1. Bwakinyi bangi bantu mbapwandjikile kinemo, na myanda kinyi yatukyebe kulonga mu uno mwisambo?

MUSHINDO kinyi watupeyaa bangi kinemo? Atwibapeyaa kyanka pa kwibateemesha na kwibaata na muulo. Kebungi, atupeyaa bantu kinemo nsaa yabakitshi mwanda awibekasha bu bantu balombene kinemo sunga bantu be na mwasu ukaamine. Mu uno mwisambo, atukyebe kulonga pabitale bantu batudi balombene kupa kinemo na bwakinyi twi balombene kwibapa kyanka.

2, 3. (a) Bwakinyi Yehowa mmupwandjikile kupeta kinemo ki pa bwakyo? (Tala kifwatulo ki ku mbangilo.) (b) Mwana a mukooko abadi batemune mu Kibafumbwilwe 5:13 nnanyi, na bwakinyi twi balombene kumupa kinemo?

² Mukanda wa Kibafumbwilwe 5:13 awamba’shi muntu “Mushikame pa lupuna-nsulu” na “Mwana a mukooko” mbalombene kupeta kinemo. Muntu “Mushikame pa lupuna-nsulu” alesha Yehowa. Mu mukanda wa Kibafumbwilwe shapitre a 4, bipangwa bi mwiyilu abilesha bwakinyi Yehowa, “Yawa e na muwa mpa na ku ikalaika,” mmulombene kupeta kinemo. Abakula’shi: “Obe Yehowa Efile etu, we mupwandjikile kutumbishibwa mwanda we sha ntumbo na kinêmo mpa na bukome, [mwanda] nobe bapangile  bintu byoso ku kikyebe ky’eshimba dyobe nyi bwakinyi mbipangibwe byekala kwanka.”​—Kibafumbwilwe 4:9-11, EEM.

³ “Mwana a mukooko” abadi baleshe mu Kibafumbwilwe 5:13 nyi Yesu Kidishitu. Nkinyi akitushinkamisha byanka? Pabadi pano pa nsenga, Yesu badi ayitanyinwa bu “Mwana a mukooko w’Efile Mukulu, ashimishaa milwisho ya ba pano pa nsenga.” (Yowano 1:29) Ngungi nfumu kinyi mulombene kukumina kufwa bu mulambu bwa bantu baye? Kano nyi kabingilo kakata katudi balombene kumupa kinemo. Yesu mupwandjikile kinemo mwanda “Mmulopwe a milopwe na Nfumu a ba nfumu.” (1 Timote 6:14-16) Pangi we kupusha nka bu abipusha bino bipangwa bya mwiyilu abiyimbi’shi: ‘Mwana a mukooko mulambulwe, mmulombeene kupeta bukome, bupeta, kinangu, kunyinga, kineemo, ntumbo na nkumo.’​—Kibafumbwilwe 5:12.

4. Bwakinyi kupa Yehowa na Yesu kinemo nkulesha kwa binangu?

⁴ Mukanda wa Yowano 5:22, 23 awakula’shi Yehowa mmwikashe Kidishitu bu nsushi a bantu boso. Kano nyi kabingilo kakata katudi balombene kupa Yesu kinemo. Na su tubakitshi bino, atupa namu Yehowa kinemo. Su tubakumina kupa Yesu na Nshaye kinemo, atukapete muwa wa ikalaika.​—Badika Misambo 2:11, 12.

5. Bwakinyi twi balombene kupa bangi bantu boso kinemo na kwibaata na muulo?

⁵ Bantu abadi bapangibwe “kwifwanyiko dy’Efile Mukulu.” (Kibangilo 1:27) Bino abipushisha’shi bantu bebungi be na ngobesha ya kulesha ngikashi i nayo Efile Mukulu. Bu kileshesho, bantu mbalombene kulesha kifulo, kalolo, na lusa. Bantu mbapangibwe dingi na kondo k’eshimba, ngobesha ya kuuka kibuwa na kibubi, kilulame na kishii kilulame, myanda ipwandjikile na ishii ipwandjikile. (Beena-Looma 2:14, 15) Bantu bebungi abakuminaa bintu bitookye na bibuwa kumona na abakuminaa kwikala mu butaale na bangi. Bino tabitukemesha nya, mwanda Yehowa nyi Efile Mukulu a bulongame na butaale. Ino myanda ayilesha kalolo’shi, bantu booso mbapangibwe na ngobesha ya kwambula Yehowa mu bipaso bibungi. Ngi pa mwanda kinyi n’abo namu twi balombene kwibapa kinemo na kwibaata na muulo.​—Misambo 8:5.

6, 7. Ba Temwe ba Yehowa mbelekene na bangi bantu naminyi pabitale kupa bangi bantu kinemo?

⁶ Atuuku’shi bangi bantu mbalombene kupeta kinemo, anka bi kwikala bukopo bwa kuuka’shi kinemo kya mushindo kinyi akitungu kwibapa na mu kipaso kinyi. Bi byabya mwanda bantu bebungi bakutwe kupwidika abalondo mwikelo wi mu ndumbulwilo a Satana. Bangi bantu mbekashe bantu nabo bu ma nkishi aabo. Pamutwe pa kwibapa kinemo na kwibaata na muulo muyiile abibatekye Yehowa, bantu abapa bantu nabo kinemo kikilekile, na kwibata bu b’efile babo. Mbalombene kwambula nfwadilo, bikitshino, na mwikelo wa bakata ba politike na ba bipwilo, bantu abashaa maasha, bantu bende nkumo be mu ma filme, na bangi bantu abaukikwa ngofu.

⁷ Bena Kidishitu ba binyibinyi abauku’shi bibubi kupa muntu kinemo mu kipaso ki byabya. Mu bantu boso bapwe kwikala pano pa nsenga, nka penda Yesu nyi mwitulekyele kileshesho kipwidikye kyatudi balombene kwambula. (1 Mpyeele 2:21) Abitungu tutentekyeshe’shi bantu “booso mbakite milwisho, mbabulwe ntombo y’Efile Mukulu.” (Beena-Looma 3:23) Ta kwi muntu su ngumune pano pa nsenga atudi balombene kulangwila nya. Nsaa yatupa bantu kinemo kikilekile, atwinyongosha Yehowa.

8, 9. (a) Ba Temwe ba Yehowa abataa bakata ba mbulamatadi naminyi? (b) Nsaa kinyi yatushi balombene kukookyela bakata ba mbulamatadi?

⁸ Kwi bangi bantu batudi balombene kupa  kinemo na kwibaata na muulo pa mwanda wa midimo yabo. Bu kileshesho, banda kutentekyesha midimo yabetukitshinaa kwi bakata ba mbulamatadi. Abakwasha bwa kulama bantu mu kwiyikela na kulombasha nkalo ya bantu ba mu maumbo aabo. Kwi myanda ibuwa ibungi yatupetela ku midimo yabo. Mpoolo mutumibwa bambile’shi abitungu twikale atumono bano bakata ba mbulamatadi bu “banfumu be na matalwa.” Bambile dingi’shi abitungu tutumikile miiya yabo mu ano mayi: “Futayi muntu ooso kyakya kimufundjilwe, kitadi, kutshina, kineemo, ooso muntu kyakya kimulombeene nwamukitshina.”​—Beena-Looma 13:1, 7.

⁹ Atwe ba Temwe ba Yehowa, atukitaa mwetu moso bwa kulesha bakata ba mbulamatadi kanemo. Byabya, eumbo dyoso di na byadyo bipikwa bilekene na bya angi, ngi bwa kinyi myanda yabadi balombene kwituteka kwi bakata ba mbulamatadi mu dino eumbo ngilombene kwilekena na yabetutekye mu dingi. Akupu, atukokyelaa bakata ba mbulamatadi nsaa yabakitshi midimo yabo. Anka, su abetutekye bwa kukita myanda ayitutakula mu kukutwa kukookyela Yehowa, tatwi balombene kwiyikita nya. Yaya nsaa, atukookyelaa na kupa Yehowa kinemo pamutwe pa kukokyela bantu.​—Badika 1 Mpyeele 2:13-17.

10. Bafubi ba Yehowa ba kala mbetulekyele kileshesho kibuwa naminyi?

¹⁰ Twi kulonga myanda ibungi kwi bafubi ba Yehowa ba kala, abadi bape bakata ba mbulamatadi kinemo. Yoosefe na Madiya mbekale kileshesho kibuwa. Pabadi bena Looma batushe eyi dya kubadika bantu be mu nsenga yabo, Yoosefe na Madiya abayile lwendo lushima ku Beteleeme bwabadya nkefundisha sunga mbibadi Madiya n’eyimi di pa kutanda. (Luka 2:1-5) Mpoolo mutumibwa mmwikale kingi kileshesho kibuwa kya muntu badi mukookyele ba nfumu ba pa nsenga. Nsaa ibabadi bamufunde’shi bakitshi mwanda wibubi, baadi musambe na kanemo koso kumpala kwa Nfumu Erode Agripa na kwa Festuse, baadi guvernere a bena Looma mu kibundji kya Yuuda.​—Bikitshino 25:1-12; 26:1-3.

11, 12. (a) Bwakinyi tatupeyaa bakata ba bipwilo kinemo ki pa bwakyo? (b) Nkinyi kibakitshikile pabadi Temwe a mu Australie muleshe mukata a myanda ya politike kanemo?

¹¹ Twi kwamba naminyi bwa bakata ba bipwilo? Abitungu twibape kinemo ki pa bwakyo su? Abitungu twibape kinemo nka kyatupeya bangi bantu boso. Tabibuwa twekala atwibapa kinemo ki pa bwakyo nya, sunga betuteka kyanka. Bwakinyi? Mwanda bipwilo bya madimi tabilongyesha bya binyibinyi bi mu Bible Eyi dy’Efile Mukulu nya. Yesu badi mutopekye bakata ba bipwilo bya madimi na kwibetanyina bu ba nsesa na bu bakunkushi bebubi. (Mateo 23:23, 24) Ku lungi lupese, ta bi bubi kwata bakata ba mbulamatadi na muulo na kwibapa kinemo nya. Bu byatukitaa bino, ingi nsaa abetukwashaa.

¹² Umune a ku bano bakata ba mbulamatadi nyi Dr. Heinrich Gleissner, mwikale mukata a myanda ya politike mu Australie. Mu ngoshi ya kabidi ya nsenga ishima, abadi bamukwate kwi bena Nazie. Pababamwelele mu mashuwa a ndjandja bwa kumutwala mu lukano, badi mwimonene na Leopold Engleitner, mwikale Temwe a Yehowa a mu Australie. Mukwetu Engleitner badi mumupatulwile malongyesha eetu na kanemo kooso, na Dr. Gleissner, badi mumuteemeshe kalolo. Kunyima kwa ngoshi, Gleissner badi mufube na mwasu waye misusa ibungi bwa kukwasha ba Temwe ba Yehowa mu Australie. We kuuka bingi bileshesho bya myanda ibuwa ikitshikye pa mwanda wa kanemo ka bena Kidishitu kwi bakata ba mbulamatadi.

13. Mbantu kinyi batudi balombene kunemeka, na bwakinyi?

¹³ Bakwetu balume na bakashi mbalombene kupeta kinemo na kwibaata na muulo. Twi balomene kunyiisha kukita bino kwi bakwetu abetukunkusha, bu bakulu mu kakongye, bakunkushi ba bifunda, bena Komite a filiale, na bena Kasaka ka Bakunkushi Bakulu. (Badika 1 Timote 5:17.) Bano bakwetu booso abetatshisha bwa kulombasha nkalo ya mwilo w’Efile Mukulu, na Bible ayitanyina bano bafubi bu “bantu [bekale] bya buntu.” (Beena-Efeso 4:8) Ngi bwakinyi twi balombene kwibapa kinemo na kwibaata na muulo kushii kutala eumbo dyabo, tulasa twabadi balongye, nshalelo, bupeta sunga bulanda bwabo. Bena Kidishitu ba kumpala mbetulekyele kileshesho kibuwa. Abadi abapa bantu abebakunkusha kinemo, n’atwe namu be lelo uno abitungu twibambule. Nsaa yatudi na bano bantu, tatwibaata bu ba mwikeyilu, sunga bu bantu bakile bangi nya. Anka atwibaata na muulo na kwibapa kinemo bwa mudimo wibukopo wabakitshi na kwiyisha kwabo.​—Badika 2 Beena-Kodinda 1:24; Kibafumbwilwe 19:10.

14, 15. Bakulu bena Kidishitu mbelekene na bakata ba bipwilo naminyi?

¹⁴ Bano bakulu mbekale nka bu balami ba mikooko basha kwiyisha. Tabakumina’shi twibakitshine myanda bu bantu bende nkumo nya. Byabya mbelekene ngofu na bakata ba bipwilo be lelo uno mpa na bakata ba bipwilo ba mu mafuku a Yesu. Ngi bwakinyi Yesu badi mwakule bino pa mwanda wabo: “Mbafule kushala pa mbalo ya kumpala mu madyo akata, na nkwasa ya kumpala mu bitumbwilo, mbakumine kusemibwa kwa kinemo mu bifumankeeno bya bantu.”​—Mateo 23:6, 7.

¹⁵ Bakulu bena Kidishitu abakokyelaa ano mayi a Yesu: “Tanwiyitanyishenanga bu balambukishi, mwanda nwi nka na mulambukishi umune, dingi anwe booso nwi bana na bana. Tanwitanyinanga muntu pa nsenga bu nshenu, mwanda nwi naye nka umune Yaaya e mwiyilu. Tabenwitanyinanga bu [bakunkushi NWT] mwanda nwi na [Mukunkushi] umune Kidishito. Mukile bukata munkatshi mwenu ayikale mufubi eenu. Ooso eekamisha, ayishibwa, ooso eeyisha akamishibwa.” (Mateo 23:8-12) Su bakulu booso ba mu nsenga ishima beyisha na kukookyela mayi a Yesu, bakwetu balume na bakashi abanyiisha kwibafula, kwibaata na muulo na kwibapa kinemo.

16. Bwakinyi abitungu twikitshishe ngofu bwatudya kulesha bangi kinemo?

¹⁶ Bi kwitwata mafuku ebungi bwatudya kulonga bwa kupa bangi kinemo. Na bena kidishitu ba kumpala namu bibadi abibelela  bukopo. (Bikitshino 10:22-26; 3 Yowano 9, 10) Anka abitungu twikitshishe. Nsaa yatupa bangi kinemo mu kipaso akikumina Yehowa, atukapete myabi ibungi.

17. Mmyabi kinyi yatupete su tubaapa bantu be na matalwa kinemo?

¹⁷ Nsaa yatupa bantu be na matalwa mwiumbo dyetu kinemo na kwibaata na muulo, abakumina kukalwila matalwa eetu a kulungula mukandu wibuwa. Mbalombene kwikala na binangu bibuwa bwa mudimo wetu wa bulungudi. Uno mwanda ubadi ukitshikye takudi bipwa bibungi mu Allemagne nsaa ibadi mbala-mashinda abetanyina bu Birgit mwende ku musangelo wa mwan’aye mukashi bapwile kalasa. Balongyeshi abalungwile Birgit’shi, be na muloo wa kulongyesha bana ba ba Temwe mu tulasa twabo. Abapushishe’shi bana ba ba Temwe abekasha ku kalasa bu mbalo ibuwa. Birgit bebalungwile’shi, “Bana betu mbalongyeshibwe byabadya kulonda miiya y’Efile Mukulu mu nshalelo aabo, mu ino miiya mwi mpa na mwiya wa kwata balongyeshi na muulo na kwibapa kinemo.” Ungi mulongyeshi bakwile’shi su bana booso abadya kwikala bu bana ba ba Temwe ba Yehowa, mudimo wa bulongyeshi ubadya kwikala upelepele. Pa mwanda wa binangu bibuwa bibabadi nabyo bwa bana ba ba Temwe, umune a ku bano balongyeshi batwelele mu kikongeno kyetu kya mafuku asatu kibakitshikile kunyima.

18, 19. Abitungu tutentekyeshe kinyi nsaa yatupa bakulu kinemo?

¹⁸ Mayi a kulonda e mu Eyi dy’Efile Mukulu ngalombene kwitukwasha bwa kupusha kipaso kyatudya kupa bakulu be mu kakongye kinemo. (Badika Beena-Ebelu 13:7, 17.) Abitungu twikale atwibakaanyisha bwa mudimo wibukopo wabakwete kukita. Nsaa yatulondo bukunkushi bwabo, atwibakwasha bwabadya kufuba na muloo. Bible amba’shi, abitungu twambule lukumino lwabo. Bino tabilesha’shi abitungu twikale atwifwana nfwadilo, ngakwilo na kipaso kya kulongyesha kya mukulu kampanda nya. Su tubakitshi byabya, bi kwikala bu’twe bakwete kulonda muntu pamutwe pa kulonda Kidishitu. Tatulubanga’shi na bakulu namu mbakutwe kupwidika nka bu’twe.

¹⁹ Nsaa yatupa bakulu kinemo na kwibaata na muulo, na kupela kwibakitshina myanda bu bantu bende nkumo, bino abibakwasha ngofu. Mu kipaso kinyi? Abibabofwila bwabadya kwikala na kwiyisha na kupela kwimona bu bakile bangi na kupela kumona’shi nsaa yooso abakitaa nka myanda ilulame.

20. Mmyabi kinyi yatupete nsaa yatupa bangi kinemo?

²⁰ Kupa bangi kinemo akwitukwasha bwatudya kupela kwisankisha atwe banabene na akwitukwasha bwatudya kwikala beyishe nsaa yabetwata na muulo kwi bangi. Kukita bino nkwikale ndingi bu bulami kwatudi mwanda akwitukwasha bwatudya kupela kupona mu kutompibwa nsaa i muntu atunemekaa bakitshi mwanda ushi’awitusangasha. Ungi mwabi ngwa’shi kukita bino akulama buumune mu ndumbulwilo a Yehowa. Ndumbulwilo a Yehowa tapeya muntu, mwina kukumina sunga shii mwina kukumina kinemo kikilekile nya.

21. Mmwabi kinyi ukile bukata watukapete su tubalesha bangi kinemo?

²¹ Ungi mwabi ukata watupete ngwa’shi nsaa yatupa bangi kinemo atusangasha Yehowa. Atukatungunuka na kukita myanda yooso y’etutekye na atukashala na lulamato kwadi. Patukitshi byabya, Yehowa amono mushindo wadya kwaluula Satana, bambile’shi muntu su ngumune ta mulombene kushala na lulamato kwi Yehowa. (Nkindji 27:11) Bantu bebungi lelo uno mu nsenga ishima tabauku bya kupa bangi kinemo kibapwandjikile nya. Twi na lutumbu lwibungi mwanda atwe atuuku bya kupa bantu kinemo mu kipaso kyabakumina kwi Yehowa!