BANTU be bungi abauuku muanda wa Yesu baadi mukookolue ku mutshi munkatshi mua bantomboshi babidi na babaadi bafuile ku mitshi. (Mat. 27:35-38) Bangi bantu abakumiinaa’shi Bible, t’apatuulaa kalolo pabitale kulumbuula kua kitanda kia Yesu bua kuikishiika nya.​—Mak. 15:42-46.

Bangi bantu abakulaa pabitale ma Evanjile be na mpaka ya’shi, muntu muipayibue e kushiikibua nka mu mushindo wi buwa, apeta aaye mashaama. Kushi mpaka bi kukitshika. Ungi Jurnaliste abetanyinaa bu Ariel Sabar, bafundile mu mukanda waye apatuula bua kinyi bantu be na uno mueneno a’shi: “Kuipayila muntu ku mutshi, kubaadi dinyooka di bukopo diabadi bakumiine kui muilo, na’shi bangi bantu bauukie mianda i bungi, babaadi abasepe kinangu kia’shi bena Looma babaadi abapa muntu kampanda kineemo, kia kumushiika mu mushindo wi buwa.” Bena Looma babaadi abakumiina kukookola nkitshishi a bubi ku mutshi, bua kumukuatshisha buufu. Biabia, su baafu ngi bakatushe kitanda kiaye ku mutshi, bua’shi bekipe nyema ikidie. Kunyima, biabia abishaala ku kitanda, babaadi abebisumbula mu buina bua bintu bioso.

Biabia, bintu bia kala biabadi bafumbule, mbileshe ingi mianda ilekeene, pabitale ingi mushindo ibaabadi abakitshi kui bena Yuda bua kushiika bantu. Mu kipua kia 1968, babaadi basangane mifufua ya muntu abaabadi bayipee mu kipungo kibafuile Yesu. Babaadi basangane’shi nga mu kifuko kia bena Yuda, babaabadi bashiikie peepi na Yelusaleme. Ingi mifufua, babaadi bakeyeele mu mbalo y’abalaminaa mifufua, sunga bu mu kasheete. Ingi ya ku yaya mifufua, ibaadi mifufua ya ku kisuulu. Babaadi bamukookole ku mutshi na musumadi wi bula bua 11.5 cm sunga bula bua (4.5 mu kupima na minue.) Sabar amba’shi: “Kisuulu kia muntu abaabadi abetanyina bu Yehochanan,” ngi “kibaadi kipudishe muanda ubaabadi abeelesha mpaka kubanga kala, pabitale biabadi bafunde mu ma Evanjile bua mashaama abaabadi bashiikie Yesu.” Abilesha’shi, “kisuulu kia Yehochanan, kibaadi kitushe kileshesho kia muntu abaabadi bakookole ku mutshi mu mafuku a Yesu, na bena Looma batusha matalua a’shi bena Yuda bamushiikie.”

Muanda wi pano ngua’shi kukii mueneno i bungi bukile ilekeenelekeene, pabitale mushindo ubaabadi bapudikie Yesu ku mutshi muyile abimueneka uno mufufua wa kisuulu kia Yehochanan. Biabia, abipushika kalolo’shi kui bangi bantomboshi babaabadi bayipee, bebashiika kushi kuibasumbula bisumanga mu buina bua bintu bioso. Bibapushika kalolo’shi, kiakia akiakula Bible pabitale kitanda kia Yesu bibaabadi bekishiikie kalolo mu mashaama, nkia binyibinyi. Kino ngi kishinkamiisho akikuatshishena abiakula Bible pabitale kitanda kia Yesu kibaabadi bashiikie mu mashaama.

Muanda wi na muulo ngua’shi, Yehowa bapuile kutemuka’shi Yesu akashiikibua mu mashaama a muntu mpeta, na ta kui muntu su ngumune mulombene kukutshishua kulombana kua ano mayi a Efile Mukulu.​—Yesh. 53:9; 55:11.