Nkonko ya bantu ababadikaa
Abitungu Temwe a Yehowa afubishe ma site a Interenete a kuiyidishena bua kupeta muntu a kuiyibakishena naye su?
Eyendo, Yehowa akumina’shi bantu beyibakishene bekale na muloo na bekale mu kipuano ki bukopo munkatshi muabo bua loso. (Mat. 19:4-6) Su okumina kupeta muntu a kuiyibakishena naye, mbikunyi biodia kupeta muntu e buwa? Bu biadi mupangi etu, Yehowa auku kiatudia kukita bua kuikala na muloo muiyibakishi. Biabia, su tualonda malango aye, atupete bipeta bi buwa. Tala angi malango.
Kia kumpala, abitungu atue banabene tushinkamishe’shi: “Ta kwi kikile eshimba dya muntu bulamalama, ta kwi muntu ashingûla byadidi.” (Yel. 17:9, EEM) Nsaa i bantu babidi abakiebe kuiyibakishena abemonena, ababanga kuiyilena, musango umune kifulo nkilombene kubanga kutama. Nsaa aikitshika bino, abibelela bukopo bua kuata bitshibilo bi buwa. Su bantu abata kitshibilo kia kuiyibakishena penda pa muanda wa biab’epusha, ku nfudilo abakenyongola ngofu. (Nki. 28:26) Nyi buakinyi ta bi buwa bantu babidi belungushene’shi mbefulene kumpala kua kuiukena kalolo.
Nkindji 22:3 amba’shi: “Muntu mudimukye eepengyelaa bubi; anka bapatakane taabamonaa buu mwanda, ngi kyaabamwena mpombo.” Buakinyi kufubisha ma site a Internete a kuiyidishena kui masaku? Muanda wa malua, bangi bantu bemonene na bantu babash’abauku ku Internete, nkubanga kuiyidishena anka kunyima abo nkumona’shi muntu abeyilenanga naye, muibadimbe. Na dingi, bantu bashi balulame, mbele mianda ya madimi bua kudimba bantu bash’abauku muanda bua kuibadimba na kuibayiba makuta. Ke bungi, bano bantu abadimbaa’shi mba Temwe ba Yehowa.
Tala angi masaku. Angi ma site a Internete a kuiyidishena aafubishaa ma programe a mu ordinatere, abapuandikisha’shi aafumankasha bantu be na mianda i mumune. Anka, takui kishinkamisho su nkimune akilesha’shi ano mayele aakuatshikaa. Kukulupila mu ma programe a ordinatere abadi bakite kui bantu bua kuata kitshibilo ki na muulo bu ki’eyibakishi, nyi nkukutua kua binangu. Programe ya mu ordinatere tayakukulupila bu mayi a kulonda e mu Bible nya.—Nki. 1:7; 3:5-7.
Eyi dia kulonda di mu Nkindji 14:15 adiamba’shi: “Sha-bukumiinekumiine akookyelaa ku kyooso kyaabamba, anka muntu mudimukye eeyipushaa kwende.” Kumpla kua kumona muntu bu mulume sunga mukashi okeyibakishena naye, abitungu omuukie kalolo. Anka bi bukopo kuuka muntu kalolo mu Internete. Sunga omona mianda ya muntu yadi muele mu Internete, sunga nuakisha nsaa i bungi mu kuitumishena ma mesaje na yawa muntu, wekuakula binyibinyi’shi omuku? Bangi abadi bashinkamishe’shi abapete kifulo kia binyibinyi, abadi bakalakashue nsaa ibabadi bemonene na yawa muntu mpala kua mpala.
Mufundi a misambo amba’shi: “Ntshi mwende mu kushaala na bantu batwelakane; ntshi mutwele kwa baa-shaa-mpala ibidi.” (Mis. 26:4) Bantu be bungi abamba’shi su muntu akiebe kuiyilena na muntu, ela mianda ya madimi mu Internete bua’shi bangi bamumone bu muntu e buwa, bino ta bubi nya. Mbalombene kufia ngikashi yabo i bubi, sunga kukutua kuiyilesha nsaa y’abatumina bangi mesaje. Sunga bangi bantu abeamba bu ba Temwe ba Yehowa, eyendo’shi mbena Kidishitu babatshishibue su? Mbanyingie mu kikudi su? Be mu kipuano ki buwa na Yehowa su? Bena nkumo i buwa mu kakongye su? Be na kileshesho ki bubi su mbekela mpa na “ba kuuku beebubi”? (1 Kod. 15:33; 2 Tim. 2:20, 21) Be na bulungantu bua kuibakila muyile mayi a kulonda ee mu Bible su? Abitungu opete ngalulo ku ino nkonko. Anka, bi bukopo kupeta ngalulo ku ino nkonko su to muisambe na bangi ba Temwe ba Yehowa abauku yawa muntu kalolo. (Nki. 15:22) Eyendo, mufubi a Yehowa sha lulamato, ta mulombene kuiyibakishena na muntu shi muina ‘kukumina’ kuamba’shi mulanguidi a Yehowa.—2 Kod. 6:14; 1 Kod. 7:39.
Bu biakudi masaku a kufubisha ma site a Internete a kuiyidishena, kui ingi mishindo i buwa ya kukimba na kuuka bia kuiukena na muntu odi mulombene kuiyibakishena naye. Nkunyi kodia kupeta muntu odia kuiyibakishena naye? Pabatudi na mushindo wa kuibunga, ba Temwe ba Yehowa abadi na mishindo ya kuuka bangi ku bisangilo bya kakongye, ku bikongeno sunga ku ingi mishindo ya kuibunga.
P’anukisha nsaa pamune, omono patoka su nui na bipatshila na mianda i mumune
Pa muanda wa kipupa kia COVID-19, tatuki na dingi mushindo wa kuibunga pa ma mbalo a kata nya, tukuete kufubisha tuamo bua kutuela mu bisangilo, muamua tui kupeta mushindo wa kuiukena na ba Temwe ba Yehowa ba ki bukupi. We kuibapusha ku’abele miisambo, na kuabalesha lukumino luabo pa kutusha mialulo. (1 Tim. 6:11, 12) Nuibalombene kuisamba mu tusaka kunyima kua bisangilo, su kakongye kenu akafubisha ino applications. Nsaa y’anuibungu na bangi ba Temwe ba Yehowa ku video, omono abikitshi yawa muntu okiebe kuiyibakishena naye, bi’akitshina bangi mianda, na bino abikukuasha bua kuuka bumuntu buaye kalolo. (1 Mp. 3:4) Muenda mafuku, ouku yawa muntu kalolo, na we mulombene kumona su nuina bipatshila bi mumune na su nui kuikala bena dibaka be buwa.
Nsaa i muntu e bukupi atumikila mayi a kulonda e mu Bible nsaa y’akimbi muntu akuiyibakishena naye, mulombene kuikala na muloo. Amono binyibinyi’shi, mayi e mu luno lukindji nga binyi, aamba’shi: ‘Baapete mukashi [sunga mulume] e buwa bapete mwabi, baapete kya-buntu kya Yehowa.’—Nki. 18:22.