Ne mutandjikwe mu kipwa kya 1937 mu kolkhoz, sunga ka ntshamba, ke pepi na musoko wa Tokmok mu Kirghizistan. Kifuko kyetu nkya mu kisamba kya Kirghiz, na dingi atwakulaa ludimi lwa kina Kirghiz. Nshami na nyin’ami abadi ba kidime, na abadi abafubila ku kolkhoz kubanga ku nakashika mpa na nsaa ya nguba batwele. Ba kidime abadi abebapa bya kudya efuku dyoso, anka babadi abebapa efuto dya makuta penda mususa umune ku kipwa. Nyinami badi ekitshisha ngofu bwa kwitupasukila ami na mwin’ande mukashi. Kunyima kwa kupudisha bipwa bitano bya kulonga, nami namu nabangile kutumika ku ntshamba ya kolkhoz.

Mu kipindji kya nsenga munadi mushale, bantu bebungi abadi balanda, na bibadi abitungu kufuba ngofu bwa kupeta bya kudya munda mwa mweshi ushima. Panadi nki nsongwalume, nadi nanangushena kapeela pabitale kepatshila ka muwa wetu na pabitale nshalelo a mu mafuku aafiki. Ntshinadi nanangushena su nkapeela’shi bya binyibinyi pabitale Yehowa Efile Mukulu na mpango yaye mbilombene kushintuula muwa wande nya. Uno mukandu ubadi ufikye mu Kirghizistan na kupalakana mwanka mushindo kinyi? Mu uno mwisambo atukyebe kulesha ino myanda kalolo. Mukandu wibuwa ubabangile mu kipindji kya nsenga kibatudi bashale dya kunundu kwa Kirghizistan.

Bya binyibinyi bya Yehowa Efile Mukulu bibadi bimene mishi mu Kirghizistan mu kipwa kya 1950. Bwa’shi bimene mishi, bibadi abitungu’shi bya binyibinyi bikambile binangu bibubi bibadi bipalakane ngofu. Bwakinyi? Eumbo dyabetanyina bu Kirghizistan binobino, mu aa mafuku dibadi munkatshi mwa maumbo abadi mu Union des républiques socialistes soviétiques (URSS). Mu mafuku a bena URSS, ba Temwe ba Yehowa abashadile belamuune kula na myanda ya politike. (Yowano 18:36) Pa mwanda wa byabya, abadi abebabingabinga bu beshikwanyi ba mbulamatadi a ba Communistes. Anka, ta  kwi mwanda su ngumune ulombene kwimika Eyi dy’Efile Mukulu bwadidya kukuma mashimba a bantu balulame nya. Eyendo, dimune dya ku malongyesha akata andi mupete mu muwa wande ndya’shi “bwa Yehowa byoso mbilombene kukitshika.”​—Maako 10:27.

Kubingwabingwa kwa ba Temwe ba Yehowa kubadi kukwashe bwa’shi banyishe kupalakana mu Kirghizistan. Bwakinyi bibadi bikitshikye bino? Mu maumbo abadi mu URSS mwi kipindji kya nsenga kya mu Siberie, mubabadi abatumu bantu boso bashi’abakumina mbulamatadi. Nsaa ibabadi abafungula bano bena lukano, bebungi abadi abafiki mu Kirghizistan, na bamo ba kwabadi abadi abatwala bya binyibinyi. Umune a ku bano bena lukano ba kala nyi Emil Yantzen, badi mutandjikwe mu Kirghizistan mu kipwa kya 1919. Abadi batume Emil mu mbalo ya kufuba midimo i bukopo, na pabadi kwakwa ngi pabadi mwimonene na ba Temwe ba Yehowa. Badi mukumine bya binyibinyi akupu, balukile mu kibundji kyabo mu kipwa kya 1956. Emil badi mushale pepi na musoko wa Sokuluk mu kipindji kya nsenga kinadi mushale. Mu Sokuluk ngi mubabatudile kakongye ka kumpala ka mu Kirghizistan mu kipwa kya 1958.

Kunyima kwa kipwa kimune, Victor Vinter bayile ku Sokuluk. Uno mukwetu mulume sha lulamato badi mufumankane na myanda ibukopo misusa na misusa. Misusa ibidi, abadi bamutshibile kibawe kya bipwa bisatu pa mwanda wa kupela kutwelakana mu myanda ya politike; kunyima badi mukishe bingi bipwa ekumi mu lukano akupu bamutuma mu lukano lwa mu mbalo i kula. Sunga mbyabya, kubingwabingwa tankwimikye kupalakana kwa lulangwilo lwa binyibinyi nya.

Mu kipwa kya 1963 kubadi ba Temwe ba Yehowa bafikye ku 160 mu Kirghizistan, bebungi ba kwabadi abadi bakatukile mu Allemagne, mu Ukraine, na mu Russie. Munkatshi mwabo mubadi Eduard Varter, ungi mukwetu badi mu lukano badi mubatshishibwe mu Allemagne mu kipwa kya 1924. Na mu kipwa kya 1940, ba Nazi abamutumine mu mbalo ya kufuba mifubo ibukopo, kunyima kwa bipwa bipeela, ba Communistes ba mu URSS abatumine Eduard mu lukano lwa mbalo i kula. Mu kipwa kya 1961 uno mukwetu sha lulamato bakatukile enda mu musoko wa Kant, wi pepi na musoko wande wa butandwa.

Elizabeth Fot ungi mufubi a Yehowa sha lulamato, badi mushale naye namu mu musoko wa Kant. Bwa kupeta ekuta dya kwikwasha nadyo, badi afubu mudimo wa kutela. Bu bibadi na bukalamwino bwibungi mu mudimo waye, bantu abadi abafubu midimo ya mbulamatadi bu ba munganga na balongyeshi abadi abatelesha bilamba byabo kwadi. Mwana mukashi umune a ku bantu babadi atelela bilamba ababadi abetanyina bu Aksamai Sultanalieva, abadi bamwibakile kwi ungi mukata a tumiladi twa bantu boso (Procureur). Aksamai badi afiki kwi Elizabeth bwa’shi amutelele bilamba, anka badi ayipusha nkonko pabitale kepatshila ka muwa na abikalaa bantu kunyima kwa kufwa. Elizabeth badi amwalula nkonko yaye kalolo ku bukwashi bwa Bible. Aksamai bafikile mulungudi a mukandu wibuwa sha kishima.

Mu aa mafuku, Nikolai Chimpoesh, badi mukatukile mu Moldavie, abadi bamutuule bu mukunkushi a kifunda na badi mufube uno mudimo munda mwa bipwa bikile pa 30. Nikolai tabadi ende nka penda mu kutala tukongye nya, kadi badi alumbuula mishindo ya kwabila bantu mikanda yetu. Bakata ba mbulamatadi ta mbakutwe kumona mudimo waye nya. Anka, Eduard Varter badi mupe Nikolai dino elango dya kumukankamika: “Nsaa yabakwele nkonko kwi bakata ba mbulamatadi, ebalungule patooka’shi tukwete kupeta mikanda yetu ku biro byetu bikata bya nsenga ishima bi ku Brooklyn. Ikala otala bena mbulamatadi a bena Russie mu meeso. Totshinanga su nkapeela.”​—Mateo 10:19.

Kapindji kapeela kunyima kwa’bo kwisamba, abadi bayitanyine Nikolai ku biro bikata bya mbulamatadi a bena Russie mu Kant. Badi mubwele myanda ibadi ikitshikye kwanka kunyima: “Bena mbulamatadi abadi bamwipushe akutukilaa mikanda yetu. Namulungwile’shi ayitukilaa ku Brooklyn. Tabadi auku kya kwakula kunyima kwa’mi kumulungula bino nya. Abadi bampoosole na tambangitanyine dimo nya.” Uno Temwe a Yehowa shi na moo batungunukile na kupalakasha mukandu wibuwa  na budimu mu kipindji kya nsenga kyandji mutandjikwe kya kunundu kwa Kirghizistan. Nsaa ibatwelele bya binyibinyi bya Yehowa mu kifuko kyetu mu kipwa kya 1980, mukashi’ande Mairambubu, ngi muntu a kumpala bebipushishe.

Mairambubu badi afiki mu kipindji kya nsenga kya ku Naryn kya mu Kirghizistan. Dingi efuku mu mweshi wa Mwanda mu kipwa kya 1974, badi mwende mu kutembela mukwetu mukashi kwaye ku nshibo, uno ngi musango wa kumpala ubatudi bemonene. Nabangile kufula Mairambubu nka paapa. Tubadi beyibakishene nka dyadya efuku dibatudi bemonene.

Mu mweshi wa Kumpala mu kipwa kya 1981 pabadi Mairambubu mu mootoka bwa kwenda mu kisalwe, ngi pabadi mupushe mayi atudi banteemune ku mbangilo kwa uno mwisambo. Mukashi’ande badi na lukalo lwa kupusha myanda ibungi, ngi bwakinyi bayipwishe yawa mwana mukashi eshina dyaye na mbalo ibadi mushale. Bamulungwile eshina dyaye, bu Apun, kadi badi na budimu mwanda mpa na mu kipwa kya 1980, midimo ya ba Temwe ba Yehowa ibadi ikandjikibwe. Pamutwe pa kulungula mukashi’ande mbalo yadi mushale, Apun batekyele mukashi’ande bwadya kumulungula mbalo yatudi bashale. Mukashi’ande bafikile ku nshibo na muloo wibungi.

Mairambubu bakwile’shi: “Napusha myanda ya kukaanya. Ungi mwana mukashi bandungula’shi mu kapindji kapela’mu bantu tabekala abafu dingi nya. Mpa na nyema ya mu kisuku, abakeyimunu pasha.” Ami nadi neyipusha nka bu myanda ya mpwandikishi. Namwalulwile’shi: “Tubande kutengyela bwa’shi afikye etulungule myanda ibungi.”

Apun bafikile mu kwitutala kunyima kwa myeshi isatu. Abafikile betutala ingi misusa kunyima, mu ino misusa tubadi bemonene na ba Temwe ba kumpala ba mu kisamba kya ba Kirghiz. Bano bakwetu bakashi abadi betuukishe bya binyibinyi bya kukaanya pabitale Yehowa na mpàngo yaye bwa bantu. Abadi abetubadikila mukanda awamba’shi Du paradis perdu au paradis reconquis. * Na dingi, bu bibakudi penda uno mukanda umune mu ludimi lwa kina Tokmok, tubadi beutentule atwe banabene.

Umune wa ku myanda ya kumpala ibatulongyele nyi mbutemuki bwi mu Kibangilo 3:15. Buno butemuki abukalombeena mwi Yesu aye mwikale Mesiya Nfumu. Uno nyi mukandu wi na muulo ngofu autungu’shi muntu ooso eupushe! Kano ngi kabingilo kakata kabadi ketutakule bwatudya kubanga kulungula mukandu wibuwa. (Mateo 24:14) Kunyima kwa mafuku apeela, bya binyibinyi bya mu Bible bibabangile kushintuula nshalelo eetu.

Ungi mukwetu mulume mwina Kidishitu a mu Tokmok badi mwitwitanyine ku musangeelo w’eyibakishi. Mu kapindji kapeela, ami na mukashi’ande  tubamwene’shi ba Temwe ba Yehowa be na mwikelo wilekene ngofu na wa bangi bantu. Ku musangeelo w’eyibakishi takubadi maalwa aakwatanaa nya, na dingi ubadi ukitshikye mu bulongame. Uno musangeelo ubadi wilekene ngofu na ingi ibatudi bapetekyelwe, mu yanka bantu bababadi betanyine babadi abakwatshika maalwa, kubanga kukita myanda ibubi, na kwakula myanda ya butesha.

Tubatwelele dingi mu bisangilo bya bena Kidishitu bya mu kakongye ka ludimi lwa Tokmok. Bino bisangilo bibadi abikitshika muushi mwa mitshi nsaa yakudi mushindo. Bakwetu balume na bakashi abadi abauku’shi ba mpulushi bakwete kwitulondesha, ngi bwakinyi bakwetu abadi abatuulu bakwetu balume balombene kulama. Mu mafuku aanoko milemba na mashika ebungi, tubadi atutwelela bisangilo mu mashibo. Ba mpulushi abafikile misusa ibidi mu nshibo mubatudi bwa kwipusha kyatukwete kukita. Pabatudi batambule ami na Mairambubu mu mweshi wa Musambo mu kipwa kya 1982 mu mwela wa Chüy, bibadi abitungu’shi twikale na budimu ngofu. (Mateo 10:16) Bakwetu abadi abafiki mu tusaka tupeela atwe nkwenda mu kwibunga mu mutamba. Tubadi atuyimbi ngono ya Bufumu na kuteemesha mwisambo wa lubatshisho.

Mu kipwa kya 1987 ungi mukwetu mulume bandungwile bwatudya kwenda mu kutala muntu badi mushale mu musoko wa Balykchy. Bwa kukatuka mu kibundji kyetu na kwenda mu kino kibundji bibadi abitungu kutambuka lwendo lwa nsaa inanka mu mashuwa a ndjandja. Kunyima kwa kwenda misusa ibungi mu kulungula mukandu wibuwa mu kibundji kya Balykchy, tubasangeene bantu bebungi be na lukalo lwa kulonga. Bino bibadi bitupe mushindo wa kutamisha mudimo wetu wa bulungudi.

Ami na Mairambubu tubadi bende mu Balykchy misusa ibungi. Tubadi atwimushala munda mwa mbingo, atutuuku mu bulungudi, na kutwela mu bisangilo bya bena Kidishitu. Bungi bwa bantu abatekye mikanda yetu bubadi bukaamine mu kipaso kya kukaanya. Tubadi atusemuna mikanda kukatuka ku Tokmok mu mishok, mufuko ubabadi abatwadila bilunga. Tubadi atutwala mifuko ibidi ku mweshi bwatudya kulombasha bungi bwa bantu abatekye mikanda. Mpa na pabatudi mu mashuwa a ndjandja pabatudi atukatuka na pabatudi atwende ku Balykchy, tubadi na mushindo wa kulungula mukandu wibuwa kwi ba nkila-mashinda.

Mu kipwa kya 1995 kubatuukile kakongye mu Balykchy​—bipwa mwanda kunyima kwa’twe kwenda mwanka bwa musango wa kumpala. Ino nyendo ibatudi atukitshi munda mwa bipwa kukatuka ku Tokmok na ku Balykchy ibadi itudye makuta ebungi. Atwe banabene tatubadi na makuta e bungi nya, byabya tubadi bobeshe kukita bino naminyi? Ungi mukwetu mulume mwina Kidishitu badi etupa makuta bwatudya kuula byoso byatudi nabyo lukalo. Yehowa bamwene lukalo lwetu lwa kutamisha mudimo wa bulungudi, aye nkwitushitwila “biibi by’eyilu.” (Malakii 3:10) Kushi mpaka, bwa Yehowa myanda yoso ngilombene kukitshika!

Mu kipwa kya 1992, abadi bampe bushito bwa kufuba bu mukulu mu kakongye, nadi bu mukulu a kumpala aakula ludimi lwa Kirghiz. Mu kakongye ka mu kibundji kyetu kya Tokmok, tubapetele ingi mishindo ipya ya kufuba. Tubapetele bantu bebungi ba kulonga nabo Bible mpa na ba nsongwa abakula ludimi lwa Kirghiz babadi ku tulasa tukata. Bamo ba ku bano ba nsongwa babatudi balongye nabo bakwete kufuba binobino bu bena kasaka ka komite a filiale, na bangi babidi bakwete kufuba bu ba mbala-mashinda ba nsaa yoso. Twi bobeshe dingi kukwasha bangi bantu ku bisangilo byetu. Kumbangilo kwa kipwa kya 1990, mikanda yetu mpa na bisangilo bibadi abikitshika mu ludimi lwa bena Russie. Anka mu kakongye mubatwelele bantu bebungi abakula ludimi lwa Kirghiz bu ludimi lwabo lwa butandwa. Ngi bwakinyi nadi napatuula bisangilo, mu ludimi lwabo na  bino bibadi abibakwasha bwabadya kunyisha kupusha bya binyibinyi.

Ami na Mairambubu tubadi na midimo ibungi ya kukita bwa kukusha bana betu. Tubadi atwende na bana betu mu bulungudi na mu bisangilo bya kakongye. Gulsayra mwan’etu mukashi—badi na muloo wa kwisamba na bantu abakidi mu museese na kwibalungula myanda ya mu Bible kubanga pabadi na bipwa 12. Na dingi bana betu abadi abakumina kulamina ma verse a mu Bible. Mu uno mushindo, bana betu, na bekulu betu abadi bepaane mu myanda ya mu kakongye. Mu bana betu 9 na bekulu betu 11 baki na muwa, 16 bakwete kufubila Yehowa na kutwela mu bisangilo pamune na bebatande.

Bakwetu balume na bakashi ababangile mudimo wa Yehowa mu kino kipindji kyetu kya nsenga mu kipwa kya 1950 mbalombene kukema ngofu pa kumona kushintuluka kwa myanda kukitshikye. Kintu kya kumpala, kubanga mu kipwa kya 1990, tubadi bapete bulungantu bwa kulungula mukandu wibuwa na kwibunga pamune mu bikongeno bikata.

Mu kipwa kya 1991 ami na mukashi’ande tubatwelele kikongeno kyetu kya kumpala kya mafuku asatu mu Alma-Ata, binobino abetanyina kino kibundji bu Almaty, mu Kazakhstan. Na dingi mu kipwa kya 1993 bakwetu ba mu Kirghizistan abatwelele mu kikongeno kya mafuku asatu kya kumpala mu kipalwe kya Spartak mu Bishkek. Balungudi ba mukandu wibuwa abadi bakishe lubingo lushima bwa kusuula mu kipalwe kumpala kwa kikongeno. Mukata a kino kipalwe badi mukeme ngofu mu kipaso kibadi mwitupe mpa na matalwa a kukita kikongeno kushi kufuta makuta.

Mu kipwa kya 1994 tubadi balombashe ungi mwanda ukata nsaa ibabadi batushe mikanda yetu bwa musango wa kumpala mu ludimi lwa Kirghiz. Binobino, mikanda yetu yoso bakwete kwiyaluula mu Kirghiz kwi kasaka ka baluudi ke ku biro bya filiale bi mu Bishkek. Mu kipwa kya 1998 abadi bakumine midimo ya ba Temwe ba Yehowa ku mbulamatadi mu Kirghizistan. Ndumbulwilo eetu mmutame ngofu, na lelo uno twi bungi bukile pa balungudi 5 000. Lelo uno twi na tukongye tufikye ku 83 na tusaka 25 twa mu ludimi lwa ki Chinois, Anglais, Kirghiz, Russe, ludimi lwa tumaama lwa bena Russie, ludimi lwa bena Turquie, ludimi lwa Ouïghour, na mu lwa Ouzbek. Bano bakwetu boso balume na bakashi bafikye mu maumbo elekene bakwete kufubila Yehowa mu buumune. Yehowa ngi mukwashe bwa’shi ino myanda yoso ishintulukye.

Yehowa badi mushintuule dingi nshalelo ande. Ne mukudile mu kifuko mushi makuta e bungi na ne mulongye penda bipwa bitano ku kalasa. Anka, Yehowa mmunkwashe bwandya kufuba bu mukulu na kulongyesha bya binyibinyi bya mu Bible bi na muulo kwi bantu balongye ngofu kunkila. Kushi mpaka, Yehowa mulombene kukwasha bwa’shi myanda ikata ikitshikye. Myanda yandi mumone’mi nabene ayintakula bwandya kutungunuka na kutula bu kamonyi na lulamato looso pabitale Yehowa, mwanda bwaye’ye, “byoso mbilombene kukitshika.”​—Mateo 19:26.