1-3. (a) Mukanda wa Misambo 147 abadi pangi beufunde mu mafuku kinyi? (b) Mukanda wa Misambo 147 wi kwitulongyesha kinyi?

MISUSA ibungi, atusamunaa muntu nsaa yakitshi sunga yakula mwanda awitukaanyisha. Byabya, twi na muloo wibungi wa kutumbisha Yehowa Efile Mukulu! Atumutumbisha pa mwanda wa bukome bwaye, bwatumono mu bintu bya kukaanya byadi mupangye. Na dingi, atumutumbisha bwa kifulo kyaye kikata kyadi mwitufule, kino kifulo atwikimono ku bukwashi bwa mulambu wa nkuulo wa Mwan’aye.

² Nsaa yatubadika mukanda wa Misambo 147, atumono kalolo’shi mufundji a uno musambo badi na lukalo lukata lwa kutumbisha Yehowa. Na dingi akankamika bangi bantu bwabadya kutumbisha Efile Mukulu pamune naye.​—Badika Misambo 147:1, 7, 12.

³ Tatuuku eshina dya muntu badi mufunde musambo wa 147 nya. Anka mufundji a uno musambo badi kwanka mu mafuku abalukile beena Isalele mu Yeelusaleme kunyima kwa Yehowa kwibatusha mu bupika mu Babilone. (Misambo 147:2) Mufundji a misambo badi atumbisha Yehowa mwanda mwilo Waye ubapetele mushindo wa kumulangwila dingi mu eumbo dyabo. Kunyima, mufundji a misambo badi  mutushe tungi tubingilo twa kutumbisha Yehowa. Ntubingilo kinyi? Na ntubingilo kinyi todi nato tulombene nkutakula mu kwela musase’shi “Aleluuya!,” sunga’shi “Tumbishaayi Yehowa!”? Misambo 147:1.

4. Nfumu Siruse pabadi mutuushe bena Isaleele mu bupika, abadi bapushe naminyi, na bwakinyi?

⁴ Banda kunangushena bibadi abipusha bena Isaleele pababadi mu bupika mu Babilone. Basalayi babadi bebatwale mu Babilone abadi abebasepe na kwibamba’shi: “Etuyimbileyi loono kampanda lwa mu Siyoona.” Anka bena Yuuda tababadi abapusha bya kwimba nya. Mwanda babadi babutule Yeelusaleme, mbalo ibadi ayibapetesha muloo. (Misambo 137:1-3, 6) Mashimba aabo abadi asasukye, na abadi na lukalo lwa kusambibwa. Kadi, nka bu bibabadi batemukye mu eyi dy’Efile Mukulu, Yehowa bakwashishe mwilo waye. Mu mushindo kinyi? Siruse nfumu a mu Perse badi mutshokole bena Babilone, aye nkwakula bino pabitale Yehowa: “Muntentekye aye nabeene bushito bwa kumwibakila nshibo ku Yeelusaleme.” Siruse balungwile bena Isaleele’shi: “Su munkatshi mwenu mwi muntu a mu mwilo waye, aalukiile, Yehowa Efile Mukulu amukunkushe mwishinda.” (2 Myanda 36:23) Ano mayi abadi akankamikye bena Isaleele abadi mu Babilone ngofu!

5. Mufundji a misambo badi mwakule naminyi pabitale bukome bwa Yehowa bwa kwitupaasha?

⁵ Yehowa tabadi musambe mwilo wa Isaleele nka penda mu kibungi nya, anka badi musambe mpa na mwina Isaleele ooso pa bupenka. Yehowa etukitshinaa bino mpa n’atwe be lelo. Mufundji a Misambo bafundile’shi Efile Mukulu “abuku baa-sha-mashimba eenyongole, abuku malonda aabo.” (Misambo 147:3) Nsaa yatudi na maladi sunga yatudi na kinyongwa, twi kwikala bashinkamishe’shi Yehowa etupasukila. Yehowa e pepi bwadya kwitusamba na kupaasha malonda e mu binangu na mu mashimba eetu. (Misambo 34:18; Yeeshaya 57:15) Etupeyaa binangu na bukome bwa’shi tumone bya kukambila myanda yoso yatufumankana nayo.​—Shake 1:5.

6. Mayi a mufundji a misambo e mu Misambo 147:4 aetukwasha naminyi? (Tala kifwatulo ki ku mbangilo.)

⁶ Kunyima, mufundji a misambo batadile mwiyilu aye nkwamba’shi Yehowa “abadika bungi bwa nyenyeene” na “audika looso lwalwa eshina.” (Misambo 147:4) Mufundji a misambo badi mulombene kumona nyenyeene, anka tabadi auku bungi bwayo nya. Lelo uno, bena siyanse abauku’shi kwi midiyo na midiyo ya nyenyeene mu galaksi umune. Na dingi mwiyilu mwi midiyala na midiyala ya ma galaksi! Bantu ta mbalombene kubadika bungi bwa nyenyeene nya, anka Mupangi auku bungi bwayo. Byabya, auku lwenyenye looso kalolo mu kipaso kyadi mupe lwenyenye na lwenyenye loso eshina dyalo. (1 Beena-Kodinda 15:41) Efile Mukulu auku mbalo ya lwenyenye loso, akuuku mpa n’obe. Auku kalolo mbalo yodi, byopusha, na bintu byodi nabyo lukalo!

7, 8. (a) Yehowa apushaa naminyi pa mwanda wetu? (b) Tuusha kileshesho akilesha’shi Yehowa etulaa pa mbalo yeetu.

⁷ Yehowa auku myanda yodi nayo, na dingi e na bukome bwa nkukwasha bodya kwiyipudisha. (Badika Misambo 147:5.) We kupusha mwanda oobe bu ukambe bukopo na’shi twe mulombene kwiupudisha. Efile Mukulu auku pemeene bukome bwetu, mwanda “mushinguule’shi twi lufuufi.” (Misambo 103:14) Twi bantu bakutwe kupwidika, ngi bwakinyi atukitaa bilubilo misusa na misusa, na bino mbilombene kwitubofusha. Atwinyongolaa ngofu bwa ingi myanda yatudi baakule, malaka ebubi atudi nao, sunga mukao watwikalanga bakwate! Yehowa te na kubofula su nkupela nya, anka auku byatupushaa.​—Yeeshaya 40:28.

⁸ Tobandile kupusha abikukwasha bukome bwa mboko ya Yehowa bodya kupudisha nkalakashi  yoobe su? (Yeeshaya 41:10, 13) Ungi mbala-mashinda abetanyinaa bu Kyoko badi mupushe bino. Kunyima kwa’ye kwenda ku mbalo ibabadi bamutume, badi mubofule ngofu. Uno mukwetu mukashi badi mushinkamishenaminyi’shi Yehowa auku myanda yaye? Mu kakongye kapya kabadi atwele, mubadi bantu bebungi abadi abauku bino bibadi apusha. Bapushishe nka bu Yehowa amulungula’shi: “Ne mukufule, kushii penda pa mwanda wa’shi we mbala-mashinda, anka pa mwanda wa’shi we mwan’ande mukashi mwilambule kwandji. Nakumina wekale na muloo mu muwa oobe bu umune a ku ba tumonyi bande!” Yehowa mmukuleshe naminyi’shi ‘binangu byaye ta bi bya kupwandjikisha’?

9, 10. Mushindo kinyi wa kukaanya wabetukwasha kwi Yehowa? Tusha kileshesho.

⁹ Boso bwetu twi na lukalo lwa bintu bu byakudya, bilamba, na mbalo ya kushala. Pangi we kwikalakasha’shi tomono bube apete bya kudya. Anka Yehowa bapangile nsenga bwayidya kutuusha bya kudya bibungi bwa bantu booso, mpa na bwa “twana twa mangânga atudidi nsala.” (Badika Misambo 147:8, 9.) Su Yehowa adishaa mangânga, twi kwikala bashinkamishe’shi aketupa na’twe namu bintu bya ku mbidi byatudi nabyo lukalo.​—Misambo 37:25.

¹⁰ Mwanda wi na muulo, Yehowa etupeyaa bintu byatudi nabyo lukalo bwa kunyingisha lukumino lwetu, na etupeyaa “butaale bw’Efile Mukulu, abo butabukile binangu byooso.” (Beena-Fidipe 4:6, 7) Ungi mukwetu mulume abetanyinaa bu Mutsuo na mukashi’aye abadi bamone mushindo ubabadi bebakwashe kwi Yehowa. Nsaa ibelele kipapi kibukopo mu Japon mu kipwa kya 2011, abadi bapande lufu pa’bo kukamina mu kisasa kya nshibo yabo. Mu dyadya efuku, abadi bashimishe kantu kooso kababadi nako. Abaladile mu kadimbo ka etaje a kabidi a nshibo yabo mu mufito na mu mashika e bukopo. Ku namashika, abakimbile kintu kilombene kwibakankamika. Kintu kimune kibabamwene mpenda mukanda wa Annuaire des Témoins de Jéhovah a mu kipwa kya 2006. Pabadi abuula masaki, Mutsuo bamwene mutwe wa mwanda awamba’shi, “Le tsunami le plus meurtrier jamais recensé.” Mu uno mutwe wa mwanda abadi abakwila bwa kutshinkatshinka kwa nsenga kubadi kukitshikye mu kibundji kya Sumatra mu kipwa kya 2004, kubadi kwibweshe tsunami sunga kupalakana kwa meema kubadi kwipee bantu kukila ingi tsunami yoso. Mutsuo na mukashi’aye abadi banoshe mpolo nsaa ibabadi ababadika uno mwanda ubabadi bafumankane nao kwi bakwabo. Abapushishe’shi Yehowa kwete kwibanyingisha. Yehowa badi mwibapasukile dingi mu ingi mishindo. Bakwabo ba mu bingi bipindji bya nsenga bya mu Japon abebapeele bya kudya na bilamba. Anka kintu kibadi kibanyingishe ngofu nyi nkumona bakwetu bababadi batume kwi ndumbulwilo a Efile Mukulu abafikile mu kutala kakongye kabo. Mutsuo akula’shi: “Napushishe’shi Yehowa badi pepi na muntu ooso a kwatudi bwa kumupasukila na kwitulombesha nkalo yetu. Bino bibadi bitusambe ngofu!” Kya kumpala, Efile Mukulu etupeyaa bintu byatudi nabyo lukalo bwa kulama lukumino lwetu lunyingye, kunyima etulombesha bintu bya ku mbidi byatudi nabyo lukalo.

11. Abitungu tukite kinyi bwatudya kupeta bukwashi bwa Yehowa?

¹¹ Yehowa “akaamishaa beeyishe.” Mwitufule na dingi kwete kwitukwasha efuku dyoso. (Misambo 147:6a) Twi kupetela myabi ku bukwashi bwaye mushindo kinyi? Abitungu twikale mu kipwano kibukopo naye. Bwa kwikala naye mu kipwano, abitungu twikale na kwiyisha. (Sefanya 2:3) Bantu beyishe abakulupilaa kwi Yehowa bwa kwibakalwila ku myanda ya kukutwa  kululama na kukatusha makyenga. Yehowa namu mmwibakumine.

12, 13. (a) Bwa kupeta bukwashi bw’Efile Mukulu, abitungu tusuukye kinyi? (b) Yehowa asankilaa bantu kinyi?

¹² Ku lungi lupese, Efile Mukulu “ayishaa bantu babi nyaa na paashi.” (Misambo 147:6b) Tatukumina’shi uno mwanda witufikile nya! Atukumina’shi Efile Mukulu etuleeshe kifulo kyaye ki na lulamato. Ngi bwakinyi abitungu tushikwe myanda yoso yadi mushikwe. (Misambo 97:10) Bu kileshesho, abitungu tushikwe kutambuka masandji. Bino abilesha’shi abitungu tusuukye myanda yoso ilombene kwitutwala ku lusandji, mpa na pornografi. (Misambo 119:37; Mateo 5:28) Bi kwikala bu ngoshi ibukopo ngofu, anka abitungu tukite bino mwanda abitupetesha myabi ya Yehowa.

¹³ Mu’twe ba nabene ta twi balombene kutshokola ino ngoshi nya. Abitungu tukulupile mwi Yehowa. Mmulombene kusangala su twakulupila mu bintu byabadi batushe kwi bana ba bantu? Nya. “Bukome bwa nfwalasa ta bwi na muulo” kwi Yehowa nya.” Twi kukulupila mu bukome bwetu’twe banabene sunga bwa bangi bantu su? Yehowa “tatalaa kupampamana kwa muntu bu kintu” nya. (Misambo 147:10) Anka, abitungu tutungunukye na kumuteka bwadya kwitukwasha, na kumusendeela bwadya kwitupa bukome bwa kukambila kubofula kwetu. Yehowa takokaa kutemesha nteko i bino nya. “Yehowa mmukumiine abamutshinyi, baaba batuule mashimba ku kifulo kyaye.” (Misambo 147:11) Bu byadi na lulamato na byadi mwitufule, atuuku’shi atungunuka na kwitukwasha bwatudya kukambila malaka eetu e bubi.

14. Mufundji a misambo badi mushinkamishe kinyi?

¹⁴ Yehowa etushinkamisha’shi etukwasha mu nsaa yatudi na myanda. Pabalukile bena Isaleele ku Yeelusaleme, mufundji a misambo badi munangushene pa kipaso kibabadi bebakwashe kwi Yehowa. Bayimbile’shi: “Banyingisha bidibu bya ku biibi byobe; asampa bana ba mu kibalo kyoobe. Aye atwesha butaale mu nsenga yoobe.” (Misambo 147:13, 14) Bu bibadi Yehowa munyingishe biibi bya ku kibelo kya kibundji, mufundji a misambo badi epusha mu bulungantu. Bino bibadi bimushinkamiishe’shi Yehowa akalwila mwilo waye.

15-17. (a) Ingi nsaa twi kupusha naminyi bwa nkalakashi yetu, kadi Yehowa afubaa n’Eyi dyaye bwa kwitukwasha naminyi? (b) Tuusha kileshesho akilesha’shi eyi dy’Efile Mukulu “adifiki bukidi bukidi” bwa kwitukwasha.

¹⁵ We kwikala na kinyongwa pa mwanda wa myanda yodi nayo, anka Yehowa mulombene nkupa binangu bya kwiyipudisha. Mufundji a misambo bambile’shi Efile Mukulu “atumu mayi aaye mu nsenga, eyi dyaye adifiki bukidi mu mbalo yooso.” Kunyima, mufundji a misambo badi muteemune milemba, na mabwe a mpeshi a kasangu na kwipusha’shi: “Nnanyi a kwipima ku aa mashika?” Kunyima bambile’shi “Yehowa atumu eyi dyaaye, byooso abisunguluka.” (Misambo 147:15-18) Efile Mukulu eetu auku myanda yoso, na mulombene kukita bintu byoso, e na matalwa ku mabwe a mpeshi a kasangu na milemba, mulombene nkukwasha bodya kukambila mwanda ooso ulombene nkukwata.

¹⁶ Lelo uno, Yehowa kwete kwitukunkusha ku bukwashi bwa Bible Eyi dyaye. Mufundji a misambo bambile’shi eyi dya Yehowa “adifiki bukidi bukidi” bwa kwitukwasha. Efile Mukulu kwete kwitukunkusha mwishinda dibuwa pa nsaa ilombane. Banda kunangushena myabi yodi mupete mu kubadika kwa Bible, na mikanda ya “mpika a kishima na mupatulukye,” ku televizion a JW, mu jw.org, kwi bakulu, na kwi bakwenu balume na bakashi. (Mateo 24:45) We mumone mu muwa oobe’shi Yehowa e pepi bwa nkukwasha su?

¹⁷ Ungi mukwetu mukashi abetanyinaa bu Simone badi mumone mushindo ubadi umukwashe Bible. Bamwene bu’ye shii mulombene buno bukwashi, aye nkwela binangu’shi Yehowa tamukumina  nya. Anka, nsaa ibadi mutshobolokye, batungunukile na kwela nteko kwi Yehowa, na kumuteka bukwashi. Batungunukile dingi na kulonga Bible. Simone bambile’shi: “Mu myanda yooso yandi mupete ne mupushe nka’shi, Yehowa kwete kunyingisha na kundudika.” Bino mbimukwashe bwadya kwikala na binangu bibuwa.

18. Bwakinyi opusha’shi Yehowa e pepi nobe, na ntubingilo kinyi twa “Kutumbisha Yehowa!” todi nato?

¹⁸ Mufundji a misambo badi auku’shi Yehowa badi musangule penda mwilo wa Isaleele bwaudya kwikala mwilo waye munkatshi mwa miilo yoso i pa nsenga. Nka penda Isaleele ngi mwilo ubadi ‘n’eyi’ dy’Efile Mukulu na “miiya yaye.” (Badika Misambo 147:19, 20.) Lelo uno, twi na mwabi ukata wa kwitanyinwa mu eshina dy’Efile Mukulu. Twi na lutumbu lukata mwanda atumuuku, twi n’Eyi dyaye dikwete kwitukunkusha, na twi balombene kwikala naye mu kipwano. Nka bu mufundji a mukanda wa Misambo 147, n’obe namu we na tubingilo twa “Kutumbisha Yehowa!” na kukankamika bangi bantu bwabadya kumutumbisha.