1-3. (a) Nkintu kinyi akitungu’shi tutuule pa mbalo ya kumpala? (b) Bantu abalongo ndimi yeenyi be na nkalakashi kinyi, na bino abibwesha nkonko kinyi? (Tala kifwatulo ki kumbangilo.)

LELO uno, Batemwe ba Yehowa bebungi mbepaane mu kulombasha butemuki bwa kulungula mukandu wibuwa mu “eumbo dyooso, kisamba, mwakulo na mwilo ooso.” (Kibafumbwilwe 14:6) We munkatshi mwa bantu bakwete kulonga ingi ndimi su? Bangi bakwete kufuba bu ba misionere sunga’shi abalungula mbalo i lukalo lukata lwa balungudi mu eumbo dishii dyabo. Bangi namu bakwete kutwela mu bisangilo mu ludimi lwabene mu kakongye ke mu kibundji kyabo.

² Bafubi b’Efile Mukulu booso be na lukalo lwa kutuula kunyinga kwabo kwa mu kikudi na kwa beena kifuko kyabo pa mbalo ya kumpala. (Mateo 5:3) Byabya, ingi nsaa twi balombeene kwikala na myanda ikile bungi ya kukita mu mushindo watukutwa mpa na nsaa ya kwilongyela bifundwe kalolo. Kadi bantu booso be mu tukongye twabakula ndimi yenyi be na ingi nkalakashi.

³ Booso abakwasha mu tukongye twabakula ndimi yenyi  be na lukalo lwa kulonga ludimi lupya, kadi abitungu bekale abalongo myanda ifwame y’Efile Mukulu lubingo looso. (1 Beena-Kodinda 2:10) Balombeene kulonga ino myanda naminyi su tabapusha myanda yabakula mu bisangilo kalolo? Na bwakinyi abitungu’shi ba nambutwile beena Kidishitu be mu tukongye twabakula ndimi yeenyi bashinkamishe’shi bya binyibinyi abikumu ku mashimba a bana baabo?

4. Mmwanda kinyi ulombeene kubofusha kipwano kyetu na Yehowa? Tuusha kileshesho.

⁴ Kukutwa kwa kupusha malongyesha a mu Bible mu ludimi lwabene, nkulombeene kutuula kipwano kyetu na Yehowa mu masaku. Pabalukiile Neemiya ku Yeelusaleme, basangeene’shi bangi bana tababadi abauku kwakula kina Ebelu nya. (Badika Neemiya 13:23, 24.) Bu bibaadi bano bana tabapusha Eyi dy’Efile Mukulu, kipwano kyabo na Yehowa kibaadi kibofule.​—Neemiya 8:2, 8.

5, 6. Bangi ba nambutwile be mu tukongye twabakula ndimi yenyi mbamone mwanda kinyi, na bwakinyi?

⁵ Bamo ba nambutwile beena Kidishitu bakwete kufuba mu tukongye twabakula ludimi lwenyi mbamone’shi kipwano kya bana baabo na Yehowa kibabofula. Pa mwanda wa kukutwa kupusha myanda yabalongyesha mu bisangilo, bana baabo tabeyitumikila nya. Pedro baadi mukatukye na kifuko kyaaye mu Amerique du Sud enda nabo mu Australie amba’shi: “Bwa kupusha myanda ya mu kikudi kalolo abitungu ikume kwishimba mpa na mu binangu.” ^[1] (Tala mayi e kunfudiilo.)​—Luka 24:32.

⁶ Nsaa yatubadika myanda mu ludimi lwabene, ta ngilombeene nkukuma kwishimba bu nsaa yweyibadika mu ludimi lwenu lwa butandwa nya. Na dingi, pa mwanda wa kukutwa kuuka bya kwakula ludimi lwenyi, twi balombeene kukooka na kumona bisangilo bu abitukalakasha. Ngi bwakinyi nsaa yatudi na lukalo lwa kukwasha mu kakongye ka ludimi lwenyi, abitungu tulame kipwano kyetu na Yehowa bibukobo.​—Mateo 4:4.

7. Beena Babilone abaadi abakyebe kukuminyisha Ndanyele bipikwa na bipwilo byabo naminyi?

⁷ Pabaadi Ndanyele na bakuuku baye mu bupika mu Babilone, beena Babilone ababangile kwibasukuma pabukopo bwa kuukumina bipikwa byabo na lulangwilo lwabo. Mushindo kinyi? Pa kwibalongyesha “ludimi lwa beena Kaldeya” na kwibawudika mashina a beena Babilone. (Ndanyele 1:3-7) Eshina dibabaudikile Ndanyele di na kishima Bel, eshina dy’efile mukata a beena Babilone. Bino abileesha’shi Nfumu Nabukodonosore baadi akyebe kukuminyisha Ndanyele’shi b’efile ba mu Babilone be na bukome kukila Yehowa Efile Mukulu a Ndanyele.​—Ndanyele 4:8.

8. Ndanyele baadi mulame kipwano kyaye kinyingye na Yehowa naminyi?

⁸ Pabaadi mu Babilone, Ndanyele baadi atuudila nfumu byakudya bibuwa. Anka “ batshile kitshibilo mwishimba” kya kupela kutupilwa ku miiya ya Yehowa. (Ndanyele 1:8, EEM) Bu bibaadi atungunuka na kwilongyela “bifundwe,” bibaadi bifundjibwe mu kina Ebelu, balamine kipwano kyaye na Yehowa kinyingye nsaa ibaadi mwiumbo dyabeene. (Ndanyele 9:2, EEM) Byabya, mpa na bipwa 70 kunyima kwa’ye kufika mu Babilone, abaadi abamuuku nka mwishina dyaye dya mu kiina Ebelu, dya bu Ndanyele.​—Ndanyele 5:13.

9. Mufundi a mukanda wa Misambo 119 baadi na binangu bi naminyi pabitale Eyi dy’Efile Mukulu?

⁹ Mufundji a mukanda wa Misambo 119 baadi na kya kunyingiila nsaa ibaadi bantu ba mwibalasa dya nfumu abamwakula myanda ibubi. Anka baadi munyingishibwe n’Eyi dy’ Efile Mukulu, na bino bibamukwashishe bwa kushala mwilekeene na bangi. (Misambo 119:23, 61) Baadi mutadiile bwa’shi Eyi dy’ Efile Mukulu dikume eshimba na binangu byaye ngofu.​—Badika Misambo 119:11, 46.

10, 11. (a) Nsaa yatwilongyela Eyi dy’ Efile Mukulu, abitungu twikale na kipetshila kinyi? (b) Twi kulombasha kano kepatshila ketu naminyi? Tuusha kileshesho.

¹⁰ Sunga twekala na mashito ebungi mu kakongye, abitungu booso bwetu tukimbe nsaa ya kwilongyela na kukita lulangwilo lwa mu kifuko. (Beena-Efeso 5:15, 16) Kepatshila ketu ta nka penda kubadika masaki a mikanda ebungi sunga kulumbuula bya nkaluula mu bisangilo nya. Kepatshila ketu nka kukita nka’shi Eyi dy’Efile Mukulu ditukume na kunyingisha lukumino lwetu.

¹¹ Bwatudya kulombasha kepatshila keetu, abitungu twikale na nkatshinkatshi. Nsaa yatwilongyela, tabitungu kunangusheena nka penda ku nkalo ya bangi bantu nya, anka abitungu tunangusheehe bwa kulombasha nkalo yetu’twe ba nabeene. (Beena-Fidipe 1:9, 10) Abitungu tushinguule’shi, nsaa yatwilumbuula bwa kwenda mu bulungudi, yatulumbuula bisangilo, sunga mwisambo, tatukitaa bwa’shi ino myanda ikale itutale’twe banabeene nya. Bu kileshesho, sunga muntu ateekye byakudya atompaa byanka kumpala kwa kwibipa bantu, tamulombeene kuladilanga nka penda yaya ndambo yatompo nya. Bwa’shi ekale na mbidi bukome, abitungu ekale ateekye byakudya bibuwa bwaye’ye nabeene efuku dyooso. Mu mushindo umune, su atukyebe kunyingisha kipwano kyetu na Yehowa, abitungu twikale atwilongyela Bible efuku dyooso. Kuno kwilongyela akulombasha nkalo yetu’twe banabeene.

12, 13. Bwa kinyi bantu bebungi abamonaa’shi kwilongyela Bible mu ndimi yabo kwi buwa?

¹² Bantu bebungi abafubu mu tukongye twabakula ndimi yenyi mbasangane’shi bibuwa bekale abelongyela Bible efuku dyooso mu ‘ludimi lwabo lwa butandwa.’ (Bikitshino 2:8) Mpa na ba misionere abauku’shi bwabadya kushaala banyingye mu kikudi mu mbalo yabadi bebatume, tabitungu bemeene nka penda ku myanda yabalongo mu bisangilo nya.

 ¹³ Alain, baadi alongo kina Perse munda mwa bipwa mwanda, akula’shi: “Nsaa yandumbuula bisangilo mu kiina Perse, nakambaa kutala nka penda myanda itale ludimi. Mwanda binagu byande mbimeene nka penda mu kukimba bya kwakula ludimi kalolo, byabya, bino bintu bya mu kikudi tabikambaa kunkuma kwishimba nya. Ngi bwakinyi nakimbaa nsaa ya kwilongyela Bible na ingi mikanda mu ludimi lwande lwa butandwa.”

14. Abitungu ba nambutwile bashinguule kinyi, na bwakinyi?

¹⁴ Abitungu ba nambutwile beena Kidishitu bashinguule’su bya binyibinyi bikwete kukuma binangu na mashimba a bana babo. Tutale kileshesho kya Serge, na mukashi aye Muriel, babadi bafube mu kakongye kabakula ludimi lwenyi munda mwa bipwa biikile pa bisatu. A babangile kumona’shi mwan’abo mulume baadi na bipwa 17 tabaadi asankilanyi bulungudi sunga bisangilo nya. Muriel akula’shi: “Kulungula mukandu wibuwa mu lungi ludimi kubaadi akumukalakasha, aku namu kumpala baadi mukumine bulungudi ngofu mu Fwalanse ludimi lwaye lwa butandwa.” Serge amba’shi: “Pabatumwene’shi uno mwanda ubakalakasha mwan’etu mulume byadya kukutwa kwenda kumpala mu kikudi, tubadi baate kitshibilo kya kwalukiila mu kakongye keetu ka kumpala.”

15. (a) Nkinyi ki bya kukwasha ba nambutwile bwa kwata kitshibilo kya kushintuula tukongye? (b) Mbuludiki kinyi bwabapa ba nambutwile mu Miiya Ikituulwe 6:5-7?

¹⁵ Nkinyi kii bya kukwasha ba nambutwile bwa kwata kitshibilo kya kwalukiila mu kakongye mwabakula ludimi lwabapusha kalolo kwi bana babo? Kya kumpla, abitungu baate kitshibilo kya kutala su be na nsaa na bukome bwa kulongyesha bana babo bwabadya kufula Yehowa na ingi nsaa namu ya kwibalongyesha ludimi lwenyi. Kya kabidi, abitungu bataluule su bana babo tabakwete kukumina kwenda mu bulungudi, kwenda ku bisangilo, sunga kukwasha mu mbalo mwabakula ludimi lwenyi. Bwa tuno tubiongilo, ba nambutwile mbalombeene kwata kitshibilo kya kwaluka mu kakongye mwi ludimi lwabapusha kwi bana babo bibuwa. Anka kunyima, ba nambutwile mbalombeene kwata kitshibilo kya kwalukiila mu kakongye mwi ludimi lwenyi su abamono’shi bana babo babapu kunyingisha kipwano kyabo na Yehowa.​—Badika Miiya Ikituulwe 6:5-7.

16, 17. Nkinyi kikwashe bangi ba nambutwile bwa kulongyesha bana baabo pabitale Yehowa?

¹⁶ Bangi ba nambutwile abakimbaa mushindo wa kulongyesha bana babo pabitale Yehowa mu ludimi lwa butandwa sunga bakwete kutwela mu bisangilo mu kisaka sunga kakongye kabakula ludimi lwenyi. Charles e na bana bakashi be pankatshi pa bipwa 9 na 13. Babadi batwele mu kisaka mwabakula Lingala. Akula’shi: “Tubaadi baate kitshibilo kya kulonga Bible na bana beetu na kukita lulangwilo lwa mu kifuko mu ludimi lwetu lwa butandwa. Akupu tubaadi atutwesha ingi miisambo na maasha mu Lingala bwa’shi bamone bya kulonga luno ludimi mu nsaa ya maasha.”

¹⁷ Kevin e na bana bakashi babidi umune e na bipwa bitano ungi namu e na bipwa mwanda. Kwete kwitatshisha ngofu bwa kwibalongyesha bya binyibinyi, mwanda bana baye tabapetele ngobesha ya kuteemesha bisangilo kalolo mu kakongye kabakula ludimi lwabeene amutwelaa kifuko kyabo. Akula’shi: “Ami na mukashi’ande twi na programe a kulonga na bana betu ku nshibo mu Fwalanse, ludimi lwabo lwa butandwa. Twi baate dingi kitshibilo kya kutwela mu bisangilo bya mu Fwalanse dimune ku mweshi, na dingi nsaa yatudi mu konje atwendaa mu kutwela mu bikongeeno abikitshika mu ludimi lwetu lwa butandwa.”

18. (a) Mukanda wa beena-Looma 15:1, 2 wi nkukwasha bwa kwata kitshibilo kibuwa bwa kukwasha bana boobe naminyi? (b) Bangi ba nambutwile mbafubishe mayele kinyi? (Tala mayi e kunfudiilo.)

¹⁸ Kifuko kyooso ki na matalwa a kusangula myanda ilombeene kukwasha bana baabo bwa kunyingisha kipwano kyabo na Yehowa. ^[2] (Tala mayi e kunfudiilo.) (Beena-Ngalatea 6:5) Muriel akula’shi sunga byekala’shi aye na mulum’aye be  na lukalo lwa kutungunuka na kukwasha mu kakongye kabakula ludimi lwenyi, abaatshile kitshibilo kya kwimukatuka bwa kukwasha bana baabo bwabadya kunyingisha kifulo kyabo mwi Yehowa. (Badika Beena-Looma 15:1, 2.) Lelo uno, Serge akula’shi babaadi baate kitshibilo kibuwa. Alombasha ano mayi: “Kubanga nka pabatukatukile twaluka mu kakongye ka Fwalanse, mwan’etu mmukule mu kikudi na mupwe kubatshishibwa. Kano kabidi kwete kufuba mudimo wa bu mbala-mashinda a myeshi yooso. Bino bino e na lukalo lwa kwaluka mu kisaka kyabakula ludimi lwenyi!”

19, 20. Twi kuleesha’shi twi bafule Eyi dy’Efile Mukulu naminyi?

¹⁹ Yehowa mmufule bantu booso. Mmupe bantu be mu ndimi nkama na nkama Bible bwa’shi bantu ba “bipaso byooso” bapete kiukilo kya binyibinyi. (1 Timote 2:4) Auku’shi su tubekala atubadika Bible mu ludimi lwetu lwa butandwa, atumupusha kalolo na kipwano kyetu naaye akikanyingi.

²⁰ Booso bwetu twi na lukalo lwa kwitatshisha ngofu bwa kunyingisha kipwano kyetu na Yehowa. Twi kukita bino su tubekala atulongo Bible mu ludimi lwatupusha kalolo. Atukekala dingi na ngobesha ya kukwasha ba mu nshibo mwetu bwabadya kushala bashimate mu kikudi, na atukaleesha’shi twi bafule Eyi dy’Efile Mukulu binyibinyi.​—Misambo 119:11.