“Atukemonena mu Mpaladiso!”
“OKEEKALA NAAMI MU MPALADIISO.”—LUKA 23:43.
1, 2. Bantu be na mweneno kinyi mwilekene pabitale mpaladiiso?
BAKWETU ba mu maumbo ebungi babafikile mu Séoul, mu Corée bwa kutwela mu kikongeno. Pababadi abatuku mu kipalwe, ba Temwe ba mu Corée babafikile bebefunyisha. Ubadi mwanda wa muloo ukata pabadi bebungi ba kwabadi abepupishena maboko na kwilugushena’shi: “Atukemonena mu Mpaladiiso!” Opwandikisha’shi babadi abesambila mpaladiiso kinyi?
2 Lelo uno bantu be na mweneno mwilekene pabitale mpaladiiso. Bangi abamba’shi mpaladiiso mmwanda wa mpwadikishi. Bangi namu’shi mpaladiiso nyi mbalo yooso yabadi na muloo. Muntu e na nsala ibukopo mushale pa mesa awule bya kudya mukumbene kwipusha bu e mu mpaladiiso. Takudi bipwa bibungi, ungi mwana mukashi badi mumone ebanda dibuwa diule na bilongo bakanyine aye nkwamba’shi: “Yooh, uno mpaladiiso!” Mpa na lelo, yaya mbalo abeyitamina bu Mpaladiiso, sunga mbyabidi’shi neige aponaa mwanka penda mu kipindji kya metre 15 ku kipwa. Opwandikisha’shi Mpaladiiso nkinyi? Okulupila’shi akafiki su?
3. Nsaa kinyi yabadi batemune Mpaladiiso bwa mususa wa kumpala mu Bible?
3 Bible akula pabitale mpaladiiso badi kwanka na akekala kwanka. Atubadika pabitale Mpaladiiso bwa mususa wa kumpala mu mukanda wa kumpala wa mu Bible. Mu Bible a bena Katolike Kibangilo 2:8 abamba’shi: “Mwanana Efile Mukulu bakunyine mpaladiiso a muloo kubanga ku mbangilo: mwamwa mubatudile muntu abapangile.” Bifundwe bya kina Ebelu abisambila ‘lupango lwa Edene.’ Mwaku “Edene” aupatula “Muloo,” na lwalwa lupango lubadi mbalo ya muloo. Lubadi buwa ngofu, na bidibwa bibungi kufukama kubadi pankatshi pa nyema na bantu.—Kibangilo 1:29-31.
abetamina bu Douay, ababadi balule mu Latin, mu4. Bwakinyi twi balombene kwitamina lupango lwa Edene bu mpaladiiso?
4 Mwaku wa mu kina Ebelu wabadi batemune bu “lupango,” mbewalule mu kina Greke bu pa·raʹdei·sos. Ungi mukanda wabetamina bu Cyclopaedia wa M’Clintock na Strong aulesha’shi nsaa ayipusha mwina Greke kishima pa·raʹdei·sos, mukumbene kupwandikisha na kintu kibuwa, eyamba dikata dyabadi bakalwile ku kintu kyoso kya kwidilwisha, di na mitshi ibuwa ayitusha bikuba na mwi mwela wi na kimwaa kyabafiki mu kukusula kwi kisaka kya nyema ya ngulungu na mikooko.—Tala dingi byabidi mu Kibangilo 2:15, 16.
5, 6. Bwakinyi Adame na Eeva babashimishe kinemo kyabo kya kushaala mu Mpaladiiso, na bangi be kwiyipusha naminyi?
5 Yehowa batudile Adame na Eeva mu lupango lwi byabya, mu mpaladiiso. Kadi pamwanda wa kukutwa kwabo kwa kukokyela Yehowa, mbashimishe kinemo kya kushaala mu Mpaladiiso, bwabo mpana bana babo. (Kibangilo 3:23, 24) Sunga byekala’shi takubadi dingi muntu mushaale mu Mpaladiiso, abimweneka’shi badi kwanka mpa na mu mafuku a Mpeshi a kabutu mu mafuku a Nowa.
6 Bangi be kwiyipusha’shi: ‘Akwikala dingi Mpaladiiso pa nsenga su?’ Nkinyi akibishinkamisha? Su okulupila nkashaala na bakwenu mu Mpaladiiso, we na kinyi akikushinkamisha lwalwa lukulupilo? We kupatuula bwakinyi twi balombene kushinkamisha’shi akwikala mpaladiiso mu mafuku e kumpala su?
AKISHINKAMISHA’SHI AKWIKALA MPALADIISO
7, 8. (a) Efile Mukulu balayile Abrahame kinyi? (b) Mulayilo w’Efile Mukulu ubadi utakule Abrahame mu kunangushena pabitale kinyi?
7 Mbalo ibuwa yatudya kupeta ngaluulo ku ino nkonko pabitale Mpaladiiso nyi mu Bible, mwanda uno mukanda aufiki kwi Yehowa, aye bapangile Mpaladiiso ku kibangilo. Banda kutala bibadi Efile Mukulu mulungule kuuku aaye Abrahame. Efile Mukulu bambile’shi afwimisha lutandwa lwa Abrahame “bu misengyeeya ya ku bukunkula bwa mbuu.” Akupu Yehowa batushishe uno mulayilo ukile buwa kwi Abrahame “mmwaludi [lutandwa] amusampiibwa bisamba byooso bya pa nsenga mwanda we muteemeshe eyi dyande.” (Kibangilo 22:17, 18) Kunyima, Efile Mukulu bambulwile dingi wawa mulayilo kwi mwana a Abrahamena na kwi mwikulu aye.—Badika Kibangilo 26:4; 28:14.
8 Ta kwi mbalo mu Bible ayilesha’shi Abrahame badi apwandikisha’shi bantu abakapete bwedi bwa nfudiilo mu mpaladiiso mwiyilu nya. Byabya Efile Mukulu pabalayile’shi: “Bisamba byooso bya pa nsenga” abikedibwa mwabi, Abrahame badi mukumbene kunangushena’shi ino myabi ibadya kwikala pa nsenga. Byabya nka penda kino ndjo kishinkamisho ki mu Bible akilesha’shi akwikala mpaladiiso pa nsenga su?
9, 10. Mmilayilo kinyi ibatukile ayitupa kabingilo ka kukulupila’shi akwikala mpaladiiso mu mafuku e kumpala?
9 Efile Mukulu badi muyokyele Daavide, mwikulu a Abrahame bwadya kwakula pabitale mafuku e kumpala’shi: “Taakwikala mubi dimo.” (Misambo 37:1, 2, 10) Anka, “beyishe namu, abapyaana nsenga, abasangeela mu butaale bw’eyendo.” Daavide batemukile dingi’shi: “Balulame abapete eumbo [nsenga], abemushaala looso.” (Misambo 37:11, 29; 2 Samwele 23:2) Opwandikisha naminyi pabitale bukitshishi bubadi nabo ino milayilo kwi bantu babadi abakumina kukita akikyebe Efile Mukulu? Babadi na kabingilo ka kukulupila’shi dingi efuku penda bantu balulame nyi abekala pa nsenga na’shi ayikaluka mpaladiiso nka bibadi lupango lwa Edene.
10 Mu kwenda kwa mafuku, bena Isaleele bebungi babadi abeamba’shi mbafubi ba Yehowa babadi bamupele na kusumbushena lulangwilo lwa binyibinyi. Nyi Efile Mukulu nkulekyela bwa’shi bena Babilone bakwate mwilo waaye, balwishe nsenga yabo, na bende nabo mu bupika. (2 Myanda 36:15-21; Yeelemiya 4:22-27) Anka batemuki b’Efile Mukulu babadi batemukye’shi mwilo waaye awalukila mwiumbo dyao kunyima kwa bipwa 70. Na ano matemuki abalombene. Kadi e na bukwashi kwatudi natwe lelo uno. Patukwete kwisambila angi a ku aa matemuki, atumono kabingilo katudi nako ka kukulupila’shi akwikala mpaladiiso pa nsenga.
11. Mushindo kinyi ubadi Yeeshaya 11:6-9 mulombane bwa mususa wa kumpala, byabya tuki na lukonko lwa kwiyipusha su?
11 Badika Yeeshaya 11:6-9. Efile Mukulu batemukile ku bukwashi bwa mutemuki Yeeshaya’shi, nsaa ayikalukila bena Isaleele mu nsenga yabo, mu nsenga amukekala butaale. Takwi muntu akapusha moo wa kukwatshibwa na nyema ibukyelo sunga na bantu. Bakulu na bakinga abekala mu butaale. Bino abikutentekyesha nshalelo a butaale badi mu lupango lwa Edene su? (Yeeshaya 51:3) Yeeshaya batemukile dingi’shi nsenga ishima, kushi penda mwilo wa Isalele ‘ayikala iwuule na kuuka kwa Yehowa, abyuulaa meema mu mbuu.’ Abikalombana mafuku kinyi? Abimweneka patoka’shi, bino mbitale mu mafuku e kumpala.
12. (a) Boso babadi na kya kukatuka mu bupika mu Babilone babadya kupeta myabi kinyi? (b) Nkinyi akilesha’shi Yeeshaya 35:5-10 akalombana mu mafuku e kumpala?
12 Badika Yeeshaya 35:5-10. Lamina’shi Yeeshaya batemukile’shi bena Isalele abakatuka mu Babilone bwa kwenda kwabo t’abakebalwisha kwi nyema sunga bantu. Bambile’shi nsenga yabo ayikaulu bidibwa bibuwa mwanda akwikala mema ebungi, nka bibadi mu lupango lwa Edene. (Kibangilo 2:10-14; Yeelemiya 31:12) Buno butemuki bubadya kulombana nka penda mu mafuku a baba bena Isalele su? Lamina’shi butemuki bubambile’shi mpofu, sha kilema na nshikwe abakapanda. Anka bino tabibadi bikitshikile bena Isaleele babakatukile mu Babilone baluka kwabo nya. Mwanda, Efile Mukulu badi muleshe’shi akapasha mikumbo yoso mu mafuku e kumpala.
13, 14. Yeeshaya 65:21-23 balombene naminyi pabakatukile bena Isalele mu bupika mu Babilone, kadi nkipindji kinyi kya bwabwa butemuki kishi kibande kulombana? (Tala kifwatulo ki ku mbangilo.)
13 Badika Yeeshaya 65:21-23. Bena Yuuda pababalukile mu nsenga yabo, tababadi bapete mashibo ebuwa sunga mafuba a nfinyo nya. Anka pa mwanda wa’shi Efile Mukulu badi mwibelele mwabi, myanda ibashintulukile. Banda kupwandikisha muloo ubadi nao bantu nsaa ibabadi bebakye mashibo abo na kwimushala bwa kusangeela bidibwa bibuwa bibabadi bakune!
14 Lamiina’shi muyile buno butemuki, mafuku etu aekala “bii bungi bwa mafuku a mutshi.” Ingi mitshi ayipwiyaa bipwa binunu. Bwa kupwa mafuku ebungi byabya, abitungu bantu bekale na mbidi bukome. Anka su bekala mu mbalo ifukame, ibuwa ibabadi batemukye kwi Yeeshaya, ibadi buwa ngofu, mpaladiiso! Na bwabwa butemuki abukalombana!
Mushindo kinyi aukalombana mulayilo wa Yesu pabitale Mpaladiiso? (Tala kikoso kya 15, 16)
15. Ngingi myabi kinyi yabadi baleshe mu mukanda wa Yeeshaya?
15 Banda kunangushena pabitale milayilo ibatukatuka mu kwisambila ayilesha’shi akwikala mpaladiiso mu mafuku e kumpala. Nsenga ishima ayikaulu na bantu babadi bele mwabi kwi Efile Mukulu. Takwi muntu akatshinyi’shi abakamulwisha kwi nyema sunga bantu. Ba mpofu, nshikwe, na basha bilema abakapanda. Bantu abakebaka mashibo abo na kukuna bidibwa. Abakapu mafuku e bungi bwi mumune na a mutshi. Eyendo, Bible atusha bishinkamisho bya’shi mpaladiiso ekala kwanka. Kadi bangi bantu batwisamba nabo mbalombene kwamba’shi ano matemuki taalesha’shi akwikala mpaladiiso pa nsenga. We kwibalungula kinyi? We na kabingilo kinyi kakata ka kukulupila
mpaladiiso pa nsenga? Yesu, muntu mukata mukile bantu boso, etupa kabingilo kakata.OKEKALA MU MPALADIISO!
16, 17. Nsaa kinyi ibadi Yesu mwakule pabitale Mpaladiiso?
16 Sunga Yesu tabadi mukite kintu, badi mutshibilwe kibawe abo nkumupudika ku mutshi, na ba ntomboshi bena Yuuda au ku lupese lwa mboko ibalume au kulupese lwa mboko ibakashi. Umune a kwabadi badi mutundule’shi Yesu badi nfumu aye nkwamba’shi: “Ontentekyeshe namu, nfumu, pokafiki mu Bufumu boobe.” (Luka 23:39-42, Kilombeeno kipya 2014) Mulayilo ubabapele ntomboshi kwi Yesu ngutale mafuku obe aafiki. Mayi a Yesu e mu Luka 23:43. Bangi bantu balongye ngofu abelaa kakoselo sunga’shi (virgule) ku mpala kwa mwaku “lelo uno” na kwalula aa mayi’shi: “Eyendo na kulungula’shi, lelo uno wekala nami mu Mpaladiiso.” Kwi mweneno mwilekene pabitale mbalo ya kwela kakoselo mu wawa mulongo. Kadi Yesu badi akyebe kwamba kinyi pabambile’shi “lelo uno”?
17 Mu ndimi ibungi ya ano mafuku, tukoselo abetwelaa bwa kupatuula milongo kalolo. Anka mu bifundwe bya kina Greke bya kumpala, bitundwilo abilesha pa kwimena nsaa yobadika (ponctuation) tababadi abakamba kwibifubisha nya. Twi balombene kwiyipusha’shi: Yesu badi amba’shi: “Nakulungula’shi, lelo uno okeekala naami mu Mpaladiiso”? Su badi amba’shi: “Nakulungula lelo uno’shi, okeekala naami mu Mpaladiiso”? Baluudi abelaa kakoselo kumpala sunga kunyima kwa mwaku “lelo uno” muyiile byabapwandikisha’shi mbibambile Yesu, na we kupeta umune a ku ino nfundilo mu ma Bible e kwanka lelo uno.
18, 19. Nkinyi akitukwasha bwa kupusha bibakwile Yesu?
18 Byabya, tentekyesha bibadi Yesu mulungule balondji baye pabitale lufu lwaye. Bambile’shi: “Mwan’a-muntu ayikala mu nsenga, mund’a mafuku asatu a kaanya na mafuku asatu a bufuku.” Bakwile dingi’shi: “Mwan’a-muntu akapanyiibwa mu maasa a bantu; abamwipaa, ank’efuku dyaa-kasatu, asanguka.” (Mateo 12:40; 16:21; 17:22, 23; Maako 10:34) Mpyeele mutumibwa alesha’shi bino bibakitshikile. (Bikitshino 10:39, 40) Byabya Yesu tabadi mwende mu Mpaladiiso mwifuku dibabafwile na yawa ntomboshi nya. Bible amba’shi yesu badi “mu Mashama” munda mwa mafuku asatu, mpa na nsaa ibabamusangwile kwi Efile Mukulu.—Bikitshino 2:31, 32, NWT. *
19 Yesu badi mwakule’shi: “Eyendo nakulungula lelo uno,” kumpala kwa kulaa ntomboshi. Uno nyi ngakwilo badi naye bantu mpa na mu mafuku a Moyiise. Ungi mususa Moyiise bakwile’shi: “Bishima bya mayi ankupa lelo biikale kwishimba dyoobe.”—Miiya Ikituulwe 6:6; 7:11; 8:1, 19; 30:15.
20. Nkinyi akitukwasha bwa kupusha bino bibakwile Yesu?
20 Mungi mwaludi a Bible a mu mbalo ibadi ishale Yesu bambile’shi: “Mu kino kifundwe mbashimikye kasele pa mwaku ‘lelo’ na abitungu kwikibadika’shi: ‘Eyendo na kulungula lelo uno’shi, okeekala nami mu Mpaladiiso.’ Mulayilo ubatukile dyadya efuku na ubadi na kya kulombana kunyima.” Yawa mwaludi bambile dingi’shi bino nyi bibadi abyakula bantu ba mu yaaya mbalo na kulesha’shi “mulayilo ubadi autuku efuku kampanda na kulombana mu dingi efuku, bibadi abitungu kwiulama.” Bifundwe bya Syriaque bya mu siekele a katano pa uno verse mbalule’shi: “Amene, nakulungula lelo uno’shi obe wekala nami mu Lupango lwa Edene.” Uno mulayilo wi na kya kwitunyingisha.
21. Nkinyi kishibadi kifikile yawa ntomboshi na bwakinyi?
21 Pabadi Yesu mulungule yawa ntomboshi pabitale Mpaladiiso, tabadi akwila mpaladiiso mwiyilu nya. Atwibiuku naminyi? Kabingilo Luka 22:29) Na dingi, yawa ntomboshi tabadi mubatshishibwe. (Yowano 3:3-6, 12) Byabya Yesu pabadi mulee ntomboshi, badi akwila pabitale mpaladiiso pa nsenga. Kunyima kwa bipwa, Mpoolo mutumibwa bakwile pabitale kimonwa kya muntu “baadi musemunyiibwe nyaa mpa na mu mpaladiiso.” (2 Beena-Kodinda 12:1-4) Sunga byekala’shi Mpoolo na bangi batumibwa babadi bebasangule bwa kwenda mwiyilu mu kumunana na Yesu, Mpoolo badi esambila mpaladiiso afiki kumpala. * Yawa mpaladiiso ekala pa nsenga su? Okekala mwanka?
ka kumpala nka’shi yawa ntomboshi tabadi sunga auku’shi Yesu bakitshine kilombeno na batumibwa basha kululama bwashi bakamunane naaye mwiyilu. (KYODI MULOMBENE KUKULUPILA
22, 23. We mukumbene kukulupila kinyi?
22 Tentekyesha’shi Daavide mwakule pabitale nsaa i “balulame abapete eumbo.” (Misambo 37:29; 2 Mpyeele 3:13) Daavide badi akwila nsaa ayikekala bantu boso ba pa nsenga na kya kokyela miiya ilulame y’Efile Mukulu. Butemuki bwi mu Yeeshaya 65:22 abulesha’shi: “Bii bungi bwa mafuku a mutshi ngi abiikala bungi bwa mafuku a bantu bande.” Bino abilesha’shi bafubi ba Yehowa mu nsenga ipya abekala na muwa munda mwa bipwa binunu. Okulupila byabya su? Oolo mwanda Kibafumbwilwe 21:1-4, Efile Mukulu akelela bantu mwabi na umune wa ku yaya myabi awikala’shi “lufu taalwikala kwanka dimo.”
23 Abilongyesha Bible pabitale Mpaladiiso abipushika. Adame na Eeva bashimishe kinemo kya kwikala na muwa mu Mpaladiiso, anka nsenga ayikala dingi mpaladiiso. Nka bibalayile Efile Mukulu, akelela bantu be pa nsenga mwabi. Daavide bambile’shi beyishe na bantu balulame abakapyana nsenga na kushala mwanka looso. Na matemuki e mu mukanda wa Yeeshaya aetukwasha bwa kukulupila nsaa yatukapete muwa mu mbalo ibuwa mu mpaladiiso pa nsenga. Abikala mu mafuku kinyi? Apakalombana mulayilo wa Yesu kwi ntomboshi. We mukumbene kwikala mu yawa Mpaladiiso. Mu yaaya nsaa, byabya bibakwile bakwetu babadi mu kikongeno mu Corée shi: “Atukemonena mu Mpaladiiso!” Abikalombana.
^ par. 18 Mulongyeshi C. Marvin Pate bafundile’shi bantu bebungi balongye ngofu abamba’shi, Yesu pabambile’shi “lelo uno,” badi akyebe kulesha’shi afu na ekale mu Mpaladiiso mu dyadya efuku, sunga munda mwa nsaa 24. Mulongyeshi Pate akula dingi’shi uno mweneno tepushena na abilesha Bible nya. Kileshesho, Bible amba’shi, Yesu badi mu Mashama kunyima kwa lufu lwaye na kunyima aye nkwenda mwiyilu.—Mateo 12:40; Bikitshino 2:31; Beena-Looma 10:7.
^ par. 21 Tala “Nkonko ya bantu ababadikaa”.