Ungi mwana e na bipwa 4 bamwene miishi ayituuku ku mulengye wa miishi wa ku nshibo yabapwiyaa bintu (usine) bu ekumbi. Aye nkwakula’shi mu ino nshibo abemupwiyaa makumbi. Uno mpushisho e bubi a uno mwana mulombeene kwitukemesha. Byabya, mpushisho ebubi mu myanda ikata e kwikala na bukitshishi bwibubi mu muwa wetu. Bu kileshesho, kupusha bibubi myanda yabadi bafunde ku ka mukanda ka bwanga nkulombeene kutwala masaku akata.

Mpushisho ebubi mu myanda ya mu kikudi mulombeene kutwala bantu ku masaku akata. Bu kileshesho, bangi bantu abaadi bapushe malongyesha a Yesu bibubi. (Yowano 6:48-68) Pamutwe pa kukimba bya kulonga ingi myanda ibungi, abapelele kuteemesha myanda yooso ibabalongyeshe kwi Yesu. Abaadi bashimishe myanda i na muulo ukata!

Okwete kukimba bukunkushi mu Bible su? Uno mmwanda wibuwa. Byabya, nkulombeene kwikala masaku a kupusha bibubi mwanda uboobadika su? Bantu bebungi mbafumankane na uno mwanda. Banda kutala bino beleshesho bisatu bya myanda yabadi bapushe bibubi kwi bantu.

• Bamo bantu abapushaa mwaku ‘kutshiin’Efile Mukulu’ wi mu Bible bibubi. Abapusha’shi abitungu kupusha Efile Mukulu moo. (Mulungudi 12:13) Anka Efile Mukulu takumina’shi bantu abamulangwila bamupushe moo nya. Amba’shi: “[Twekalanga na moo NWT], mwanda nee noobe; twekalanga na katshim’a-munda, mwanda nee Efile Mukulu oobe. Naakupa bukome; oolo, naakukwasha, naakukankamika.” (Yeeshaya 41:10) Kutshina Efile Mukulu akupushisha kwikala na kaneemo kakata kwadi.

• Bangi bantu abapusha mayi a mu Bible bibubi: “Kwi kipungo bwa kintu kyooso, . . . kipungo bwa kutanda na kipungo bwa kufwa.” Abamba’shi Efile Mukulu mmutshibile muntu ooso nsaa yadya kufwa. (Mulungudi 3:1, 2) Anka, uno verse aleesha myanda ayikitshika mu muwa wa muntu na kuleesha’shi muntu ooso mmutadiile ku lufu. Eyi dy’Efile Mukulu aditulongyesha dingi’shi bitshibilo byetu mbilombeene kwikala na bukitshishi ku mafuku a muwa wetu. Bu kileshesho, Bible amba’shi: “Baba abatshinyi Yehowa abekala na muwa mafuku ebungi.” (Nkindji 10:27, EEM; Misambo 90:10; Yeeshaya 55:3) Mu kipaso kinyi? Kuneemeka myanda i mu Eyi dy’Efile Mukulu akwitutakula mu kusuuka kukita myanda ilombeene kwitutwadila maladi mu mbidi, bu bunkolwenkolwe na kutambuka masandji.​—1 Beena-Kodinda 6:9, 10.

• Bangi namu abapusha Bible bibubi pakula’shi eyilu na nsenga ‘mbebilamine kaalo,’ na abamba’shi Efile Mukulu akyebe kubutula ino nsenga yatudi bashaale. (2 Mpyeele 3:7) Anka Efile Mukulu mmulee’shi ta mulombeene kutadiila bwa’shi ino nsenga ibutulwe nya. Efile Mukulu “bashimikile nsenga pa bibangilo byâyo, ta kwi akikeyisânyisha mafuku ooso mpâ na ku ikalaika.” (Misambo 104:5, EEM; Yeeshaya 45:18) Bantu ba mu uno ndumbulwilo mulwile, nyi baabakabutula, nka bu babutulwe na kaalo, ta nsenga inabeene nya. Anka eyilu, ndilombeene kulesha eyilu dyatumono, dino di na nyenyene, sunga kishalelo ky’Efile Mukulu nabeene. Ano mayilu taakabutuka nya.

Nka bu byodi mulombeene kumona mu bino bileshesho, bantu bebungi abapushaa ma verse a mu Bible bibubi nsaa yababadika. Bwakinyi Efile Mukulu mmutadiile bino abikitshika? Bangi bantu be kwela binangu’shi: ‘Su Efile Mukulu e na binangu byooso na kiukilo, badya kwitupa mukanda ufundjibwe kalolo wabadi balombeene kupusha kwi muntu ooso bipeelepeele. Bwakinyi tamukite bino? Banda kutala tuno tubingilo tusatu atuleesha bwakinyi ingi nsaa bantu abapushaa myanda ya mu Bible bibubi.

1. Bible mbamukite bya’shi bamupushe kwi baaba be na kwiyisha na abakumina kulonga. Yesu balungwile Nshaye’shi: “Naakutumbisha, . . . Yaya Nfumu a eulu na a nsenga, mwanda bofiile bino  bintu kwi baasha bukalamwino na kwi baasha binangu, na’shi we mwibifumbwiile baana-bakinga.” (Luka 10:21) Bible mmufundibwe mu kipaso kya’shi nka penda baaba be na binangu bibuwa nyi balombeene kupusha mukandu wi mwanka. Bantu be na kwitatula—​eyikashi adikalaa na bantu “baasha binangu” na bantu balongye ngofu—abafikaa mu kupusha myanda ya mu Bible bibubi. Anka bantu ababadika Bible na binangu bu bya “baana-bakinga”—​be na kwiyisha na be na lukalo lwa kulonga​—Efile Mukulu ebapeyaa bwedi pa kwibakwasha bwabadya kupusha mukandu wi mu Bible kalolo. Efile Mukulu mmukite Bible na binangu bibungi!

2. Bible mbamufundile bantu abakumina n’eshimba dimune’shi Efile Mukulu ebakwashe bwa kumupusha. Yesu bambile’shi bwa kupusha myanda ibaadi alongyesha kalolo, abitungu muntu atekye bukwashi. Bantu abaadi balombeene kupeta buno bukwashi naminyi? Yesu bapatulwile’shi: “Mukwashi kikudi ki selele akikatumiibwa kwi Yaaya mwishina dyande, akiinulambukisha bintu byooso.” (Yowano 14:26) Efile Mukulu apeyaa bantu kikudi kyaye ki selele​—sunga bukome bwaye bukitshishi​—bwabudya kwibakwasha bwa’shi bapushe myanda yababadika mu Bible. Anka asuminaa bantu bashi’abamutekye bukwashi bwa kikudi kyaye. Nyi bwakinyi ingi nsaa tabapushaa myanda ya mu Bible nya. Kikudi kiselele akitakulaa beena Kidishitu be na kiukilo bwabadya kwenda mu kukwasha bantu abakimbi bya kupusha myanda ya mu Bible kalolo.​—Bikitshino 8:26-35.

3. Amo ma verse a mu Bible bantu mbalombeene kwiapusha nka apalombana kipungo. Bu kileshesho, mutemuki Ndanyele abamulungwile bwadya kufunda myanda ya mu mafuku aafiki. Mwikeyilu bamulungwile’shi: “Lama ino myaku kushii kwiyilungula muntu, ela mukanda kitampi mpaa na ku kipungo kya nfudiilo.” Munda mwa bipwa bibungi, bantu bebungi mbabadikye mukanda wa Ndayele mu Bible kushii’bo kwiupusha kalolo. Mpaa nka na Ndanyele nabeene tabaadi apusha kalolo ingi myanda ibaadi mufunde nya. Na kwiyisha kooso bambile’shi: “Naateemeeshe ino myaku, anka ntshinaapushiishe kyaayamba.” Abimweneka kalolo’shi bantu abaadi balombeene kupusha matemuki ababafundile kwi Ndanyele, anka apakalombana kipungo kyabadi batshibe kwi Efile Mukulu. Mwikeyilu bapatulwile’shi: “Enda, Ndanyele, mwanda ino myaku ngilamwe ifwame na yeelwe kitampi mpaa na ku nguba a nfudiilo.” Mbantu kinyi abakapusha mukandu w’Efile Mukulu? Bible amba’shi: “Mubi su ngumune taakapusha, anka bantu baa-sha-kinangu abakapusha.” (Ndanyele 12:4, 8-10) Byabya, Efile Mukulu afumbulaa mpushisho a angi ma verse a mu Bible nka apalombana kipungo.

Mu kipungo kampanda, ba Temwe ba Yehowa mbapushe ingi myanda ya mu Bible bibubi su? Oolo. Anka nsaa ibalombeene kipungo ky’Efile Mukulu kya kupushisha myanda kalolo, ba Temwe ba Yehowa namu abalumbulwile mpushisho aabo. Abashinkamisha’shi nsaa yabakitshi byabya, abambula kileshesho kya batumiibwa ba Kidishitu, abaadi balumbuule binangu byabo nsaa yooso ibaadi Yesu ebaleesha kibuwa.​—Bikitshino 1:6, 7.

Kinangu kya ka nsongwakashi kabaadi kedimbe akufikaa makumbi nkilombeene kwikala mpushisho e bubi mu ka mwanda kapeela. Anka, myanda ayilongyesha Bible i na muulo ukata koodi. Mbilombeene kwikala bukopo bwa’shi muntu ooso apushe myanda ya mu Bible kalolo nsaa yebadikila aye nabeene. Byabya, kukimba bukwashi bodya kupusha myanda yobadika kwibuwa. Kimba bantu abalongo Bible na binangu bya kwiyisha, bantu abatekye Efile Mukulu bukwashi bwa kikudi kyaye bwabadya kupusha myanda ya mu Bible, bantu abashinkamisha’shi twi mu mafuku a ku nfudiilo, amukumiina Efile Mukulu’shi tupushe myanda ya mu Bible kalolo kukila byatwiyipushanga kumpala. Topushanga bukopo bwa kwisamba na Temwe a Yehowa sunga kubadika myanda yabadi bakimbuule kalolo i mu site a jw.org. Bible etulaa’shi: ‘Su okimba binangu . . . Okapete kiukilo ky’Efile Mukulu.’​—Nkindji 2:3-5.