1, 2. (a) Yesu balulwile naminyi nsaa ibabamulungwile kwi Mpyeele’shi Efile Mukulu akukumbe? (Tala kifwatulo ki ku mbangilo.) (b) Bwakinyi Yesu badi mumwalule mu uno mushindo?

BALONGI ba Yesu babadi benyongole ngofu! Babadi abanangushena’shi Yesu badi mulombene kwalushuula bufumu bwa Isaleele, anka Yesu bakwile’shi mu mafuku apeela’mu abakamukyengyesha na kumwipaa. Mpyeele mutumibwa bakwile’shi: “Efile Mukulu akukumbe kwanka, Mwanaana! Nya, kyaakya takikukitshikila.” Yesu nkumwalula’shi: ‘Kila kumongo kwande kafilefile’be! We kikokoshi kyande, mwanda kyobe kinangu tanky’Efile Mukulu nya, nkya bantu.’—Mateo 16:21-23; Bikitshino 1:6.

² P’aye kwakula byabya, Yesu badi muleshe patooka’shi, ngelelo a binangu a Yehowa mwilekene na a uno ndumbulwilo abakunkusha kwi Satana. (1 Yowano 5:19) Mpyeele badi munyingishe Yesu bwadya kwikala na binangu bya ku mbidi bikale na bantu bebungi mu uno ndumbulwilo. Anka Yesu badi auku’shi Yehowa akumina’shi elumbuule aye nabene bwa dikyenga na kwipayibwa kubadi kulombene kumufikila kunyima kwa kapindji kapeela. Lwalulo lwa Yesu lubalesheshe patooka’shi badi mukumine binangu bya Yehowa na kusumbula  binangu bya uno ndumbmulwilo n’eshimba dyaye dyoso.

3. Bwakinyi bi bukopo kukumina ngelelo a binangu a Yehowa na kupela ngelelo a binangu a uno ndumbulwilo?

³ Atwe namu bi kwikala naminyi? Twi na binangu bu bya Yehowa su twi na binangu bu bya bantu ba mu uno ndumbulwilo? Nka bu Kidishitu, natwe namu abitungu twikitshishe na bukome bwetu boso bwa kwikala bashinkamishe’shi myanda yatukitshi ikwete kusankisha Efile Mukulu. Byabya bi kwikala naminyi pabitale mushindo watukwete kunangushena? Tukwete kwikitshisha na bukome bwetu boso bwa kunangushena bu abinangushenaa Yehowa, kwamba’shi kumonaa myanda bu abiyimona Yehowa su? Bwa kukita bino abitungu kwikitshisha na bukome bwetu boso. Byabya kunangushena bu abinangushenaa bantu ba mu uno ndumbulwilo nkubofule ngofu. Mwanda kikudi kya uno ndumbulwilo nkitwifunyishe atwe boso. (Beena-Efeso 2:2) Na dingi, misusa ibungi bantu ba mu uno ndumbulwilo abakimbi nka buwa bwabo, na twi kwikala mu kitompwanga kya kubanga kunangushena bu’bo. Kushi mpaka, bibukopo kunangushena abinangushenaa Yehowa, anka mbibofule kunangushena abinangushenaa bantu ba mu uno ndumbulwilo.

4. (a) Nkinyi akikitshika su tubalekyela’shi uno ndumbulwilo ekale na bukitshishi mu binangu byetu? (b) Nkinyi kyatukalongo mu uno mwisambo?

⁴ Su tubatadila’shi uno ndumbulwilo ekale na bukitshishi mu binangu byetu, atukekala nka befule atwe banabene na atukakumina kwiatshila bitshibilo bibuwa na bibubi. (Mako 7:21, 22) Byabya abitungu tulongye bya kunangushena ku ‘binangu by’Efile Mukulu’ kadi kushii ‘bya bantu.’ Uno mwisambo awuketukwasha bwa kwikala atwibikitshi. Atukamono kabingilo akalesha bwakinyi kumona myanda bu abiyimonaa Yehowa takwitukutshishwa bulungantu bwetu nya, kadi kwi na myabi ibungi. Atukalongo mushindo watudi balombene kusumbula binangu bya uno ndumbulwilo, sunga bukitshishi ku bukwashi bwa ano mayi. Mu mwisambo aulondo, atukalongo mushindo watudi balombene kupeta binangu bya Yehowa mu ingi myanda na kwibikasha bu byetu.

5. Bwakinyi bangi bantu tabakuminaa’shi muntu su ngumune e bakunkushe?

⁵ Bangi bantu tabakuminaa’shi muntu su ngumune ekale na bukitshishi ku mushindo wabanangushena nya. Abakula’shi: “Nanangushena bwande ami nabene.” Nka bu abakyebe kupushisha’shi abakumina kwata bitshibilo byabo abo banabene, na’shi be na matalwa a kwikitshina myanda. T’abakumina bangi bantu bebakunkusha sunga kwibakitshisha pa bukopo bwa kukita abikumina namu bangi nya. *

6. (a) Mbulungantu kinyi bwabetupeyaa kwi Yehowa? (b) Buno bulunngantu mbukutwe mikalo su?

⁶ Bibuwa kuuka’shi, su atukumina binangu bya Yehowa, twi nka na etu mmweneno. Mukanda wa 2 Beena-Kodinda 3:17 awakula’shi: “Kwakwa kwi kikudi kya Yehowa, kwakwa ngi kwi bulungantu.” Yehowa mmwitupe bulungantu bwa kusangula byatukumina kwikala. Twi balombene kwikala na eetu mweneno na kusangula myanda ayitusankisha atwe banabane. Yehowa mmwitupangye mu uno mushindo. Anka bino tabipushisha’shi twi na bulungantu bushii na mikalo nya. (Badika 1 Mpyeele 2:16.) Su atukumina kuuka kintu kibuwa na kibubi, Yehowa akumina’shi tufubishe Eyi dyaye ditukunkushe. Kukita bino akwitwikasha mu ka mbungye, su akwitupetesha myabi?

7, 8. Kumona myanda abiyimono Yehowa akwitukutshisha bulungantu su su? Tusha kileshesho.

⁷ Tubande kwata kino kileshesho. Ba nambutwile abekitshishaa bwa kulongyesha bana babo miya ya mu nshalelo. Mbalombene kwibalongyesha bwabadya kwikala balulame, bekale abafubu ngofu, na bwabadya kwikala  abapasukila bangi. Bino tabibekasha mu ka mbungye sunga kwibakutshishwa bulungantu bwabo nya. Mwanda abalumbulwila bana babo bwabadya kwikala na nshalelo a muloo. Su bana babakulu, babakatuka ku nshibo, abekala na bulungantu bwa kwiatshila bitshibilo abo banabene. Su babakumina kwikala na nshalelo muyiile miya i bababadi bebalongyeshe kwi banambutwile abibakwasha bwabadya kwata bitshibilo bibuwa bwa kupela kupeta nkalakashi ibungi, twinyongoshi, na kwialashena.

⁸ Nka bu bano ba nambutwile bebuwa, Yehowa akumina’shi atwe bana baye twikale na nshalelo ebuwa muyiile ngobesha yetu. (Yeeshaya 48:17, 18) Etulongyesha mayi a kulonda atale nshalelo, mwikeelo na mushindo watudi balombene kukitshina bangi myanda. Etwitanyina bwatudya kulonga bya kumona myanda mu mushindo weyimonaa na kwikala na nshalelo mwipushene na miya yaye. Tayitukutshisha bulungantu nya. Anka, ayitupa binangu na kwitukwasha bwatudya kwata bitshibilo bibuwa. (Misambo 92:5; Nkindji 2:1-5; Yeeshaya 55:9) Atwwikala na etu mweneno a myanda, anka atwata bitshibilo abitwikasha na muloo. (Misambo 1:2, 3) Su tubekala na binangu bya Yehowa, abitukwasha mu mishindo ibungi!

9, 10. Nkinyi akilesha’shi binangu bya Yehowa mbitabukile bya bantu ba mu uno ndumbulwilo?

⁹ Kangi kabingilo aketutakula bwatudya kukumina kwikala atunangushena abinangushenaa Yehowa nka’shi, binangu byaye mbitabukile bya bantu boso ba mu uno ndumbulwilo. Mu uno ndumbulwilo bantu bakwete kutusha malango ebungi pabitale mwikelo wibuwa, bya kwikala na nshalelo a muloo mu kifuko, na kutusha bipeta bibuwa mu mudimo wetu, na ingi myanda ya mu nshalelo. Anka malango abo ebungi tangepushene na binangu bya Yehowa. Bu kileshesho, bantu ba mu uno ndumbulwilo bakwete kukankamika bangi bwabadya kukimba nka penda buwa bwabo’bo banabene na kumona’shi kutambuka lusandji ta kwi bubi. Na ingi misusa, abalungula bantu beyibakishene’shi mbalombene kwikala na muloo sunga belekena sunga kutshiba eyibakishi apatuku tu myanda tupela. Dino elango ndikutwene na abilongyesha Bible. Anka twi kwamba’shi elango dya bantu ba mu uno ndumbulwilo di buwa kukila dya mu Bible su?

¹⁰ Yesu bambile’shi: ‘Kinangu akitundulwa bu kilulame muyiile mifubo yakyo.’ (Mateo 11:19) Sunga bantu benda kumpala mu myanda ya bu nsendwe, ta mbapete ngobesha ya kupudisha myanda ikata ayitukutshishwa kwikala na muloo nya; bu ngoshi, ntondo, na bu ntomboshi. Na dingi, bantu ba mu uno ndumbulwilo abamono lusandji bu mwanda wibuwa. Anka bantu bebungi abashinkamisha’shi lusandji alwipaa bifuko, alupa bantu mikumbo, na alutusha bingi bipeta bibubi. Twi kwamba naminyi pabitale malango a Yehowa. Bena Kidishitu abakumina mweneno a Yehowa be na muloo wibungi mu bifuko byabo, be na mbidi bukome, na be mu kipwano kibuwa na bakwabo balume na bakashi be mu nsenga ishima. (Yeeshaya 2:4; Bikitshino 10:34, 35; 1 Beena-Kodinda 6:9-11) Bino abilesha’shi binangu bya Yehowa mbitabukile bya bantu boso.

11. Nnanyi badi mulongyeshe binangu bya Moyiise, na bino bibadi bitushe bipeta kinyi?

¹¹ Bafubi ba Yehowa basha lulamato ba kala abadi abauku’shi binangu bya Yehowa mbitabukile bya bantu. Bu kileshesho, sunga mbibadi Moyiise mulongye “myanda yooso ya binangu bya bena Ejiipitu,” badi auku’shi binangu bya binyibinyi abifiki kwi Yehowa. (Bikitshino 7:22; Misambo 90:12) Ngi bwakinyi batekyele Yehowa’shi: “Ngukishe eshinda dyoobe.” (Efilu 33:13) Bu bibadi Moyiise mutadile bwa’shi Yehowa alongyeshe binangu byaye, Yehowa badi mufube naye mu mushindo wa kukaanya bwadya kulombasha mpango Yaye na badi mupe Moyiise kinemo pa kumwitanyina bu muntu sha lukumino lunyingye.—Beena-Ebelu 11:24-27.

12. Mpoolo badi aata bitshibilo bimeene pa kinyi?

¹² Mpoolo mutumibwa badi na binangu bibungi, badi mulongye ngofu, na dingi badi akula ndimi ibidi. (Bikitshino 5:34; 21:37, 39; 22: 2, 3) Anka badi musumbule binangu bya pa nsenga na badi mwate kitshibilo kimeene mu Eyi dy’Efile Mukulu. (Badika Bikitshino 17:2; 1 Beena-Kodinda 2:6, 7, 13.) Bu kipeta, badi mutushe bipeta bibuwa mu bulungudi na badi akulupila kupeta efuto dya ikalaika.—2 Timote 4:8.

13. Nnanyi e na bushito bwa kulumbuula binangu byetu bwa’shi twikale atumono myanda bu byabeyimonaa kwi Yehowa?

¹³ Mu binyibinyi, binangu by’Efile Mukulu mbitabukile bya bantu ba mu uno ndumbulwilo. Su tubalondo miya y’Efile Mukulu, atukekala na muloo wa binyibinyi na atukoobesha myanda yoso yatukitshi. Yehowa tetukitshishaa pa bukopo bwatudya kunangushena bu byanangushenaa nya. Bakulu na “mpika a kishima na mupatulukye” tabetukitshisha pa bukopo nya bwatudya kuludika binangu byetu. (Mateo 24:45; 2 Beena-Kodinda 1:24) Muntu oso a kwatudi e na bushito bwa kulumbuula binangu byaye bwa’shi ekale amono myanda bu byabeyimonaa kwi Yehowa. Twi kukita bino naminyi?

14, 15. (a) Abitungu twikale atunangushena ku myanda kinyi bwatudya kunangushena abinangushenaa Yehowa? (b) Bwakinyi ta twi balombene kutadila bwa’shi binangu bya uno ndumbulwilo bitwele mwatudi? Tusha kileshesho.

¹⁴ Mukanda wa Beena-Looma 12:2, (Esambi dipya 2015) awamba’shi: “Tanwifwanishenanga na bantu ba kino kipungo. Anka nwikaale baaluulwe mu kukituulwa kwa binangu byenu, bwanudya kushinguula kikyebe ki’eshimba di’Efile Mukulu, kii buwa na kilumbulukye na kipwidikye.” Uno verse etulongyesha’shi sunga binangu byetu byekala bipwe kulongyeshibwa na kinyi kumpala kwa kulonga bya binyibinyi, twi balombene kushintuula mweneno eetu bwa’shi ekale e mumune na a Efile Mukulu. Sunga byekala’shi twi bambule betutande sunga’shi myanda yatudi bamone mu muwa wetu bi kwikala na bukitshishi ku binangu byetu, binangu byetu mbilombene kwenda na kushintuluka. Na abikashintuluka muyiile myanda yatukumina kwikala atunangushena. Su tubekala atunangushena ku mushindo aunangushenaa Yehowa, atukalesha’shi uno mweneno aaye mmululame. Su tubakitshi byabya, atukekala na lukalo lwa kumona myanda mu mushindo wabeyimonaa kwi Yehowa.

¹⁵ Anka bwa kushintuula binangu byetu bwatudya kunangushena bu abinangushenaa Yehowa, abitungu ‘tulekye kwifwanyishena na bantu ba kino kipungo.’ Bino abipushisha’shi abitungu tulekye, kubadika, na kuteemesha kintu kyoso ki na binangu bikutwene na abinangushenaa Efile Mukulu. Bwa kwitukwasha bwatudya kupusha muulo wa kukita bino, tubande kwata kileshesho kya bya kudya. Muntu akumina kwikala na mbidi ibuwa, ataa kitshibilo kya kudya bidibwa bikile buwa. Anka kwitatshisha kwaye nkulombene kukutwa kutusha bipeta bibuwa su ekala adi bintu bipwe kukisha mafuku sunga bilwile! Mu mushindo umune, kwitatshisha kwetu koso bwa kulonga bya kuuka abinangushenaa Yehowa nkulombene kwenda mu bisumanga su twakumina’shi binangu bya mu uno ndumbulwilo bikale abitwele mu binangu byetu.

16. Abitungu twikalwile ku kinyi?

¹⁶ Twi balombene kusuuka binangu bya uno ndumbulwilo mu myanda yoso su? Nya, atukekala nka kumpala kwa bingi binangu bya uno ndumbulwilo mwanda ta twi balombene kwimukatuka nya. (1 Beena-Kodinda 5:9, 10) Sunga nsaa yatudi mu bulungudi, twi balombene kupusha bantu abakula myanda byayishidi mpa na malongyesha a madimi. Anka sunga ta twi balombene kusuuka binangu byoso bibubi bya mu uno ndumbulwilo, tabitungu tutungunukye na kunangushena ku byanka sunga kwibikumina nya. Nka bu Yesu, abitungu twikale atusumbula bukidibukidi binangu byoso byabakumina kutwesha mwatudi kwi Satana. Na dingi twi balombene kwikalwila pa kusuuka bwa kupela kupusha binangu bya uno ndumbulwilo.—Badika Nkindji 4:23.

17. Twi kusuuka binangu bikutwene na by’Efile Mukulu naminyi?

¹⁷ Bu kileshesho, abitungu tusangule bakuuku  sunga baloole betu kalolo. Bible etudimusha’shi, su tubekala bakuuku ba bantu bashi’abalangwila Yehowa, atukabanga kwambula binangu byabo. (Nkindji 13:20; 1 Beena-Kodinda 15:12, 32, 33) Abitungu dingi tusangule kalolo mishindo ya kukisha kapapi. Su tubapele mishindo ya kukisha kapapi ayikwatshishena binangu bya’shi bintu mbituukile, binangu bya bu ntomboshi, sunga bya lusandji, atukapele kulwisha binangu byetu na binangu bikutwene “na kyuukilo ky’Efile Mukulu.”—2 Beena-Kodinda 10:5.

18, 19. (a) Bwakinyi abitungu twikale badimukye pabitale binangu bya mu uno ndumbulwilo byabapalakasha mu mishindo ifwame? (b) Nkonko kinyi ayitungu’shi twiyipushe, na bwakinyi?

¹⁸ Abitungu dingi tushingule na kusumbula binangu bya mu uno ndumbulwilo nsaa yabetulungula byanka mu mishindo ifwame. Bu kileshesho, ingi myanda yabakula ku bisaashi abeyakula mu mushindo aukwatshishena myanda ya politike mu bufyefye. Na ingi myanda yabalondo ayikwatshishena bipatshila na myanda yabakumina kwi bantu ba mu uno ndumbulwilo. Angi ma filme na mikanda ayikwatshishena binangu bya “kubanda kwisankisha” na “kubanda kusankisha bifuko byabo” na dingi ayilesha bino binangu bu bibuwa, abisankisha, na bilulame. Anka uno mweneno mwikutwene na abilongyesha Bible. Akula’shi, atwe na bifuko byetu twi balombene kupeta muloo wa binyibinyi nsaa yatufulu Yehowa kukila bingi bintu byoso. (Mateo 22:36-39) Na dingi, ingi myanda yabalongyesha bana bakinga, sunga byekala’shi mbeyikumine kwi bantu bebungi, ngilombene kutakula bana bwabadya kumona kutambuka lusandji bu mwanda wibuwa.

¹⁹ Bino tabilesha’shi bibubi kukisha kapapi mu mushindo wibuwa nya. Anka abitungu twiyipushe’shi: ‘Natundulaa binangu bya uno ndumbulwilo sunga byekala bifwame su? Nkwete kukalwila bana bande na kwikalwila ami nabene ku ingi miisambo ya ku televizion na mu mikanda su? Nkwete kukwasha bana bande bwabadya kwikala na mweneno a Yehowa bwabadya kupela kulonda binangu bya uno ndumbulwilo byabapusha sunga byabamono su?’ Su tubashinguula kwilekena kwi pankatshi pa binangu bya Yehowa na bya uno ndumbulwilo, twi balombene kupela ‘Kwifwanyishena na bantu ba kino kipungo.’

20. Nkinyi akilesha muntu atukwete kwifwana?

²⁰ Abitungu tushinguule’shi myanda yoso ayipalakana mu nsenga ayituukila nka penda kwi bantu babidi. A kumpala Yehowa, na a kabidi Satana na ndumbulwilo aaye. Obe okwete kwifwana nnanyi? Lwalulo lwi’shi, okwete kwambula ngyawa okwete kuteemesha myanda yaye. Su bokumina binangu bya uno ndumbulwilo, obanga kwambula binangu bya uno ndumbulwilo na okabanga kunangushena na kukita myanda ayilesha’shi okimbi penda buwa bobe. Ngi bwakinyi bi na muulo ngofu bwatudya kusangula kalolo myanda yatutala, yatubadika, yatuteemesha, na yatunangushena.

21. Nkinyi kyatukesambila mu mwisambo aulondo?

²¹ Mu uno mwisambo tubakatuka mu kulonga’shi, bwa kwikala na binangu Yehowa, abitungu tushikwe binangu bya uno ndumbulwilo. Abitungu dingi tunangushene pa binangu by’Efile Mukulu bwatudya kwikala atunangushena bu byanangushenaa. Mu mwisambo aulondo, atukalongo byatudi balombene kukita bino.