1, 2. (a) Mayi a Yesu e mu Mateo 24:12 abadi alombane kwi bantu kinyi kumpala? (b) Mukanda wa Bikitshino aulesha naminyi’shi bena Kidishitu ba kumpala bebungi abadi balame kifulo kyabo kinyingye? (Tala kifwatulo ki ku mbangilo.)

YESU pabadi pano pa nsenga, badi mupatulwile bantu byabadi balombene kutundula mafuku a ku “nfudiilo aa byaapano.” Mu bintu bibungi bibadi muleshe, batemukile’shi: “Kifulo kya bebungi akikataala.” (Mateo 24:3, 12, Esambi dipya 2015) Sunga mbibadi bena Yuuda ba mu siekele a kumpala abakula’shi abo nyi mwilo w’Efile Mukulu, abatadidile kifulo kyabo bw’Efile Mukulu akyende na kutaala.

² Byabya, bena Kidishitu bebungi ba mu aa mafuku abadi na binangu bilekene na bya bangi bantu. Abadi abalungula “mukandu wibuwa wa Kidishitu” na katshintshi na kulesha kifulo kyabo bw’Efile Mukulu, bwa bakwabo bena Kidishitu, na bwa bangi bantu abadi bashi’abauku bya binyinyi. Bano bena Kidishitu abalamine kifulo kyabo kibukopo bw’Efile Mukulu. (Bikitshino 2:44-47; 5:42) Mwanda wa malwa, kifulo kya bangi bena Kidishitu kibadi kitaale. Nkinyi akitulesha byabya?

3. Nkinyi ki bya kutaadisha kifulo kya bena Kidishitu?

 ³ Yesu balungwile bena Kidishitu ba mu kakongye ka kumpala ka mu Efeso’shi: “Kifulo kyoobe kya kwibedi, we mwikilekye.” (Kibafumbwilwe 2:4) Bi kwikala’shi bena Kidishitu ba mu Efeso abadi abalondo binangu bya bantu bebefuunyishe abadi abakumina kwisangasha abo banabene. (Beena-Efeso 2:2, 3) Bantu ba mu kibundji kya Efeso abadi abetatshisha ngofu bwa kwikala na nshalelo ebuwa kukila bibabadi abetatshisha bwa bingi bintu, na bantu bebungi ba mu Efeso abadi bepaane dingi mu bukitekite na tababadi abanemeka miiya y’Efile Mukulu nya. Abadi bepaane ngofu mu kukimba bya kwisangasha pamutwe pa kukimba bya kufula Efile Mukulu na bangi bantu.

4. (a) Kifulo kikwete kwenda na kutaala naminyi mu ano mafuku eetu? (b) Mu myanda kinyi isatu mwatudi balombene kulama kifulo kyetu?

⁴ Mayi abakwile Yesu pabitale kutaala kwa kifulo ngetutale mpa na’twe be lelo uno. Lelo uno kifulo kya bantu bw’Efile Mukulu kikwete kwenda na kupeela. Pamutwe pabadya kukimba Efile Mukulu bwadya kwibapwila myanda i mu nsenga, bantu midiyo na midiyo bakwete kukimba bukwashi kwi ma ndumbulwilo a bantu. Kifulo kyabo kikwete nka kwenda na kutaala. Mpa na kifulo kya bafubi ba Yehowa nkilombene kutaala, nka bu bibakidi mu kakongye ka Bena Kidishitu ba mu siekele a kumpala ka mu Efeso. Byabya, tutaleyi myanda isatu ilombene kunyingisha kifulo kyetu: (1) Kifulo bwa Yehowa, (2) Kifulo bwa bya binyibinyi bya mu Bible, na (3) Kifulo bwa bakwetu balume na bakashi.

5. Bwakinyi abitungu tufule Efile Mukulu?

⁵ Nanyi atudi balombene kufula ngofu? Yesu bakwile’shi: “Ofule Efile Mukulu oobe n’eshimba dyoobe dyoso, na kikudi kyoobe kyoso, mpa na kinangu kyoobe kyoso. Dyaadya ngi [Eyi] dikata naa dya-kumpala” (Mateo 22:37, 38) Kifulo bw’Efile Mukulu akitukwasha bwatudya kukokyela miiya yaye, kunyingiila, na kusuuka myanda ibubi. (Badika Misambo 97:10.) Anka, Satana na ba demo baye abakimbi bya kwitubofusha na kulwisha kifulo kyetu bw’Efile Mukulu.

6. Nkinyi akikitshikila bantu abashimisha kifulo kyabo bw’Efile Mukulu?

⁶ Bantu tabadi na mweneno ebubi pabitale kifulo. Pamutwe pa kufula Efile Mukulu, bantu bebungi ‘mbekumine banabene.’ (2 Timote 3:2, Esambi dipya 2015) Be nka na penda “ndakalaka ya mbidi, ndakalaka ya meeso na lwabi lwa kwisadikila mu bupeta.” (1 Yowano 2:16) Mpolo mutumibwa badi mmwakule pabitale uno mwanda ubadi ulombene kukitshika su tubatulu kwisankisha pa mbalo ya kumpla. Bakwile’shi: “Kwelanga binangu ku [mbidi] akufwishaa muntu ku lufu.” Bwakinyi? Mwanda boso abakitshi bino abekala beshikwanyi n’Efile Mukulu. (Beena-Loma 8:6, 7, EEM) Bantu bebungi bakwete kwipana mu kukimba nfwalanga sunga kulombasha lwabi lwabo lwa kutambuka kwa masandji, bakwete kufumankana na nkalakashi ibungi.​—1 Beena-Kodinda 6:18; 1 Timote 6:9, 10.

7. Mbinangu kinyi bi bubi bi bya kwikala na bukitshishi kwi bena Kidishitu lelo uno?

⁷ Bantu abapelaa’shi Efile Mukulu te kwanka, bantu bashi’abauku su Efile Mukulu e kwanka sunga’shi te kwanka, na bantu abakumina’shi bintu mbituukile bakwete kutakula bangi mu kupela kufula Efile Mukulu sunga kukimba bya kwibakuminyisha’shi te kwanka. Abakula’shi su muntu akumina’shi kwi Mupangi a bintu byooso, yawa muntu te na binangu. Na dingi, bangi bantu abanemeka bena sianse ngofu kukila byabanemeka Mupangi a bintu. (Beena-Looma 1:25) Mpa na mwina kidishitu mulombene kubanga kulonda bino binangu. Kipwano kyetu na Yehowa nkilombene kutshimba, na kifulo kyetu nkilombene kwenda na kutaala.​—Beena-Ebelu 3:12.

8. (a) Mmyanda kinyi ilombene kubofusha bafubi ba Yehowa lelo uno? (b) Mayi e mu mukanda wa Misambo 136 e kwitunyingisha naminyi?

 ⁸ Bu byatudi mu ndumbulwilo e bubi a Satana, kwi myanda ibungi ilombene kwitubofusha ingi nsaa. (1 Yowano 5:19) Anka su tubatadila bwa’shi ino myanda itubofushe, lukumino lwetu ndulombene kubofula na kifulo kyetu bw’Efile Mukulu nkilombene kutaala. Bu kileshesho, twi kufumankana na nkalakashi pa mwanda wa bununu, mukumbo, sunga bulanda. Twi kupusha dingi bibubi pa mwanda wa’shi ta twi na ngobesha ya kukita myanda mu kipaso akitungu. Twi kwinyongola dingi pa mwanda wa’shi ingi myanda mu nshalelo eetu tangikitshikye mu kipaso kyatukulupilanga. Sunga twekala kumpala kwa lukalakashi lwi naminyi, tatumonanga’shi Yehowa betulekyela. Abitungu tunangushene pa ano mayi aetukankamika atupete mu mukanda wa Misambo 136:23: “Mu mpombo yeetu, beetutentekyeeshe, mwanda kifulo kyaaye nkyaa-looso.” Twikale bashinkamishe’shi Yehowa ateemesha ‘kwidila kwetu’ na akaluula nteko yetu.​—Misambo 116:1; 136:24-26.

9. Nkinyi kibapeele Mpoolo bukome bwa kulama kifulo kyaye bw’Efile Mukulu?

⁹ Mpoolo mutumibwa mufubi a Efile Mukulu, badi munangushene ngofu kipaso kibabadi bamukwashe kwi Yehowa, na kukita bino kubamukwashishe bwadya kushala munyingye. Bafundile’shi: “Yehowa byaadi mukwashi ande, ntantshiinyi kintu su nkimune; kilombeene kunkitshiina muntu nkinyi?” (Beena-Ebelu 13:6) Lukulupilo lwa Mpoolo mwi Yehowa lubamukwashishe bwadya kunyingila nkalakashi ibapetele mu muwa waye. Mpoolo pabadi afumankana na nkalakashi, tabadi ashimisha lukulupilo lwaye mwi Yehowa nya. Mpa na pabadi mu lukano, badi mukwashe bakwabo bena Kidishitu p’aye kufundjila tukongye mikanda ya kwitukankamika. (Beena-Efeso 4:1; Beena-Fidipe 1:7; Filemone 1) Sunga mpabadi apete myanda ibukopo, badi nka alama kifulo kyaye kibukopo bwa Yehowa. Badi mukulupile kwi “Efile Mukulu sha kusambana mu byooso, etusambaa mu malwa eetu ooso.” (2 Beena-Kodinda 1:3, 4) Twi kwambula kileshesho kya Mpoolo naminyi?

10. Twi kulama kifulo kyetu kinyingye bwa Yehowa naminyi?

¹⁰ Mpoolo badi mwitupatulwile kipaso kyatudi balombene kulama kifulo kyetu bw’Efile Mukulu kinyingye. Pabafundile’shi: ‘Tekayi kushii kukooka.’ Kunyima bafundile dingi’shi: “Ikalayi na katshintshi mu nteko.” (1 Beena-Tesalonika 5:17; Beena-Looma 12:12) Bwakinyi luteko alwitukwasha bwa kwifubwila peepi n’Efile Mukulu? Mwanda nsaa yatwele luteko, atwisamba na Yehowa. Bino abitupa mushindo wa kwikala mu kipwano kibuwa naye. (Misambo 86:3) Nsaa yatulungula Nshetu a mwiyilu myanda yooso i mu binangu na mwishimba dyetu, atunyiisha kwifuwila pepi naye. (Misambo 65:2) Na dingi, nsaa yatumono Yehowa aluula nteko yetu, kifulo kyetu bwaye akinyiisha kutama. Atushinkamisha’shi “Yehowa e peepi na booso abamwididi.” (Misambo 145:18) Kwikala bashinkamishe’shi Yehowa mmwitufule na kwete kwitukwatshishena akwitukwasha bwatudya kukambila nkalakashi yooso yatudi nayo binobino na ya mu mafuku aafiki.

11, 12. Twi kutamisha kifulo kyetu bwa bya binyibinyi bya mu Bible naminyi?

¹¹ Atwe bena Kidishitu, twi bafule bya binyibinyi. Bya binyibinyi atwibipete mu Eyi dy’Efile Mukulu. Yesu balungwile Nshaye’shi: “Eyi dyoobe ndya binyibinyi.” (Yowano 17:17) Bwatudya kufula bya binyibinyi bya mu Bible, abitungu tuukye kikale Bible. (Beena-Kolose 1:10) Anka kwi ingi myanda ayitungu kukita. Banda kutala myanda yabetulungula kwi mufundji a mukanda wa Misambo 119 bwatudya kuuka akitungu kukita. (Badika Misambo 119:97-100.) Efuku dyooso, abitungu tutuule binangu byetu, sunga kunangushena ngofu pa myanda yatubadika mu  Bible. Su tubanangushena myabi yatudi balombene kupeta nsaa yatutumikila bya binyibinyi bya mu Bible mu muwa wetu, atukanyiisha kwibifula.

¹² Mufundji a misambo akula dingi’shi: “Mayi oobe e mwenyi mu kilakalaka kyande kukila na buuki mukanwa mwande!” (Misambo 119:103) Mikanda ayipatuula Bible yabetupa kwi ndumbulwilo a Efile Mukulu i nka bu bya kudya bi mwenyi. Nsaa yatudi byakudya byatudi bafule, atwataa nsaa ibungi bwa kwibidya. Mu mushindo umune, abitungu twate nsaa bwa kwilongyela. Su tubakitshi byabya, atukasankila “mayi e mwenyi” a bya binyibinyi, na abikekala bibofule bwatudya kutentekyesha myanda yatudi babadikye na kwiyifubisha bwa kukwasha bangi.​—Mulungudi 12:10.

13. Nkinyi kibakwashishe Yeelemiya bwadya kufula Eyi dy’Efile Mukulu? Bino bibadi na bukitshishi kinyi kwadi?

¹³ Mutemuki Yeelemiya badi mufule mu Eyi dy’Efile Mukulu. Bambile’shi: “Panaapushiishe bishima byoobe, naadi na kusepeela. Eyi dyoobe dibansangasha, dibampa mwabi ukata. Babangabikiish’eshina dyoobe, Yehowa, Efile Mukulu sha-makome.” (Yeelemiya 15:16) Yeelemiya badi anangushena ngofu pa mayi e mwenyi a Efile Mukulu, na badi mwiafule. Badi na muloo wa kulesha mpala ya Yehowa na kulungula bantu mukandu waye. Su twi bafule bya binyibinyi bya mu Bible, atwikala bashinkamishe’shi twi na mwabi wi pa bwao wa kwikala ba Temwe ba Yehowa na kulungula bantu mukandu wa Bufumu mu ano mafuku a ku nfudiilo.

14. Ngingi myanda kinyi yatudi balombene kukita bwa kutamisha kifulo kyetu bwa bya binyibinyi bya mu Bible?

¹⁴ Ngingi myanda kinyi ilombene kwitukwasha bwa kutamisha kifulo kyetu bwa bya binyibinyi bya mu Bible? Abitungu twikale atutwele mu bisangilo bya kakongye lubingo looso, mwanda mwanka, abetulongyesha kwi Yehowa. Kulonga kwa Bible ku bukwashi bwa Kitenta kya Mulami ku lubingo looso nyi ngumune wa ku mishindo ikata yabetulongyesha. Su atukyebe kupeta myanda ibungi mu kino kisangilo, abitungu twikilumbuule kumpala kwa nsaa. Bu kileshesho, twi balombene kubadika ma verse ooso a mu Bible. Lelo uno, bantu bebungi be na mushindo wa kubadika sunga kwata Kitenta kya Mulami ku Internete mu ma ordinatere na mu matelefone mwanda mu site eetu a jw.org na mu programe a JW Library ki mu ndimi ibungi. Ingi mishindo ya mikanda yatudi baate ku Internete mu ma tablete  na mu ma telefone ayitupa mushindo wa kupeta ma verse abadi bateemune bukidibukidi. Byabya, su tubekala atulongo mwisambo ooso wi mwanka, nsaa yatubadika ma verse na kunangushena ngofu pa anka, kifulo kyetu bwa bya binyibinyi bya mu Bible akyende na kutama.​—Badika Misambo 1:2.

15, 16. (a) Muyiile mukanda wa Yowano 13:34, 35, Yesu mmwitulekyele mwiya kinyi? (b) Kifulo kyetu bw’Efile Mukulu na bwa Bible nkipushene na kifulo kyetu bwa bakwetu naminyi?

¹⁵ Mu bufuku bwa nfudilo a muwa wa Yesu pano pa nsenga, balungwile balongi baye’shi: “Nenupa uno mwiya upya: efuleneeyi kifulo. Bu byandji mwinufule, anwe namu nwi na kya kwifuleena. Abakatundula’shi nwi balondji bande anka ku kifulo kyanwifuleena.”​—Yowano 13:34, 35.

¹⁶ Kufula bakwetu nkwipushene na kufula Yehowa. Su ta twi bafule Efile Mukulu, ta twi balombene kufula bakwetu nya. Na dingi su tatwi bafule bakweetu, ta twi balombene kufula Efile Mukulu. Yowano mutumibwa bafundile’shi: “Su muntu amba’shi: Ne mufule Efile Mukulu aku mmushikwe mukwabo nsha-madimi. Mwanda shafulu mukwabo aamono, ta mulombene kufula Efile Mukulu ashi’amono nya.” (1 Yowano 4:20) Kifulo kyetu bwa Yehowa na bwa bakwetu nkipushene dingi na kifulo kyetu bwa Bible. Bwakinyi? Mwanda su twi bafule myanda yatulongo mu Bible, atukekala na muloo wa kukookyela miiya yatupete mwanka ya kufula Efile Mukulu na bakwetu.​—1 Mpyeele 1:22; 1 Yowano 4:21.

17. Mmishindo kinyi yatudi balombene kulesha kifulo?

¹⁷ Badika 1 Beena-Tesalonika 4:9, 10. Mmishindo kinyi yatudi balombene kulesha’shi twi bafule bakwetu be mu kakongye? Mukwetu mulume sunga mukashi taadi mununu mulombene kwikala na lukalo lwa muntu a kumusemuna bwa kumutwala ku bisangilo. Mukwetu mukashi kilele mulombene kwikala na lukalo lwa muntu a kumulumbulwila mbalo ilwile ku nshibo yaye. (Shake 1:27) Bakwetu babofule, be na twinyongoshi, sunga be na ingi myanda be na lukalo lwa’shi twibapasukile, twibakankamikye, na kwibasamba. (Nkindji 12:25; Beena-Kolose 4:11) Atulesha’shi twi bafule “bakwetu mu lukumiino” mu bishima na mu bikitshino byetu.​—Beena-Ngalatea 6:10.

18. Nkinyi kilombene kwitukwasha bwa kupudisha tu bilumbu atwiboo munkatshi mwetu na bakwetu?

¹⁸ Bible amba’shi: mu “mafuku a ku nfudiilo” kwa uno ndumbulwilo ebubi, bantu bebungi abakekala befule’bo banabene na be na lwabi. (2 Timote 3:1, 2) Atwe bena Kidishitu, abitungu twikitshishe ngofu bwa kunyiisha kutamisha kifulo kyetu bwa Yehowa, bw’Eyi dyaye, na bwa bakwetu. Bu byatudi bantu bakutwe kupwidika, ingi nsaa twi kwikala na tu bilumbu pankatshi petu na bakwetu. Anka bu byatudi befulene, atukekala na ngobesha ya kupudisha tu bilumbu tooso bukidibukidi mu kalolo. (Beena-Efeso 4:32; Beena-Kolose 3:14) Byabya, tatutadilanga kifulo kyetu kyataala! Anka, tutungunukyeyi na kwikala na kifulo kibukopo bwa Yehowa, bw’Eyi dyaye, na bwa bakwetu.