1, 2. (a) Bwakinyi kutalula kileshesho kya Nowa, Ndanyele, na kya Yoobo nkulombene kwitukankamika? (b) Nshalelo kinyi badi kwanka mu mafuku ababafundile mayi e mu Esekyele 14:14 kwi Esekyele?

WE MU kipungo ki bukopo pa mwanda wa’shi we na maladi, we na dikyenga dya makuta, sunga kubingwa bingwa su? Ingi nsaa abikwelelaa bukopo bodya kwikala na muloo mu mudimo okwete kufubila Yehowa su? Su opushaa bino, kutaluula kileshesho kya Nowa, Ndanyele, na kya Yoobo nkulombene nkukankamika. Bano bantu abadi bakutwe kupwidika na abadi bapete nkalakashi i mumune na yatudi nayo lelo uno. Ingi misusa, mpa na myuwa yabo ibadi mu masaku. Anka, abashadile na lulamato kwi Yehowa, aye namu badi ebamono bu bileshesho bibuwa bya bantu basha lukumino na kukookyela.​—Badika Esekyele 14:12-14.

² Esekyele bafundile mayi e mu kifundwe kyabadi baate uno mutwe wa mwanda pabadi mu Babilone mu kipwa kya 612 kumpala kwa Kidishitu. * (Esekyele 1:1; 8:1) Badi mufunde bino bipwa bipeela kumpala kwabadya kubutula Yeelusaleme mu kipwa kya 607. Nka penda bantu bapeela ba mu Yeelusaleme ngi babadi na lukumino na kukookyela bu kwa Nowa,  Ndanyele, na Yoobo, na babapandjile. (Esekyele 9:1-5) Munkatshi mwa bano bantu abapandjile mwi Yeelemiya, Baruke, Ebede-Meleke, na bena Rekabe.

3. Mu uno mwisambo atukyebe kulonga kinyi?

³ Mu mushindo umune, lelo uno nka penda bantu babamono kwi Yehowa bu bantu balulame, bantu be bu Nowa, Ndanyele, na Yoobo, ngi abakapanda ku nfudilo kwa uno ndumbulwilo ebubi. (Kibafumbwilwe 7:9, 14) Byabya tubandeyi kulonga bwakinyi Yehowa badi mwate bano bantu basatu bu bileshesho bya bantu babadi abakitshi myanda ilulame ku meso kwaye. Atukesambila (1) nkalakashi ibapetele muntu oso a kwabadi, na (2) mushindo watudi balombene kwambula lukumino na kukookyela kwabo.

4, 5. Nowa badi mupete nkalakashi kinyi, na nkinyi akitukemesha pa mwanda waye?

⁴ Nowa badi mupete nkalakashi kinyi? Mu mafuku a Enoke badi mutande nshaye kulu na Nowa, bantu abadi bapwe kulwila ngofu. Abadi abakula Yehowa “bishima bya kapeesha.” (Yunda 14, 15) Bantu ba mu yawa ndumbulwilo abadi abende na kukaamisha bu ntomboshi. Mu mafuku a Nowa, “pa nsenga poso pabadi paûle na myanda ya buntomboshi.” Ba mwikeyilu abatombokyele mwiyilu bayika pa nsenga, bafwala mbidi ya bantu, na kubanga kwibakila bakashi. Bana babo abadi bantu basha kifita na ba ntomboshi. (Kibangilo 6:2-4, 11, 12, EEM) Anka, muntu ooso badi amono’shi Nowa mmwilekene na bangi bantu boso ngofu. Bible akula’shi: “Nowa bapetele mwabi ku meeso [a] Efile Mukulu.” Mu kwilekena na bantu abadi bamwifunyishe, aye badi akitshi myanda ibuwa. ‘Nowa . . . badi atambuka mu kipwano [n’Efile Mukulu].’​—Kibangilo 6:8, 9, EEM.

⁵ Ano mayi aetulungula kinyi pabitale Nowa? Kya kumpala, banda kunangushena bungi bwa mafuku bubadi Nowa mufubile Yehowa na lulamato mu yawa ndumbulwilo mulwile kumpala kwa’shi Mpeshi a kabutu afikye. Takubadi kukile penda bipwa 70 sunga 80 nya, kadi kubadi kukile bipwa 600! (Kibangilo 7:11) Kya kabidi, tentekyesha’shi tabadi na kakongye kalombene kumukwasha na kumukankamika bu byatudi nako lelo uno nya. Abimweneka’shi mpa na bakwabo balume na bakashi ta mbamukwatshishene. *

6. Nowa badi muleshe eshimba dinyingye naminyi?

⁶ Nowa tabadi eele meshi’shi kwikala penda bu muntu e buwa ngi kupwa kwa mwanda nya. Badi na nfyedi ya kulungula bangi bantu pabitale lukumino lwaye mwi Yehowa. Bible amwitanyina bu “balambukishanga bantu mwanda wa bululame.” (2 Mpyeele 2:5) Mpoolo mutumibwa bakwile bino pa mwanda wa Nowa: “Ku lukumino, . . . baapiishiishe baa pano.” (Beena-Ebelu 11:7) Kushi mpaka, bantu abadi abamusepe na kukimba bya kumwimika. Pangi abadi abamutshinyisha na kukyeba kumukupila. Anka Nowa tabadi atshinyi bantu nya. (Nkindji 29:25) Pamutwe pa byabya, badi na lukumino, ngi bwakinyi Yehowa badi mumupe eshimba dinyingye. Na lelo uno namu kwete kupa bafubi baye boso basha lulamato mashimba anyingye.

7. Nowa bapetele nkalakashi kinyi nsaa ibadi ayibaka bwato?

⁷ Nowa badi mupwe kwikala na lukumino kwi Yehowa munda mwa bipwa bikile pa 500 nsaa ibabamulungwile kwi Yehowa bwadya kwibaka bwato. Buno bwato bubadi bulombene kupaasha bantu na ndambo ya nyema ku Mpeshi a kabutu. (Kibangilo 5:32; 6:14) Kwibaka buno bwato bukata kubadi bu mwanda wi bukopo kwi Nowa. Na badi auku kalolo’shi bantu abanyisha kumusepa na kutuula muwa waye mu masaku. Anka Nowa badi na lukumino na badi mukookyele Yehowa. ‘Aye nkukita nka byaabya bibaamulungwile.’​—Kibangilo 6:22.

8. Nowa badi mukulupile kwi Yehowa bwa kulombasha nkalo ya kifuko kyaye naminyi?

⁸ Nowa badi na lungi lukalakashi. Bibadi abitungu’shi alombashe nkalo ya mukashi’aye na bana baye. Kumpala kwa Mpeshi a kabutu, bantu abadi abafubu ngofu bwa kupeta bidibwa. Na Nowa namu badi afubu ngofu. (Kibangilo 5:28, 29) Anka, ta mutadile bwa’shi nkalo ya ba mu nshibo mwaye ikale pa mbalo ya kumpala nya. Kufubila Yehowa ngi kubadi pa mbalo ya kumpala mu muwa waye. Sunga mbibadi Nowa mwipaane mu kwibaka bwato munda mwa bipwa 40 sunga 50, badi nka mutuule  binangu byaye kwi Yehowa. Bakitshine bino munda mwa bingi bipwa 350 kunyima kwa Mpeshi a kabutu. (Kibangilo 9:28) Nowa badi kileshesho kibuwa kya muntu sha lukumino na kukookyela!

9, 10. (a) Twi kwambula lukumino na kukookyela kwa Nowa naminyi? (b) Su we na kitshibilo kya kukookyela miya y’Efile Mukulu, we kwikala mushinkamishe kinyi?

⁹ Twi kwambula lukumino na kukokyela kwa Nowa naminyi? Atukitshi bino nsaa yatulesha bantu bi mweneno a Yehowa pabitale myanda ilulame, nsaa yatupele kutwelakana mu ndumbulwilo a Satana, na nsaa yatutuulu Yehowa pa mbalo ya kumpala mu muwa wetu. (Mateo 6:33; Yowano 15:19) Byabya, pa mwanda wa tuno tubingilo, bantu ba mu uno ndumbulwilo ta mbetukumine nya. Bu kileshesho, bu byatudi na kitshibilo kya kukookyela miya y’Efile Mukulu pabitale kwifikena pepi kwa mulume na mukashi na eyibakishi, bantu mbalombene kwitwakula myanda ibubi ku bisaashi sunga mu Internete. (Badika Malakii 3:17, 18.) Nka bu Nowa, tatutshinyi bantu nya. Atutshinyi Yehowa, kwamba’shi, atumunemeka ngofu na tatukumina kumufitshisha munda nya. Atuku’shi nka penda Aye ngi mulombene kwitupa muwa wa ikalaika.​—Luka 12:4, 5.

¹⁰ Eyipushe’shi: ‘Bwakinyi natungunukaa na kukita myanda ilulame ku meso kw’Efile Mukulu, sunga bansepa sunga kungakula myanda ibubi kwi bantu? Ne mukulupile’shi Yehowa mulombene kundombesha nkalo ya kifuko kyande, sunga mu nsaa yatudi mu nshalelo e bukopo su?’ Su bokulupila mwi Yehowa na kumukookyela bu bibakitshine Nowa, ikala mushinkamishe’shi Yehowa akulombesha nkalo yobe yoso.​—Beena-Fidipe 4:6, 7.

11. Ndanyele na bakuuku baye basatu abapetele nkalakashi kinyi ikata pababafikile mu Babilone? (Tala kifwatulo ki ku mbangilo.)

¹¹ Ndanyele badi mupete nkalakashi kinyi? Abadi bakwate Ndanyele pa bukopo bwa kwenda naye mu Babilone, kibundji kyabene kibadi kiuule na b’efile ba madimi na kupaka kwa manga. Bantu ba mu kino kibundji abadi bashikwe bena Yuuda na abadi abebasepe na Yehowa, Efile Mukulu aabo. (Misambo 137:1, 3) Uno mwanda ubadi awinyongosha Ndanyele na bangi bena Yuuda abadi bafule Yehowa! Na dingi, bantu bebungi abadi ababandila Ndanyele na bakuuku baye basatu Hananya, Mishaele, na Azariya mwanda abadi na kya kulongyeshibwa bwabadya kufubila nfumu a bena Babilone. Abebalungwile bwabadya kudya bya kudya bya nfumu, mu bino bya kudya mubadi bintu bibabadi bakandjikile mwilo wa Isaleele kwi Yehowa. Anka Ndanyele bapelele “kwilwisha na bya kudya bya mulopwe.”​—Ndanyele 1:5-8, 14-17.

12. (a) Ndanyele badi muntu a mushindo kinyi? (b) Yehowa badi amono Ndanyele naminyi?

¹² Ndanyele badi na lungi lukalakashi, lubadi alumweneka ku mbangilo bu lushi bukopo. Badi na ngobesha ya kukita myanda ibungi, na pa mwanda wa byabya, nfumu bamupeele mwasu wi pa bwao. (Ndanyele 1:19, 20) Anka, Ndanyele ta mubangye kwitatula sunga kwela binangu’shi byaye byoso bibadi akula bibadi nka bibuwa nya. Badi na kwiyisha na kupopeela. Badi akula nsaa yoso’shi Yehowa ngi badi amupa ngobesha ya kukita ino myanda yoso. (Ndanyele 2:30) Banda kunangushena: Yehowa badi mutemune Ndanyele pamune na Nowa na Yoobo bu bileshesho bibuwa bya kulonda. Mu aa mafuku, Nowa na Yoobo abadi bapwe kufubila Yehowa munda mwa muwa wabo ooso, anka Ndanyele badi ki nsongwalume. Yehowa badi mukulupile Ndanyele binyibinyi! Badi na kabingilo ka kumukulupila bino, mwanda Ndanyele bashadile na lukumino na kukookyela Efile Mukulu mu muwa waye oso. Pabadi Ndanyele na bipwa bikile pa lukama, mwikeyilu a Efile Mukulu bamulungwile ano mayi a kalolo: “Ndanyele [obe we] mufudibwe kwi Efile Mukulu.”​—Ndanyele 10:11.

13. Yehowa badi mukwashe Ndanyele bwadya kwikala na mwasu ukaami bwa kabingilo kinyi?

¹³ Ku bukwashi bwa Yehowa, Ndanyele bafikile muntu mukata, muntu a kumpala mu Ampire mushima a bena Babilone, kunyima bekeele muntu mukata mu Ampire a bena Perse. (Ndanyele 1:21; 6:1, 2) Pangi Yehowa badi mukite bya’shi Ndanyele ekale na uno mwasu ukaamine bwadya kumona bya kukwasha mwilo waye, nka bu bibakitshine Yoosefe mu Ejiipitu na bibakitshine Eshitele na Mordekayi mu Perse. * (Ndanyele 2:48) We kupwandikisha  bibadi abipushisha Esekyele na bangi bena Yuuda be mu bupika nsaa ibabadi abamono mushindo ubabadi bafube na Ndanyele kwi Yehowa bwadya kwibakwasha? Bino bibadi bibakankamikye ngofu!

14, 15. (a) Nshalelo eetu mmwipushene na a Ndanyele naminyi? (b) Lelo uno ba nambutwile mbalombene kulongyela kinyi ku kileshesho kya nshaye na nyinaye na Ndanyele?

¹⁴ Twi kwambula lukumino na kukokyela kwa Ndanyele naminyi? Mu uno ndumbulwilo atudi mmuule na myanda ibutete na bipwilo bya madimi. Babilone mukata, nsangilo a bipwilo bya madimi, abadi bayitanyine mu Bible bu “kifwamino kya bikudi bibi” e na bukitshishi kwi bantu bebungi. (Kibafumbwilwe 18:2) Anka atwe twi nka bu bantu benyi mu uno ndumbulwilo. Ngi bwakinyi, bantu abamono’shi twi belekene nabo, na mbalombene kubanga kwitusepa. (Maako 13:13) Nka bu Ndanyele, tunyisheyi kwifubwila pepi na Yehowa Efile Mukulu eetu. Su tubekala na kwiyisha, tubakulupila mwi Yehowa, na kumukookyela, natwe namu atukekala na muulo ku meso kwaye.​—Angai 2:7.

¹⁵ Ba nambutwile mbalombene kupeta malongyesha e na muulo kwi baledi ba Ndanyele. Pabadi Ndanyele ki kana kakinga mu Yuuda, bantu bebungi abadi bamwifunyishe abadi balwile ngofu. Anka, aye badi mufule Yehowa n’eshimba dyaye dyoso. Bibadi bikitshikye bino mu mpukapuka su? Nya. Nshaye na nyin’aye abadi bamulongyeshe bwadya kuuka Yehowa. (Nkindji 22:6) Mpa n’eshina dya Ndanyele, adipushisha’shi “Efile Mukulu ngi nsushi ande,” adilesha’shi nshaye na nyin’aye abadi bafule Yehowa. (Ndanyele 1:6, NWT mayi e kuushi kw’esaki) Byabya anwe ba nambutwile, ikalayi na lwishinko nsaa yanulongyesha bana benu bwabadya kuuka Yehowa. Tanukookanga. (Beena-Efeso 6:4) Sambilayi nabo pamune. Ebeleleyi nteko. Etatshisheyi na mwenu mooso bwa kwibalongyesha bwabadya kufula myanda ilulame ku meso kwa Yehowa. Su nubakitshi byabya, Yehowa akenwelela myabi ibungi.​—Misambo 37:5.

16, 17. Yoobo bapetele nkalakashi kinyi mu bipungo bilekene bya mu muwa waye?

¹⁶ Yoobo badi mupete nkalakashi kinyi? Yoobo badi mufumankane na kushintuluka kukata mu muwa waye. Kumpala, Yoobo badi “muneeme kukila [bantu] booso baa Kutunduka-nguba.” (Yoobo 1:3) Badi na bupeta bwibungi, na abadi abamuuku kwi bantu bebungi, na abadi abamunemeka ngofu. (Yoobo 29:7-16) Sunga mbibadi na bino bintu byoso, Yoobo tabadi anangushena’shi mmukile bangi bantu sunga kwela binangu’shi te na lukalo n’Efile Mukulu mu muwa waye nya. Atuuku bino mwanda Yehowa bamwitanyine bu “mufubi ande” na bakwile bino pa mwanda waye: “Muntu mupwidikye na mululame, atshiinyi Efile Mukulu, dingi eekumbaa bubui.”​—Yoobo 1:8.

¹⁷ Anka, mususa umune nshalelo a Yoobo badi mushintulukye ngofu. Badi mushimishe bintu byaye byoso, aye nkwinyongola ngofu mu kipaso kibadi mukumine mpa na kufwa. Lelo uno, atuuku’shi Satana ngi badi nsulo ya ino myanda yoso ibadi ifikile Yoobo. Badi mwakule’shi Yoobo badi afubila  Yehowa penda bwa buwa bwaye. (Badika Yoobo 1:9, 10.) Yehowa badi mwate uno mwanda na muulo ukata. Bakitshine kinyi bwadya kulesha’shi Satana nsha madimi? Bapeele Yoobo mushindo wadya kulesha lulamato lwaye kwi Efile Mukulu na kulesha’shi badi amufubila pa mwanda wa kifulo.

18. (a) Nkinyi akikukemesha pabitale Yoobo? (b) Mushindo ubadi Yehowa mukitshine Yoobo myanda awitulongyesha kinyi?

¹⁸ Satana badi mulwishe Yoobo na myanda ibukopo misusa na misusa na kumutakula bwadya kwela binangu’shi ano makyenga abadi aafiki kwi Efile Mukulu. (Yoobo 1:13-21) Kunyima kwa papa bantu babidi abadi abeyitanyina bu bakuuku ba Yoobo abalungwile Yoobo myanda ibubi. Abamulungwile’shi mmuntu mubi ngi bwakinyi Efile Mukulu kwete kumunyooka. (Yoobo 2:11; 22:1, 5-10) Sunga mbibadi mufumankane na ino myanda yoso, Yoobo bashadile na lulamato kwi Yehowa. Eyendo’shi ingi nsaa Yoobo badi mwakule myanda ishi ya binangu. (Yoobo 6:1-3) Anka Yehowa badi mupushe’shi Yoobo badi mwakule bino pa mwanda wa’shi badi mu dikyenga na binangu bibadi bimufudile. Yehowa bamwene’shi Yoobo tamumulekye su mpa peela, sunga mbibabadi bamukyengyeshe na kumukaa kwi Satana misusa na misusa. Kunyima kwa uno mwanda wibubi, Yehowa bapeele Yoobo bintu bikile bibadi nabyo kumpala misusa ibidi na kumukumbesha bingi bipwa 140 byadya kwikala na muwa. (Shake 5:11) Mu aa mafuku, Yoobo batungunukile na kufubila Efile Mukulu n’eshimba dyaye dyoso. Atuuku bino naminyi? Atuuku bino mu mukanda wa Esekyele 14:14, mwabadi baate mutwe wetu wa mwanda, na abeufundile bipwa nkama na nkama kunyima kwa lufu lwa Yoobo.

19, 20. (a) Twi kwambula lukumino na kukookyela kwa Yoobo naminyi? (b) Twi kulesha lusa na kwituula pa mbalo ya bangi bu abikitaa Yehowa naminyi?

¹⁹ Twi kwambula lukumino na kukokyela kwa Yoobo naminyi? Sunga twekala mu nshalelo e naminyi, abitungu twikale bashinkamishe’shi Yehwoa ngi Muntu e pa mbalo ya kumpala mu muwa wetu. Abitungu tumukulupile mu myanda yoso na kumukookyela na mashimba eetu oso. Byabya, atwe twi na tubingilo twa kukita bino tukile tubadi na Yoobo. Banda kunangushena myanda ibungi yatuuku lelo uno. Atuuku myanda ibungi pabitale Satana na mayele aaye. (2 Beena-Kodinda 2:11) Ku bukwashi bwa Bible, bikishekishe mu mukanda wa Yoobo, atuuku bwakinyi Efile Mukulu mmutadile makyenga. Kukiila ku butemuki bwa Ndanyele, atuuku’shi Bufumu bw’Efile Mukulu nyi mbulamatadi a binyibinyi abakunkusha kwi Yesu Kidishitu. (Ndanyele 7:13, 14) Na dingi atuuku’shi buno Bufumu abukyebe kubanga kumunana pa nsenga poso na kukatusha makyenga oso binobino.

²⁰ Myanda ibadi ifikile Yoobo ayitulongyesha dingi bwatudya kwikala na lusa nsaa yatumono bakwetu abakyengye. Nka bu Yoobo, mbalombene kwakula myanda kushi kunangushena. (Mulungudi 7:7) Anka tabitungu twikale atwibelela binangu bibubi sunga kwibatopeka’shi abakula sunga kukita myanda ibubi nya. Anka, abitungu twibapushishe na kwitula pa mbalo yabo. Su tubakitshi bino, atukambula Nshetu, Yehowa, sha kifulo na lusa.​—Misambo 103:8.

21. Mayi e mu 1 Mpyeele 5:10 aetutentekyesha myanda ibadi ifikile Nowa, Ndanyele, na Yoobo naminyi?

²¹ Nowa, Ndanyele, na Yoobo abadi na muwa mu bipungo bilekene na abadi na nshalelo mwilekene ngofu. Anka, boso bwabo abadi banyingiile nkalakashi yabo. Myanda ibabadi bafumankane nayo ayitutentekyesha uno mwanda ubabadi bakule kwi Mpyeele mutumibwa: “Efile Mukulu sha buntu booso, . . . akeenwikasha kalolo aye nabeene, anwe babaapu kufwambuka bwa kapindji kapeela; eenukankamika, eenunyingishe, eenushikamishe.”​—1 Mpyeele 5:10.

22. Mu mwisambo aulondo atukalongo kinyi?

²² Mayi e mu 1 Mpyeele 5:10 akwete kulombana mpa na kwi bafubi b’Efile Mukulu be lelo uno. Yehowa etushinkamisha’shi akakankamika na kunyingisha bafubi baye. Boso bwetu atukumina’shi Yehowa etunyingishe, na atukumina kushala bakankamane na kushala na lulamato kwadi. Ngi bwakinyi atukumina kwambula lukumino na kukookyela kwa Nowa, Ndanyele, na Yoobo. Mu mwisambo aulondo, atukalongo’shi bano bantu abadi na ngobesha ya kushala na lukumino kwi Yehowa mwanda abadi abamuuku binyibinyi. Byabya, abadi na ngobesha ya ‘kushinguula’ kalolo myanda yoso ibadi mwibalungule bwa kukita. (Nkindji 28:5) N’atwe namu twi balombene kwibambula.