1, 2. (a) Uno ndumbulwilo mubi e mumune na muntu ntomboshi abakyebe kwipaa naminyi? (Tala kifwatulo ki ku mbangilo.) (b) Bantu boso be mwiyilu na be pa nsenga abakapusha naminyi kunyima kwa kabutu ka uno ndumbulwilo mubi?

NANGUSHENA uno mwanda. Muntu ntomboshi kwete kutambuka munkatshi mwa nshibo ya lukano na bantu abamulama bakwete kwela musase’shi, “Nnauno muntu mufwe atembe!” Bwakinyi abakula bino? Sunga uno ntomboshi e na muwa na mbidi bukome, mbapwe kumutshibila kibawe kya lufu na abende naye mu nkamwipaa. E nka bu’ye mupwe kufwa. *

² Uno ndumbulwilo mubi atudi e nka bu uno muntu ntomboshi abende naye mu nkamwipa. Bible akula’shi: “Bya pano abikidi.” (1 Yowano 2:17) Yehowa mmupwe kwata kitshibilo kya kufudiisha uno ndumbulwilo binobino, ngi bwakinyi kushii mpaka uno ndumbulwilo afudiila binobino. Anka kwi kwilekena kukata pankatshi pa nfudiilo a uno ndumbulwilo na kwipayibwa kwa yawa muntu ntomboshi. Bangi bantu be kumona’shi abatshibila yawa muntu kiimmu bi bubi mwanda  abamudimbiila, na kukulupila’shi tabamwipaa. Anka, Yehowa mmwikale nsushi mupwidikye, na kitshibilo kyaye kya kubutula uno ndumbulwilo nkipwidikye na nkilulame. (Miiya Ikituulwe 32:4) Kabutu kaye akafiki binobino. Kunyima kwa kabutu ka uno ndumbulwilo, bantu boso be mwiyilu na be pa nsenga abakakumina na kwakula’shi kiimu kya Yehowa nkilulame. Atukekala na muloo wibungi!

3. Mmyanda inanka kinyi ayikakabutulwa nsaa ayikafiki Bufumu bw’Efile Mukulu?

³ “Bya pano abikidi” mbintu kinyi? Nyi mbintu byooso bibubi bi mu nshalelo atudi naye lelo uno. Bino byoso abebikatusha binobino. Uno nyi “mukandu wibuwa wa Bufumu.” (Mateo 24:14) Mu uno mwisambo, atukalongo pabitale myanda yabakakatusha kwi Bufumu bw’Efile Mukulu bu, bantu be bubi, ndumbulwilo, mifubo yabo, na nshalelo ebubi. Pabitale bino bintu byoso, atukalongo (1) mushindo wabitwinyongosha binobino, (2) byabakebitshi kwi Yehowa, na kya (3) nkinyi kyakapyanyisha nabyo.

4. Bantu babi bakwete kwitukyengyesha naminyi lelo uno?

⁴ Bantu be bubi abetwinyongosha mushindo kinyi lelo uno? Mpoolo mutumibwa bakwile’shi, mu mafuku a ku nfudilo, akukekala “bipungo bibukopo.” Na bakwile dingi’shi: “Bantu be bubi na bansesa mu lukumiino abayidididila mu bubi.” (2 Timote 3:1-5, 13) Tobandile kufumankana na ino myanda su? Bebungi ba kwatudi mbakyengyeshibwe na bantu babi be na kifita, be na ntondo y’ekoba, na bantu abakitaa bibeshi. Bangi ba kwabadi abakitshi myanda ibubi mpa na patoka apamono bantu. Bamo abamba’shi, abakwasha bantu aku namu bakwete kukita myanda ya bu ntomboshi. Na dingi, sunga twekala’shi tatwabandile kufumankana na bino bibeshi, tukwete kukyengyeshibwa na bantu babi. Abitutanyisha mitwe nsaa yatupusha kipaso kyabakwete kukyengyesha bana bakinga, bantu banunu, na bangi bantu bashii balombene kwikalwila. Bano bantu babi bakwete kukita myanda ayibekasha nka bu nyema ya bukyelo sunga ba demo. (Shake 3:15) Biya byoso, Eyi dy’Efile Mukulu aditupa lukulupilo.

5. (a) Mbalekyele bantu babi nsaa ya kukita kinyi? (b) Nkinyi akikafikila bantu abapele kushintuluka?

⁵ Yehowa akakitshi kinyi na ba ntomboshi? Binobino Yehowa mmulekyele bantu babi nsaa yabadya kushintuluka. (Yeeshaya 55:7) Sunga byekala’shi uno ndumbulwilo abutulwa binobino, tababandile kwibatshibila kiimu kya nfudilo nya. Byabya, nkinyi akikakitshikila bantu booso abapele kushintuluka na abakidi ku lupese lwa uno ndumbulwilo mpa na mu nsaa ayikafiki mpombo ikata? Yehowa mmulee’shi, akatusha bantu boso bebubi pa nsenga. (Badika Misambo 37:10.) Lelo uno, bantu bebungi bakwete kukimba bya kufwamisha myanda ibubi yabakitshi, na misusa ibungi tabakwete kupeta manyooka bwa bilubilo byabo nya. (Yoobo 21:7, 9) Anka, Bible etutentekyesha’shi: “Meeso a Yehowa aatalaa bikitshino bya bantu booso, aebalondeshâ koso kwabende. Mufito sunga wekala wi bwî tangulombene kumukutshishwa kumona ba nkitshishi ba bubi.” (Yoobo 34:21, 22, EEM) Ta kwi muntu mulombene kufwama kumpala kwa Yehowa nya. E na ngobesha ya kumona kintu kyoso kyabakitshi kwi bantu babi. Kunyima kwa Armagedone, atukakimba mbalo yabekalanga, anka tatukebamono nya. Abakashimina bwa looso!​—Misambo 37:12-15.

6. Mbantu kinyi abakashala pa nsenga nsaa yabakabutula bantu babi, na bwakinyi uno mmukandu wibuwa?

 ⁶ Mbantu kinyi abakashala nsaa yabakabutula bantu babi? Yehowa mmwitulee’shi: “Beyishe abapyana nsenga, abasangeela mu butaale bw’eyendo.” Kunyima kwa paapa, atubadika bino mu mukanda wa Misambo: “Balulame [abapyana nsenga], abemushala looso.” (Misambo 37:11, 29) Bantu “beyishe” na “balulame” mbantu kinyi? Bantu beyishe nyi mbantu be na kwipeelesha abakumina kulonga bwa kuuka Yehwa na bya kumukookyela. Bantu balulame namu nyi mbano bafule kukita myanda yabadi baleshe kwi Efile Mukulu’shi ibuwa. Lelo uno, mu nsenga mwi bantu babi bebungi kukila bantu balulame. Anka mu ndumbulwilo mupya, akukekala nka penda bantu beyishe na balulame, na abakaluula nsenga bu mpaladiso!

7. Ndumbulwilo ibubi ikwete kwitukyengyesha naminyi lelo uno?

⁷ Ndumbulwilo ibubi i na bukitshishi kinyi kwatudi lelo uno? Myanda ibubi ibungi ayikitshika mu nsenga lelo uno, tabeyikitshi kwi muntu umune nya. Anka abeyikitshi kwi ma ndumbulwilo. Ndumbulwilo ya bipwilo ikwete kudimba bantu midiyo na midiyo. Bu kileshesho, bakwete kudimba bantu pabitale Efile Mukulu, abakula’shi ta bi buwa kukulupila myanda ya mu Bible, na abadimbi bantu pabitale myanda ya mu mafuku aafiki bwa nsenga na bantu. Mbulamatadi ilwile ikwete kwibwesha ngoshi na ntondo y’ekoba na kukyengyesha balanda na bantu bashii balombene kwikalwila. Ino mbulamatadi ikwete kukaamisha makome p’ayo kulesha ntondo na kukumina kutshibibwa milomo. Ndumbulwilo Ya busunga ikwete kulwisha kapapi, kulwisha mitshi na bingi bintu abikwasha, na kwiba bantu bintu byabo bwa’shi bantu bapeela bafikye ba mpeta. Abimweneka kalolo’shi, ndumbulwilo ibubi ngi ikwete kwibwesha makyenga ebungi atumono mu nsenga lelo uno.

8. Muyiile abyakula Bible nkinyi akikafikila ndumbulwilo yooso ayimweneka bu ibukome kwi bantu bebungi lelo uno?

⁸ Yehowa akakitshi kinyi? Mpombo ikata ayikabanga nsaa ayikafiki bakata ba politike mu kulwisha ndumbulwilo ya bipwilo bya madimi, byabadi betanyine mu Bible bu mukashi ndumba sh’eshina dya bu Babilone mukata. (Kibafumbwilwe 17:1, 2, 16; 18:1-4) Ino ndumbulwilo ya bipwilo ayikabutulwa yooso. Nkinyi akikafikila ingi ndumbulwilo ibubi? Bible ebapwandikisha na myengye ikata na bisangi mwanda abamweneka bu be bukome na banyingye. (Badika Kibafumbwilwe 6:14.) Munkatshi mwayo mwi ma mbulamatadi na angi ma ndumbulwilo ooso aapele kukwatshishena Bufumu bw’Efile Mukulu. Ino ndumbulwilo ayikabutudibwa. Kino nyi akikekala kipindji kya nfudiilo kya mpombo ikata. (Yeelemiya 25:31-33) Kunyima kwa byabya, takukekala ndumbulwila su ngumune e bubi nya!

9. Bwakinyi atushinkamisha’shi nsenga ipya ayikekala na ndumbulwilo ebuwa?

⁹ Nkinyi akikapyana ino ndumbulwilo ibubi? Kunyima kwa Armagedone, pa nsenga tapakekala ndumbulwilo su ngumune? Bible akula’shi: “Twi batengyele eyilu dipya na nsenga ipya, mwamwa amukabikala bululame.” (2 Mpyeele 3:13) Mayilu a kala na nsenga ya kala nyi mbulamatadi ibubi na bantu babakunkusha. Kunyima kwa kulwishibwa, nkinyi akikebipyana? “Eyilu dipya na nsenga ipya.” Eyilu dipya adileesha mbulamatadi mupya, abakunkusha  kwi Yesu Kidishitu na bantu 144 000. Nsenga ipya ayilesha bantu babakamunu kwi Bufumu bw’Efile Mukulu. Yesu na bantu abakamunana naye abakambula Yehowa mwikale Efile Mukulu a bulongame mu kipaso kipwidikye. (1 Beena-Kodinda 14:33) Byabya, “nsenga ipya” ayikala na myanda ilondene mu mulongo. Amukekala bantu balulame bwa kulama bintu kalolo. (Misambo 45:16) Bantu boso abakakunkushibwa na Kidishitu na bano bantu 144 000. Banda kupwandisha nsaa ayikakatuka ino ndumbulwilo yooso na kupyanyibwa na ndumbulwilo umune e na buumune na mushi’amukekala dingi kutshibibwa milomo!

10. Mmyanda ibubi kinyi ipalakane mu uno ndumbulwilo atudi, na ino myanda i na bukitshishi kinyi koodi na kwi kifuko kyobe?

¹⁰ Myanda ibi i na bukitshishi kinyi kwatudi lelo uno? Twi mu ndumbulwilo mupalakane bantu be na bwikashi bwibubi bu, kukutwa kwa kululama, na bu ntomboshi. Mu bintu bya kukisha nabyo kapapi, abalesha ino myanda bu ibuwa aku namu abatupilwa miya ya Yehowa ya kusangula kibuwa na kibubi. (Yeeshaya 5:20) Abitungu ba nambutwile bakite bukopo bwabo bwabadya kukalwila bana babo ku ino myanda ibubi. Byabya, abitungu’shi bena Kidishitu ba binyibinyi booso bekale abetatshisha bwa kukalwila kipwano kyabo na Yehowa mu uno ndumbulwilo shi’anemeka miiya y’Efile Mukulu.

11. Nkinyi akitulongyesha kiimu kibabadi batshibile bena Sodome na Gomore kwi Yehowa?

¹¹ Yehowa akakitshi kinyi na myanda ibi? Banda kunangushena bibakitshine Yehowa na myanda ibubi ibadi ayikitshika mu kibundji kya Sodome na Gomore. (Badika 2 Mpyeele 2:6-8.) Loota badi muntu mululame, na dingi aye na kifuko kyaye abakyengyele ngofu pa mwanda wa myanda ibubi ibaabadi abakitshi kwi bantu bebefunyishe. Yehowa bayipayile bantu ba mu bino bibundji booso na myanda ibubi ibaadi ayikitshika mwanka. Bakitshine bino bwa kupa bantu babi ba ano mafuku kileshesho. Nka bu bibaabadi bafudiishe myanda ibubi kala kwi Yehowa, ngi byakafudiisha dingi ino myanda ibubi ikwete kukitshika lelo uno nsaa yakabutula uno ndumbulwilo a myanda.

12. Mmyanda kinyi yokulupila nkakita nsaa yabakabutula uno ndumbulwilo?

¹² Nkinyi akikapyana myanda ibi? Mu nsenga ipya atukekala na muloo wa kukita myanda ibuwa. Bu kileshesho, atukaluula nsenga ifikye mpaladiso na kwibaka mashibo eetu na a bakwetu. Atukakuukila dingi bantu midiyo na midiyo abakasanguka na kwibalongyesha bwabadya kuuka Yehowa na myanda yooso yadi mukitshine bantu. (Yeeshaya 65:21, 22; Bikitshino 24:15) Mu aa mafuku, atukekala na myanda ibungi ya kukita ayiketwikasha na muloo na atukatumbisha Yehowa ngofu!

13. Bu ntomboshi bwa mu Edene mbutuushe myanda kinyi?

¹³ Nshalelo ebubi e na bukitshishi kinyi kwatudi lelo uno? Ino nsenga ngiule mba na bantu babi, ndumbulwilo ibubi, na myanda i bubi ngitwikashe dingi mu nshalelo ebubi. Boso bwetu tukwete kupeta twinyongoshi atutuukila ku ngoshi, bulanda, ntondo y’ekoba, mikumbo, na lufu. Ino nshalelo ibubi i kwanka mwanda Satana, Adame, na Eeva abaadi batombokyele Yehowa. Na boso bwetu tukwete kukyenga pa mwanda wa bu ntomboshi bwabo.

14. Yehowa akakita kinyi na uno nshalelo ebubi?

 ¹⁴ Yehowa akakitshi naminyi na uno nshalelo ebubi? Tubande kutala bino bileshesho. Yehowa mmulee bwa kupudisha ngoshi. (Badika Misambo 46:8, 9.) Akakatusha mikumbo. (Yeeshaya 33:24) Akamina lufu bwa looso. (Yeeshaya 25:8) Akakatusha bulanda. (Misambo 72:12-16) Na dingi Yehowa akakatusha ingi myanda yooso ibubi ayitukyengyesha lelo uno. Akakatusha mpa na bukitshishi bwi bubi bwa Satana na ba demo baye!​—Beena-Efeso 2:2.

15. Mbintu kinyi abikashimina bwa looso kunyima kwa Armagedone?

¹⁵ Banda kunangushena abikekala nshalelo, apakekala bantu mu nsenga mushii ngoshi, mikumbo, sunga lufu! Takukekala basalayi, ma mputu, sunga bintu abitentekyesha ngoshi. Takukekala lukalo lwa mpitaalo, ba munganga, ma mbalo a kulama bitanda, sunga mashama nya. Takukekala bibeshi, byabya tatukekala na lukalo lwa ba mpulushi, basalayi ba kwitulama, pangi takukekala su ndukalo lwa ma nsapi na ma nfungula nya! Ino myanda yooso ayitwinyongosha ngofu lelo uno ayikashimina bwa looso.

16, 17. (a) Bantu abakapanda ku Armagedone abakapusha naminyi? Tusha kileshesho. (b) Abitungu tukite kinyi bwatudya nkapanda pabakabutula uno ndumbulwilo?

¹⁶ Nshalelo akekala naminyi nsaa yabakakatusha myanda ibubi? Kupwandikisha byabikekala ta nkubofule nya. Mwanda tubapu kukita mafuku ebungi mu nshalelo ebubi. Ngi bwakinyi tatumono bya kupwandikisha kipaso kyabitwinyongosha nya. Tubande kwata kileshesho, bantu bashale pa mbalo ayimenaa ma mashuwa a ndjandja ebungi mbalombene kubanga kukutwa kupusha tuleo. Na bantu bashale peepi na kibunduulu kya basumbwilaa butshafu bwibungi mbalombene kubanga kukutwa kupusha eshiko. Kadi nsaa ayikakatusha Yehowa nshalelo ebubi, atukekala na nshalelo ebuwa bukile!

¹⁷ Nkinyi akikapyana tuno twinyongoshi toso twatudi nato lelo uno? Mukanda wa Misambo 37:11 awamba’shi: “Abasangeela mu butaale bw’eyendo.” Abitukankamika ngofu pa kupusha’shi Yehowa akumina kwitutuula mu nshalelo e bino! Mu ano mafuku e twinyongoshi twi bungi, kita mobe mooso bodya kushala peepi na Yehowa na ndumbulwilo aaye. Bu byodi na lukulupilo lwa nkapeta myanda ibuwa, ikala onangushena ngofu pa yanka, ikala mushinkamishe’shi ino myanda ngya binyibinyi, na ikala weyilungula bangi bantu. (1 Timote 4:15, 16; 1 Mpyeele 3:15) Su bokitshi byabya, we mulombene kushinkamisha’shi nsaa yabakabutula uno ndumbulwilo, okapanda na okekala na muloo wa ikalaika!