1, 2. Abitungu ooso a kwatudi ashinkamishe kinyi? (Tala kifwatulo ki ku mbangilo.)

NKA bu byatwikele bebimone mu mwisambo ushale, Diabulu badi mwakule’shi Yehowa te na matalwa a kukunkusha bantu. Bakwile dingi’shi Yehowa takunkushaa mu kipaso kibuwa na’shi bantu mbalombene kwikala na muloo wibungi su bekala abekunkusha abo banabene. Bino bibakwile Satana mby’eyendo su? Banda kwela binangu bibatudya kwikala su bantu abadya kwikala na muwa wa ikalaika na kwikunkusha abo banabene. Abadya kwikala na muloo kukila pababadya kwibakunkusha kwi Efile Mukulu su? We kwikala na muloo wibungi su wekala na muwa wa ikalaika kushii kulonda bukunkushi bw’Efile Mukulu su?

² Ta kwi muntu su ngumune mulombene kwalula ino nkonko pa mbalo yobe nya. Ooso a kwatudi e na kya kunangushena kalolo pa ino nkonko. Kunyima kwa kunangushena, atukamono kalolo’shi mushindo wa kukunkusha wa Yehowa ngi ukile buwa. Na’shi twi balombene kukwatshishena bukunkushi bwaye na mashimba eetu oso. Twi kushinkamisha bino kukiila ku myanda yatudi balongye mu Bible. Tubandeyi kutalula akyakula Bible pabitale matalwa a Yehowa a kumunana pa bintu byoso bi mwiyilu na bi pa nsenga.

3. Bwakinyi Yehowa e na matalwa a kwikala Nfumu?

³ Nka penda Yehowa ngi e na matalwa a kwikala Nfumu a bantu  boso be mwiyilu na pa nsenga mwanda aye nyi Efile Mukulu sha bukome boso na Mupangi. (1 Myanda 29:11; Bikitshino 4:24) Mu kingi kimonwa kya myanda ya mwiyilu, bantu 144 000 abakamunana pamune na Kidishitu abadi abamba’shi: “Yehowa Efile Mukulu eetu, we mulombene kupeta ntumbo na bukome, mwanda obe ngi bapangile bintu byooso; bokyebele’shi bikale panka, abyo nkupangibwa.” (Kibafumbwilwe 4:11) Yehowa nyi bapangile bintu byoso, ngi bwakinyi e na matalwa a kukunkusha bantu boso be mwiyilu na be pa nsenga.

4. Bwakinyi bulungantu bwa kwisangwila tabwitupa matalwa a kutombokyela Efile Mukulu?

⁴ Satana tamupangye kintu su nkimune. Ngi bwakinyi te na matalwa su ngapeela a kwikala nfumu a bintu bi mwiyilu na bi pa nsenga. Satana, mulume na mukashi ba kumpala, abadi na kapesha nsaa ibabadi batombokyele matalwa a kumunana a Yehowa. (Yeelemiya 10:23) Kwikala na bulungantu bwa kwisangwila kubadi akwibapa matalwa a kutombokyela bukunkushi bwa Yehowa su? Nya. Bulungantu bwa kwisangwila abupeyaa muntu matalwa a kwiatshila bitshibilo. Anka tabupeyaa muntu matalwa a kutombokyela Yehowa Mupangi aaye nya. Abimweneka kalolo’shi, kutombokyela Efile Mukulu nyi nkufuba bibubi na bulungantu bwa kwisangwila. Atwe bantu twi na lukalo na bukunkushi bwa Yehowa.

5. Bwakinyi bitshibilo by’Efile Mukulu byoso abikalaa nka bilulame?

⁵ Banda kwela binangu bwa kangi kabingilo akalesha bwakinyi Yehowa e na matalwa a kukunkusha. Afubishaa matalwa aaye mu kipaso kipwidikye na kilulame. Etulungula’shi: “Ami Yehowa [naleshaa kifulo ki na lulamato NWT], biinyibiinyi na bululame pa nsenga. . . . Byaabya ngi abinsangasha.” (Yeelemiya 9:24) Yehowa te na lukalo lwa miya ya bana ba bantu bwa’shi imukwashe bwadya kwata kitshibilo kibuwa nya. Anka, aye elaa miya pabitale kibuwa. Na dingi Yehowa bapeele bantu miya imeene pa kululama kwaye kupwidikye. Mufundi a Misambo bambile’shi: “Bululame na bupwidikye ngi bitako bya lupuna-nsulu lwobe.” Ngi bwakinyi mwiya ooso, eyi dya kulonda, na kitshibilo kyoso akifiki kwi Yehowa nkilulame. (Misambo 89:14; 119:128) Satana bambile’shi, Yehowa ta Mukunkushi e buwa. Byabya, Satana ta mulombene kutuula kululama pa nsenga.

6. Nkabingilo kinyi akalesha’shi Yehowa e na matalwa a kumunana?

⁶ Kangi kabingilo akalesha bwakinyi Yehowa e na matalwa a kumunana, nka’shi aye e na kiukilo na binangu abimukwasha bwa kupasukila bintu byoso bi mwiyilu na bi pa nsenga. Atushinkamisha uno mwanda patumono kipaso kibapeele Mwan’aye ngobesha ya kupaasha mikumbo ibadi ikambile ba munganga boso. (Mateo 4:23, 24; Maako 5:25-29) Sunga ino myanda yekala bu bilengyeleshi kwatudi, ta ngikale bilengyeleshi kwi Yehowa nya. Aye auku kalolo bi mbidi ya muntu, ngi bwakinyi mulombene kupaasha mukumbo ooso wi mwanka. Mulombene dingi kubusha bantu bafwe na kwimika masaku aatuukila ku bintu bipangibwe.

7. Yehowa e na binangu kukila bantu boso be mu ndumbulwilo a Satana naminyi?

⁷ Uno ndumbulwilo abakunkusha kwi Satana ta mulombene kutuula butaale, munkatshi mw’eumbo dimune sunga munkatshi mwa maumbo ebungi. Nka penda Yehowa ngi e na binangu bilombene kufwisha butaale pa nsenga. (Yeeshaya 2:3, 4; 54:13) Atupusha nka bibapushishe Mpoolo mutumibwa nsaa ibambile’shi: “Efile sha bupeta bukata, na binangu na kapatupatu bifiime! Bitshibilo byaye ta bi kupimwa, na mashinda aaye ta e kushinguulwa!”​—Beena-Looma 11:33.

8. Opusha naminyi pabitale kipaso akikunkushaa Yehowa?

⁸ Nka bu bibatukatuka mu kumona, Bible alesha patoka’shi Yehowa e na matalwa a kumunana. Bible alesha dingi bwakinyi Yehowa mmwikale Mukunkushi mukile buwa. Kabingilo ka kumpala, mpa mwanda akunkushaa  na kifulo. Atunyisha kwifubwila pepi naye nsaa yatunangushena kipaso kyadi na “lusa na kalolo, shakwataa nsungu bukidi, muule na kifulo, [lulamato na binyibinyi NWT].” (Efilu 34:6) Efile Mukulu etukitshinaa myanda na kanemo na kwitwata na muulo. Etulombesha nkalo yetu kalolo kwitukila mpa n’atwe banabene. Satana bakwile’shi Yehowa asuminaa bafubi Baye bintu bibuwa, bino bibakwile bya madimi. Efile Mukulu batushishe mpa na Mwan’aye aadi mufule bwa’shi tupete lukulupilo lwa muwa wa ikalaika.​—Badika Misambo 84:11; Beena-Looma 8:32.

9. Atuuku naminyi’shi Efile Mukulu apasukilaa muntu na muntu oso a kwatudi?

⁹ Yehowa mmufule bafubi baye boso mu kibungi. Anka, etatshishaa dingi bwa muntu na muntu ooso a kwatudi. Banda kwela binangu ku myanda ibakishikile mu mafuku a kala. Munda mwa bipwa nkama isatu, Yehowa badi mufube na ba nsushi bwadya kukunkusha mwilo waye na kwibatshokwela ngoshi kumpala kwa beshikwanyi. Sunga mbibadi akitshi ino myanda yoso, Yehowa badi nka apasukila muntu ooso a kwabadi. Umune a ku bano bantu nyi mwana mukashi ababadi abetanyina bu Luuta. Tabadi mwina Isaleele nya, na dingi badi mulekye bintu bibungi bwadya kufika mulangwidi a Yehowa. Yehowa bamufutshile p’aye kumupa mulume na mwana. Kunyima kwa byabya, mwana a Luuta bafikile umune a ku bantu be mu mulongo wa ba nkambwa ba Mesiya. Yehowa badi mufundishe mpa na nshalelo a Luuta mu Bible, mu mukanda wa mu Bible wi n’eshina dyaye. Opwandikisha’shi Luuta akapusha naminyi nsaa yakasanguka na pakauku ino myanda yoso?​—Luuta 4:13; Mateo 1:5, 16.

10. Bwakinyi twi kwamba’shi Yehowa takunkushaa mu kipaso kya kumwesha bantu mpombo?

¹⁰ Yehowa takunkushaa mu kipaso kya kumwesha bantu mpombo nya. Anka, bantu boso abamukookyela be mu bulungantu na muloo. (2 Beena-Kodinda 3:17) Daavide bakwile bino pabitale Yehowa: “Ebaakanyi n’etaata bi kumpala kwa lukyebo lwaye, bukome na kinemo bi mu nshibo yaye.” (1 Myanda 16:7, 27) Etane mufundji a misambo bafundile’shi: “Mwilo ushinguule bya nkusaamuna ngwa-mwabi! Autambukila mwitaata dya mpala yoobe Yehowa! Bw’eshina dyoobe, abashi masha a muloo efuku dyooso, bwa bululame boobe abapete kineemo.”—Misambo 89:16, 17.

11. Twi kunyiisha kwikala bashinkamishe’shi bukunkushi bwa Yehowa ngi bukile buwa naminyi?

¹¹ Su tubatungunuka na kunangushena pa buwa bwa Yehowa, atukanyiisha kwikala bashinkamishe’shi bukunkushi bwaye ngi bukile buwa. Atukapusha nka bu mufundi a misambo bambile’shi: “Kushala efuku dimune mu nshibo yoobe nkukile kwikala mafuku kinunu mu ingi mbalo!” (Misambo 84:11) Yehowa nyi betupangile, ngi bwakinyi aye auku myanda yoso ilombene kwitwikasha na muloo. Etupa bintu byoso byatudi nabyo lukalo na kalolo kooso. Myanda yoso yabetutekye kwi Yehowa mbwa buwa bwetu. Sunga byatunga’shi twisumine ingi myanda, atwikala nka na muloo su tubakookyela Yehowa.​—Badika Yeeshaya 48:17.

12. Nkabingilo kakata kinyi aketutakula mu kukwatshishena matalwa a kumunana a Yehowa?

¹² Bible etulungula’shi kunyima kwa bipwa kinunu bya kumunana kwa Kidishitu, bangi bantu abakatombokyela Bufumu bwa Yehowa. (Kibafumbwilwe 20:7, 8) Nkinyi akikebatakula bwabadya kukita bino? Mu aa mafuku, Diabulu akatakula bantu bwabadya kwikala na kinangu kya kwisankisha. Mmupwe kwibatakula bwabadya kwikala na kino kinangu. Na akatompo dingi bwa kukuminyisha bantu’shi be kwikala na muwa wa ikalaika sunga bapela kukookyela Yehowa. Bino ta mbya binyibinyi nya. Anka abitungu twiyipushe’shi, ‘Ne mulombene kukumina madimi e bino su?’ Su twi bafule Yehowa binyibinyi na kwikala bashinkamishe’shi e buwa, na’shi e na matalwa a kukunkusha bintu byoso bi mwiyilu na bi pa nsenga, tatukakumina ano madimi nya. Atukakumina kwikala nka mu bukunkushi bwa Yehowa, aye akunkushaa na kifulo.

13. Twi kukwatshishena matalwa a Efile Mukulu a kumunana nsaa yatumwambula naminyi?

¹³ Nka bu bibatukatuka mu kumona, Yehowa e na matalwa a kumunana, na kumunana kwaye ngi kukile buwa. Ngi bwakinyi twi balombene kukwatshishena matalwa aaye a kumunana n’eshimba dimune. Atukwatshishena matalwa aaye a kumunana nsaa yatushala na lulamato kwadi na kumwambula. Su tubakitshi mwetu moso bwa kukita myanda mu mushindo wa bakumina kwi Yehowa, atulesha’shi twi bamufule na atukwatshishena matalwa aaye a kumunana.​—Badika Beena-Efeso 5:1, 2.

14. Bakulu na ba nfumu ba bifuko be kwambula Yehowa naminyi?

¹⁴ Bible etulongyesha’shi misusa yoso, Yehowa afubaa na matalwa aaye na kifulo. Ba nfumu ba bifuko na bakulu mu tukongye bafule matalwa a kumunana a Yehowa, abakuminaa kumwambula na kupela kukyengyesha bangi sunga kwibakunkusha mu kipaso kibubi. Mpoolo mutumibwa badi mukite mwaye moso bwadya kwambula Efile Mukulu na Mwan’aye. (1 Beena-Kodinda 11:1) Tabadi enyongosha bangi na kwibakitshisha myanda ilulame pa bukopo nya. Anka, badi ebakankakamika na kalolo koso bwabadya kukita myanda ibuwa. (Beena-Looma 12:1; Beena-Efeso 4:1; Filemone 8-10) Mpoolo pa kukita bino badi mwambule Yehowa. Nsaa yatukitshina bangi myanda na kalolo, atukwatshishena matalwa a kumunana a Yehowa.

15. Atukwatshishena matalwa a kumunana a Yehowa naminyi nsaa yatuneemeka bantu badi mupe matalwa?

¹⁵ Atukwatshishena dingi matalwa a kumunana a Yehowa nsaa yatunemeka na kutumika pamune na bantu baadi mupe matalwa. Sunga twakutwa kupusha kalolo bwakinyi abaata kitshibilo sunga kyekala’shi takitusankisha, abitungu twibakwatshishene. bantu ba mu uno ndumbulwilo tabakuminaa kukita bino nya, byabya su atwe twakumina Yehowa bu Nfumu’etu, atukakumina kwibikita. (Beena-Efeso 5:22, 23; 6:1-3; Beena-Ebelu 13:17) Su tubakitshi bino, atwikala na muloo  wibungi, mwanda Efile Mukulu akumina’shi twikale bibuwa.

16. Bitshibilo byatwata abilesha’shi tukwete kukwatshishena matalwa a kumunana a Efile Mukulu naminyi?

¹⁶ Twi balombene kukwatshishena dingi matalwa a Efile Mukulu a kumunana mu bitshibilo byatwata. Yehowa ta mwitwelele miya mu myanda yoso ya mu nshalelo eetu nya. Anka, etulungula bi binangu byaye. Bino abitukwasha bwatudya kuuka kyatudya kukita. Bu kileshesho, Yehowa ta mupe bena Kidishitu mulongo wa mashina a bilamba byabadi balombene na byabashi balombene kufwala nya. Anka, etulungula’shi abitungu tukimbe bilamba abilesha’shi twi na kupopeela na bilombane bwa ba tumonyi baye. (1 Timote 2:9, 10) Akumina’shi tunangushene pa bukitshishi bulombene kwikala na bitshibilo byetu kwi bangi. (1 Beena-Kodinda 10:31-33) Nsaa yatwata bitshibilo bimeene pa binangu bya Yehowa, atulesha’shi twi bamufule na atukwatshishena mushindo waye wa kumunana.

17, 18. Balume na bakashi beyibakishene be kulesha naminyi’shi abakwatshishena matalwa a kumunana a Yehowa?

¹⁷ Tubande kutala ungi mushindo ulombene bena Kidishitu be mu eyibakishi kukwatshishena matalwa a kumunana a Yehowa. Mulume na mukashi mbalombene kufumankana na myanda yabashi’abakulupilanga’shi abakafumankana nayo mu eyibakishi dyabo. Be kupeta nkalakashi ibukopo. Pabafumankana na mwanda wi byabya, mbalombene kunangushena mushindo ubabadi abakitshina mwilo wa Isaleele a kala myanda kwi Yehowa. Badi mwipwandikishe aye nabene bu mulume a mwilo waye. (Yeeshaya 54:5; 62:4) Mwilo ubadi utombokyele Yehowa misango ibungi. Kino kipwano kyabo kibadi nka bu eyibakishi di na nkalakashi ibungi. Yehowa tamukimbe bya kusumbushena mwilo wa Isaleele bukidi nya. Anka, badi ebafwila lusa misango na misango na kwibalombesha milayilo yaye.​—Badika Misambo 106:43-45.

¹⁸ Bena Kidishitu beyibakishene be na kifulo na Yehowa abetatshishaa bwa kumwambula. Sunga mu eyibakishi dyabo mwekala myanda, tabakimbaa bya kutshiba eyibakishi mu mushindo wikutwene na Bifundwe nya. Abauku’shi Yehowa ataa mutshipo wa mu eyibakishi na muulo na akumina’shi mulume na mukashi bekale ‘babungibwe’ pamune. Nka penda lusandji ngi kabingilo kamune ke mu Bifundwe kalombene kutakula muntu mu kutshiba eyibakishi na kwikala bulungantu bwa kutwela mu dingi eyibakishi. (Mateo 19:5, 6, 9) Su bena Kidishitu abakitshi bukopo bwabo boso bwa koobesha eyibakishi dyabo, abakwatshishena matalwa a kumunana a Yehowa.

19. Abitungu tukite kinyi nsaa ibatukitshi bilubilo?

¹⁹ Boso bwetu twi bantu bakutwe kupwidika, na ingi nsaa atukitaa myanda ishi’ayisankisha Yehowa. Aye nabene auku bino, ngi bwakinyi batushishe mulambu wa nkuulo wa Kidishitu. Byabya, nsaa yatukitshi kilubilo, abitungu tutekye Yehowa lusa. (1 Yowano 2:1, 2) Pamutwe pa kupusha penda bibubi bwa kilubilo kyetu, twi kwitatshisha bwa kulongyela ku kyanka. Abitungu tushale pepi na Yehowa, aye akuminaa kwitufwila lusa na kwitukwasha na dingi tutungunukye na kumufubila.​—Misambo 103:3.

20. Bwakinyi abitungu tukwatshishene matalwa a kumunana a Yehowa kubanga binobino?

²⁰ Mu ndumbulwilo mupya, muntu ooso akakunkushibwa na Yehowa na dingi akalonga mashinda aaye alulame. (Yeeshaya 11:9) Twi balombene kulonga myanda ibungi kubanga binobino bwa kuuka bi binangu byaye na kipaso kyakumina’shi twikale atukitshi myanda. Kubashala kapindji kapeela, muntu su ngumune takelesha matalwa a kumunana a Efile Mukulu mpaka nya. Ngi bwakinyi, tukiteyi mwetu moso kubanga binobino bwatudya kukwatshishena matalwa a kumunana a Yehowa p’atwe kumukookyela, kumufubila na lulamato, twikitshishe na mwetu moso bwa kumwambula mu myanda yoso yatukitshi.