UNO mwanda ubadi ufikye mushindo kinyi? Ntemesheyi nenulungule. Ne mutandikwe mu 29/7/1929, na nemukudile mu kibundji kya mu provense a Bulacan mwiumbo dya Philippines. Mu nshalelo eetu tatubadi na bintu bibungi nya mwanda mu aa mafuku mubadi dikyenga pa mwanda wa makuta ashibadi ku maboko. Ngoshi ibadi itwele mafuku anadi nki mukinga. Basalayi ba mu Japon babadi bauule mu eumbo dya Philippines. Sunga mbyabya, kibundji kyetu kibadi ku mpengwa ngofu, ngi bwakinyi basalayi tababadi batwele na ngoshi mu kibundji kyetu nya. Tatubadi na kisaashi, televizion, sunga ma jurnale a kubadika nya, tubadi atupete mikandu itale ngoshi nka mu kwipusha kwa bantu.

Nadi mutandikwe bu mwana a kabidi mu bana mwanda; nshami kulu badi mungaate bwadya kukashala nami panadi nki na penda bipwa mwanda. Sunga mbibatudi mu kipwilo kya Katolike, nshami kulu badi akumina kupusha myanda ya mu bingi bipwilo na badi atambula mikanda ibabadi abamupa kwi ba kuuku baye. Natentekyesha pabandesheshe tu mikanda tubadi na mutwe wa mwanda awamba’shi Bulami, Kwiyikeela, na ka Bifumbulwe mu ludimi lwa Tagalog, * mpa na Bible. Nadi na muloo wa kubadika Bible, bikishekishe mikanda inanka ya ma evanjile. Bino bibadi binkwashe bwandya kulonda kileshesho kya Yesu.​—Yowano 10:27.

Basalayi ba mu Japon abadi bakatukye mu kipwa kya 1945. Mu aa mafuku, nshami bandungwile bwandya kwaluka ku nshibo kwetu. Nshami kulu badi mundungule bwa’shi nyende. Nadi mukumine kwenda.

Kapindi kapeela kunyima kwa byabya, mu Mweshi w’ekumi na wa kabidi mu kipwa kya 1945, kisaka kya ba Temwe ba Yehowa kibadi kifikye akikatukila mu kibundji kya Angat bwa kulungula mukandu wibuwa mu kibundji kyetu. Ungi Temwe badi mununu bafikile ku nshinbo kwetu aye nkubanga kwitupatulwila akyakula Bible pabitale “mafuku a nfudilo.” (2 Timote 3:1-5) Badi mwitwitanyine bwatudya kutwela mu kulonga kwa Bible mu kibundji ki peepi na kyetu. Ba nshami na nyinami babadi bapele kwenda, anka ami nadi mwende. Kubayile bantu bafikye ku 20, na dingi bantu abadi abele nkonko ya mu Bible.

Ntshinadi nakamba kupusha byoso bibabadi abalongyesha kalolo nya, ngi bwakinyi natshile kitshibilo kya kukatuka. Kumpala kwa’shi nkatukye, ababangile kuyimba ngono ya Bufumu. Yaya ngono ibadi insankishe  ngofu, ngi bwakinyi naukile kushala. Kunyima kwa kuyimba ngono na kwela luteko, abadi betanyine bantu boso bwabadya kwenda mu kutwela mu bisangilo mu kibundji kya Angat mu dya Lunbingo dibalondele.

Bakwetu bebungi babadi abakitshi lwendo lwa bilometre 8 bwa kwenda mu kutwela mu bisangilo mu nshibo ya kifuko kya Cruz. Nadi mukaanye pa kumona bana bakinga babadi mu bisangilo kwabatusha ngalulo ayitukila mu Bible. Kunyima kwa kwenda mu bisangilo misusa ibungi, mukwetu Damian Santos, mbaala-mashinda badi mufube bu nfumu a lupata kumpala kwa kwikala Temwe a Yehowa, badi angitanyina bwa kushala kwaye mpa na abiidi bufuku. Tubadi atutaluula naye myanda ya mu Bible kipindi kibula bwabwa bufuku.

Mu aa mafuku, bebungi ba kwatudi babadi abakumina kushi kunyengakana kulonga malongyesha akata a bya binyibinyi bya mu Bible. Kunyima kwa kutwela mu bisangilo munda mwa mafuku apeela, bakwetu babadi betwele luno lukonko ami na bangi bakwetu: “Anukumina kubatshishibwa su?” Nadi mwalule’shi, “Oolo, nakumina.” Nadi muukye’shi nakumina “kufubila Nfumu Kidishitu.” (Beena-Kolose 3:24, Kilombeno kipya 2014) Tubayile ku ka mwela ke peepi, na tubadi babatshishibwe bubidi mu efuku dya 15/2/1946.

Tubadi babatshishibwe bu bena Kidishitu, na dingi tubadi atukumina kulungula mukandu wibuwa saa yoso bwa kwambula Yesu. Byabya byoso binadi nakitshi tabibadi abisankisha nshami nya, mwanda badi akula’shi, oki “mwana mukinga, twe mulombene kulungula mukandu wibuwa nya. Na dingi, kukwina mu mwela takukwikasha bu mulungudi nya.” Nadi mumupatulwile’shi Efile Mukulu akumina’shi tulungule mukandu wibuwa wa Bufumu bwaye. (Mateo 24:14) Nakwile dingi’shi, “Nakumina kulombasha mutshipo wande wandi mukite kwi Efile Mukulu.” Ino ngi nsaa ibabadi bandungule kwi nshami mayi a kuntshinyisha nao andi mwakule ku mbangilo. Oolo, badi na kinangu kya kunkutshishwa kukita mudimo wa bulungudi. Bino ngi bibadi binfikishe mu kuleka bintu kunyima bwa mususa wa kumpala na kulonda bipatshila bya mu kikudi.

Kifuko kya Cruz kibadi kingitanyine bwa kushala nabo ku Angat. Abadi betukankamikye ami na mwan’abo mukashi Nora bwatudya kwata mudimo wa bu mbala-mashinda. Boso bwetu tubabangile mudimo wa bu mbala-mashinda mu efuku dya 1/11/1947. Nora badi mwende mu kukwasha mu dingi eumbo, ami namu nadi nakwatshishena mudimo wa bulungudi mu kibundji kya Angat.

Mu kipwa kyande kya kasatu kya bu mbala-mashinda, mukwetu Earl Stewart badi afubu ku Betele, badi mwele mwisambo kumpala kwa bantu 500 mu kisalwe kikata kya mu kibundji kya Angat. Badi akula mu Anglais, ami namu nadi napatuula mwisambo waye mu ludimi lwa Tagalog. Mu kalasa nadi mulongye nka penda bipwa musambobidi, anka balongyeshi beetu babadi abakamba kwakula mu Anglais. Kingi kintu kibadi kinkwashe bwa kulongamisha kwakula kwande kwa Anglais, mwanda tubadi na penda mikanda ipeela ya mu ludimi lwa Tagalog. Ngi bwakinyi nadi nalongo ino mikanda ibungi ya mu ludimi lwa Anglais. Bino bibadi binkwashe bwa kuuka bishima bya mu Anglais bibadi bimpe mushindo wa kupatuula uno mwisambo na ingi inadi mupatuule kunyima.

Efuku dinadi mupatuule mwisambo wa mukwetu Stewart, badi mulungule bena kakongye ka mu kyakya kibundji’shi biro bya filiale abikyebe kwitanyina mbala-mashinda umune sunga babidi bwabadya kwenda ku Betele. Babadi balombene kukwasha ba misionere babadi mu kikongeno kya mu kipwa kya mu 1950 kibadi na mutwe wa mwanda awamba’shi, “ Accroissement de la théocratie ” kibakitshikile mu New York, mu États-Unis. Nadi umune a ku bantu bababadi betanyine. Uno ngungi mususa, unadi mulekye bintu bibungi binadi mupwe kwiubidishena nabyo ku mongo, bwa kwenda mu kufuba ku Betele.

Nafikile ku Betele mu efuku dya 19/6/1950, nabangile mudimo wande upya. Betele badi mu kishibo kikata, kikulu kibabadi befunyishe na mitshi ikata mu lupango lwi bukata bwa metre 250. Bakwetu balume ekumi na babidi be bukupi babadi abafubu kwanka. Efuku dya kumpala ku nakashika, nabangile kukwasha mu shibo ya kuteekyela. Kunyima, kubanga mu nsaa ya 9h00, nadi mubangye kufuba mu kibambalo kya kutumpa na kukoma bilamba. Nafubile wawa mudimo nyaa na kunyima kwa midi. Mpa na kunyima kwa ba misionere kwaluka ku Kikongeno kibungye maumbo ebungi, nadi mutungunukye na kufuba ku Betele. Nadi nalongo ma jurnale bwa kwiatuma, nadi nafundu bantu abatekye mikanda, na kufuba ku mbalo yabatambwilaa benyi; Na dingi, nadi nakitshi kyoso kibabadi abandungula bwa kukita.

Mu kipwa kya 1952, pabatudi mwishinda na bangi bantu basamombo atufiki ku Philippines, nadi mupushe muloo wibungi p’ami kutambula lwitanyino lwa ku kalasa ka 20 ka Gileade. Bintu byoso bibatudi atumono ku États-Unis, bibadi nka bu bipya na bu byenyi kwatudi. Mu binyibinyi, bibadi bilekeene ngofu na binaadi muukye kubanga kwetu ku musoko.

Bu kileshesho, tubadi balongye bya kufubisha byamo bya mu nshibo bya kuteekyela na bya kudya na mpawu  na nsomo byatushibadi beubidishene nabyo kubanga kwetu. Dingi, kapapi ka kwanka nkelekene ngofu na ka mu angi ma mbalo! Dingi efuku ku namashika nadi mwashine kintu kitooka kibadi mu nsenga. Uno ngi musango wande wa kumpala wa kumona ebwe dya mulemba wa kasangu. Panedyashine, naukile’shi di mashika—mashika gofu!

Anka, ku bino bintu byoso binadi mumone, takubadi kintu kibadi akimpa muloo bu kutwela kwa mu kalasa ka Gileade nya. Balongyeshi babadi abafubisha mayele ebuwa a kulongyesha. Tubalongyele mushindo wa kukimbuula myanda na kwilongyela kalolo. Malongyesha a ku Gileade abadi ankwashe bwandya kunyisha kunyinga mu kikudi.

Kunyima kwa kupeta diplome, babadi bantume bu mbala-mashinda a nsaa yooso munda mwa mafuku apeela mu kibundji kya Bronx kya mu eumbo dya New York City. Mu Mweshi wa musambobidi mu kipwa kya 1953, nadi mupete mushindo wa kutwela mu kikongeno akyamba’shi, La société du monde nouveau, kibadi kikitshikye mu ingi mbalo ya mu kyakya kibundji. Kunyima kwa kikongeno, babadi bantume mu kufuba mu Philippines.

Bakwetu ba ku biro bya filiale abandungwile’shi: “Binobino wende mu mudimo wa bu mukunkushi a kifunda.” Bino bibadi bimpe mushindo upya wa kulonda mu matabula a Nfumu, badi ende ku bibundji bikata na bipeela bi kula mu kukwasha mikoko ya Yehowa. (1 Mpyeele 2:21) Abantumine mu kufuba mu kifunda kyate kipindji kikata kyabetanyinaa bu Luzon, kisangi kikata kya mu eumbo dya Philippines. Muno mubadi mpaa na ma provense bu Bulacan, Nueva Ecija, Tarlac, na Zambales. Panadi nende mu bingi bibundji, nadi nasabuka ma mbalo e masaku a mu myengye ya mu Sierra Madre. Ta kwi myootoka ya kusemuna bantu ibadi ayende ku ano ma mbalo nya. Pa mwanda wa byabya, bibadi abitungu’shi ntekye muntu atambushaa mootoka ukata bwa’shi su bakumina nshaale kunundu kwa mitshi ibabadi abasemuna mu myootoka yabo. Misusa ibungi babadi abakumina, anka lwalwa lwendo lwi byabya talubadi buwa nya.

Tukongye twibungi tubadi tupya na twi bantu bapeela. Bakwetu babadi abapusha buwa ngofu nsaa inadi nebakwasha bwa kulumbuula bisangilo na bya kulumbuula mudimo wa bulungudi kalolo.

Babadi bantume mu kingi kifunda kikata mu kipindji kya nsenga kya Bicol. Mwamwa mubadi tusaka twa tukongye twi bungi tubadi mu ma mbalo e kula mubabadi batume ba mbala-mashinda ba nsaa yooso bwa kubanga kulungula mu ma mbalo apye. Ku ingi nshibo, kubadi nkumba badi na bwina, bwabadi batuule mitshi ibidi kunundu. Panadi mutuule mikolo ku ino mitshi, ibaponene mu bwina, n’ami namu naponene. Bibadi bingate nsaa ibungi bwa kwitumpa na kukatusha bwabwa butshafu na kukimba bya kudya kidibwa kya ku nakashika!

Panadi nafubu uno mudimo nabangile kunangushena pabitale Nora, badi mubangye kufuba bu mbala-mashinda mu kibundji kya Bulacan. Mu aa mafuku, badi mupwe kwikala mbala-mashinda a nsaa yoso mu kibundji kya Dumaguete City, ami nkwenda mu kutala kakongye kabo. Kunyima kwa paapa, tubadi befundjishene mikanda munda mwa mafuku apeela, na mu kipwa kya 1956, tubadi beyibakishene. Tubadi bakishe lubingo lwetu lwa kumpala kunyima kwa kwiyibakishena pabatudi bende  mu kutala kakongye ke mu kibundji ki mu kisangi kya Rapu Rapu. Kwakwa tubadi atukaamina myengye ila na tubadi atutambuka lwendo lwibula, anka tubadi na muloo wibungi wa kukwasha bakwetu mu mbalo i kula bu bantu beyibakishene!

Kunyima kwa kukita bipwa binanka mu mudimo wa bu mukunkushi a kifunda, tubapetele lwitanyino lwa kwenda mu kufuba ku Betele. Nabangile mudimo wa ku Betele mu Mweshi wa 1/1960. Mu kukila kwa mafuku, nadi mulongye myanda ibungi pa kufuba pamune na bakwetu balume be na mashito ebungi, na dingi Nora badi mupete ingi mifubo ibungi ku Betele.

Ku bukwashi bwa mufubo wande wa ku Betele, ne mupete mwabi wa kumona kufiima na kwenda kwa kumpala mu kikudi kwa bantu ba mu Philippines. Panafikile ku Betele bwa musango wa kumpala ami ki nsongwalume e bukupi, kubadi penda balungudi ba mukandu wibuwa 10 000 mu eumbo dishima. Binobino, mu Philippines mwi balungudi bakile pa 200 000, na bantu nkama na nkama abafubu ku Betele bwa kukwatshishena mudimo ukata wa bulungudi.

Bu bibadi abyende mudimo na kutama mu kukila kwa bipwa, mashibo a Betele abadi aende na kupeela. Kunyima, Kasaka ka Bakunkushi Bakulu kabetulungwile bwatudya kukimba mbalo ipya yatudi balombene kwibaka mashibo e bungi. Ami na mukwetu badi akunkusha kibambalo kya kutusha mikanda tubadi bende ku nshibo na nshibo mu ma mbalo e pepi na biro bya filiale, bwa kwipusha su kwi muntu akumina kuudisha lupango lwaye. Ta kwi muntu su ngumune badi mukumine, anka ungi muntu betulungwile’shi: “Atwe ba Chinois tatuudisha lupango nya. Tukwete kuula.”

Anka dingi efuku, ungi muntu sha lupango lwaye bafikile etwipusha su atukumina kuula lupango lwaye; badi akyebe kukatuka bwa kwenda mu États-Unis. Uno mwanda ubadi wimikye myanda ibatudi abapusha bukopo bwa kwiyikumina. Ungi mwina mutumba baatshile kitshibilo kya kuudisha, aye nkukankamika bangi bantu be pepi naye bwabadya kwituudisha yabo mpango. Tubapetele mpa na mushindo wa kuula lupango lwa yawa muntu bambile’shi: “Atwe ba Chinois tatuudisha lupango.” Mu kapindji kapeela, lupango lwa biro bya filiale lubatamine misusa isatu kukila palwikalanga kumpala. Ne mushinkamishe’shi Yehowa Efile Mukulu ngi badi mukumine’shi bikitshikye bino.

Mu mafuku ashale mu kipwa kya 1950, ami ngi badi mukinga ku bena Betele boso. Binobino ami na mukashi’ande ngi bantu bakulu ku bena Betele boso. Ntshi mwinyongole su nkapeela bu byandi mulonde Nfumu mu ma mbalo moso mubadi ankunkusha. Eyendo, bantande abadi bantuushe mu nshibo yabo, anka Yehowa namu mmumpe kifuko kikata kya bena kukumina nami. Kushi mpaka, Yehowa mmwitupe kintu kyooso kyatudi nakyo lukalo, mu mifubo yoso yabadi betutume. Ami na Nora atutumbula Yehowa ngofu bwa byoso byadi mwitupe na kalolo koso, na atukankamika bangi bwabadya kutompa Yehowa.​—Malaki 3:10.

Yesu badi mwitanyine ungi muntu audishaa bitadi ababadi abetanyina bu Mateo Levi, amulungula’shi: “Ndonde.” Bakitshine naminyi? “Baalekyele byooso aye nkwibwaa, nkubanga kulonda [Yesu].” (Luka 5:27, 28) N’ami namu ne mupete uno mwabi umune, na nalungula bangi bwabadya kukita nabo nka byabya. Su abakitshi bino abakapete myabi ibungi.