1, 2. Mukanda wa Beena-Looma 5:12 wi kwitukwasha naminyi?

MUKANDA wa Beena-Looma 5:12 (EEM) awamba’shi: “Milwisho ibatwelele pa nsenga pa mwanda wa muntu umune, . . . yaya milwisho yafwisha lufu. Byabya, lufu alukwata bantu boso mwanda boso mbalwishe.” Uno ngumune a ku ma verse atuuku kalolo na atufubishaa kebungi nsaa yatulongo Bible na bantu.

² Uno verse mbafube naye misango ibungi mu mukanda wa A nkinyi akilongyesha namu Bible? na mu wa A nkinyi akitulongyesha Bible? Nsaa yatulongo na bana beetu sunga bangi bantu shapitre a 3, 5, na a 6 a ino mikanda, abitungu tubadikye mukanda wa Beena-Looma 5:12. Twi kufuba na uno verse bwa kwibakwasha bwabadya kupusha bwakinyi nsenga tangikale mpaladiiso lelo uno, bwakinyi twi na lukalo lwa nkuulo, na bwakinyi tukwete kufwa. Anka, uno verse e kwitukwasha dingi booso bwetu bwa kutamisha lutumbu lwatudi nalo bwa kipwano kyetu na Yehowa. Mmulombeene kwitukwasha bwa kwikala na kitshibilo kya kumusangasha na kuyididiila na kukulupila bintu byadi mwitulee.

3. Yehowa akitaa naminyi na milwisho yeetu?

³ Bi malwa, mwanda booso bwetu atukitaa milwisho. Atukitaa  bilubilo efuku dyooso. Anka Yehowa e na lusa. Auku’shi twi bakutwe kupwidika, na akuminaa kwitufwila lusa. (Misambo 103:13, 14) Yesu betulungwile’shi abitungu tutekye Efile Mukulu bwadya kwitufwila lusa ku milwisho yeetu. (Luka 11:2-4) Su Yehowa betufwila lusa ku bilubilo byatudi bakite mu mafuku ashaale, tabitungu kutungunuka na kwela binangu ku byanka nya. Tubandeyi kutaluula bikale Yehowa na ngobesha ya kwitufwila lusa.

4, 5. (a) Nkinyi akitukwasha bwa kupusha akyakula mukanda wa Beena-Looma 5:12? (b) “Kalolo kakata” akapushisha kinyi?

⁴ Mukanda wa Beena-Looma, bikishekishe mu shapitre a 6, awitukwasha bwa kupusha bilombeene Yehowa kwitufwila lusa ku milwisho yeetu. Shapitre a 3, etulungula’shi “booso mbakite milwisho.” Akupu Mpoolo baadi mupatuule’shi: “Mbebabingishe buntu, ku kalolo kaaye, [kukidila ku] kipandjilo kitutwadile Yesu Kidishitu.” (Beena-Looma 3:23, 24) Mwaku wa mu kina Greke wabadi baluule pano bu “kalolo kakata” autuusha binangu bya kukita kintu kya kalolo kushii kutengyela’shi bakwalwishe, sunga’shi kupa muntu kintu kyashii mulombeene.

⁵ Ungi muntu mulongye ngofu apatuula’shi misusa ibungi kino kishima kya mu kiina Greke akileesha myanda yabadi bakitshine bantu kwi Efile Mukulu na Kidishitu bwa kwibapaasha ku mulwisho na ku lufu. Nyi bwakinyi mu Bible a Les Saintes Écritures mu Anglais mbaluule kino kishima kya mu kina Greke bu “kalolo kakata.” Tubandeyi kutala myanda yabadi betukitshine kwi Efile Mukulu na myabi yatupetela ku kalolo kaaye kakata kubanga binobino na kwitupa lukulupilo lwa mafuku aafiki.

6. Mbantu kinyi be bya kupetela myabi ayituukila ku kalolo kakata k’Efile Mukulu, na bwakinyi?

⁶ Pa mwanda wa mulwisho wa Adame, mulwisho na lufu mbikwate muntu ooso mukutwe kupwidika e pa nsenga. Ngi bwakinyi Bible amba’shi “ku kito kya muntu umune lufu lubadiile bufumu.” Anka, Yehowa balesheshe kalolo kaaye kakata pa kutuusha eshinda dya kupaasha bantu booso ku bukwashi bwa “muntu umune’nka, Yesu Kidishitu.” (Beena-Looma 5:12, 15, 17) “Ku kukookyela kwa muntu umune, kibumbu kya bantu akitambula bululame.” Nkilombeene kukulupila “muwa wa looso kukiila kwi Yesu Kidishitu.”—Beena-Looma 5:19, 21.

7. Bwakinyi nkuulo nkya buntu kyabadi betupe kwi Efile Mukulu akileesha kalolo kaye kakata?

⁷ Banda kunangusheena uno mwanda: Yehowa tabaadi na kitungo kya kutuusha mwan’aye bu mulambu wa nkuulo nya. Anka mmuleeshe kalolo kaaye kakata pa kutuusha eshinda dya kwitupaasha ku mulwisho na ku lufu. Ta kwi muntu su ngumune a kwatudi mulombanyine uno mwanda wabadi betukitshine kwi Efile Mukulu na Yesu nya. Twi na lutumbu lwibungi p’abo kwitupa mushindo wa kwitufwila lusa na kupeta muwa wa ikalaika! Tulesheyi Efile Mukulu lutumbu lwetu mu nshalelo eetu.

8. Abitungu tusumbule binangu kinyi?

⁸ Atuuku’shi Efile Mukulu akumina kwitufwila lusa ku milwisho yeetu, sunga yekala bukata bwi naminyi. Anka tabitungu twafuba na kalolo kakata ka Yehowa bu kabingilo ka kukita myanda ibubi na kunangusheena’shi ‘Yehowa anfwila lusa’ nya. Mu siekele a kumpala, mu mafuku abaadi mpa na bamo batumibwa bakii na muwa, bamo beena Kidishitu  abaadi na uno mwikeelo. (Badika Yuude 4.) Lelo uno, abitungu tudimukye ngofu tala twalonda binangu bya bangi bantu, na kubanga kunangusheena mu kino kipaso ku kapeelakapeela.

9, 10. Mpoolo na bangi beena Kidishitu abaadi bapoososhwe ku milwisho na lufu naminyi?

⁹ Mpoolo baadi mudimushe beena Kidishitu’shi; bi bubi bukile su banangusheena’shi su batungunuka na kukita milwisho Efile Mukulu mmulombeene kuyididiila na kwibafwila lusa. Mpoolo balesheshe’shi abitungu basumbule bino binangu mwanda mbapwe ‘kufwa ku milwisho.’ (Badika Beena-Looma 6:1, 2.) Bino abipushisha kinyi?

¹⁰ Ku bukwashi bwa nkuulo, Efile Mukulu baadi mulekyele milwisho ya Mpoolo na ya bangi beena Kidishitu ba mu siekele a kumpala. Yehowa bebeelele mwimu wa kikudi kiselele bwabadya kwikala bana baaye. Bibaadi abitungu’shi bashaale na lulamato, bwabadya kwenda mwiyilu na kumunana pamune na Kidishitu. Bu bibaabadi na muwa pa nsenga, abaadi “bafwe ku milwisho” naminyi? Mpoolo baadi mupwandikishe uno mwanda bwa kwibalesha’shi nshalelo aabo ooso mmupwe kushintuluka. Bambile’shi kunyima kwa lufu, Yesu basangukile na mbidi ya mu kikudi ishii bya kufwa. Nyi bwakinyi lufu ‘talukii na matalwa kwadi nya.’ Mu mushindo umune, bibaadi nka bu’shi na beena Kidishitu namu abafwile. Nshalelo aabo ooso baadi mushintulukye mwanda tababaadi bya kutadiila dingi binangu byabo bya milwisho bikale abibakunkusha nya. Kubanga nka paapa, abaadi abakitshi mwabo mooso bwa kwikala na nshalelo asankisha Efile Mukulu. Abaadi “bafwe ku milwisho, anka [be] na muuwa bw’Efile Mukulu, mu Yesu Kidishitu.”​—Beena-Looma 6:9, 11.

11. Lelo uno beena Kidishitu ‘mbafwe ku milwisho’ naminyi?

¹¹ Kadi’twe namu? Twi “bafwe ku milwisho” naminyi? Mu mafuku a kala, pangi tubaadi bakite myanda ibubi ibungi kushii kuuka bi mweneno a Yehowa pabitale bikitshino byetu. Tubaadi mu “bupika bwa myanda ibutete na ya kafuutakanyi,” kwamba’shi, “bapika ba milwisho.” (Beena-Looma 6:19, 20) Anka, pabatulongyele mu Bible bi nshalelo atudya kwikala naye bwa kusangasha Efile Mukulu, tubaadi bashintulukye, atwe nkwilambula kwadi, na kubatshishibwa. Tubaadi na lukalo lwibukopo lwa kukookyela Yehowa na kwikala na nshalelo amusangasha. Twi “bapwe kupoosolwa ku milwisho,” na “kushaala bapika ba bululame.”​—Beena-Looma 6:17, 18.

12. Abitungu’shi ooso a kwatudi aate kitshibilo kinyi?

¹² Dingi, twi na kya kwata kitshibilo. Mpoolo mutumibwa bakwile’shi: “Byabya milwisho tayidyanga dimo bufumu mu mbidi yeenu ya lufu, bwa kupela kwinutwesha mu ndakalaka yaayo.” (Beena-Looma 6:12) Pa mwanda wa byabya twi balombeene kupa mbidi yeetu ya milwisho lwabi sunga’shi twi balombeene kwiyitonta. Eyipushe obe nabene’shi: ‘Nalekyelaa bwa’shi lwabi lwi bubi lutame mu mbidi yande bwaludya kunkitshisha myanda i bubi? Su nelubingaa nka paapa? Su twi na lutumbu bwa kalolo kakata sunga buntu bw’Efile Mukulu, atukakitshi mwetu mooso bwa kumusankisha.

13. Bwakinyi atushinkamisha’shi twi bya kukita myanda ibuwa?

¹³ Mu siekele a kumpala, bangi bantu ba mu kibundji kya Kodinda babaadi ba ngifi, abakitshi bulunda bwa mulume na mulume sunga bwa mukashi na mukashi, lukyebanokyebano, lulangwilo lwa ma nkishi na bunkolwenkolwe.  Bano bantu, p’ababafikile mu kuuka na kufula Yehowa, abashintulukile. Abaadi bashikwe myanda yooso ibaabadi abakitshi. (Beena-Looma 6:21; 1 Beena-Kodinda 6:9-11) Beena Kidishitu ba mu Looma namu abaadi bakumiine kushintuluka nka byabya. Mpoolo mutumibwa bebalungwile’shi: “Tanulambulanga bina-mbidi bienu ku mulwisho, bu bifubishwanga bya myanda ibubi nya, anka elambuleyi anwe banabene kwi Efile Mukulu, bu be munkatshi mwa bafwe bekale babushibwe na muwa, na bina-mbidi bienu nwibilambule kwi Efile Mukulu bu bifubishwanga bya kululama.” (Beena-Looma 6:13, Kilombeeno kipya 2014) Mpoolo baadi mushinkamishe’shi abaadi na kya kukita myanda ibuwa na kwikala abapete myabi ayituukila ku kalolo kakata k’Efile Mukulu.

14, 15. Abitungu twikale atwiyipusha naminyi?

¹⁴ Bi mumune na lelo uno. Bangi bakwetu balume na bakashi babaadi na nshalelo nka bu baadi naye beena Kodinda. Anka kunyima kwa kwiuka Yehowa, mbafikye mu kushintuluka. Bibaadi nka bu babekeele batôshwe ku milwisho. Bwa kusankisha Yehowa, abitungu ooso a kwatudi ashintuule nshalelo aaye. Mpa na binobino twi nka na lukalo lwa kuleesha lutumbu bwa kalolo kakata k’Efile Mukulu. Byabya twikaleyi na kitshibilo kya kukambila ndakalaka ibubi na kufubila Yehowa mu muwa wetu.

¹⁵ Byabya, abitungu tulekye kukita milwisho ibaabadi abakitshi kwi bangi beena Kodinda. Su tubayididiila na kukita ino myanda tatukulupilanga’shi Efile Mukulu etuleesha kalolo kaaye kakata na kwitufwila lusa nya. Twi kwamba naminyi bwa milwisho yabamono kwi bangi bu ipeela? Twi na kitshibilo kya kukita bukopo bwetu booso bwatudya kukookyela Yehowa mu myanda yooso su?—Beena-Looma 6:14, 17.

16. Atuuku naminyi’shi abitungu tusuukye kukita milwisho yabashii bateemune mu mukanda wa 1 Beena-Kodinda 6:9-11?

¹⁶ Banda kunangusheena pa mwanda wa Mpoolo mutumiibwa. Bafundile’shi: “Ne mupaanyiibwe ku bupika bwa milwisho. Mbinyibinyi, ntanshinguula kintu ku bikitshino byande: kyaakya kyankyebe, ntaneekikitshi nya; anka kyandi mushikwe, neekikitshi.” (Beena-Looma 7:14, 15) Sunga bibaadi takitshi myanda yabadi bateemune mu mukanda wa 1 Beena-Kodinda 6:9-11, Mpoolo bambile’shi kwete nka kukita milwisho. Baadi akumina kusangasha Yehowa, ngi bwakinyi baadi alu ngoshi bwa kupela kukita myanda ibubi. (Badika Beena-Looma 7:21-23.) Twi kwambula kileshesho kyaye na kukita mwetu mooso bwa kukookyela Yehowa.

17. Bwakinyi abitungu twikale na kululama?

¹⁷ Bu kileshesho, atuuku’shi bwa kufubila Yehowa abitungu twikale bantu balulame. (Badika Nkindji 14:5; Beena-Efeso 4:25.) Tatwambulanga Satana, mwikale “nshee [na] madimi.” Tutentekyeshe’shi Ananiase na mukashi’aye abafwile pa mwanda wa madimi. Ngi bwakinyi tatwikalanga na madimi. (Yowano 8:44; Bikitshino 5:1-11) Anka, kwikala mululame ta mpenda kupela kwa kudimba nya. Su twi na lutumbu bwa kalolo kakata k’Efile Mukulu, atukekala na kululama mu ingi mishindo.

18, 19. Kwikala muntu mululame akupushisha kinyi?

¹⁸ Muntu mmulombeene kukutwa kululama sunga ta mwakule madimi. Bu kileshesho, Yehowa balungwile beena Isalele’shi: “Tanunyengananga kintu ku bukopo; tanudimbanga, tanwikalanga balamalama pa kulwishiisha mwin’eumbo neenu.” Bwakinyi bibaadi abitungu’shi bakite bino? Yehowa bambile’shi: “Ikalaayi beeselele, mwanda nee Eeselele, ami Yehowa, Efile Mukulu  eenu.” (Beena-Levi 19:2, 11) Sunga twakutwa kudimba, su tubakuminyisha bangi mwanda ushii w’eyendo, tatwi na kululama nya.

¹⁹ Bu kileshsho, muntu balungula mukata aaye a mudimo sunga beena mudimo naye’shi abitungu nkatukye ku mudimo kumpala kwa nsaa mwanda nakyebe nkemonena na munganga. Aku namu kano ta ngi kabingilo kakatukila nya. Akyebe kukatuka kumpala kwa nsaa bwa kwenda mu ingi myanda yaye. Pangi akyebe kukidila ku lupitalo penda bwa kwata tu bwanga sunga ku biro bya munganga bwa kufuta makuta. Uno muntu e na kululama su kwete kudimba bangi? Yawa muntu bakuminyisha bangi mwanda ushii wa binyibinyi. Ingi nsaa, bantu abadimbaa bwa kupeta kintu sunga kupela kwa’shi bebanyooka. Anka atwe atukookyela Yehowa bambile’shi: “Tanudimbanga.” Atukumina kukita myanda yamono’shi ngilulame na ngya kishila.—Beena-Looma 6:19.

20, 21. Bwa kuleesha lutumbu bwa buntu sunga kalolo kakata k’Efile Mukulu, abitungu tukite myanda kinyi?

²⁰ Na dingi, abitungu tusuukye lukyebanokyebano, bu nkolwe nkolwe, na ingi milwisho ikata. Anka kunyima kwa byabya, abitungu tusuukye kintu kyooso kulombeene kubungamisha Yehowa. Bu kileshesho, abitungu tusuukye lusandji, na kusuuka maasha ooso e butete. Tabitungu tulekye penda kukwatshika maalwa nya, anka tulekye kutoma maalwa mu kipaso kyatupusha bu ka kifunyo ka kukwatshika. Twi balombeene kwitatshisha ngofu bwa kukambila bino bitompwanga, anka twi na ngobesha ya kwibikambila.

²¹ Twikaleyi na kitshibilo kya kukita bu Mpoolo bambile’shi: “Byabya milwisho tayidyanga dimo bufumu mu mbidi yeenu ya lufu, bwa kupela kwinutwesha mu ndakalaka yaayo.” (Beena-Looma 6:12; 7:18-20) Eyendo, ta twi balombeene kwiyisuuka mu kipaso kipwidikye nya. Anka, su tubetatshisha bwa kukambila milwisho ya bipaso byooso, atuleesha’shi twi na lutumbu bwa kalolo kakata kabadi betuleeshe kwi Efile Mukulu na Kidishitu.

22. Efuto kinyi dyatudi balombeene kukulupila su tubaleesha lutumbu bwa kalolo kakata k’Efile Mukulu?

²² Yehowa mmwitufwile lusa ku milwisho yeetu na atungunuka na kwitufwila lwanka. Twi na lutumbu lwibungi bwa kalolo kaaye kakata! Ngi bwakinyi twitatshisheyi na mwetu mooso bwa kupela kukita bintu bibubi ku meeso kwaye, sunga bangi bantu tabebimono bu milwisho. Su tubakitshi bino, efuto kinyi dyatudi balombeene kukulupila? Mpoolo bambile’shi: “Binobino bu bibanupoosolwa ku milwisho, nubekala bapika b’Efile Mukulu; anupa bikuba abikeenufisha ku bwiselele, na nfudiilo aabyo muwa wa ikalaika.”​—Beena-Looma 6:22.