We mubadikye kalolo Bitenta bya Mulami bituukye binobino su? Banda kutala su we kwalula ino nkonko ayilondo:

Abitungu bakunkushi ba bifunnda na bakulu mu kakongye bakite kinyi nsaa yabapete buludiki abufiki kwi ndumbulwilo a Efile Mukulu?

Abitungu bakookyele kushi kunyengakana. Mbalombene kwiyipusha abo banabene’shi: ‘Nakankamikaa bakwetu be pepi nami bwabaya kwikala na lulamato kwi Yehowa su? Nalondaa buludiki bwabetupa kwi ndumbulwilo a Efile Mukulu kushii kunyengakana su?’​—w16.11, esk. 14.

Bena Kidishitu ba binyibinyi abatwelele mu bupika bwa bena Babilone mu mafuku kinyi?

Bino bibadi bikitshikye mafuku apeela kunyima kwa lufu lwa batumibwa. Mu aa mafuku, kubatukile kasaka ka bakata ba bipwilo. Bakata ba bipwilo na bena mbulamatadi ababangile kukwatshishena lulangwilo lwa bena Kidishitu basumbule lukumino na kubanga kushikiila mayi a bena Kidishitu be bu blee. Anka, bipwa makumi kumpala kwa kipwa kya 1914, bedibwe mwimu ababangile kupeta bulungantu.​—w16.11, esk. 24-25.

Bwakinyi mudimo wa Lefèvre d’Étaples ubadi na muulo?

Lefèvre badi mwaluule Bible mu Fwalanse ludimi alupusha bantu bebungi mu kipwa kya 1520. Mushindo ubadi mupatuule mukandu wa mu Bible ubadi utakule Martin Luther, William Tyndale, na John Calvin.​—wp16-F.6, esk. 10-12.

Nkwilekena kinyi kwi pankatshi pa “kwelanga binangu ku mbidi” na “kwelanga binangu ku kikudi”? (Beena-Looma 8:6)

Muntu elaa binangu ku mbidi, ngyawa mwipaane mu kusangasha malaka aaye a mbidi ikutwe kupwidika, nsaa yoso esambaa na kutumbisha bintu bya ku mbidi. Muntu eele binangu ku kikudi namu mmutuule myanda y’Efile Mukulu pa mbalo ya kumpala mu muwa waye na anangushenaa ku yanka; mwina Kidishitu akitaa bino kwete kukunkushibwa na kikudi kiselele. Kwelanga binangu ku mbidi akutwalaa ku lufu, anka kwelanga binangu ku kikudi namu akutwalaa ku muwa na kufukama.—w16.12, esk. 15-17

Ingi mishindo kinyi yatudi balombene kupeelesha twinyongoshi?

Tuula bintu bi na muulo pa mbalo ya kumpala, ikala na nkatshinkatshi, ata nsaa ya kukisha kapapi efuku dyooso, ikala obandjila bipangwa by’Efile Mukulu, ikala wele miseku na bantu, na dingi ikala okitshi kalashishi ka mbidi na kulaala tulo twi bungi.—w16.12, esk. 22-23

“Henoke batwadilwe bwa kumukumba ku lufu.” (Beena-Ebelu 11:5) Mushindo kinyi?

Abimweneka’shi Efile Mukulu bakatwishe Henoke ku muwa amutwala na kalolo kooso ku lufu, kushi’ye nabene kuuka lufu lwaye.—wp17.1, esk. 12-13.

Bwakinyi kwipeelesha kukii na muulo?

Muntu e na kwipeelesha auku kyaadi aye nabeene, na ashinguula’shi kwi bingi bintu byashii na ngobesha sunga matalwa a kwibikita. Abitungu tuukye bukitshishi bulombene kwikala na mwikeelo wetu kwi bangi bantu, na tulekye kwiata na muulo ukilekile atwe banabene.—w17.01, esk. 18.

Nkinyi akishinkamisha’shi Efile Mukulu badi akunkusha kasaka ka bakunkushi bakulu ka mu siekele a kumpala bu byakwete kukunkusha Kasaka ka Bakunkushi Bakulu lelo uno?

Ku bukwashi bwa kikudi kiselele, babadi bapushe kalolo bya binyibinyi bya mu Bifundwe. Ku bukwashi bwa ba mwikeyilu, abadi abaludika mudimo wa bulungudi. Na dingi babadi abalondo Eyi dy’Efile Mukulu nsaa ibabadi abatusha buludiki. Ino myanda ikwete kukitshika mpa na lelo uno.—w17.02, esk. 26-28.

Mmyanda kinyi ayitukwasha bwatudya kumona nkuulo bu i na muulo?

Kwi myanda inanka: Nanyi beyitushishe, bwakinyi badi mwiyitushe, mmulambu wa mushindo kinyi ubabadi batushe, na ndukalo kinyi lwayitulombesha. Twi balombene kunangushena kipaso kifikye ino myanda mu kulombana.—wp17.2, esk. 4-5.

Kunyima kwa kwata kitshibilo mu mwanda kapanda, mwina Kidishitu mulombene kushintula binangu byaye su?

Abitungu tulombashe mayi eetu. Anka ingi nsaa twi balombene kutalula bitshibilo byetu. Bena Ninive pababadi belangye ku milwisho, Efile Mukulu badi mushintuule kitshibilo kyaye. Ingi nsaa, apashintuluka nshalelo sunga patushinguula myanda ipya, bi kwitutunga natwe namu bwatudya kushintuula bitshibilo byetu.—w17.03, esk. 16-17.

Bwakinyi kwakula myanda ibi kwi masaku?

Nkulombene kupalakasha mwanda, na kunyisha kwiulwisha. Byabikala’shi mbetulwishishe sunga’shi natwe balwishe, kwakula myanda ibubi ta nkulombene kulumbuula myanda nya.—w17.04, esk. 21.