1. Ba Temwe basatu babadi baleshe mu kino kikoso, mbashale na lulamato kwi Yehowa naminyi?

BANDA kunangushena pa ino myanda isatu itale ba Temwe ba Yehowa. (1) Dingi efuku, nsongwakashi e ku kalasa, na mulongyeshe aabo balungula balongi boso bwabadya kupetekyelwa ku musangelo kampanda w’eumbo sunga wa bipwilo bya madimi. Nsongwakashi auku’shi wawa musangelo tausangasha Efile Mukulu, na bapele kwenda na kanemo koso. (2) Nsongwalume sha buufu, e mu bulungudi bwa ku nshibo na nshibo. Bamono’shi mulongi naye badi asepe ba Temwe ba Yehowa e mu lupango alulondo. Kadi sunga mbyabya, bende ku yaya nshibo na bakakokola kushii kupusha buufu. (3) Muntu kwete kufuba ngofu bwa kulombasha nkalo ya ba mu kifuko kyaye, dingi efuku mukata aaye a mudimo bamutekye bwa kukita mwanda wi bubi. Sunga shi badya kushimisha mufubo su apela kukita abimulungula mukata aaye, uno muntu balungula mukata aaye’shi akumiina kwikala mululame na kukokyela mwiya mwanda byabya nyi abitekye Efile Mukulu kwi bafubi baye.—Lom. 13:1-4; Eb. 13:18.

2. Nkonko kinyi yatukyebe kutaluula, na mbwakinyi?

² Eyikashi kinyi dibomono mwi bano bantu basatu? Pangi bomono ngikashi ibungi bu, eshimba dinyingye na kululama. Kadi kwi eyikashi dimune dibuwa dibabalesha—dino eyikashi nyi nkululama. Oso a kwabadi mmushale na lulamato kwi Yehowa. Boso abapele kutupilwa ku miiya y’Efile Mukulu. Kululama akutakulaa bantu bwa kukita nka byabya bibabakitshi. Yehowa asanka na ese a kwabadi mwanda boso abalesha dyadya eyikashi. Atwe namu atukumiina kusangasha Nshetu e mwiyilu. Byabya, tubandeyi kutaluula ino nkonko isatu: Kululama nkinyi? Bwakinyi abitungu twikale balulame? Na mbikunyi byatudya kunyingisha kitshibilo kyetu kya kwikala balulame mu kino kipungo kii bukopo?

3. (a) Kululama akulesha kinyi? (b) Mbileshesho kinyi bilombene kwitukwasha bwa kupusha akilesha kululama?

³ Bwetu’twe bafubi b’Efile Mukulu, kululama akulesha kufula na kulamata Yehowa n’eshimba dyetu dyoso, na kukita myanda ayimusankisha misusa yoso. Tutaluleyi ingi myanda ayilesha byabadi bafubishe kishima kululama mu Bible. Mu Bible, kishima kya mu kina Ebelu kyabadi baluule bu “kululama” akilesha: kilombane, kishi kalema, sunga kishima. Bu kileshesho, bena Isaleele abadi abalambula Yehowa nyema, na mwiya ubadi awibatekye bwa kulambula nyema ilombane. * (Lv. 22:21, 22) Mwilo w’Efile Mukulu taubadi na kya kulambula nyema mutshokokye mukolo, mutshibikye etwi, mutunyikye eyiso sunga nyema e na maladi. Kwi Yehowa bibadi na muulo bwa’shi nyema ekale mushima. (Mal. 1:6-9) Atupusha bwakinyi akuminaa kintu kilombane sunga kishima. Nsaa yatuulu kintu kampanda, byakikala’shi nkikuba, mukanda, sunga kintu kya kufuba nakyo, t’atukuminaa’shi kikale na matubu akata sunga kikutwe lungi lupoolo. Atukuminaa kyakya kikumbane, sunga kishima. Yehowa apushaa nka byabya pabitale kifulo kyetu bwaye, na lulamato lwetu kwadi. Abitungu bikale bilombane, bishima.

4. (a) Bwakinyi muntu mukutwe kupwidika mmulombene kwikala mululame? (b) Muyile Misambo 103:12-14, Yehowa tetutekaa kinyi?

⁴ Twi kwamba’shi abitungu twikale bapwidikye bwa kwikala balulame su? Mu byoso, twi kumona’shi atukitaa bilubilo bibungi. Tubande kutaluula tubingilo tubidi atulesha’shi t’abitungu twikale bapwidikye bwa kwikala balulame. Ka kumpala, Yehowa t’emenaa pa bilubilo byetu. Eyi dyaye aditulungula’shi: “Su olubiila bito bya bantu Yehowa, Yehowa, nnaanyi a kupanda?” (Mis. 130:3) Auku’shi twi bakutwe kupwidika, bantu basha milwisho, na etufwilaa lusa na kalolo kooso. (Mis. 86:5) Ka kabidi, Yehowa auku pemene bukome bwetu, na t’etutekaa bwa kukita myanda ikile bukome bwetu nya. (Badika Misambo 103:12-14.) Mu mushindo kinyi mwatudi balombene kwikala balombane ku meso kwa Yehowa?

5. Bwakinyi bafubi ba Yehowa be na lukalo na kifulo bwa kwikala na kululama?

⁵ Bwa bafubi ba Yehowa, kifulo nyi akikwasha bwa kwikala na kululama. Kifulo kyetu bw’Efile Mukulu na lulamato lwetu kwadi aye Nshetu e mwiyilu, abitungu bikale bilombane. Su kifulo kyetu ki byabya sunga nsaa yatudi mu bitompwanga, yaya nsaa twi na kululama. (1 Mya. 28:9; Mat. 22:37) Tubande kutaluula dingi mwanda wa ba Temwe basatu babatwisambila ku mbangilo. Bwakinyi abadi bakite byabya? Yawa nsongwakashi t’akuminanga kwasha namu ku kalasa? Yawa nsongwalume akuminanga’shi bamukwatshishe buufu ku kibelo? Sunga shi yawa nfumu a kifuko akumiinanga kushimisha mudimo waye? Ta mbyabya nya. Anka, abauku’shi Yehowa e na miiya ilulame, na binangu byabo bibadi bitule ku kusangasha Nshabo e mwiyilu. Pa mwanda mbamufule, abatulaa binangu kwadi kumpala kwa kwata kitshibilo. P’abakitshi byabya abalesha’shi be na kululama.

6. (a) Bwakinyi twi na lukalo na kululama? (b) Mbikunyi bibadi ba Adame na Eeva bakutwe kulesha kululama?

⁶ Bwakinyi abitungu’shi oso a kwatudi ekale mululame? Abitungu wekale mululame mwanda Satana badi mwele mpaka na Yehowa, dingi mmukudimbiile. Uno mwikeyilu ntomboshi mmwiyikashe nabene bu Satana, sunga “Mwishikwanyi” kubanga mu Edene. Badi  mudimbiile Yehowa pa kwamba shi, Efile Mukulu e bubi, tatalaa nkalo ya bantu, na’shi Mmukunkushi mukutwe kululama. Bya malwa, Adame na Eeva abalondele Satana, abo nkutombokyela Yehowa. (Kib. 3:1-6) Nshalelo ababadi naye mu Edene badi mwibape mishindo ya kunyingisha kifulo kyabo bwa Yehowa. Kadi, kumpala kwa kitompwanga kya Satana kifulo kyabo takibadi kilombane. Kunyima, kubebwele lukonkonko lubadi alutungu lwaluulo: Bantu mbalombene kushala na lulamato kwi Yehowa mwanda wa kifulo kyabadi nakyo bwaye su? Mu ungi ngakwilo, bantu be na mushindo wa kulesha kululama su? Luno lukonko lubebwele mu mwanda wa Yoobo.

7. Bu byabadi bebileshe mu Yoobo 1:8-11, Yehowa baadi mupushe naminyi pabitale lulamato lwa Yoobo? Na Satana baadi mupushe naminyi pabitale lulamato lwa Yoobo?

⁷ Yoobo badi na muwa mu mafuku abadi bena Isaleele mu Ejiipitu. Kululama kwaye kubadi kukile kwa bantu boso. Badi muntu mukutwe kupwidika nka bu’twe. Bakitshine bilubilo. Kadi, Yehowa badi mumufule mwanda wa kululama kwaye. Abimweka’shi Satana badi mupwe kusepa Yehowa pabitale kululama kwa bantu. Byabya, Yehowa nkumulesha Yoobo. Yoobo badi na nshalelo badi alesha’shi Satana nsha madimi! Satana batekyele Yehowa bwa’shi amutadiile atompe lukumiino lwa Yoobo. Yehowa badi mukulupile mwi kuuku aaye Yoobo, na Aye nkutadiila Satana bwa’shi amutompe.—Badika Yoobo 1:8-11.

8. Satana badi mulwishe Yoobo naminyi?

⁸ Satana ntomboshi, na ayipayishenaa. Badi mulwishe bintu byoso bya Yoobo, bupeta bwaye, bafubi baye, na kulwisha nkumo yaye. Badi mulwishe kifuko kya Yoobo, nkumwipayila bana boso ekumi. Kunyima, badi mulwishe mbidi ya Yoobo, amukumbisha mukumbo  wi bu mbalanga kubanga kumutwe na mushi mwa ngwa. Mukashi a Yoobo badi mukalakashwe mu binangu na mubofule mwanda wa twinyongoshi; aye nkulungula Yoobo’shi apele Efile Mukulu afwe. Yoobo nabene batekyele lufu, anka badi mulame kululama kwaye. Kunyima, Satana bashintulwile mayele a kumutompa. Aye nkutuma bantu basatu bekale ba kuuku ba Yoobo. Baaba bantu abafikile mu kutala Yoobo munda mwa mafuku, kadi kushii kumunyingisha. Kadi abadi bamutopekye na bishima abitapa kwishimba. Abamulungwile’shi Efile Mukulu nyi kwete kumufwishila nkalakashi na ta kwete kutala kululama kwaye nya. Abadi bakule mpa na’shi Yoobo badi muntu e bubi badi mulombene’shi yaya myanda i bukopo imufwile!—Yob. 1:13-22; 2:7-11; 15:4, 5; 22:3-6; 25:4-6.

9. Yoobo bapelele kukita kinyi pabadi mu nkalakashi?

⁹ Yoobo bakitshine kinyi na buno bulwishi? Ta baadi mupwidikye nya. Baadi musashile ba kuuku baye basatu na nsungu, aye nkwakula bintu bibadi mukumiine kunyima’shi bibubi. Badi eamba bu mulalame kukila Efile Mukulu. (Yob. 6:3; 13:4, 5; 32:2; 34:5) Anka, sunga pabadi mu nkalakashi i bukopo, Yoobo bapelele kukatuka kwi Yehowa Efile Mukulu. Bapelele kukumiina madimi a baba ba kuuku baye. Bakwile’shi: “Ntshii mulombeene kukaanya kwakula kwenu nya! Mpaa naa pankafwila, Mpaa na pankafwila, . . . Naalama bululame bwande!” (Yob. 27:5, 6) Bino bishima bi na muulo ukata. Yoobo bapelele kusumbula kululama kwaye; atwe namu twi kukita nka byabya.

10. Mwanda wa Yoobo ubaadi Satana mwibweshe, ngukutale naminyi?

¹⁰ Mwanda ubadi Satana mwibweshe pabitale Yoobo ngukutale naminyi? Bakwile’shi, twemufule Yehowa Efile Mukulu mu binyibinyi nya, we kuleka kumufubila bwa kupasha muwa oobe, na’shi twe mulombene kushala na lulamato kwadi nya! (Yob. 2:4, 5; Kibaf. 12:10) Bopusha naminyi pabitale uno mwanda? Bibakukalakasha ngofu, ta nabyo? Anka, banda kunangushena: Yehowa mmukukulupile mu kipaso kyadi mukupe mushindo wibuwa wa kulesha kululama. Yehowa atadila Satana bwadya nkutompa. Yehowa ashinkamisha’shi we mukumbene kulama kululama koobe na kukwasha bwa kulesha Satana’shi nsha madimi. Na Mmulee’shi a kukwasha. (Eb. 13:6) Nyi nkinemo kikata kya kukulupilwa na Nfumu a eyilu na nsenga! Bomono bwakinyi kululama kwi na muulo? Akwitukwasha bwa kusuuka madimi a Satana na kukwatshishena eshina dibuwa dya Nshetu na bukunkushi bwaye. Twi kukita kinyi bwa kulama kululama kwetu?

11. Nkinyi kyatudi balombene kulongyela kwi Yoobo?

¹¹ Satana mmutamishe ngoshi yaye kwi bafubi b’Efile Mukulu mu ano mafuku “a nfudiilo.” (2 Tim. 3:1) Mu ano mafuku e bubi, mmushindo kinyi watudya kwinyingisha na kulama kululama kwetu? Bwa pano dingi, twi balombene kulongyela bibungi kwi Yoobo. Mafuku ebungi kumpala kwabadya kumutompa, Yoobo badi mupwe kulama kululama kwaye kwi Yehowa. Banda kutala malongyesha asatu atudi balombene kupetela kwadi pabitale byatudya kwitatshisha bwa kulama kululama kwetu.

12. (a) Muyile Yoobo 26:7, 8, 14, mbikunyi bibaadi Yoobo mutamishe moo na kanemo kaye bwa Yehowa? (b) Mbikunyi byatudi balombene kuusha mashimba eetu na moo bwa Yehowa?

¹² Yoobo badi munyingishe kifulo kyaye bwa Yehowa p’aye kumutshinanga ngofu. Yoobo badi mukishe nsaa ibungi atalanga bipangwa bibuwa bya Yehowa. (Badika Yoobo 26:7, 8, 14.) Badi mupushe moo nsaa  ibadi anangushena pabitale nsenga, eyilu, makumbi, na tubadibadi, akupu ashingula’shi ta badi auku bibungi pabitale bipangwa bya Yehowa. Badi mwate dingi midimo ya Yehowa na muulo. Yoobo bakwile pabitale eyi dy’Efile Mukulu’shi: “Ne mupe miiya yaaye kineemo kikile.” (Yob. 23:12) Yoobo badi mukaanye ngofu pabitale Yehowa, aye nkubanga kumunemeka. Badi mufule Nshaaye na badi na lukalo lwa kumusangasha. Pa mwanda wa byabya, Yoobo baadi munyingishe kitshibilo kyaye kya kulama kululama kwaye. Abitungu tukite bibakitshine Yoobo. Atuuku bibungi pabitale bipangwa bya kukaanya kukila bantu ba mu mafuku a Yoobo. Dingi twi na Bible mushima mufundjibwe ku bukwashi bwa kikudi kiselele akitukwasha bwa kuuka kalolo bi Yehowa. Byoso byatulongo abitukwasha bwa kuusha mashimba etu na moo. Wawa moo na kanemo ketu bwa akikyebe Yehowa, abitutakula mu kumufula na kumukokyela na kutamisha lukalo lwetu lwa kulama kululama kwetu.—Yob. 28:28.

13, 14. (a) Bu byabadi baleshe mu Yoobo 31:1, mbikunyi bibaadi Yoobo muleshe’shi e na kukookyela? (b) Twi kulonda kileshesho kyaye naminyi?

¹³ Kukokyela kwa Yoobo mu myanda yoso kubadi kumukwashe bwa kulama lulamato lwaye. Yoobo badi muukye’shi bwa kwikala na kululama abitungu akokyele Yehowa. Byabya, kikitshino kyoso kya kukokyela akinyingisha kitshibilo kyetu kya kulama kululama kwetu. Yoobo badi mwitatshishe ngofu bwadya kukokyela Efile Mukulu mu nshalelo aaye a kwifuku n’efuku. Kileshesho, badi mudimukye pabitale nshalelo aye na muntu’shi mulume naye. (Badika Yoobo 31:1.) Bu bibadi mupwe kwibakila, badi muukye’shi tabibadi buwa kutala mungi mwana mukashi na meso a kumulakila. Lelo uno twi pa nsenga paule bintu bibungi abitutompo bwa kutambuka lusandji. Anka bu Yoobo, atupelaa kutala muntu oso atushii beyibakishene naye eyiso dya kumulakila su? Atupelaa dingi kutala bintu bibutete sunga bifwatulo bya pornografi mu mishindo yabyo yoso su? (Mat. 5:28) Su twelama  byabya efuku dyoso, atwikala banyingye bwa kulama kululama kwetu.

¹⁴ Yoobo badi dingi mukokyele Yehowa mu mushindo ubadi aata bintu bya ku mbidi. Yoobo badi muukye’shi, su bakulupila bintu byadi nabyo mulombene kukita mulwisho ukata na kunyokibwa. (Yob. 31:24, 25, 28) Lelo uno twi mu ndumbulwilo akimbi bintu bya ku mbidi ngofu. Su twekala na nkatshinkatshi pabitale makuta na bintu bya kumbidi, bu byabetulanga mu Bible, atunyingisha kitshibilo kyetu kya kulama kululama.—Nki. 30:8, 9; Mat. 6:19-21.

15. (a) Yoobo badi mukulupile efuto kinyi dibadi dimukwashe bwa kulama lulamato lwaye? (b) Bwakinyi kulama mulayilo wa Yehowa mu binangu akwitukwasha?

¹⁵ Yoobo badi mulame kululama kwaye p’aye kukulupila’shi Efile Mukulu akamupa efuto. Badi ashinkamisha’shi Efile Mukulu badi amono kululama kwaye. (Yob. 31:6) Sunga mbibadi na bitompwanga, Yoobo badi mukulupile’shi Yehowa akamupa efuto. Lwalwa lukulupilo lubadi lumukwashe bwa kulama kululama kwaye. Yehowa badi musangeele kululama kwa Yoobo ngofu Aye nkumufuta bintu bibungi aku badi nka muntu mukutwe kupwidika! (Yob. 42:12-17; Shak. 5:11) Mbalamine Yoobo bwedi bukata mu mafuku aafiki. We na lukulupilo lwi bukopo’shi Yehowa akakupa efuto bwa kululama koobe su? Efile Mukulu etu ta mushintulukye nya. (Mal. 3:6) Su atutentekyesha’shi ataa kululama kwetu na muulo, atulama lukulupilo lwetu bwa myanda ibuwa ayifiki kumpala mu mashimba.—1 Tes. 5:8, 9.

16. Abitungu twikale na kitshibilo kya kukita kinyi?

¹⁶ Ata kitshibilo kya kulama kululama koobe! Ingi nsaa we mukumbene kwipusha bu e bupenka, anka twe bupenka nya. We munkatshi mwa midiyo ya bantu basha lukumino balame kululama kwabo be mu nsenga ishima. Otwele dingi mu mulongo wa balume na bakashi basha lukumino babadi balame lukumino lwabo mu mafuku a kala, mpa na ku kitompwanga kya lufu. (Eb. 11:36-38; 12:1) Twikaleyi boso na kitshibilo kya kulama kululama kwetu nka bu Yoobo, bambile’shi: “Naalama bululame bwande!” Na kululama kwetu kutumbishe Yehowa!