1. Abrahame balesheshe naminyi’shi badi mukulupile mwi Yehowa sha kululama? (Tala kifwatulo ki ku mbangilo.)

“NSUSHI a miilo asambishaa nka na bululame?” (Kibangilo 18:25) Abrahame muntu sha lukumiino tabadi mwele luno lukonko mwanda’shi badi na mpaka nya. Anka, luno lukonko lwaye lubadi alulesha byadi mukulupile’shi Yehowa mulombene kusambisha kibundji kya Sodome na Gomore mu kipaso kilulame. Badi mushinkamishe’shi Yehowa tamulombene “kwipaa muntu ebuwa na mubi pamune nya.” Abrahame bamwene’shi tamulombene “kukita byabya.” Kunyima, Yehowa bakwile aye nabene’shi: “Aye Lubwebwe, byakitshi mbipwidikye, mwatambukilaa mooso mmululame. Nyi Efile Mukulu a lulamato; mwadi ta mwi kukutwa bululame dingi nsha-kalolo.”​—Miiya Ikituulwe 31:19; 32:4.

2. Bwakinyi Yehowa ta mulombene kukutwa kululama?

² Bwakinyi Abrahame badi mukulupile’shi Yehowa mulombene kukita nka myanda ilulame efuku dyoso? Mwanda Yehowa mmwikale kileshesho kipwidikye kya kululama. Byabya bu bi miiya ya Yehowa ngilulame mu myanda yooso, atungunuka na kutshiba myanda yooso nka na kululama. Bible akula’shi: “mmufule bululame.”​—Misambo 33:5.

3. Tusha kileshesho kya myanda ya kukutwa kululama ayikitshika mu nsenga lelo uno.

 ³ Abitunyingisha mashimba patupusha’shi Yehowa e na kululama mu myanda yooso. Byabya, lelo uno mu nsenga mwi myanda ya kukutwa kululama ibungi. Bu kileshesho, kwi bantu bebungi babadi badimbile na kwibela mu lukano bwa bibeshi byabashii bakite. Anka pabakitshi kipimo kya ADN, abasangana’shi bangi bantu mbebadimbiile, aku namu abapu kukita bipwa bibungi mu lukano. Ino myanda ya kukutwa kululama ayinyongosha bantu na kwibafitshisha munda. Byabya, kwi ungi mushindo wa kukutwa kululama ulombene kwikala bubi kukila ino ibatwisamba. Mushindo wa kukutwa kululama kinyi?

4. Mmwanda kinyi ulombene kutuula lukumino lwa mwina Kidishitu mu kutompibwa?

⁴ Bena Kidishitu abashinguula’shi mbalombene kufumankana na myanda ya kukutwa kululama pasha pa kakongye. Byabya, lukumino lwetu ndulombene kutompibwa ngofu su twamona mwanda aumweneka bu wa kukutwa kululama mu kakongye. Su ofumankana na mwanda wi byabya, we kukita naminyi? Okatadila uno mwanda bwa’shi ukuponeshe su?

5. Bwakinyi tatwi balombene kukalakashwa su twamona sunga kufumankana na mwanda wa kukutwa kululama mu kakongye?

⁵ Boso bwetu twi bakutwe kupwidika na atukitaa bilubilo, ngi bwakinyi ungi muntu mulombene kwitukitshina mwanda ushii ululame. Sunga’shi atwe namu twi balombene kukitshina ungi muntu e mu kakongye mwanda wibubi. (1 Yowano 1:8) Sunga byekala’shi ino myanda tayikambaa kukitshika, bena Kidishitu banyingye mu lukumino tababofulaa sunga kupona nsaa ayikitshika mwanda wi bino nya. Yehowa mmwitupe malango ebuwa e mu Bible e bya kwitukwasha bwa kushala banyingye mu lukumino nsaa yatufumankana na mwanda wa kukutwa kululama ubabetukitshina kwi bakwetu balume sunga bakashi.​—Misambo 55:12-14.

6, 7. Mmwanda kinyi wa kukutwa kululama ubafumankene na ungi mukwetu mu kakongye, na ngikashi kinyi ibamukwashishe?

⁶ Tubande kwata kileshesho kya Willi Diehl. Kubanga mu kipwa kya 1931, mukwetu Diehl badi afubu na lulamato looso ku Betele a mu Bern, mu Suisse. Mu kipwa kya 1946, batwelele mu kalasa ka 8 ka Gileade mu New York, mu États-Unis. Kunyima kwa kwibapa ma dipolome, abamutumine bu mukunkushi a kifunda mu Suisse. Mu mwisambo wa nshaleelo aaye, mukwetu Diehl bambile’shi, mu mweshi wa Katano 1949, badi mufundile komite a filiale a mu Suisse’shi e na mpàngo ya kwibakila. Bakwetu abadi abakunkusha mudimo abamulungwile’shi su bayibakila abamukatusha mashito aaye ooso. Abamulungwile’shi ashala penda bu mbala-mashinda. Mukwetu Diehl bambile’shi: “Babaadi bantunyishe mpa na bwa kukita miisambo. Bebungi tababadi abetwele sunga mooyo, abadi abetukitshina myanda nka bu’twe batushibwe mu kakongye.”

⁷ Mukwetu Diehl bakitshine naminyi? Bambile’shi: “Anka, tubadi atuuku’shi kwibakila ta mwanda wikutwene na Bifundwe nya, ngi bwakinyi tubadi bepaane mu nteko na kutula lukulupilo lwetu mwi Yehowa.” Sunga mbibadi bangi bakwetu tabashinguula kalolo bi mweneno a Yehowa pabitale eyibakishi, kunyima kwa mafuku abadi balumbuule mpushisho aabo, ngi mukwetu Diehl nkupetuula mashito aaye. Yehowa badi mumufute bwa lulamato lwaye. * Tubandeyi kwiyipusha’shi: ‘Su nnami mufumankane na mwanda wi bino wa kukutwa kululama, nadya kutengyela na lwishinko na  kukulupila’shi Yehowa alumbuula uno mwanda su? Su nadya kwikulupila ami nabene na kukimba bya’shi bankitshine nka myanda na kululama?’​—Nkindji 11:2; Badika Mika 7:7.

8. Bwakinyi twi balombene kwidimba’shi atwe sunga bangi bantu be mu kakongye mbetukitshine mwanda wa kukutwa kululama?

⁸ Su omono’shi nkukitshikye mwanda wa kukutwa kululama mu kakongye, tentekyesha’shi ingi nsaa we kwidimba. Bwakinyi? Mwanda bu byatudi bantu bakutwe kupwidika twi balombene kupusha mwanda bibubi. Twi balombene dingi kukutwa kuuka bi myanda yooso kalolo. Anka byabikala’shi twi bapushe mwanda bibuwa sunga bibubi, abitungu tutekye Yehowa bwa uno mwanda, tukulupile mwadi, na kushala na lulamato. Kukita bino nkulombene kwitukwasha bwa kupela ‘kufiitshila Yehowa munda.’​—Badika Nkindji 19:3.

9. Mu uno mwisambo na mu aulondo mbileshesho kinyi byatukyebe kulonga?

⁹ Tubandeyi kulongyela ku ino myanda isatu ya kukutwa kululama ibapetele bafubi ba Yehowa ba mu mafuku a kala. Mu uno mwisambo, atukyebe kumona mwanda ubadi pankatshi pa Yoosefe ka nkwata manwi ka Abrahame na bakwabo. Mu mwisambo aulondo namu, atukesambila kipaso kibabadi bakitshine Nfumu Akabe myanda kwi Yehowa na mwanda ubapetele Mpyeele mu Antyoshe a mu Sirii. Patukwete kwenda na kutaluula bino bileshesho, kimba mishindo yodi mulombene kushala mukulupile kwi Yehowa na kulama kipwano kyobe naye, bikishekishe mu nsaa yomono’shi mbakukitshine myanda na kukutwa kululama.

10, 11. (a) Yoosefe bafumankene na mwanda kinyi wa kukutwa kululama? (b) Yoosefe pabadi mu lukano bapetele mushindo wa kukita kinyi?

¹⁰ Yoosefe nyi mufubi a Yehowa sha lulamato ababadi bakitshine myanda ya kukutwa kululama kwi bantu ba miilo yabene. Anka mwanda ubadi umukalakashe ngofu, myanda ya kukutwa kululama ibabadi bamukitshine kwi bakwabo. Pabalombeshe Yoosefe bipwa 17, bakwabo abamukwatshile bamupaana mu bupika. Kunyima abamuudiishe mu Ejiipitu. (Kibangilo 37:23-28; 42:21) Kunyima kwa mafuku, pabadi mu dino eumbo dyabene, abadi bamudimbiile’shi bakyebe kulala na mwana mukashi pa bukopo, abo nkumwela mu lukano kushii’bo kumusambisha. (Kibangilo 39:17-20) Dikyenga dya Yoosefe dya kubanga pababamuudishe bu mpika na pababamwelele mu lukano dibakitshine bipwa 13. Ndilongyesha kinyi dyatudi balombene kupetela ku kileshesho kya Yoosefe dilombene kwitukwasha nsaa yatufumankana na mwanda wa kukutwa kululama ubabetukitshina kwi bakwetu?

¹¹ Pabadi Yoosefe mu lukano, abadi bele namu kapita kabatwadilanga nfumu malwa mu lukano. Mu bungi bufuku, uno kapita balotele kilotwa, Yehowa namu bakwashishe Yoosefe bwadya kupatuula kino kilotwa. Yoosefe badi mupatuule’shi uno kapita ka maalwa abamutuusha mu lukano na akatungunukye na kufubila Faraone. Kunyima kwa paapa Yoosefe bapetele mushindo wa kupatulwila yawa muntu bi mwanda waye. Twi balombeene kulonga myanda ibungi ku myanda ibakwile Yoosefe na ku yashii mwakule.—Kibangilo 40:5-13.

12, 13. (a) Nkinyi akitushinkamisha’shi Yoosefe tabadi mukumine myanda ya kukutwa kululama ibadi mupete? (b) Mmwanda kinyi wabashii balungule kapita ka maalwa kwi Yoosefe?

¹² Badika Kibangilo 40:14, 15. Lamina’shi Yoosefe bakwile’shi abadi ‘bantwale mwiumbo dyabene.’ Kishima kyabadi bele mu Bible pa ino mbalo nkilombene dingi kupushisha’shi “mbangibe.” Abimweneka kalolo’shi abadi bamukitshine mwanda wa kukutwa kululama. Yoosefe bakwile dingi patooka’shi; tamusoole mwanda ubabadi  abamuteula nya. Ngi bwakinyi batekyele kapita ka maalwa bwadya kumwakwila kwi Faraone. Badi na kepatshila kinyi? Bambile’shi: ‘[Bwa’shi] antushishe mu ino nshibo.’

¹³ Yoosefe badi nka mukumine kushala mu dino dikyenga kushii kwikitshisha bwa’shi emutuukye su? Nya! Yoosefe badi auku’shi abamukitshina myanda ibungi ya kukutwa kululama. Ngi bwakinyi badi mulungule kapita ka maalwa mwanda waye, na lukulupilo lwa’shi uno muntu mulombene kumukwasha. Anka lamina’shi Bible talesha mbalo su ngimune’shi Yoosefe balungwile ungi muntu, sunga Faraone’shi bakwabo ngi babamupaanyine nya. Byabya, nsaa ibafikile bakwabo mu Ejiipitu na kwalusha butale pankatshi pabo na Yoosefe, Faraone badi mwibakuukile na kwibetanyina bwabadya kufika mu kushala mu Ejiipitu na kudya “bintu bikile buwa bya mwiumbo.”—Kibangilo 45:16-20.

14. Nkinyi akiketukalwila bwa kupela kwakula myanda ibubi su abetukitshina mwanda wa kukutwa kululama mu kakongye?

¹⁴ Su twamona’shi mbetukitshine mwanda wa kukutwa kululama mu kakongye, abitungu tudimukye tala uno mwanda wetutwala mu kuunauna. Byabya, twi balombene kuteka bukwashi kwi bakulu mu kakongye na kwibalungula su mukwetu bakitshi mulwisho ukata. (Beena-Levi 5:1) Anka, misusa ibungi ino myanda tayikalaa milwisho ikata nya, nkulombene kwikala mushindo wa kutwesha butaale na mukwetu kushii kulungula ungi muntu, sunga beenyi bakulu. (Badika Mateo 5:23, 24; 18:15.) Patudi kumpala kwa mwanda wi bino, abitungu tushale na lulamato na kufubila mayi a kulonda a mu Bible. Ingi nsaa twi balombene kumona’shi twi bapushe mwanda bibubi na’shi tambetukitshine mwanda wa kukutwa kululama nya. Yaya nsaa, twi kupusha bibuwa su atwe banabene tatwi balwishe myanda pa kwakula mukwetu myanda ibubi! Tentekyesha’shi byabikala’shi mbetulwishishe sunga’shi ta mbetulwishishe, kwakula myanda ibubi ta nkulombene kulumbuula myanda nya. Kwikala na lulamato kwi Yehowa na kwi bakwetu akuketukalwila bwa kupela kukita bilubilo. Mufundi a misambo bambile’shi muntu mulombene kushala mu nshibo ya Yehowa  “nguno sha mwikeelo ululame.” Uno muntu “te na bwakul’akule, takitshinaa mukwabo mwanda ubi.”—Misambo 15:2, 3; Shake 3:5.

15. Kipwano kya Yoosefe na Yehowa kibadi bu mwabi kwadi naminyi?

¹⁵ Twi kupeta dingi dilongyesha di na muulo mu kileshesho kya Yoosefe. Munda mwa bipwa 13 bibadi mukyengye bwa myanda ya kukutwa kululama, Yoosefe balesheshe’shi badi amono myanda mu kipaso akiyimonaa Yehowa. (Kibangilo 45: 5-8) Tabadi mutopekye Yehowa bwa uno mwanda efuku nsu dimune. Byabya, Yoosefe tabadi mulube myanda ya kukutwa kululama ibadi mupete, anka ta mulame nsungu nya. Mwanda wi na muulo, tamutadiile bwa’shi bilubilo na bikitshino bibubi bya bangi bantu bilwishe kipwano kyaye na Yehowa. Lulamato lwa Yoosefe lubadi lumupe mushindo wa kumona Yehowa kwalumbuula myanda na kumwelela aye na kifuko kyaye myabi.

16. Bwakinyi twi balombene kunyiisha kwifubwila peepi na Yehowa nsaa yatufumankana na mwanda wa kukutwa kululama mu kakongye?

¹⁶ Mu mushindo umune, abitungu twikale atwata kipwano kyetu na Yehowa na muulo na kwikikalwila. Ta twi balombene kutadila bilubilo bya bakwetu bilwishe kipwano kyetu n’Efile Mukulu atudi bafule na atukwete kulangwila nya. (Beena-Looma 8:38, 39) Pamutwe pa byabya, su tubafumankana na mwanda wa kukutwa kululama mu kakongye, twambuleyi kileshesho kya Yoosefe, na kunyiisha kwifubwila peepi na Yehowa. Twitatshisheyi bwa kumona uno mwanda abiumono Yehowa. Kunyima kwa kukita mwetu mooso bwa kupudisha uno mwanda muyiile mayi akulonda a mu Bible, abitungu twiulekye mu maasa mwa Yehowa. Twikale bashinkamishe’shi akalumbuula uno mwanda pa nsaa na mu kipaso kibuwa.

17. Twi kulesha naminyi’shi twi bakulupile mwi “nsushi a booso be pa nsenga”?

¹⁷ Mu mafuku ooso atukii mu uno ndumbulwilo mulwile, tukulupileyi’shi atufumankana nka na myanda ya kukutwa kululama. Ingi misusa, obe sunga ungi muntu ouku mmulombene kumona mwanda wa kukutwa kululama mu kakongye. Uno mwanda taukuponeshanga. (Misambo 119:165) Pamutwe pa byabya, shala na lulamato kwi Efile Mukulu, ela nteko kwadi, na otuule lukulupilo lobe mwadi. Tentekyesha’shi bu byodi muntu mukutwe kupwidika, we mulombene kupusha mwanda bibubi, na pangi we kukutwa kuuka bi mwanda ooso. Ambula kileshesho kya Yoosefe na dingi twakulanga myanda ibubi, mwanda bishima bibubi mbilombene kunyiisha kulwisha myanda. Bwa kufudiisha, pamutwe pa kwikulupila obe nabene, ikala na kitshibilo kya kushala na lulamato, na kutengyela na lwishinko looso bwa’shi Yehowa nabene alumbuule uno mwanda. Su bokitshi byabya, okakuminyibwa na Yehowa na kupeta myabi yaye, nka bu bibapetele Yoosefe. Ikala mushinkamishe’shi Yehowa, “nsushi a booso be pa nsenga,” akitaa nka myanda ilulame, mwanda “mwatambukilaa mooso mmululame.”—Kibangilo 18:25; Miiya Ikituulwe 32:4.

18. Mu mwisambo aulondo atukalongo kinyi?

¹⁸ Mu mwisambo aulondo, atukalongo bingi bileshesho bibidi bya myanda ya kukutwa kululama ibadi ikitshikye munkatshi mwa bafubi ba Yehowa ba kala. Bino bileshesho abiketukwasha bwa kumona kipaso akiketukwasha kwiyisha na kufwila bangi lusa bwa kwambula mweneno a Yehowa pabitale kululama.