1. Tuusha kileshesho akileesha bwakinyi bi na muulo kwikala bapasukye bwa kuuka nsaa itatudi na myanda ikwete kukitshika mu bwipi mwetu. (Tala kifwatulo ki kumbangilo.)

NSAA ya kubanga kikongeeno ibaadi ipwe kulombana. Mukunkushi mupwe kwimana ku kyakwilo na kupokyeela bantu booso. Mizike ibaadi ipwe kubanga. Bantu booso babaadi abauku’shi nsaa ya kushaala ibapu kulombana. Babaadi na muloo wa kupusha mizike ibuwa, na abakulupila kuteemesha miisambo yabadi bebalumbulwile. Kadi kwi bangi bantu bashibaadi batee matwi kwi mukunkushi sunga kupusha’shi mizike tayibangile. Byabya tambaukye’shi kikongeeno kibapu kubanga, na babaadi bakyabende na kutambuka na kwisamba na bakuuku baabo. Uno mwanda awituleesha kilombeene kukitshika su twakutwa kushaala bapasukye bwa kuuka nsaa itatudi na myanda ikwete kukitshika mbwipi mwetu. Dino ndilongyesha dikata kwatudi mwanda mu mafuku apeela’mu akukitshika mwanda ukata, autungu twiwilumbulwile. Mwanda kinyi?

2. Bwakinyi Yesu balungwile balongi baaye’shi “ikalai bapasukye”?

² Yesu badimwishe balongi baaye pabitale muulo wa kwikala bapasukye na bwa kwikala belumbuule bwa “nfudilo aa byaa-pano.” Bebalungwile’shi: “Dimukayi, nwikale bapasukye, mwanda t’anwiûku apakalombana dyadya efuku.” Kunyima bebalungwile misango  ibungi’shi: “Ikalai bapasukye.” (Mateo 24:3; badika Maako 13:32-37, EEM.) Uno mwanda wi mu Mateo auleesha dingi’shi Yesu badimwishe balongi baaye pabitale uno mwanda. Bebalungwile’shi: “Ikalai bapasukye mwanda t’anwiuku efuku adikafiki Nfumwenu ooo.” Ungi mususa bebadimwishe’shi: “Anwe namu ikalai belumbuule, mwanda Mwana a muntu akafiki pa nsaa yanush’anwiûku.” Kunyima bebalungwile dingi’shi: “ikalai bapasukye, mwanda tanwiuku efuku sunga nsaa ayikafiki Nfumwenu.”​—Mateo 24:42-44; 25:13.

3. Bwakinyi tukwete kuteemesha kudimusha kwa Yesu?

³ Batemwe ba Yehowa bakwete kuteemesha kuno kudimusha kwa Yesu. Atuuku’shi twi mu “kipungo kya nfudiilo” na’shi “mpombo ikata” tayidi peepi! (Ndanyele 12:4; Mateo 24:21) Nka bu bibatemukile Yesu, mwilo wa Yehowa ukwete kulungula mukandu wibuwa wa Bufumu mu nsenga ishima. Mu ano mafuku amune tukwete kumona ngoshi, bipupa bya mikumbo, kutshinkatshinka kwa nsenga, na bipupa bya nsala mu ma mbalo ebungi. Tukwete kumona kafuutakanyi ka bipwilo na bibeshi na bu ntomboshi bibafiimi kukila bibaabidi mu mafuku a kala. (Mateo 24:7, 11, 12, 14; Luka 21:11) Tukwete kutengyela n’eshimba kwiyilu mafuku aakafiki Yesu bwa kulombasha mpàngo ya Nshaye.—Maako 13:26, 27.

4. (a) Bwakinyi atushinkamisha’shi Yesu mmupwe kuuka efuku adikabanga Armagedone? (b) Sunga twakutwa kuuka efuku adikabanga mpombo ikata, mmwanda kinyi watudi balombeene kushinkamisha?

⁴ Patwende mu kikongeeno, atuukaa nsaa ayibanga kipindji kya kikongeeno kyooso. Byabya, tatwi na mushindo wa kuuka kalolo nsaa ayikabanga mpombo ikata nya. Pabaadi pa nsenga, Yesu bambile’shi: “Anka bwa dyady’efuku na yawa nguba takwi muntu eebyuuku su ngumune, sunga miikeeyilu mwiyilu, sunga Mwana, kukaasha penda Yaaya bupenka bwaye.” (Mateo 24:36) Byabya, bu bi Yesu nyi akakunkusha ngoshi ya Armagedone, abimweneka’shi binobino mmupwe kuuka nsaa ayikabanga yaya ngoshi. (Kibafumbwilwe 19:11-16) Kadi na binobino tatwaukile efuku sunga nsaa ayikafiki nfudiilo nya. Ngi bwakinyi bi na muulo bwa’shi twikale bapasukye. Yehowa mmupwe kutshiba nsaa ayikabanga mpombo ikata, na efuku dyooso adikidi, dyadya efuku dikwete kwifubwila peepi ngofu. ‘Adikalombana kushii kutentuulwa!’ (Badika Abakuke 2:1-3.) Bwakinyi twi balombeene kushinkamisha uno mwanda?

5. Tuusha kileshesho akileesha’shi matemuki a Yehowa aalombanaa nka mu nsaa itshibibwe.

⁵ Matemuki a Yehowa ooso aalombanaa nka pa nsaa ilombane! Bu kileshesho, tentekyesha efuku dibatushishe mwilo waye mu Ejiipitu. Dibaadi mu efuku dya 14 mu mweshi wa Nisane mu kipwa kya 1513 kumpala kwa Kidishitu. Kunyima Moyiise bafundile pabitale dyadya efuku’shi: “ku mfudiilo a bipwa nkama inanka na makumi asatu, dyaady’efuku difundjibwe, bilwilo byooso bya Yehowa bibatuukile mwiumbo dya Ejiipitu.” (Efilu 12:40-42) Mu efuku dya 14 dya mweshi wa Nisane mu kipwa kya 1943 kumpala kwa Kidishitu, bipwa 430 kumpala kwa’shi beena Isaleele bapete bulungantu, mulayilo wa Yehowa wa kwelela bekulu ba Abrahame mwabi ubalombeene. (Beena-Ngalatea 3:17, 18) Kunyima kwa mafuku apeela, Yehowa balungwile Abrahame’shi: “Uuka biibuwa’shi beekulu boobe abashaala mwiumbo dyabeene. Abeebeekasha bu bapika, abeebapombesha mund’a bipwa nkama inanka.” (Kibangilo 15:13; Bikitshino 7:6) Bino bipwa 400 bibaabangile mu kipwa kya 1913 kumpala kwa Kidishitu nsaa ibaabangile Ismaele kukyengyesha Isaake. Bibapwile efuku dibabatushishe beena Isaleele mu Ejiipitu. (Kibangilo 21:8-10; Beena-Ngalatea 4:22-29) Eyendo, kumpala kwa bipwa nkama, Yehowa baadi mutshibe efuku dya kutuusha mwilo waye mu bupika!

6. Bwakinyi twi kwikala bashinkamishe’shi Yehowa akapaasha mwilo waye?

⁶ Yooshwa baadi umune a ku beena Isaleele babatukile mu Ejiipitu. Kunyima kwa bipwa bibungi,  baadi mutentekyeshe mwilo’shi: Anuuku “n’eshimba dyeenu dyooso na byenu byooso’shi eyi su ndimunenka tandishaale kushii kipeta, ku bishima byooso bikile buwa bibaadi byambe Yehowa Efile Mukulu eenu pa mwanda wenu. Byooso mbinukumbeene. Su nkimunenka kya ku bino bishima tankishaale kushii kipeta.” (Yooshwa 23:2, 14) Yehowa mmwitulee’shi akapaasha mwilo waye ku mpombo ikata na akebapa muwa wa ikalaika mu ndumbulwilo mupya. Na dingi twi balombeene kushinkamisha’shi milayilo yaaye ayikalombana. Byabya, su atukyebe nkatwela mu ndumbulwilo mupya, abitungu twikale bapasukye.

7, 8. (a) Balami babaadi na mudimo kinyi mu mafuku a kala, na uno mwanda awitulongyesha kinyi? (b) Tuusha kileshesho akileesha kilombeene kukitshika su balami balaala mu tulo ku mudimo wabo.

⁷ Twi kupeta malongyesha ebungi ku balami babaadi abalama bibundji mu Isaleele mu mafuku a kala. Bibungi bya ku bino bibundji kusanga na Yeelusaleme, bibaadi bifunyishwe na bimano sunga midimba bwa’shi beshikwanyi tabatwelanga. Balami babaadi abemana ku bino bimano, na kwakwa babaadi na ngobesha ya kumona bipindji bya nsenga byooso bifunyishe kibundji. Bangi balami babaadi abemana ku kiibi kya kibundji. Bibaadi abitungu’shi baaba bantu bashaale bapasukye bufuku na kaanya, na nsaa yabamono beshikwanyi babaadi na kya kudimusha bantu be mu kibundji. (Yeeshaya 62:6) Babaadi abauku’shi kushaala bapasukye na kutala myanda yooso ayikitshika kwi na muulo ukata. Su bakutwa kukita byabya, bantu bebungi babaadi balombeene kwipayibwa.—Esekyele 33:6.

⁸ Josephe, ungi muntu bafundile myanda ya kala ya beena Yuuda, baadi mupushishe bibapetele beena Looma mushindo wa kutwela mu Yeelusaleme mu kipwa kya 70 kunyima kwa Kidishitu. Balami babaadi abalama kyakya kipindji kya kibundji babaadi balaale mu tulo. Pa mwanda wa byabya, basalayi ba beena Looma babapetele mushindo wa kutwela mu kibundji. Babayiile ku ntempelo, bamwela kaalo, na kubutula Yeelusaleme ooso mushima. Kino kibaadi kipindji kya nfudiilo kya mpombo ikata ishabandile kukitshika dingi mu Yeelusaleme.

9. Mmwanda kinyi wabash’abauku kwi bantu bebungi?

⁹ Mbulamatadi ibungi ano mafuku eetu ikwete kulama ku mikalo yaabo na basalayi na byamo bya kulama nabyo byabadi batuushe binobino. Mbulamatadi ayishalaa ipasukye bwa kupela muntu sunga kintu kyooso kilombeene kukalakasha kwiyikeela kwa bantu be mu eumbo. Kadi bano beena mbulamatadi tabashinguula’shi kwi ungi mbulamatadi e bukome e mwiyilu kwete kukunkushibwa na Yesu Kidishitu nya. Uno mbulamatadi akyebe kufika binobino bwa kulwa ngoshi na mbulamatadi yooso i pa nsenga. (Yeeshaya 9:6, 7; 56:10; Ndanyele 2:44) Tukwete kutengyela n’eshimba kwiyilu bwa’shi dino efuku difikye na atukumiina kwikala belumbuule bwa dyanka. Ngi bwakinyi atulondesha matemuki a mu Bible na kutungunuka na kufubila Yehowa na lulamato looso.​—Misambo 130:6.

10, 11. (a) Mmwanda kinyi autungu’shi tudimukile, na bwakinyi? (b) Nkinyi akikushinkamiisha’shi Diabulu mmubulakashe bantu bwa’shi bakutwe kuuka matemuki a mu Bible?

¹⁰ Banda kupwandikisha’shi mulami ekalanga mupasukye bufuku bushima. Mu nsaa ya pa kutooka, abikalaa bukopo ngofu bwadya kushaala mupasukye mwanda wa kukooka. Mu mushindo umune, twi mu mafuku a ku nfudiilo kwa uno ndumbulwilo. Na dingi nsaa yatunyiisha kwifubwila peepi na nfudiilo, abinyiisha kwitwelela bukopo bwa kushaala bapasukye. Mbilombeene kwikala bibubi ngofu su twakutwa kushaala bapasukye! Tubandeyi kutaluula bintu bisatu bilombeene kwitukutshishwa kushaala bapasukye.

¹¹ Diabulu kwete kudimba bantu. Aye nyi “nfumu a pano pa nsenga.” Mafuku apeela kumpala kwa lufu lwaye, Yesu baadi mutentekyeshe balongi baaye pabitale uno mwanda misusa isatu. (Yowano 12:31; 14:30; 16:11) Diabulu kwete kufuba na bipwilo bya madimi bwa kudimba  bantu. Nyi bwakinyi bantu bebungi lelo uno tabauku matemuki a mu Bible aaleesha patooka’shi nfudiilo a uno ndumbulwilo taadi peepi. (Sefanya 1:14) Abimweneka kalolo’shi, Satana ‘mmwikashe bashi bakumiine ba mpofu mu binangu.’ (2 Beena-Kodinda 4:3-6) Bu kipeta, nsaa yatutompo kulungula bantu’shi nfudiilo a uno ndumbulwilo taadi peepi na’shi Kidishitu mmupwe kwikala Nfumu, bebungi ba kwabadi tabakumiina kwituteemesha nya. Misusa ibungi bakwete kwamba’shi: “T’abinkwasha nya.”

12. Bwakinyi tabitungu’shi tutadiile Diabulu etudimbe?

¹² Sunga bantu bebungi bakutwa kwipaana mu matemuki a mu Bible, tatwi balombeene kulekyeela binangu byabo byetubofusha nya. Atwe atuuku bwakinyi bi na muulo bwa’shi tushaale bapasukye. Mpoolo balungwile bakwabo’shi: “Mwanda anwe banabeene anuuku kalolo’shi efuku dya Yehowa adikafiki.” Bambile dingi’shi: adifiki nka “bu abifikaa ngifi bufuku.” (Badika 1 Beena-Tesalonika 5:1-6.) Yesu baadi mwitudimushe’shi: “Ikalayi belumbuule, mwanda Mwan’a-muntu akafiki nguba anushanuwuku.” (Luka 12:39, 40) Mu mafuku apeela’mu Satana akadimbi bantu pa kwibeelesha binangu’shi be mu “kufukama na kwiyikeela.” Nka paapa, ngi apafiki efuku dya Yehowa, na abakabutudibwa. Atwe namu abiketwikeela naminyi? Su atukyebe’shi tupande ku dyadya efuku na kupela kudimbibwa bu bangi bantu booso, abitungu “tushale bapasukye na beelame.” Ngi bwakinyi abitungu’shi twikale atubadika Bible efuku dyooso na kunangusheena mu myanda ayitulongyesha Yehowa.

13. Kikudi kya uno ndumbulwilo kikwete kukunkusha binangu bya bantu naminyi, na twi kusuuka buno bukunkushi bwibubi naminyi?

¹³ Kikudi kya uno ndumbulwilo kikwete kukunkusha binangu bya bantu. Lelo uno bantu bebungi abamono’shi ta be na lukalo n’Efile Mukulu nya. (Mateo 5:3) Anka, bakwete kukisha bukome na nsaa yaabo mu kukimba kwa makuta na bintu bya mu uno ndumbulwilo. (1 Yowano 2:16) Na dingi, ano mafuku kwi mishindo ya kukisha kapapi ibungi kukila mafuku a kala, ikwete kukaka bantu na kwibakankamika bwa kufula masanka na miloo mu bintu byooso byabakumiina. (2 Timote 3:4) Bino bintu abikatusha binangu bya bantu ku myanda i na muulo ukata, ngi bwakinyi bantu tabanangusheena ku kipwano kyabo n’Efile Mukulu nya. Pa mwanda wa byabya Mpoolo baadi mutentekyeshe beena Kidishitu’shi abitungu “nubuukye mu tulo” pa kupela kutuula muwa wabo mu kukimba bya kulombasha malaka aabo.​—Beena-Looma 13:11-14.

14. Nkudimusha kinyi kwi mu mukanda wa Luka 21:34, 35?

¹⁴ Abitungu binangu byetu bikale abikunkushibwa na kikudi ky’Efile Mukulu, pamutwe pa kukunkushibwa na kikudi kya uno ndumbulwilo. Ku bukwashi bwa kikudi kyaye, Yehowa mmwitukwashe bwa kupusha kalolo myanda ikwete kukitshika. (1 Beena-Kodinda 2:12) ^[1] (Tala mayi e ku nfudiilo.) Byabya abitungu twikale badimukye. Mpa na bintu bi na muulo mbilombeene kukumba binangu byetu ku mufubo wa Yehowa. (Badika Luka 21:34, 35.) Bangi bantu mbalombeene kwitulungula’shi kukumiina’shi nfudiilo a uno ndumbulwilo taadi peepi nkukutwa kwa binangu. (2 Mpyeele 3:3-7) Anka tatwibatadilanga bwa’shi betubofushe. Atwe twi na bishinkamiisho abileesha patooka’shi nfudiilo ayifiki binobino. Su atukumiina’shi kikudi ky’Efile Mukulu  kitukunkushe, abitungu twikale atutwele mu bisangilo byooso na bakwetu.

15. Mmwanda kinyi ubaadi ukitshikile Mpyeele, Shake, na Yowano, na mushindo kinyi waudi ulombeene kwitukitshikila namu natwe?

¹⁵ Kubofula kwetu akwitukutshishwa bya kushaala bapasukye. Yesu baadi mupushe’shi bantu bakutwe kupwidika be na kubofula. Banda kutentekyesha mwanda ubakitshikile bufuku bwa mulaadilo wa lufu lwaye. Sunga bibaadi Yesu muntu mupwidikye, baadi auku’shi bwa kushaala na lulamato, bibaadi abitungu’shi ekale atekye bukwashi kwi Nshaye. Yesu balungwile batumiibwa baaye Mpyeele, Shake, na Yowano bwabadya kushala bapasukye nsaa yakwete kuteka. Kadi batumiibwa baaye tambaukye bwakinyi bibaadi na muulo bwa’shi bashaale bapasukye nya. Abaadi bakookye, abo nkwikupila mu tulo. Yesu namu baadi mukookye, kadi bashadile mupasukye na kwelanga nteko kwi Nshaye. Batumiibwa babadya kwikala abatekye nabo mu yaya nsaa.—Maako 14:32-41.

16. Muyiile mukanda wa Luka 21:36, Yesu baadi mwitulongyeshe bwatudya kushaala “bapasukye” naminyi?

¹⁶ Nkinyi kilombeene kwitukwasha bwa kushaala “bapasukye” na kwikala belumbuule bw’efuku dya Yehowa? Abitungu twikale na lukalo lwi bukopo lwa kukita myanda ilulame. Anka kukita bino ta nkupwa kwa mwanda nya. Mafuku apeela kumpala kwa lufu lwa Yesu, balungwile balongi baaye’shi abitungu batungunukye na kuteka bukwashi kwi Yehowa. (Badika Luka 21:36.) Bwa kushaala bapasukye mu ano mafuku a ku nfudiilo, n’atwe namu abitungu twikale atutekye bukwashi kwi Yehowa nsaa yooso.​—1 Mpyeele 4:7.

17. Twi kwikala bashinkamishe’shi twi belumbuule bwa myanda ayifiki kumpala naminyi?

¹⁷ Yesu bambile’shi “tanwiuku efuku sunga nsaa ayikafiki” nfudiilo. (Mateo 24:44) Byabya abitungu twikale belumbuule nsaa yooso. Ino ta nsaa yatudya kukimba nshaleelo abalesha kwi ndumbulwilo a Satana bu atwala muloo nya. Ino mmyanda ya mpwandikishi. Anka, ku bukwashi bwa Bible, Yehowa na Yesu abetuleesha mushindo watudi balombeene kushaala bapasukye. Byabya tulondesheyi matemuki a mu Bible na mushindo waakwete kulombana. Na tunyisheyi kwifubwila peepi na Yehowa na kutuula Bufumu pa mbalo ya kumpala mu muwa wetu. Su tubakitshi byabya atukekala belumbuule nsaa ayikafiki nfudiilo. (Kibafumbwilwe 22:20) Kukita bino ngi kulombeene kupaasha muwa wetu!