena kui na muulo ukata? Muisambo aulondo aukaluula ino nkonko yoso.