NSENGA ishima, bakulu bakwete kusankila mudimo wabo wabakwete kufuba mu ndumbulwilo a Efile Mukulu. Bano bakulu mbekale bu mwabi ukata kwatudi’twe boso! Anka, mu mafuku ashale’mu kwikele kukitshikye kushintuluka. Mbatekye bakulu batabadi banunu bwabadya kulekyela bakulu bakii ba nsongwalume mashito aabo. Mu mushindo kinyi?

Ingi mpango ipya ngya’shi bakunkushi ba bifunda, na balongyeshi ba mu tulasa twa bakulu balekyele bangi mashito aabo nsaa yabalombasha bipwa 70. Na dingi, bakulu babalombasha bipwa 80 abalekyela bakulu baki ba nsongwalume mashito elekeene abekalanga nao. Bu kileshesho, mudimo wa bu mukunkushi a Komite a filiale, sunga bu mukunkushi a kasaka ka bakulu mu kakongye. Bano bakwetu bakulu bapwe kununupa mbakite naminyi nsaa ibabadi bapushe kuno kushintuluka? Mbaleshe lulamato lwabo kwi Yehowa na kwi ndumbulwilo aaye!

Ken, badi mufube bu mukunkushi a Komite a filiale munda mwa bipwa bifikye ku 49, akula’shi: “Nadi mukumine kino kitshibilo n’eshimba dyande dyoso. Yawa namashika anapushishe uno mwanda, nelele luteko kwi Yehowa, ami nkumulungula’shi twi na lukalo lwa mukwetu ki nsongwalume mulombene kufuba bu mukunkushi a Komite a filiale.” Bino bibakitshine Ken, abilesha  bibapushishe bakwetu basha lukumino babapu kununupa be mu nsenga ishima. Byabya, bu byabadi bafule kufubila bakwabo, babadi benyongole kapeela.

Esperandio badi afubu bu mukunkushi a kasaka ka bakulu mu kakongye kabo akula’shi: “Bibadi binginyongoshe kapeela.” Anka ashinkamisha’shi: “Nadi na lukalo lwa nsaa ibungi mwanda mbidi yande ibadi ayende na kunyisha kukooka.” Esperandio kwete kutungunuka na kufubila Yehowa na lulamato loso na mmwikale bu mwabi ukata mu kakongye kabo.

Kadi twi kwakula kinyi bwa bakunkushi ba bifunda babapu kufuba munda mwa mafuku e bungi bababatumu mu ingi midimo ya ndumbulwilo? Allan, mupwe kufuba bu mukunkushi a kifunda munda mwa bipwa 38 akula’shi: “Nsaa inapushishe byabya, nadi mwinyongole ngofu.” Na binobino, Allan kyatentekyesha myabi ya kulongyesha bansongwa uno mudimo, na dingi kwete kutungunuka na kufuba na lukumino loso.

Russell, badi mufube bu mukunkushi a kifunda na bu mulongyeshi ku tulasa twa bakulu munda mwa bipwa 40 akula’shi aye na mukashi’aye bibadi bibakalakashe ku mbangilo. “Tubadi atusangela uno mudimo wetu ngofu na tubadi na bukome bwa mbidi mpa na mu binangu bwa kutungunuka na kwiufuba.” Russell na mukashi’aye bakwete kufuba na myanda yabadi balongye na yabadi bamone mu mudimo wabo bwabadya kukwasha mu kakongye kabadi bebatume, na bino abisankisha bangi balungudi bakwete kufuba nabo pamune.

Sunga tobandjile kupusha bino bibadi bipushe bano bantu babadi batemune kunundu, mwanda wi mu 2 Samwele wi nkukwasha bwa kupusha bino bibabapushishe.

Banda kunangushene nsaa ibadi Absalome mwana a Nfumu Daavide mutombokye. Daavide basukile ku Yeelusaleme enda ku Mahanaime lupese lwa kutunduka nguba kwa mwela wa Yoordano. Daavide na bantu babadi nabo babadi na lukalo lwa bya kudya. Otentekyesha kibakitshikile su?

Bantu basatu ba mu kino kipindji kya nsenga abebakwashishe bebapa nsala ya kuladila, bya kudya bilekene, na bintu bya mu nshibo bibabadi nabyo lukalo. Umune a ku bano bantu nyi Barzilaayi. (2 Samwele 17:27-29) Kunyima kwa bu ntomboshi bwa Absalome, Daavide bapetele mushindo wa kwalukila mu Yeelusaleme, na Barzilaayi namu basabukile naye mwela wa Yoordano. Daavide bamulungwile bwadya kufika ku Yeelusaleme. Nfumu bamulungwile’shi ekala amupa bya kudya, aku namu Barzilaayi “baadi mununu bibi” na tabadi dingi na lukalo lwa bya kudya bibabadi abatusha nya. (2 Samwele 19:31-33) Anka Daavide badi akumina’shi Barzilaayi ekale mu bwipi mwaye ku Yeelusaleme bwa’shi ekale amupa malango ebuwa mwanda Barzilaayi badi mupwe kumona myanda munda mwa bipwa bibungi. Badi mupete mwabi wa kushala na kufuba mwibalasa dya nfumu!

Bu bibadi na nkatshi-nkatshi na kwipelesha Barzilaayi balesheshe’shi tadi na bipwa 80. Akupu balombeshe’shi: “Nee mulombeene’nyi kushinguula kiibuuwa na kiibubi su?” Badi akyebe kwamba kinyi? Barzilaayi badi mupete binangu bibungi mu muwa waye. Na dingi badi mutungunukye na kutusha elango dibuwa, nka bu bibakitshine bantu “bakulu,” kunyima mu mafuku a Nfumu Roboame. (1 Banfumu 12:6, 7; Misambo 92:12-14; Nkindji 16:31) Byabya myanda ibabadi bakule kwi Barzilaayi pabitale kuuka kibuwa na  kibubi ibadi ayilesha mikalo ya mbidi ibadi nayo pa mwanda wa bununu. Balombeshe’shi bununu bubadi bumukutshishwe mpa na malaka a kudya na tabadi’nyi apusha kalolo nya. (Mulungudi 12:4, 5) Barzilaayi balungwile Daavide bwadya kwata Kimekame badi ki nsongwalume bwadya kwenda naye ku Yelusaleeme, pangi Kimekame badi mwana a Barzilaayi.—2 Samwele 19:35-40.

Bano bantu bapete kushintuluka pa mwanda wa bununu bwabo batudi baleshe kunundu mbaleshe mweneno e mumune na ababadi baleshe kwi Barzilaayi. Abipushika kalolo’shi, mu ano mafuku eetu, mwanda wi na muulo ngofu watudi balombene kutala nyi nshalelo a muntu na ngobesha yaye, nka bu byabadi bebileshe mu mwanda wa Barzilaayi. Akwikalanga lukalo lwa kutala na nkatshi-nkatshi bwa kuuka mufubo ulombene bakwetu basha lulamato bapwe kununupa bakwete kufubila Yehowa mu nsenga ishima.

Bano bakwetu bena Kidishitu bapwe kununupa be na kwipeelesha mbamone bukidibukidi’shi ndumbulwilo a Yehowa mulombene kunyinga na kwenda kumpala ngofu mu mafuku aafiki su balekyela bakwetu ba nsongwalume mashito abekalanga nao. Misusa ibungi, bakwetu batabadi banunu ngi abekalanga abalongyesha ba nsongwalume, nka bibadi Barzilaayi mulongyeshe mwan’aye, na bibadi Mpoolo mutumibwa mulongyeshe Timote. (1 Beena-Kodinda 4:17; Beena-Fidipe 2:20-22) Bano bakwetu ba nsongwalume mbaleshe’shi binobino mbapwe kwikala bu “bantu [bekale] bya buntu,” be na ngobesha ya kukwasha bwa “kwibaka mbidi ya Kidishitu.”—Beena-Efeso 4:8-12; tala byabidi bipushene na Mbadiko 11:16, 17, 29.

Bantu bebungi be mu kakongye ka mwilo w’Efile Mukulu mu nsenga ishima, balekyele bangi angi mashito abekalanga nao, mbapete mushindo wabadya kufuba ingi midimo ilekene sunga kufuba ingi midimo ya ungi mushindo mu ndumbulwilo a Yehowa.

Marco badi mufube bu mukunkushi a kifunda munda mwa bipwa 19 akula’shi: “Nshalelo andi naye binobino ampetesha mushindo wa kwimonena na balume bashi bena kukumina bebakile bakwetu bakashi be mu kakongye ketu.”

Geraldo badi afubu bu mukunkushi a kifunda munda mwa bipwa 28 akula’shi: “Kepatshila ketu katudi nako binobino nka kukwasha bantu bapwe kuleka kufuba na kulonga Bible na bantu bebungi.” Akula’shi aye na mukashi aaye bakwete kulonga Bible na bantu 15, na bantu abekalanga bapwe kuleka kufuba bebungi bababanguula dingi kutwela mu bisangilo.

Allan, atudi batemune ku mbangilo akula’shi: “Binobino twi na mushindo wa kwipana ngofu ku mudimo wa bulungudi. Twi na muloo wa kukita bulungudi bwa mu ma mbalo e bantu bebungi, mu ma mbalo a bisalwe, na kulungula ba nkungishanyi netu mukandu wibuwa, na babidi ba kwabadi mbafikye mu bisangilo ku Nshibo ya Bufumu.”

Su we mukwetu mulume e na ngobesha na lulamato abadi bashintuule mudimo mu ndumbulwilo a Efile Mukulu, kwi ingi mishindo i pa bwayo yodi mulombene kukwasha. We mulombene kukwatshishena mudimo wa Yehowa pa kulungula bakwetu baki ba nsongwa be mu kakongye kenu myanda yodi mumone. Russell atudi batemune kunundu akula’shi: “Yehowa kwete kulongyesha na kufuba na ba nsongwa be na ngobesha ya kufuba. Bakwetu boso bakwete kupeta myabi kukidila ku malongyesha na bukunkushi bwabo.”—Tala kashibo akamba’shi: “ Kwashayi ba nsongwa bwa’shi bafubishe ngobesha yabo yoso.”

Su we mukatukye mu kushintuula mudimo binobino, ikala nka na binangu bibuwa. We mupwe kukwasha bantu bebungi mu muwa wabo ku bukwashi bwa mudimo oobe odi mufube n’eshimba dimune, na we mulombene kutungunuka na kwibakwasha. Bantu bebungi mbakufule na tungunuka na kukita bya’shi bakufule.

Mwanda wi na muulo ngofu, Yehowa mmulamine mwishimba dyaye myanda yoso yodi mukite. Tamulombene “kuluba kyanudi bakite, na kifulo kyanudi baleshe bw’eshina dyaye, kwipaana ku mufubo wa bantu b’Efile ku kala, naa binobino dimo.” (Beena-Ebelu 6:10) Uno verse abadi bayokyelwe kwi Efile Mukulu ashinkamisha bantu boso’shi ta mulombene kwilwankana mudimo wibukopo watudi bamufubile mu mafuku  ashale nya. We na muulo ngofu ku meso kwa Yehowa mu kipaso kyashii mulombene nkwilwankana bwa mudimo wi bukopo oodi mumufubile mu mafuku ashale na byokwete kutungunuka na kwikitshisha bwa kumusankisha!

Twi kwamba naminyi su twe umune a ku bantu babadi bashintuule mudimo bu byatudi besambile kunundu? Ino myanda ngilombene nkukwasha mpa n’obe. Mu mushindo kinyi?

Su bwemonena na mukwetu taadi mununu e na lulamato abadi bashintuule mudimo, we mulombene kupeta malongyesha ebungi kukidila ku myanda yadi munyingiile mu bipwa bibungi bya mudimo waye. Mutekye malango. Mwipushe byodi mulombene kukita. Na dingi, tala kipaso kyakwete kulombasha mudimo wadi nao binobino na lulamato na kapatupatu.

Su we mukwetu mupwe kununupa abadi batume mu kufuba ungi mudimo sunga mukwetu mulume sunga mukashi abalongyesha kwi uno mukwetu, ikala mushinkamishe’shi Yehowa kwete kwata lulamato lwa bantu boso bamufubile munda mwa bipwa bibungi na abatungunuka na kumufubila na muulo.